Daniel 3 - Chayahuita (Shahui)

Mamanshi moshapisoꞌ

¹ Ina piquëran Napocotono copirnosoꞌ, aꞌnara mamanshi oro quëran anitërin. Inasoꞌ, cara shonca mitro naporopitahuaton, cara mitro pancanatërin. Nani tënihuachinara, Tora itopisoꞌ noya roꞌtëquë acocaiso camaitërin. Ina noya roꞌtësoꞌ, Papironia propinciaquë chachin yaꞌhuërin.

^2-3 Ina piquëran, yaꞌipi chirinchiroꞌsa panca pancana huaꞌanëntopisopita amatërin. Sontaro huaꞌanoꞌsaꞌ, propincia chirinchiroꞌsaꞌ, copirno ayonquinaꞌpiroꞌsaꞌ, coriqui tapanaꞌpiroꞌsaꞌ, coisëroꞌsaꞌ, aꞌnapita huaꞌanoꞌsanta yaꞌipi propinciaroꞌsa quëran, amatërin. Mamanshi anitërinso moshacaiso marëꞌ yaacoaton, amatërin. Napohuachina, yaꞌipi ina huaꞌanoꞌsa inaquë niyontonpi.

⁴ Aꞌna huaꞌani caniaritacaso marëꞌ chiníquën camaitërin: “Yaꞌipinquëma copirno camaitërinso noya natancoꞌ. Naporin: ‘Canpitaso nisha nisha piyapinquëmaꞌ. Nisha nisha nacionquë yaꞌhuëramaꞌ. Nisha nisha nananquë nonamaꞌ.

^5-6 Apira nisha nisha piꞌnirapi: Tronpitaroꞌsaꞌ, nisha nisha pirinanoꞌsaꞌ, inapita pihuirapi. Nisha nisha arparoꞌsaꞌ, tonton, tanporo, inapitanta piꞌnirapi. Yaꞌipi nisha nisha piꞌnicaiso nipisopita piꞌnirahuachinaꞌ, yaꞌipinquëma isonaramaꞌ. Isonama quëran noꞌpaquë huarëꞌ monshorahuatoma mamanshi anitërahuësoꞌ, moshaaramaꞌ. Inso tëranta co yamoshahuachinhuëꞌ, panca orno huënaratapaquë tëꞌyatacaiso marëꞌ camaitarahuë,’ tënin,” itërin.

⁷ Napoaton nisha nisha piꞌnicaiso nipisopita piꞌnirahuachinara, yaꞌipiya isonpi. Isonpi quëran noꞌpaquë huarëꞌ monshorahuatonaꞌ, oro quëran mamanshi nipisoꞌ moshapi.

⁸ Aꞌnaquën papironiaroꞌsasoꞌ, cotioroꞌsa co quëꞌyapihuëꞌ. Napoaton copirnoquë shaꞌhuirapipi. Paaparahuatonaꞌ:

⁹ —¡Quëmasoꞌ copirnonëhuëinquën! ¡Nanpimiataton huaꞌanëntocoi! ¡Ama onporo tëranta nanianchinënquënsohuëꞌ!

¹⁰ Quëmasoꞌ yaꞌipicoi camairancoi oro quëran mamanshi ninansoꞌ moshacaꞌhuaisoꞌ. Nisha nisha piꞌnicaiso nipisopita piꞌnirahuachinara, isonahuatoi noꞌpaquë huarëꞌ monshorai quëran inapoaꞌhuaiso camaitëran.

¹¹ Insosona co natëhuachinquënhuëꞌ, naporo chachin panca orno huënaratapaquë tëꞌyatacaisontaꞌ, camaitëran.

¹² Napopiranhuëꞌ, aꞌnaquën cotioroꞌsasoꞌ, co piꞌpian tëranta tëꞌhuatërinënquënhuëꞌ. Inapitasoꞌ, quëmari chachin Papironia propinciaquë huaꞌanoꞌsa nicacaiso marëꞌ acoran. Inahuaso napoaponahuëꞌ, co mamanshinënpita moshapihuëꞌ, mamanshi oro quëran anitëransontaꞌ, co moshapihuëꞌ. Inapitasoꞌ, Satraco, Misaco, Api-nico, inapita, itopi.

^13-14 Copirnosoꞌ paꞌpi noꞌhuitahuaton, inapita quëcacaisoꞌ camaitërin. Quëpachinara: —¿Tëhuënchachin canpitaso yosënëhuëpita, co yamosharamahuëꞌ ti? Mamanshi oro quëran anitërahuësontaꞌ, co yamosharamahuëꞌ, topi.

