Daniel 6 - Chayahuita (Shahui)

Naniri paꞌpini quëran chaꞌërinsoꞌ

¹ Yaꞌipi huaꞌanëntërinquë camaitacaiso marëꞌ Tario copirnosoꞌ, pasa cato shonca chirinchiroꞌsa acorin.

² Ama inapitari piꞌpian tëranta ihuacaiso marëhuëꞌ, cato huaꞌanoꞌsa acorahuaton. Nanirinta ina marëꞌ acorin.

³ Inaso napoaponahuëꞌ, noya noya nitotaton aꞌnapita huaꞌanoꞌsaꞌ, chirinchiroꞌsaꞌ, inapita yaꞌcotërin. Ina nicaton copirnosoꞌ, yaꞌipi huaꞌanëntërinquë camaitacaso marëꞌ ina yaacorin.

⁴ Huaꞌanoꞌsaꞌ, chirinchiroꞌsaꞌ, inapitariso napoaponahuëꞌ, co quëꞌyapihuëꞌ. Inapoatona shaꞌhuirapicaiso marëꞌ maquë tëranta tëhuërinsoꞌ yonípi. Naniriso noyasáchin nisahuaton, co piꞌpian tëranta ihuatërinhuëꞌ. Napoaton co nanitopihuëꞌ shaꞌhuirapicaisoꞌ.

⁵ Napoaponahuëꞌ, onpopionta yaminsëatonaꞌ: “Coꞌchi maquë tëranta shaꞌhuirapichináchinhuëꞌ niconin paya. Yosënën chinotërin quëran tëhuënchinsoꞌ, canaitërihuahuëꞌ,” topi.

⁶ Ninapotatonaꞌ, huaꞌanoꞌsaꞌ, chirinchiroꞌsaꞌ, inapitari copirno nonpintacaiso marëꞌ paahuapi. Cantonahuatona noyasha nontopi: —¡Nanpimiataton sinioro copirno huaꞌanëntocoi!

^7-8 Yaꞌipi noꞌpanënpoaquë huaꞌanoꞌsa yaꞌconaisoꞌ, aꞌnara nanan quëma camaitacaso marëꞌ yonquirai. Cara shonca tahuëri marëꞌ quëmasáchin sinioro copirno piyapiroꞌsa maꞌsha nohuantopisoꞌ, natainën. Co aꞌna piyapi natanacaiso yaꞌhuërinhuëꞌ. Co yosënëna tëranta natanacaiso yaꞌhuërinhuëꞌ. Insosona co natëtohuachinhuëꞌ, paꞌpiniroꞌsa yaꞌhuërinquë tëꞌyatacaiso yaꞌhuërin. Ina inachachin nicacaiso marëꞌ quëma sinioro copirno quirica ninshitëraiquë, nininën acorahuaton huiꞌshaquëꞌ. Inapotohuatan, co huachi incari tëranta anishataponhuëꞌ. Mitiaroꞌsaꞌ, pirsiaroꞌsaꞌ, inapita ina pochin camaitohuachinara, co incari tëranta nanitërinhuë tapicasoꞌ, itopi.

⁹ Ina natanahuaton, Tario copirnoso natëtërin. Quirica ninshitopiquë nininën acorahuaton, huiꞌsharin.

¹⁰ Camaitopiso Naniri nitotaponahuëꞌ, co natëtërinhuëꞌ. Pëinënquë paꞌsahuaton, huëꞌërinso patoanaquë yaꞌconin. Huintananënpita Quirosarin parti notëtopisoꞌ iꞌsohuatahuaton, isonin. Isonahuaton Yosë nontërin, chinotërin, naporin. Inachintërin nichinapon chachin nani tahuëri cararo naporin.

¹¹ Ina nicatonaꞌ, huaꞌanoꞌsaꞌ, chirinchiroꞌsaꞌ, inapitaso Naniri pëinënquë napopináchin yaꞌconpi. Yaꞌconpachinara, Yosë nontaton chinotárin quënanconpi.

¹² Ina quëran aꞌnaroáchin copirno paaparahuatonaꞌ: —Quëmasoꞌ sinioro copirno cara shonca tahuëri marëꞌ yaꞌipi piyapinënpita camairan: “Maꞌsha nohuantohuatamaꞌ, casáchin natanco. Co aꞌna piyapi natanacaiso yaꞌhuërinhuëꞌ. Co yosëroꞌsa tëranta natanacaiso yaꞌhuërinhuëꞌ. Insosona co natëtohuachinhuëꞌ, paꞌpiniroꞌsa yaꞌhuërinquë tëꞌyatacaiso yaꞌhuërin,” ¿tënan camaitapon pora? —Naporin mini. Naporahuësoꞌ nani huiꞌsharahuë niꞌton, co incari tëranta nanitërinhuë tapicasoꞌ. Mitiaroꞌsaꞌ, pirsiaroꞌsaꞌ, inapita camaitërinso niꞌton, co tapicaso yaꞌhuërinhuëꞌ, tënin copirno.

¹³ Napotohuachina, huaꞌanoꞌsaso taantapi: —Nanirisoꞌ aꞌnapitarë chachin Cotia parti quëran quëpirinahuëꞌ, co natërinquënhuëꞌ. Quirica ninshitëransontaꞌ, co tëꞌhuatërinhuëꞌ. Inasoꞌ, cararo nani tahuëri Yosë nontaton chinotërin. Quiyari chachin niꞌnai, itopi.

