Daniel 2 - Chayahuita (Shahui)

Napocotono huaꞌnarinsoꞌ

¹ Napocotono paꞌpin yaꞌhuërënamën Copirno yaꞌconinsoꞌ, nani cato piꞌipitarin. Naporoꞌ inaso nisha nisha huaꞌnaton, paꞌyanin. Ina yonquirápaton co huachi huëꞌëcaso nanitërinhuëꞌ.

^2-3 Napohuachina, magiaroꞌsa amatërin. Ninotonaꞌpiroꞌsaꞌ, pënotonoꞌsaꞌ, quirica nitotoroꞌsaꞌ, inapitanta amatërin. Maꞌsona tapon huaꞌnarinsopita shaꞌhuitacaiso marëꞌ naporin. Napoaton yaꞌipi inapitari paapapi. Naporo inasoꞌ: —Huëꞌëhuëquë maꞌsha quënanahuë. Napoaporahuëꞌ, maꞌsona tapon huaꞌnarahuëso co nitotatohuëꞌ, yonquirárahuë, itërin.

⁴ Napotohuachina, inapitaso Aran nananquë copirno nontopi: —¡Quëmaso sinioro copirno chiníquën nanantëran! ¡Huaꞌqui tahuëri nicaton, huaꞌanëntocoi! Quiyaso quëma piyapinënpitacoi. Shaꞌhuitocoi huaꞌnaranso nipachin, maꞌsona tapon naporinso shaꞌhuichinquën, itopi.

⁵ —Huaꞌnarahuësonta shaꞌhuitatomaco, maꞌsona tapon naporinso shaꞌhuitamacoso yaꞌhuërin. Coꞌsoꞌ shaꞌhuitohuatamacohuëꞌ, tëparahuatënëma yaquiarinënquëmaꞌ. Pëinëmanta amoro tëꞌyatacaiso marëꞌ yaꞌhuëapon.

⁶ Huaꞌnarahuëso shaꞌhuitatomaco, maꞌsona tapon naporinsonta shaꞌhuitoco. Inapotohuatamaco, notohuaroꞌ maꞌsha nicanaranquëmaꞌ. Ca nohuanton naní quëran noya nicatënënquëmaꞌ, moshaponënquëmaꞌ. Napoaton huaꞌnarahuëso shaꞌhuitatomaco, maꞌsona tapon naporinsonta shaꞌhuitoco, itërin.

⁷ Inapitariso natanaponaraihuëꞌ: —Shaꞌhuitocoi huaꞌnaranso nipachin. Quiyari maꞌsona tapon naporinso shaꞌhuichinquën, itaantapi.

^8-9 —Nani shaꞌhuitëranquëmasoꞌ natanatomaꞌ, nonpintamacoso marëꞌ co aꞌnaroáchin yashaꞌhuitëramacohuëꞌ. Huaꞌnarahuëso co shaꞌhuitohuatamacohuëꞌ, ina quëran chachin yaꞌipinquëma chiminapomaꞌ. Nani canpita capini nonpintamacosoꞌ nishaꞌhuitëramaꞌ. Inapotatomaco nisha yonquicaꞌhuaso marëꞌ naporamaꞌ. Napoaton maꞌsona huaꞌnarahuësontaꞌ, shaꞌhuitamacoso yaꞌhuërin. Ina shaꞌhuitohuatamaco tëhuënchinsoꞌ, maꞌsona tapon naporinsontaꞌ, “noꞌtëquën shaꞌhuitërinaco,” tosarahuë, itaantarin copirnori.

¹⁰ —Co insonta isoroꞌpaquë ina pochin shaꞌhuicaso nanitërinhuëꞌ. Naporahuaton, co inso copirno tëranta magiaroꞌsaꞌ, ninotonaꞌpiroꞌsaꞌ, quirica nitotoroꞌsaꞌ, inapita quëma pochin nataninhuëꞌ. Chiníquën nanantaponahuëꞌ, co inapochininhuëꞌ.

¹¹ Natanancoisosoꞌ, co onpo nitotochináchinhuëꞌ. Co piyapimiasoꞌ, ina pochin shaꞌhuitiinquënso nanitërinhuëꞌ. Yosëroꞌsaráchin aꞌna nanitomaraiꞌ. Napoaponahuëꞌ, inapitaso co canpoarëꞌ yaꞌhuëpihuëꞌ, itaantapi inahuarintaꞌ.

