Daniel 4 - Chayahuita (Shahui)

Napocotono copirno huaꞌyantacaso shaꞌhuitërinsoꞌ

¹ Ca Napocotono copirnoco ninshitaranquëmaꞌ. Canpitaso nisha nisha nacionquë yaꞌhuëramaꞌ. Nisha nisha nananquë nonamaꞌ. Naporahuaton nisha nisha piyapinquëmaꞌ. Paꞌpi nohuantërahuë yaꞌipinquëma noya yaꞌhuëatomaꞌ, sano yaꞌhuëcamasoꞌ.

^2-3 Yosë chini chiníquën nanantaton napotërincosoꞌ, canpitanta shaꞌhuichinquëmaꞌ. Ina nitotohuatamaꞌ canpitanta catahuaponquëma niꞌton, shaꞌhuitaranquëmaꞌ: ¡Maꞌpitacha inaso ninin paya! Co piyapinpoa nanitaparëhuasohuëꞌ, inaso ninin. Ina huaꞌanëntërinsosoꞌ, yaꞌhuëmiatapon. Onpo shinpoapita huënton yaꞌhuëpirinhuë tërantaꞌ, ina chiníquën nanantërinsosoꞌ, inachachin nisápon.

^4-5 Caso huaꞌanëntërahuëso pëiquë noya yaꞌhuëato, capa cancantápirahuëꞌ. Aꞌna tashisoꞌ, huaꞌnato paꞌpi paꞌyanahuë. Ina yonquirápato co napion cancantërahuë.

^6-7 Napohuachina, yaꞌipi magiaroꞌsaꞌ, ninotonaꞌpiroꞌsaꞌ, pënotonoꞌsaꞌ, quirica nitotoroꞌsaꞌ, tayora nitotoroꞌsaꞌ, inapita Papironiaquë yaꞌhuëpisoꞌ, amatërahuë. Maꞌsona tapon huaꞌnarahuëso shaꞌhuitiinacoso marëꞌ amatërahuë. Canquihuachinara, huaꞌnarahuësoꞌ shaꞌhuitërahuë. Inahuaso napoaponahuëꞌ, co nanitopihuëꞌ maꞌsona tapon huaꞌnarahuëso shaꞌhuitiinacosoꞌ.

⁸ Piquëran huarëꞌ Nanirinta huëꞌnin. Inasoꞌ, yosënëhuë yonquiato Piritasasaro itërahuë antaꞌ. Inasoꞌ quëmapi noya yosëroꞌsa ispiritonëni, onpoinsona nanpicasoꞌ anitotërin. Ina huëꞌpachina, huaꞌnarahuëso shaꞌhuitërahuë:

⁹ “Piritasasaro. Quëmasoꞌ ninotonaꞌpiroꞌsa huaꞌanquën niꞌton, noya yosëroꞌsa ispiritonën ira aꞌnotërëso pochin nitarinquën. Napoaton yaꞌipi co nitotacasohuëꞌ nininsonta nitotëran. Huëꞌëhuëquë huaꞌnarahuëso shaꞌhuitohuatënquën, maꞌsona tapon naporinso shaꞌhuitoco topirahuë.

¹⁰ Iso pochin huaꞌnarahuë: Isoroꞌpaꞌ huancanachinquë, aꞌnara panca nara niꞌnahuë. Paꞌpi inápa huanirin.

¹¹ Inasoꞌ nara aꞌshinahuaton, aquë aquëtë pancanantërin. Huiꞌnimotën quëran piꞌiroꞌtëquë huarëꞌ nincanin. Yaꞌipi isoroꞌpaꞌ quëran nanitopi quënanacaisoꞌ.

¹² Monoquën noya noyatërin. Nitërinsontaꞌ, paꞌpi notohuaroꞌ. Inariáchin yaꞌipiya cosharo ananitërin. Yaꞌipi maꞌsharoꞌsanta inaanaquë naꞌipi. Sëꞌpainpitaquëntaꞌ, inairaroꞌsa huaꞌhuatopi. Yaꞌipi isoroꞌpaquë yaꞌhuërinso inaquë nanpipi.

^13-14 Ina quëran huëꞌëhuëquë, aꞌnara aꞌpaito anquëni aꞌnanaya niꞌnahuë. Inasoꞌ inápa quëran oꞌmarahuaton: ‘Panca nara nisahuasoꞌ aꞌnërahuatomaꞌ, sëꞌpaquënpita pëꞌshitëcoꞌ. Monoquënpita matahuatomaꞌ, nitërinsonta paꞌsa paꞌsatocoꞌ. Yaꞌipi maꞌsharoꞌsa inaanaquë naꞌipisoꞌ, taꞌainaꞌ. Inairaroꞌsanta sëꞌpainpitaquë yaꞌhuëpisoꞌ, paꞌinaꞌ.