¹⁵ Iporaso nipirinhuëꞌ, moshacamaso yaꞌhuërin. Mosica piꞌnirahuachinaꞌ, mamanshi anitërahuësoꞌ isonama quëran noꞌpaquë huarëꞌ monshorahuatomaꞌ, moshaaramaꞌ. Coꞌsoꞌ inapohuatamahuëꞌ, naporo chachin orno huënaratapaquë tëꞌyatarinënquëmaꞌ. Inapotohuachinquëmaꞌ, ¡co inso yosë tërantaꞌ, nichaꞌëinquëmaso nanitaponhuëꞌ! itërin.

^16-18 Napotohuachina, inahuaso taponaꞌ: —Co ina naꞌcon yonquiraihuëꞌ sinioro copirno. Yosë chinotëraisoꞌ nohuantohuachin, nanitërin pën quëran nichaꞌëincoisoꞌ. Quëmá quëraonta nanitërin nichaꞌëincoisoꞌ. Napoaponahuëꞌ co yanichaꞌëhuachincointaꞌ, noyatapon. Co yosëroꞌsa mosharanso moshapoihuëꞌ. Mamanshi oro quëran anitëransontaꞌ, co isonahuatoi moshapoihuëꞌ, itopi.

Pën quëran chaꞌëpisoꞌ

¹⁹ Ina natanaton, copirnoso paꞌpi noꞌhuitërin. Naporahuaton: “¡Naꞌcon naꞌcon orno huënaratacaso marëꞌ ihuë tëꞌyanantocoꞌ!” tënin camaitaton. Napohuachina, inapotopi.

²⁰ Ina quëran sontaronënpita chini chiníquënoꞌsa yaꞌhuëtërinsoꞌ, cara yaꞌpi chachin tonporahuatona pënquë tëꞌyatacaisoꞌ camairin.

²¹ Cara yaꞌpisoꞌ, noya aꞌmopiquëranchin tonpopi. Inapotahuatona pënquë tëꞌyatopi.

^22-23 “Manóton tëꞌyatocoꞌ,” tëninso marëꞌ inapotopirinahuëꞌ, inahuasaꞌ pëni tëparin. Naꞌcon naꞌcon ahuënaratopi niꞌton, naporin. Cara yaꞌpiso orno acopo tonpopinan anotopi.

²⁴ Naporoꞌ copirnosoꞌ, aꞌnaroáchin huanirin. Paꞌpi paꞌyanaton ayonquirinsopita huaꞌanoꞌsa natanin: —¿Cara yaꞌpiraꞌ tonpopinan pënquë tëꞌyatërama pora? itërin. —Naporin mini, itopi inahuarintaꞌ.

²⁵ —Napoaponahuëꞌ, caso catapini yaꞌpi pënquë co tonpopinanhuëꞌ, ¡noya paꞌsapi niꞌnahuë! Aꞌnaso nipirinhuëꞌ, Yosë anquëninën pochin niꞌnahuë, tënin.

²⁶ Ina quëran orno yaꞌcarirahuaton: —Satraco, Api-nico, Misaco. Canpitasoꞌ, Yosë chini chiníquën nanantërinsoꞌ piyapinënpitanquëmaꞌ. ¡Pipirahuatoma huëntaco huachi! itërin chiníquën nontaton. Napotohuachina, cara chachin pën quëran pipipi.

²⁷ Napohuachinara, yaꞌipi huaꞌanoꞌsa inaquë nisapisopitari yamotiipi. Co manta huëyapisohuëꞌ niꞌpi. Co ainëna tëranta huësorochatërarinhuëꞌ. Aꞌmopisontaꞌ, co manta onporinhuëꞌ. Co piꞌpian tëranta conai huëꞌëropiri maninhuëꞌ.

²⁸ Naporoꞌ copirnosoꞌ: “¡Ma noyacha Yosëso paya! Inasoꞌ, Satraco, Misaco, Api-nico, inapitari chinotërin. Inapita nichaꞌëcaso marëꞌ anquëninën aꞌpaimarin. Inapitasoꞌ Yosëíchin cancantopi niꞌton, co nohuantopihuëꞌ aꞌna yosë isonahuatona moshacaisoꞌ. Napoaton co chimirin tëranta tëꞌhuatatonaraihuëꞌ, ¡ca copirnoco nisapirahuëꞌ, co natërinacohuëꞌ!

²⁹ Napoaton inso tëranta isopita huiꞌnapiꞌsa Yosë chinotopiso pinopachin, tëpaꞌinaꞌ. Inapotahuatona yaquiꞌinaꞌ. Pëinëonta amoro tëꞌyatacaiso marëꞌ yaꞌhuëapon. Intohuasona yaꞌhuëpirinahuë tërantaꞌ, inapochinaꞌ. Ma nananquësona nonpachinantaꞌ, inapotacaiso yaꞌhuërin. Co aꞌna yosë ina pochin nichaꞌëcaso nanitërinhuëꞌ niꞌton, inapochinaꞌ,” tënin.

³⁰ Ina quëran copirnosoꞌ, cara chachin Papironiaquë camaitacaiso marëꞌ chini chiníquën nanan quëtërin.