¹² Ina natanaton, copirnoso paꞌpi noꞌhuitërin. Noꞌhuitaton yaꞌipi magiaroꞌsaꞌ, ninotonaꞌpiroꞌsaꞌ, pënotonoꞌsaꞌ, quirica nitotoroꞌsaꞌ, inapita Papironiaquë yaꞌhuëpisoꞌ, tëpacaisoꞌ camaitërin.

¹³ Camaitërinso nahuinpachina, Nanirinta amiconënpitarë chachin tëpacaiso marëꞌ yonípi.

Naniri amiconënpitarë chachin chaꞌërinsoꞌ

^14-15 Copirno aꞌpaipisopita huaꞌanënsoꞌ, Arioco itopi. Copirnori magiaroꞌsaꞌ, ninotonaꞌpiroꞌsaꞌ, pënotonoꞌsaꞌ, quirica nitotoroꞌsaꞌ, inapita tëpacaiso ina camairin niꞌton, nani yatëparapi. Napohuachina, Naniriso noya yonquirahuaton oshaquëran Arioco natanin: —¿Onpoatonta ina pochin copirno camaitërin? itërin. Napotohuachina, inariso yaꞌipi shaꞌhuitërin.

¹⁶ Ina natanaton, Naniriso copirno nontapon paꞌnin: “Sinioro copirno, piꞌpian ninaco. Huaꞌnaranso shaꞌhuitatënquën, maꞌsona tapon naporinsontaꞌ, shaꞌhuichinquën,” itërin. Napotohuachina nohuantërin.

^17-18 Naniriso pëinënquë paꞌsahuaton, amiconënpita yaꞌipi shaꞌhuitoonin: “Canpitanta iyaroꞌsa catahuaco. Chiníquën Yosë nonchi copirno huaꞌnarinso anitotatonco, maꞌsona tapon naporinsonta anitochinco. Ama aꞌnapitarë chachin tëpainënpoaso marëhuëꞌ inapoaꞌahuaꞌ,” itërin. Napotohuachina, inachachin nipi.

^19-20 Naporo tashi Siniorori huaꞌnarëso pochin yaꞌnotahuaton, yaꞌipi anitotërin. Napoaton “Yosparinquën,” itaton, iso pochin Yosë nontërin: “¡Ma noyanquëncha quëmaso Sinioro paya! Quëmasáchin yaꞌipi piyapiꞌsa chinochinën. Yaꞌipi nitotëran. Yaꞌipi nanitaparan.

²¹ Quëma nohuanton tahuëriroꞌsa nishatërin. Quëma nohuanton copirnoroꞌsanta yaꞌconpi. Quëmari chachin inapitanta ocoiran. Quëmari yonquinahuanoꞌsanta yonqui quëtëran.

²² Aꞌnaquën maꞌsha, co nitotochináchinhuëꞌ. Napoaponahuë quëmari anitotohuatana, nitotopi huachi. Quëmaso tahuëri pochin ninan niꞌton, co tashinanquë tëranta naꞌpitarinënhuëꞌ.

²³ Quëmaso Yosënquën. Shimashonëhuëipitantaꞌ, chinotërinën. ‘Yosparinquën,’ itatënquën chinotëranquën. Quëma nohuanton yonquínahuan nisahuato chiníquënco. Natananquënsonta anitotëranco. Copirno huaꞌnaton co napion ancantápirinhuëꞌ, anitotëranco,” itërin.

²⁴ Yosë nontahuaton Nanirisoꞌ, Arioco nicapon paꞌnin. Quënanconahuaton: —Ama tëpacoisohuëꞌ. Copirnoquë quëpaco huaꞌnarinso shaꞌhuitaꞌhuaso marëꞌ, itërin.

²⁵ Napotohuachina, aꞌnaroáchin inaquë quëparahuaton: —Aꞌnara Cotia parti quëran quëmapi quënësoꞌ, maꞌsona tapon huaꞌnaransoꞌ, shaꞌhuitarinquën, itërin.

²⁶ Napotohuachina copirnori Naniri nontaton itapon: —¿Quëma Piritasasaro nanitëran huaꞌnarahuësoꞌ, maꞌsona tapon naporinsoꞌ, inapita shaꞌhuitaancoso ti? itërin.