¹⁵ Motën, itën, inapitaso napoaponahuëꞌ, inaquëranchin quëparichin. Huaꞌnamia, shaꞌpi huaꞌna, inaquëranpita catinaroꞌsa nipiquë, catinaquëchinaꞌ. Pacatororoꞌsa huáncana huëshicoꞌ. Poroncayori shipichin. Pëꞌtahuaroꞌsarëꞌ pasto caꞌin.

¹⁶ Yonquinën tapiton, maꞌsha pochin cancanchin. Ina pochin canchisë piꞌipi paꞌin.

¹⁷ Ina pochin aꞌpaito anquëniroꞌsa camaitopi. Yosëso chini chiníquën nanantaton, isoroꞌpaquënta huaꞌanëntërin. Ina yaꞌipiya quëran nitotacaiso marëꞌ napoarin. Ina nohuanton copirnoroꞌsanta huaꞌanëntopi. Insosona nohuantërinsoꞌ copirno nicacaso marëꞌ acorin. Sano sano piyapi nininsoꞌ, aꞌna nacion camaicaso marëꞌ acorin,’ tënin.

¹⁸ Ina pochin huaꞌnarahuë. Iporasoꞌ, quëma maꞌsona tapon naporinso shaꞌhuitoco. Aꞌnapita nani natanpirahuëꞌ, co insonta nanitërinhuëꞌ shaꞌhuitiinacosoꞌ. Quëmaso napoaponahuëꞌ, nanitaran. Noya yosëroꞌsa ispiritonën yaꞌcoancantërinquën niꞌton, shaꞌhuitaponco,” itërahuë.

¹⁹ Shaꞌhuitohuatora, Naniriso paꞌyanin. Paꞌyanaton, huaꞌquimiachin tachianantërin. Napopirinhuëꞌ: “Ama huaꞌnarahuëso marëꞌ paꞌyanquësohuëꞌ. Maꞌsona tapon naporinso marëꞌ tëranta co paꞌyanacaso yaꞌhuërinhuëꞌ,” itërahuë. Napotohuatora: “¡Maꞌhuantacha sinioro copirno nisaran paya! maꞌsona tapon huaꞌnaransoꞌ, inimiconënpita marëꞌ huaꞌnaran naporini, ¡noya noya niitonhuëꞌ!

²⁰ Nara inápa nisahuaton pancanan niꞌnansoꞌ, huiꞌnimotën quëran piꞌiroꞌtëquë nincanin. Yaꞌipi parti quëran nanitopi quënanacaisoꞌ.

²¹ Monoquën noya noyatahuaton, huaꞌhuayátërahuë nitërin. Yaꞌipiya capacaiso marëꞌ nanirin. Inaanaquë maꞌsharoꞌsa naꞌipi. Sëꞌpainpitaquëntaꞌ, inairaroꞌsa huaꞌhuatopi.

²² Ina nara pochinquën quëmasoꞌ sinioro copirno. Quëmanta ina nara aꞌshininso pochin chini chiníquën nanantëran. Chiníquën nanantëransoꞌ, piꞌiroꞌtëquë nincaninso pochin ninin. Naporahuaton yaꞌipi isoroꞌpaquë huaꞌanëntëran.

²³ Ina quëran aꞌnara aꞌpaito anquëni inápa quëran oꞌmarahuaton: ‘Panca nara nininsoꞌ aꞌnërahuatomaꞌ, ataꞌhuantocoꞌ. Napoaponahuëꞌ, motën, itën, inapitasoꞌ, inaquëranchin quëparichin. Huaꞌnamia, shaꞌpi huaꞌna, inaquëranpita catinaroꞌsa nipiquë catinaquëchinaꞌ. Pacatororoꞌsa huáncana huëshiinaꞌ. Poroncayorintaꞌ, shipichin. Maꞌsharoꞌsa pochin pasto canchisë piꞌipi caꞌin,’ tënin.

²⁴ Yosë chini chiníquën nanantaton, onpotatënquënsona anaꞌintiinquënsoꞌ nani shaꞌhuirin.

²⁵ Quëmasoꞌ copirnonquën nipiranhuëꞌ, piyapiroꞌsa yaꞌhuërin quëran ocoiaponën. Maꞌsharoꞌsarëꞌquën yaꞌhuëaran. Toro pochin pasto caꞌsaran. Poroncayontaꞌ, shipitáponquën. Ina pochin sinioro copirno canchisë piꞌipi yaꞌhuapon. ‘Yosëso chini chiníquën nanantaton, yaꞌipi isoroꞌpanta huaꞌanëntërin. Ina nohuanton insosona nohuantërinsoꞌ, copirno nicacaso marëꞌ acorin,’ tëcama huarëꞌ noyataran huachi.

