Daniel 5 - Chayahuita (Shahui)

Pairaquë ninshitërinsoꞌ

¹ Huaꞌqui quëran, Pirisasaro yaꞌhuërëꞌ, Papironia copirno yaꞌcoantarin. Aꞌna tahuëri inasoꞌ, panca pita ninin. Yaꞌipi huaꞌanëntërinso noꞌparoꞌsa quëran, huaranca huaꞌanoꞌsa amatërin. Inapitarë chachin coshatahuatonaꞌ, notohuaroꞌ huino oꞌopi.

^2-3 Noꞌpiton copirnosoꞌ, oro, prata, inapita quëran Yosë marëꞌ minëroꞌsa nipisoꞌ, quëshicaiso camaitërin. Ina minëroꞌsasoꞌ, Quirosarin quëran Napocotonori iráca quëntarin. Quëshihuachinara, inapitaquë huino oꞌorin. Saꞌinpita, cosonanënpita, huaꞌanoꞌsa amatërinsoꞌ, yaꞌipi inapitanta inaquë oꞌopi.

⁴ Inaquë huino oꞌosahuatonaꞌ, mamanshinënapita oro quëran nipisoꞌ, mosharápi. Prata, shaꞌpi huaꞌna, huaꞌnamia, nara, naꞌpi, inapita quëraonta nipisoꞌ, mosharápi.

^5-6 Naporápirinahuëꞌ, aꞌnanaya piyapi imira pochin nininsoꞌ yaꞌnorahuaton, huiríchin paira nininquë ninshitarin. Sëꞌparahuan nanparini aꞌpintërin niꞌton, aꞌninquëchin copirnori quënanin. Ina nicaton inasoꞌ, paꞌpi paꞌyanin. Paꞌyanaton ropa ropátarin.

⁷ Ina quëran ninotonaꞌpiroꞌsaꞌ, quirica nitotoroꞌsaꞌ, tayora nitotoroꞌsaꞌ, inapita quëcacaiso marëꞌ chiníquën camaitërin. Huëꞌpachinara: —Inso tëranta pasoꞌ ninshitopisoꞌ nontaton, maꞌsona tapon naporinso shaꞌhuitohuachinco, copirnoroꞌsa aꞌmorinsoanpi aaꞌmotarahuë. Oro quëran catina nipisoꞌ apëꞌpëconotarahuë. Naporahuaton ca pochin nanantacaso marëꞌ aꞌna huaꞌaniáchini yaꞌcopiarin, tënin.

⁸ Napopirinhuëꞌ, co aꞌnayari tëranta maꞌsona tapon ninshitërinsoꞌ shaꞌhuitacasoꞌ nanitërinhuëꞌ.

⁹ Napohuachina, copirnoso naꞌcon naꞌcon paꞌyanaton shaꞌpíchin niꞌtërin. Aꞌnapita huaꞌanoꞌsantaꞌ, onporë pochin cancantopi.

¹⁰ Copirno, huaꞌanoꞌsaꞌ, inapita paꞌyanënaquë noncaropisoꞌ, copirno aꞌshionta natanin. Ina natanaton, coshatopiso pëiquë yaꞌconconin. Huaꞌhuin paaparahuaton: —¡Quëmaso sinioro copirno chiníquën nanantëran! ¡Huaꞌqui tahuëri nicaton, huaꞌanëntocoi! Ama naꞌcon naꞌcon paꞌyanaton, shaꞌpíchin niꞌtëquësohuëꞌ.

¹¹ Isëquë aꞌnara quëmapi yaꞌhuërin. Inasoꞌ, noya yosëroꞌsa ispiritonëni onpo nanpicasona anitotërin. Paꞌpi yonquínahuan niꞌton, tata Napocotonocori noyá nohuitërin. Aꞌnapita quirica nitotoroꞌsa quëran yonqui yonquínahuan niꞌton, inapita huaꞌanën nicacaso marëꞌ acorin.

¹² Nininënsoꞌ Naniri nipirinhuëꞌ, tatacori Piritasasaro itërin. Inasoꞌ quëmapi noya noya cancantërin. Huaꞌnahuatëra maꞌsona tapon naporinsopita nito shaꞌhuirin. Co nitotacasohuëꞌ nananoꞌsantaꞌ, nito shaꞌhuirin. Nanan nisëꞌmorinso pochin nipisopitantaꞌ, anoyatërin. Ina apërátëquëꞌ, maꞌsona tapon pairaquë ninshitopisoꞌ, anitochinquën, itërin.

¹³ Napotohuachina, amatahuaton natanin: —¿Quëma Nanirinquën ti? ¿Quëmantaꞌ, aꞌnapita cotioroꞌsarëꞌquën tataco Cotia parti quëran quëninquën?

¹⁴ Quëma yonquiatënën: “Inasoꞌ, noya yosëroꞌsa ispiritonëni yaꞌcoancantërin. Yonquinën quëraonta yonqui yonquíchararin,” itërinaco.

¹⁵ Pairaquë ninshitopiso nontatona maꞌsona tapon naporinso shaꞌhuitiinacoso marëꞌ, naꞌcon quirica nitotopisopita përarahuë. Huëcaponaraihuëꞌ, nisha nananquë ninshitopi niꞌton, co nitotopihuëꞌ.