^27-29 —Tëhuënchachin mini sinioro copirno, magiaroꞌsaꞌ, ninotonaꞌpiroꞌsaꞌ, pënotonoꞌsaꞌ, quirica nitotoroꞌsaꞌ, tayora nitotoroꞌsa inapita yaꞌhuërin. Yaꞌhuëpirinahuëꞌ, co aꞌnaya tëranta quëma yanitotëranso nanitopihuëꞌ anitotiinënsoꞌ. Napoaponahuëꞌ, inápaquë aꞌnara Yosë yaꞌhuërin. Co onpo nitotacasohuëꞌ nipisopita nanitërin anitotiinpoasoꞌ. Ina mini anitotarinquën aꞌna tahuëri maꞌsona onpocasoꞌ. Maꞌsona huaꞌnaransoꞌ, maꞌsona tapon naporinsoꞌ, inapita iporaso shaꞌhuitaranquën: Huëꞌëranquë quëhuënaton, aꞌna tahuëri maꞌsona onpocasoꞌ yonquiráran. Naporaran quëran huëꞌëpiranhuëꞌ, Yosësoꞌ, aꞌna tahuëri maꞌsona onpocasoꞌ, huaꞌnaran quëran anitotërinquën.

³⁰ Ina canta anitotërinco. Co aꞌnapita piyapiꞌsa quëran naꞌcon naꞌcon nitotërahuëso marëꞌ anitotërincohuëꞌ. Maꞌsona tapon huaꞌnaranso anitotaꞌhuanquënso marëꞌ anitotërinco. Shaꞌhuitohuatënquën quëmanta quëhuënaton yonquiráransoꞌ, noꞌtëquën nitotaran huachi.

³¹ Huaꞌnaranquë sinioro copirno, aꞌnara nonanpisoꞌ huaniárin quënanan. Panca masho nisahuaton huënaratarin. Naporahuaton paꞌpi tëꞌhuatoro yaꞌnorin.

³² Motënsoꞌ, oro quëransáchin. Tëꞌtëtën, tanpaquën, inapitasoꞌ, prata quëran. Sëꞌnamën, tonainpita, inapitaso shaꞌpi huaꞌna quëran.

³³ Paꞌhuëquënpitasoꞌ, huaꞌnamia quëran. Nantëquënpitaso nipirinhuëꞌ, patomachin huaꞌnamia quëran, patomachin tëshiroꞌpaꞌ quëran.

³⁴ Ina nicasënquën chachin motopi quëran inaora aꞌnara naꞌpi notarintërin. Inaporahuaton, nonanpisoꞌ nantëquën ohuanquimarin. Inapotohuachina yaꞌipi paꞌpan paꞌpantërin.

³⁵ Ina quëran aꞌnaroáchin yaꞌipi noꞌmoshin taranin: Huaꞌnamia, tëshiroꞌpaꞌ, shaꞌpi huaꞌna, prata, oro, inapita naporin. Piꞌipi tahuëri pintiatohuatëra, amocan quënanëso pochin taranpachina, ihuani yaꞌipi quiquirin. Co piꞌpian tëranta acorinhuëꞌ. Ohuantonaꞌpi naꞌpiso nipirinhuëꞌ, panca motopi taranahuaton, yaꞌipiroꞌpaꞌ yaꞌsotërin.

³⁶ Ina pochin huaꞌnaran. Iporaso maꞌsona tapon naporinso shaꞌhuichinquën:

³⁷ Quëma sinioro copirno yaꞌipi copirnoroꞌsa quëran chini chiníquën nanantëran. Yosë inápaquë huaꞌanëntërinso nanan quëtërinquën niꞌton, yaꞌipi huaꞌanëntëran. Ina nohuanton chiníquën nanantëran. Ina nohuanton chachin yaꞌipiya quëran noya nicatënën natërinën.

³⁸ Yaꞌipi parti piyapiꞌsa yaꞌhuërinsoꞌ, quëma ahuaꞌanëntërinquën. Maꞌsharoꞌsaꞌ, inairaroꞌsaꞌ, inapita quëran huarëꞌ huaꞌanëntamaso marëꞌ acorinquën. Ina nohuanton yaꞌipi huaꞌanëntëran. Napoaton nonanpisoꞌ niꞌnansoꞌ, motën oro quëran nininso pochin ninan.

³⁹ Quëma piquëran, aꞌna yaꞌhuërëꞌ huaꞌanëntaantapon. Inaso co onpopinchin chiníquën nanantarinhuëꞌ. Ina piquërantaꞌ, aꞌna yaꞌhuërëꞌ yaꞌipi roꞌpaꞌ huaꞌanëntaantapon. Oro, prata, inapita quëran co onpopinchin shaꞌpi huaꞌnaso paꞌtërinhuëꞌ. Ina pochin ina copirnontaꞌ, nisarin.

