Daniel 7 - Chayahuita (Shahui)

Catapini maꞌsharoꞌsa pochin nininsoꞌ

¹ Pirsasaro copirno Papironiaquë nani aꞌna piꞌira huaꞌanëntarin. Naporoꞌ Nanirisoꞌ, aꞌna tashi huëꞌërinquë huaꞌnarin. Capayatahuaton noya noya nininsopita huaꞌnarinsoꞌ, ninshitërin.

² Ninshitohuachina, iso pochin acorin: “Huëꞌëhuëquë panca marë niꞌnahuë. Catapini ihuanoꞌsa yaꞌhuërinsopitari pihuihuachina, marëso panca coꞌsacaitërin.

³ Aꞌnanaya niꞌpirahuëꞌ, catapini panca maꞌsharoꞌsa nisha nisha yaꞌnopisoꞌ, marë quëran pipirapi. Inapitasoꞌ, co napopináchin niꞌtopihuëꞌ. Nisha nisha niꞌtopi.

⁴ Yaꞌnatiirinsosoꞌ, paꞌpiniꞌ pochin niꞌtaponahuëꞌ, panca onian pochin anpiantëhuanin. Ina nicasoco chachin anpiantënpita oshitëtahuatonaꞌ, piyapi pochin ahuanipi. Inapotohuachinara, piyapi pochachin cancantërin.

⁵ Ina piquëran niantarinsosoꞌ, tocani pochin yaꞌnorin. Inasoꞌ huanihuachina, aꞌnatëran inapamiachin huanirin niꞌton, aꞌnatëranso tahuanin. Cara maꞌsha nininpitëꞌ, naquërin niꞌnahuë. Naporahuaton: ‘¡Paaton onponta nosha caꞌquëꞌ!’ itopi natanahuë.

⁶ Ina piquëran niantarinsontaꞌ, paꞌpini pochin yaꞌnorin niꞌnahuë. Inasoꞌ, catapini anpiantëhuanin. Motënpitanta catapini yaꞌhuëtërin. Naporahuaton, chiníquën nanan quëtopi huaꞌanëntacaso marëꞌ niꞌnahuë.

⁷ Piquëran nininsosoꞌ, paꞌpi tëꞌhuatoro yaꞌnorin niꞌnahuë. Naporahuaton paꞌpi chiníquën. Panca natëroꞌsa huaꞌnamia quëran yaꞌhuëtërin. Nani maꞌsha quënaninsopita pëꞌyaraꞌpiarin. Oshitë oshitëtëraꞌpiarin. Pëꞌsotërinsopitanta toꞌpi toꞌpitëraꞌpiarin. Inasoꞌ, co aꞌnapita maꞌsharoꞌsa huëꞌëhuëquë niꞌnahuëso pochin yaꞌnorinhuëꞌ. Shonca pomonënpita motënquë yaꞌhuëtërin.

⁸ Ina maꞌsha pomonënpita nicasoco chachin, inapita huáncana quëran aꞌnara pomonaꞌhuain pipitaantarin. Ina pichopitacaso marëꞌ cara pomonënpita opashotopi. Inaso pomonaꞌhuaya, piyapi pochin yaꞌpirahuanin. Nonpachinantaꞌ, paꞌpi nocantërin niꞌnahuë.

Yosë coisë pochin nisarinsoꞌ

⁹ Ina quëran niantahuatora, huaꞌanëntacaiso shiraroꞌsa acorapi. Inaquë aꞌnara Ansiano, másho pochin yaꞌnorinsoꞌ huënsërin. Aꞌmorinsosoꞌ, ocai pochin huiríchin. Ainëontaꞌ, huiri huaita noyá pëꞌsapinan pochin yaꞌnorin. Huaꞌanëntërinso shiranën, ina tahuinanënpita, inapitanta panca pën nënë nënëtárinso pochin yaꞌnorin.

¹⁰ Ina notënan quëraontaꞌ, pancaiꞌ pochin pipirarin. Iꞌsha niponahuëꞌ, pën pochin yaꞌnorin. Notohuaroꞌ huaranca anquëniroꞌsari chinotopi. Notohuaroꞌ michon piyapiroꞌsantaꞌ, ina notënanquë huaniápopi. Coisëroꞌsa caniaritapi huachi piyapiꞌsa natanacaisoꞌ. Quiricaroꞌsanta oniriraꞌpiapi.

¹¹ Pomonaꞌhuaya pipihuachina, nocantaton noninsoꞌ natanárahuë. Ina nicasoco chachin maꞌsha shonca pomon yaꞌhuëtërinso tëparahuatonaꞌ, yáquiraꞌpiapi. Inapotahuatona huiquitacaso marëꞌ pënquë tëꞌyatopi.

¹² Aꞌnapita maꞌsharoꞌsa pochin nipisopitantaꞌ, huaꞌanëntopiso osërëtëraꞌpiapi. Napoaponahuëꞌ, co naporo chachin tëpapihuëꞌ. Tahuërinëna naniquë huarëꞌ, inapotaponaꞌ.

¹³ Huëꞌëhuëquë inapita nicasoco, aꞌnanaya, aꞌnara quëmapi chitoro huáncana oꞌmararin. Oꞌmarahuaton Ansiano huënsëarinso yaꞌcariꞌ, paꞌnin. Ina quëran ayaꞌcaritopi huachi.