^14-15 Ina natanaton, copirnoso paꞌpi sëtërin: “Onpotahuato tëranta Naniri nichaꞌëcaꞌhuaso yaꞌhuërin,” tënin yonquinënquë. Inapoaton iꞌhuaraya huarëꞌ chiníquën sacatopirinhuëꞌ, huaꞌanoꞌsaso niyontoantarahuatonaꞌ, copirno nontaantapi: —Naniri chiminacaso yaꞌhuërinsoꞌ, nani sinioro copirno nitotëran. Mitia, Pirsia, inapita copirnoroꞌsasoꞌ, maꞌsona nicacaiso huiꞌsharahuatona camaitohuachinara, co incari tëranta tapicaso nanitërinhuëꞌ, itopi.

¹⁶ Napotohuachinara, camaitërin: “Naniri quëcatomaꞌ, paꞌpiniꞌ yaꞌhuërinquë tëꞌyatocoꞌ,” tënin. Coꞌhuara tëꞌyachátërasoihuëꞌ: —Quëmaso Naniri, Sinioroíchin cancantaton natëran. Ina nichaꞌëinquën, itërin.

¹⁷ Paꞌpiniꞌ yaꞌhuërinquë Naniri tëꞌyatohuachinara, yaꞌcoananën panca naꞌpi piꞌnapirahuatona paꞌcopitopi. Ina naꞌpiquë copirnosoꞌ, sichonën quëran sichotërin. Chiníquën nanantopisopita huaꞌanoꞌsantaꞌ, ina pochachin sichotopi antaꞌ. “Copirno camaitërinso chachin Nanirinta nitopi,” taꞌcaiso marëꞌ sichotëraꞌpiapi.

¹⁸ Ina quëran copirnosoꞌ, huaꞌanëntërinso pëiquë paꞌnin. Co coshataponahuëꞌ, huëꞌërinquë quëhuënin. Co piꞌpian tëranta capa cancantacaso yonquirinhuëꞌ. Naporahuaton yaꞌipi tashi co manta huëꞌërinhuëꞌ.

¹⁹ Ipora tahuëriso chachin huënsërahuaton, paꞌpiniroꞌsa yaꞌhuërinquë taꞌarëꞌnachin paꞌnin.

²⁰ Nani yaꞌcaritohuachina, co napion ancantaton: —¡Naniri. Quëmaso Yosëíchin cancantaton natëran! Inasoꞌ nanpiárin nichinapon chachin, ¿nichaꞌërinquën paꞌpiniroꞌsa quëran to? itërin.

^21-22 ¡Nichaꞌërinco mini sinioro copirno! Quëmanta nanpimiataton huaꞌanëntocoi. Co manta tëhuëtëranquënsohuëꞌ Yosë nitotaton, paꞌpiniroꞌsa sëꞌcopianantacaso marëꞌ anquëninën chachin aꞌpaimarin. Inapotohuachina, co manta onpotërinacohuëꞌ, itërin.

²³ Ina natanahuaton, copirnoso capa cancantërin. Ina quëran aꞌnaroáchin Naniri ocoicaisoꞌ camaitërin. Nani ocoihuachinara niꞌpirinahuëꞌ, co manta paꞌpiniroꞌsari onpotërinhuëꞌ. Inasoꞌ Yosë natërin niꞌton, noya pipirin.

²⁴ Ina quëran copirnosoꞌ, camaitërin: “¡Naniri shaꞌhuirapipisopita huaꞌanoꞌsaꞌ, chirinchiroꞌsaꞌ, saꞌinaꞌ, huiꞌninaꞌ, inapita macoꞌ! ¡Nani mapatamaꞌ, paꞌpiniroꞌsa yaꞌhuërinquë tëꞌyatocoꞌ!” tënin. Napotohuachina, inapotopi. Inapitasoꞌ ipora tëꞌyatasoi chachin, paꞌpiniroꞌsari macatona paꞌsa paꞌsatopi.

²⁵ Ina piquëran Tario copirnosoꞌ, quirica ninshitërin: “Ca Tario copirnoco ninshitaranquëmaꞌ. Canpitaso nisha nisha nacionquë yaꞌhuëramaꞌ. Nisha nisha nananquë nonamaꞌ. Naporahuaton nisha nisha piyapinquëmaꞌ. Paꞌpi nohuantërahuë yaꞌipinquëma noya yaꞌhuëatomaꞌ, sano yaꞌhuëcamasoꞌ.

²⁶ Yaꞌipi huaꞌanëntërahuëso noꞌpaquë, Naniriri chinotërinso Yosë tëꞌhuatatomaꞌ, nóya niꞌcoꞌ. Inasáchin Yosë yaꞌhuëmiatërinsoꞌ. Huaꞌanëntërinsoꞌ, co onporonta taꞌhuantaponhuëꞌ. Chiníquën nanantërinsontaꞌ, co nitiquiaponhuëꞌ.

²⁷ Inaíchin nichaꞌëtonaꞌpisoꞌ. Isoroꞌpaquë, piꞌiroꞌtëquë, inaquëpita co nanitapacasohuëꞌ nininsopita ninin. Naniri paꞌpiniquë tëꞌyatopiraihuëꞌ, inari nichaꞌërin niꞌton, co manta onpotopihuëꞌ,” tënin ninshitaton.

²⁸ Ina pochin Nanirisoꞌ, Tario copirno catahuarin. Pirsia copirno Siro itopisontaꞌ, catahuarin. Inapitarintaꞌ, chiníquën nanan camaitacaso marëꞌ quëtopi niꞌton, naporin.