⁴⁰ Ina huaꞌanëntërinso piquëran, aꞌnanta isoroꞌpaquë huaꞌanëntaantapon. Inasoꞌ, huaꞌnamia chinirinso pochin chiníquën nisarin. Huaꞌnamiaso taríton niꞌton, yaꞌipi paꞌpaarin. Ina naporinso pochin ina huaꞌanëntohuachin, aꞌnapita copirnoroꞌsa ataꞌhuantapon.

^41-42 Huaꞌnahuatana, ina nantëquënsoꞌ, huaꞌnamia quëran nisahuaton, tëshiroꞌpaꞌ quëran niꞌnan. Inasoꞌ, piquëran copirno yaꞌconinso isoroꞌpaꞌ huaꞌanëntohuachin, cato huënton pochin nisarin. Huaꞌnamia pochin chiníquën nicaponahuëꞌ, tëshiroꞌpa pochin co onpopinchin chiniarinhuëꞌ.

⁴³ Huaꞌnamia tëshiroꞌparë ayontërëso pochin naporo tahuëriꞌsa huiꞌnina niacoantatona aꞌna huëntoíchin nicacaiso marëꞌ anoyatapi. Napopirinahuëꞌ, co aꞌna huëntoíchin nicacaisoꞌ nanitapihuëꞌ. Tëshiroꞌpaꞌ huaꞌnamiarëꞌ, co niayontacasoꞌ nanitërinsohuë pochin nisarin.

⁴⁴ Ina copirnoroꞌsa huaꞌanëntasoiꞌ, Yosë inápaquë yaꞌhuërinso huaꞌanëntarin. Ina huaꞌanëntërinsoꞌ, co onporonta taꞌhuantarinhuëꞌ. Co aꞌnapita nacionoꞌsari minsëarinhuëꞌ. Aꞌnapita huaꞌanëntopisoꞌ, yaꞌipi ataꞌhuantapon. Yaꞌhuërëꞌ ina huaꞌanëntërinsosoꞌ, yaꞌhuëmiatapon.

^45-46 Ina tapon naporin huaꞌnaranquë motopi quëran naꞌpi notarintaton huaꞌnamia, shaꞌpi huaꞌna, tëshiroꞌpaꞌ, prata, oro, inapita niꞌnomorinsoꞌ. Yosëso chini chiníquën nanantaton, aꞌna tahuëri maꞌsona onpocasoꞌ anitotërinquën. Huaꞌnaranso noꞌtëquën shaꞌhuitëranquën. Maꞌsona tapon naporinsontaꞌ, noꞌtëquën shaꞌhuitëranquën, itërin. Naporoꞌ Napocotonosoꞌ, Naniri notënanquë isonin. Isonin quëran noꞌpaquë huarëꞌ monshorahuaton mosharin. Ina quëran piyapinënpita camairin, maꞌsha tëparahuatona Naniri moshacaisoꞌ. Yonarin pochin nininsonta aꞌpërahuatonaꞌ, moshacaiso camaitërin.

⁴⁷ Ina quëran Naniri itapon: —Canpita Yosë chinotëramasosoꞌ, yaꞌipi yosëroꞌsa quëran chini chiníquën nanantërin. Yaꞌipi copirnoroꞌsa huaꞌanëntërin. Inasáchin co nitotacasohuëꞌ nininsonta anitotërin. Napoaton huaꞌnarahuëso anitotatënquën, maꞌsona tapon naporinsontaꞌ, anitotërinquën, itërin.

⁴⁸ Ina quëran chiníquën nanantaton camaitacaso marëꞌ acorin. Yaꞌipi Papironia propinciaquë chirinchi nicacaso marëꞌ acorahuaton, yaꞌipi quirica nitotoroꞌsa camaicaso marënta acorin. Naporahuaton notohuaroꞌ maꞌsha paꞌton nininsopita quëtërin.

⁴⁹ Naniriri copirno natanpachina, Satraco, Misaco, Api-nico, inapitanta Papironia propinciaquë chiníquën nanantatona camaitacaiso marëꞌ acorin. Naniriso nipirinhuëꞌ, copirno huaꞌanëntërinso pëiquë chachin yaꞌhuëaton, camaitarin.