¹⁴ Inapotohuachinara, yaꞌipi noya noya huaꞌanëntacaso marëꞌ Ansianori chini chiníquën nanan quëtërin. Inapotohuachina, yaꞌipi nacionoꞌsaquë yaꞌhuëpisopitari, nisha nisha nananquë nonpisopitari ina chinotapi. Chiníquën nanantërinsoꞌ, co onporonta nishataponhuëꞌ. Huaꞌanëntërinsontaꞌ, co onporo taꞌhuantaponhuëꞌ.

^15-17 Yaꞌipi inapita niꞌsahuato, paꞌpi paꞌyanahuë. Co napion ancantato, aꞌnara inaquë huaniárinsoꞌ, paaparahuë: ‘Yaꞌipi niꞌnahuësopita ¿maꞌta tapon naporin? Shaꞌhuitoco canta nitochi topirahuë,’ itërahuë. Napotohuatora: ‘Catapini maꞌsharoꞌsa pochin niꞌnansopitasoꞌ, catapini copirnoroꞌsa tapon naporin. Inapitasoꞌ huaꞌanëntohuachinaꞌ, yaꞌipiroꞌpaꞌ huaꞌanëntaponaꞌ.

¹⁸ Inapita piquëransoꞌ, Yosë chini chiníquën nanantërinsoꞌ imapisopitari, huaꞌanëntapona huachi. Inapita huaꞌanëntohuachinaꞌ, co huachi onporonta aꞌnapitari huaꞌanëntopiso matarinhuëꞌ,’ itërinco.

^19-22 Napotohuachincora, nataantarahuë: ‘Piquëran maꞌsha pipirinsosoꞌ, aꞌnapita quëran nisha yaꞌnorin. Paꞌpi tëꞌhuatoro niꞌtërin. Natëquënpita huaꞌnamia quëran yaꞌhuëtërin. Toꞌtëratënpitantaꞌ, shaꞌpi huaꞌna quëran yaꞌhuëtërin. Yaꞌipi quënaninsoꞌ pëꞌyaraꞌpiarin. Oshitë oshitëtëraꞌpiarin. Pëꞌsotërinsopitantaꞌ, toꞌpi toꞌpitëraꞌpiarin. Shonca pomonënpita yaꞌhuëtërin. Aꞌna pomonaꞌhuanta pipitaantarahuaton, yaꞌpirahuanin. Ina nonpachina, paꞌpi nocantërin. Naporahuaton ina pomonaꞌhuasoꞌ, aꞌnapita pomonoꞌsa quëran panca panca pochin yaꞌnorin. Ina pichopitacaso marëꞌ cara pomonoꞌsa anotopi. Ina pomonaꞌhuasoꞌ, Yosë imapisopitantaꞌ, ahuëarin. Inapotaton minsëarin. Napoin quëran, Ansiano, masho pochin yaꞌnorinso huëꞌnin. Huëꞌpachina, Yosë imapisopita noꞌtëquën catahuarin. Nani huachi tahuëri nanirin Yosë piyapinënpitari yaꞌipiroꞌpaꞌ huaꞌanëntacaso niꞌton, naporin. Yaꞌipi inapita naporinso yanitotërahuë,’ itërahuë.

²³ Napotohuatora: ‘Piquëran maꞌsha pipirinsosoꞌ, isoroꞌpaquë huaꞌanëntacaisoꞌ, tapon naporin antaꞌ. Cara yaꞌhuërinso piquëran inanta yaꞌhuëapon. Inasoꞌ, co aꞌnapita pochin nisarinhuëꞌ. Yaꞌipi quënaninsoꞌ pëꞌyaraꞌpiapon. Oshitë oshitëtëraꞌpiapon. Toꞌpi toꞌpitëraꞌpiapon. Napoarin.

²⁴ Shonca pomonënpitasoꞌ, shonca copirnoroꞌsa ina huaꞌanëntërinquë huaꞌanëntaponaꞌ, tapon naporin. Ina piquëran aꞌna yaꞌhuërëꞌ copirno yaꞌcoantapon. Inasoꞌ yaꞌconpachin, co aꞌnapita copirnoroꞌsa pochin nisarinhuëꞌ. Shonca copirno quëran cara copirno minsëapon.

²⁵ Yosëso chini chiníquën nanantopirinhuëꞌ, noꞌhuipon. Yosë piyapinënpitantaꞌ, shitiquiapon. Yosë pënëntërinsopita anishatacaso camaitapon. Yosë chinotatona niyontonacaiso tahuëriꞌsantaꞌ, inapotapon. Yosë piyapinënpita quëran huarëꞌ, cara piꞌipi miria nohuantërinsoꞌ nitapon.

^26-27 Napopirinhuëꞌ, coisëroꞌsaso piyapiroꞌsa natanapi. Ina copirno ocoirahuatonaꞌ, ataꞌhuantapi huachi. Inapotahuatona Yosë piyapinënpita yaꞌhuërëꞌ, isoroꞌpaꞌ huaꞌanëntacaiso marëꞌ quëtaponaꞌ. Inapitasoꞌ huaꞌanëntohuachinaꞌ, noya noya nisapi huachi. Huaꞌanëntopiso yaꞌhuëmiatarin. Nisha nisha piyapiroꞌsa isoroꞌpaquë yaꞌhuëpisopita piyapitaponaꞌ. Camaihuachina natëponaꞌ,’ itërinco.

²⁸ Isëquë huarëꞌ shaꞌhuitëranquëmasoꞌ nanirin. Caso ina yonquiato co napion cancantërahuë. Naporahuato caniaꞌpi ninatanahuë. Napoaporahuëꞌ, co inso tëranta huaꞌnarahuëso shaꞌhuitërahuëꞌ.”