¹⁶ Quëmaso napoaponahuëꞌ, sacai nininsopita nito shaꞌhuiransoꞌ natantërahuë. Iso ninshitopisoꞌ nontaton, maꞌsona tapon naporinso shaꞌhuitohuatanco, copirnoroꞌsa aꞌmorinsoanpi aaꞌmotaranquën. Catinanta oro quëran nipisoꞌ, apëꞌpëconotaranquën. Naporahuaton ca pochin nanantacaso marëꞌ aꞌna huaꞌaínchin yaꞌcopiarinquën, itërin.

¹⁷ Napotohuachina: —Yanicanarancosopitasoꞌ, quëmaora chachin maantaquëꞌ. Huaꞌanëntëranso pëiquë sacatohuato, noya niꞌsarinaco. Inapotiinacosontaꞌ, aꞌna piyapi quëtëquëꞌ. Co manta acanaancoso nohuantaporahuëꞌ, pairaquë maꞌsona tapon ninshitopisoꞌ, shaꞌhuitaranquën.

¹⁸ Yosë chini chiníquën nanantërinsoari, iráca tata Napocotono copirno nicacaso marëꞌ acorin. Inari chiníquën nanan quëtërin niꞌton, noya noya huaꞌanëntërin. Ina marëꞌ naní quëran noya nicatona tëꞌhuatopi.

¹⁹ Inapotërin niꞌton, nisha nisha piyapiꞌsari tëꞌhuatatona natëpi. Nisha nisha nacionquë yaꞌhuëaponaraihuëꞌ, nisha nisha nananquë nonaponaraihuëꞌ, natëpi. Insosona nohuantërinsoꞌ, atëpatërin. Insosona nohuantërinsoꞌ, nichaꞌërin. Nohuantërinsopita chini chiníquën nanan camaitacaiso marëꞌ quëtërin. Aꞌnaquënso nipirinhuëꞌ, chiníquën nanantopirinahuëꞌ, ocoihuachina atapanin.

²⁰ Inapoaton, “caso noya noyaco. Co insonta ca pochin yaꞌhuërinhuëꞌ,” tënin. Ina pochin yonquiaton, piyapiꞌsa yaaparisitërin. Napohuachina, Yosëri copirno yaꞌconin quëran ocoirin.

²¹ Co huachi nanitërinhuëꞌ piyapiꞌsa huáncana yaꞌhuëcasoꞌ. Napoaton ocoihuachinara, tanan moraroꞌsarëꞌ yaꞌhuërin. Tororoꞌsa pochin pasto caꞌnin. Poroncayori shipitárin. Naporin. “Yosëso chini chiníquën nanantaton yaꞌipi isoroꞌpaquë nacionoꞌsantaꞌ, huaꞌanëntërin. Ina nohuanton insosona nohuantërinsoꞌ copirno nicacaso marëꞌ acorin,” tëcaquë huarëꞌ noyatërin.

²² Tata naporinso quëmanta sinioro copirno nitotaponahuëꞌ, co cancan yonquiaton sano yonquiranhuëꞌ.

²³ Yosë tëꞌhuataton natëcaso nipirinhuëꞌ, nocanatë pochin ninan. Inapoaton minëroꞌsa ina pëinën quëran quëpiso amatohuatana, quëshirinën. Quëpachinara, inaquë përaransopita huino ichioꞌoran. Naporahuaton mamanshinënpita oro quëran nipisoꞌ, mosharan. Prata, shaꞌpi huaꞌna, huaꞌnamia, nara, naꞌpi, inapita quëran nipisontaꞌ, mosharan. Inapitaso co máquënoꞌsahuë niꞌtonaꞌ, co quënantopihuëꞌ, co natantopihuëꞌ, co manta nitotopihuëꞌ, napopi. Napopirinahuëꞌ, inapitaso chinotëran. Yosëso ananpirinquën. Ina nohuantohuachin maꞌpitaso yonquiranso ninan. Inaso napopirinhuëꞌ, co chinotëranhuëꞌ.

^24-25 Napoaton ninshitacaso marëꞌ imira niꞌnansoꞌ aꞌparin. Ninshitohuachina: mini mini tiquiri parsin tënin.

²⁶ Mini huaꞌanëntëranso tahuëriꞌsa Yosëri pichiton, ocoiarinquën huachi tapon naporin.

²⁷ Tiquiri pëꞌtënanquë pëꞌtënëso pochin Yosë nitohuachinquëna, pahuanan tapon naporin.

²⁸ Parsin huaꞌanëntëransosoꞌ, nipatomataponaꞌ. Mitia piyapiroꞌsaꞌ, Pirsia piyapiroꞌsaꞌ, inapitari huaꞌanëntapona huachi tapon naporin, itërin Naniriri.

²⁹ Napotohuachina copirnosoꞌ, piyapinënpita camairin: “Ca aꞌmorahuësoanpi Naniri aꞌmotahuatomaꞌ, oro quëran catina nipiquë apëꞌpëconotocoꞌ. Naporahuaton ca pochin nanantacaso marëꞌ, aꞌna huaꞌaínchini yaꞌcopiapon. Yaꞌipinquëma ina nitotocoꞌ,” itërin. Copirno napohuachina piyapinënpitasoꞌ, ina inachachin nipi.

³⁰ Napoaponahuëꞌ, naporo tashi chachin Pirisasaro copirno tëpapi.

³¹ Mitia copirno Tario itopisoari yaꞌhuërëtërin. Saota shonca cato piꞌipitahuaso napoarin.