²⁶ Motën, itën, inapita inaquëranchin quëparitacaisosoꞌ, naquëranchin huaꞌanëntamaso tapon naporin. ‘Yosëso yaꞌipi isoroꞌpanta huaꞌanëntërin,’ topatan, naquëranchin huaꞌanëntaantaran.

²⁷ Napoaton carinquën pënëinquën: Noꞌtëquënáchin nicaton, ama huachi aquëtë oshahuaantaquësohuëꞌ. Co noyahuëꞌ ninansopitanta aꞌporahuaton, popriyatopisopita catahuacaso cancantëquëꞌ. Tapona inaporanso marëꞌ noya yayaꞌhuërápiranhuëꞌ,” itërinco.

Copirno huaꞌyantërinsoꞌ

²⁸ Naniriri shaꞌhuitërinso chachin Napocotono ninin.

^29-30 Shaꞌhuitërin quëran huarëꞌ aꞌna piꞌisaꞌ noya yaꞌhuëantarin. Aꞌna tahuëri huaꞌanëntërinso pëi inapa pëꞌsatëquë nanpërin. Inaquë ayanapon pochin: “Niꞌquëꞌ. ¡Ma pancanacha Papironia ninanosoꞌ paya! Cari chiníquën nanantato isëquë huaꞌanëntaꞌhuaso marëꞌ aocoitërahuë. Aꞌna tahuërinta iso ninano nicatonaꞌ, chiníquën nanantërahuëso yonquiapi,” tënin.

³¹ Noninsoꞌ co tiquiátërasohuëꞌ, inápa quëran: “¡Napocotono! Natanquë nanan shaꞌhuichinquën. Ipora quëran huarëꞌ co huachi copirno nisaranhuëꞌ.

³² Piyapiroꞌsa yaꞌhuërin quëran ocoiaponën. Inapotohuachinën, maꞌsharoꞌsapitarëꞌquën yaꞌhuapon. Tororoꞌsa pochin canchisë piꞌipi pasto capon. ‘Yosëso chini chiníquën nanantaton yaꞌipi isoroꞌpaquë nacionoꞌsanta huaꞌanëntërin. Ina nohuanton insosona nohuantërinsoꞌ, copirno nicacaso marëꞌ acorin,’ tëcama huarëꞌ ina pochin nisaran,” itërin natanin.

³³ Naporo chachin napotërinsoꞌ nanirin. Co huachi piyapiroꞌsarëꞌ, yaꞌhuërinhuëꞌ. Tororoꞌsa pochin pasto caꞌsárin. Poroncayori shipitárin. Ainënsoꞌ, onian anporo pochin aꞌshinin. Toꞌtëratënënpitantaꞌ, onian toꞌtëratë pochin aꞌshinin. Naporin.

Napocotono noyataantarinsoꞌ

³⁴ Noyataꞌhuaso tahuëri nanihuachina, ca Napocotonoco inápaquë nëꞌpëtërahuë. Naporo chachin huaꞌyantërahuësoꞌ, noyatërahuë ninatanahuë. Noyatahuato: “Yosparinquën Sinioro,” itërahuë. Inaso yaꞌhuëmiatërin niꞌton, chinotërahuë: “Quëmasoꞌ Sinioro chiníquën nanantëran. Naporansoꞌ, inachachin nisápon. Shihuëipita onpo huënton ocoipirinahuë tërantaꞌ, quëmasoꞌ huaꞌanëntápon.

³⁵ Isoroꞌpaquë yaꞌhuëpisopita quëma marësoꞌ, co máquënoꞌsahuëꞌ. Inápaquë yaꞌhuëpisopita, nohuantëransoráchin nipi. Isoroꞌpaquëntaꞌ, ina pochachin nipi. Chini chiníquën nanantëran niꞌton, co insonta nanitarinhuëꞌ, chinitiinquënsoꞌ. Maꞌsha nipataontaꞌ: ‘¿Onpoatonta ina pochin nisaran?’ co itiinënso yaꞌhuërinhuëꞌ,” itërahuë.

³⁶ Naporo chachin noya yonquiantarahuë. Yaꞌipi huaꞌanëntërahuëso huaꞌanëntaantarahuë. Naporahuaton noya nicatonaco piyapinëhuëpita natëantarinaco. Ayonquirinacosopita, chiníquën nanantopisopita huaꞌanoꞌsa acorahuësoꞌ, inapita huëcapairahuatonaco, yoniantarinaco. Naquëranchin copirno yaꞌcoantarahuato, iráca chiníquën nanantërahuë quëran, chini chiníquën nanantaantarahuë.

³⁷ Iporaso ca Napocotonoco, Yosë inápaquë huaꞌanëntërinso chinotërahuë. Inasáchin noya nicato natërahuë. Inasoꞌ maꞌsha nipachina, noꞌtëquënáchin nisahuaton, noyasáchin ninin. “Caso noya noyaco,” topachina, inari nanitërin atapanacasoꞌ, tënahuë.