Daniel 1 - Chayahuita (Shahui)

Papironiaquë quëpahuachinara napopisoꞌ

¹ Papironia copirno Napocotono itopisosoꞌ, sontaronënpitarë chachin Quirosarin ninanoquë canquirin. Canquirahuatonaꞌ, ahuëcaiso marëꞌ tancapitopi. Naporo tahuëriꞌsa Cota huënton israiroꞌsa copirnonënasoꞌ, Coaquin itopi. Copirno yaꞌconinsoꞌ, nani cara piꞌipitarin.

² Sinioro nohuanton Napocotonosoꞌ canatahuaton, Coaquin manin. Yosë pëinënquë nisha nisha ohuarapisonta yaꞌhuërinsoꞌ, patoma naꞌcon manin. Inapita macaton yaꞌhuërinquë quëparin. Mamanshinënpita moshapiso pëiquë acoonin. Paꞌton nininsopita tapapiquë acorin. Coaquinta israiroꞌsarë chachin inátohua asacatacaiso marëꞌ quëparin.

^3-5 Inaquë nipachina Napocotonosoꞌ, huaꞌanëntërinso pëiquë sacatopisopita huaꞌanën camairin: “Aspina. Israiro copirno quëmopinënpita quëran huiꞌnapiꞌsa huayonaton quëquëꞌ. Israiro huaꞌanoꞌsa quëmopinënpita quëraontaꞌ, quëquëꞌ. Noyapin noyapin niꞌtopisopita, co máquëna tëranta tëhuërinsohuëꞌ, yonquinahuanoꞌsa niꞌtonaꞌ, míso nonpisopita, nani maꞌsha nitotopisopita, huaꞌanëntërahuëso pëiquë sacatochináchin inashitopiso quëquëꞌ. Inapitasoꞌ, canpoa nanan aꞌchinchinaꞌ. Cartioroꞌsa nitotërinsoꞌ quiricaroꞌsantaꞌ, cara piꞌipi aꞌchinchinaꞌ. Aꞌchintasoiꞌ, ca caꞌnahuëso chachin inapitanta caꞌsapi. Ca huino oꞌorahuëso chachin oꞌosapi. Ina piquëran catahuainacoso marëꞌ acoarahuë,” itërin.

Naniri amiconënpitarë chachin copirno pëiquë yaꞌhuëpisoꞌ

⁶ Napotohuachina Aspinasoꞌ, huiꞌnapiꞌsa huayonin. Catapini yaꞌpisoꞌ, Cota huënton huiꞌnapiꞌsaꞌ. Inapitasoꞌ, Naniri, Ananiasë, Misairo, Asariasë, inapita.

⁷ Ina pochin ninihuanpirinahuëꞌ, huaꞌani Nanirisoꞌ, Piritasasaro itërin. Ananiasëntaꞌ, Satraco itërin. Misairoso nipirinhuëꞌ, Misaco itërin. Asariasësoꞌ, Api-nico itërin.

⁸ Naniriso napoaponahuëꞌ, co nohuantërinhuëꞌ copirno caꞌninsoꞌ capacasoꞌ. Co huino oꞌorinso tërantaꞌ, oꞌocaso nohuantërinhuëꞌ. Amiconënpitantaꞌ, ina pochachin yonquipi. Napoaton Nanirisoꞌ: “Ama nëꞌhuëtërinso pochin Yosë nicaincoiso marëhuëꞌ, co nohuantëraihuëꞌ iso cosharo capacaꞌhuaisoꞌ. Huinontaꞌ, co nayaraihuëꞌ,” itërin huaꞌan nontaton.

^9-10 Yosë nohuanton huaꞌaniso Naniri noya nicaponahuëꞌ: —Nani copirno camaitërin maꞌsona canpita capacamasoꞌ. Maꞌsona oꞌocamasontaꞌ, nani camaitërin. Canpitaso nisha capatoma co aꞌnapita huiꞌnapiꞌsa pochin copirno niꞌpachinquëmahuëꞌ, canpita naꞌin quëran inaso atëpataponco. Ina tëꞌhuatato napoarahuë taꞌa, itërin.

^11-13 Naniri, Ananiasë, Misairo, Asariasë, inapita aꞌpaicaso marëꞌ Aspinasoꞌ, aꞌnara huaꞌan acorin. Ina yaꞌhuërë Naniriri nontaton: —Quëmasoꞌ huaꞌanëhuëinquën. Quiyasoꞌ piyapinënpitacoi. Shonca tahuëri marëꞌ tënitoncoi, noꞌpa quëran paporinsopitaráchin quëtocoi caꞌi. Oꞌocaꞌhuaiso marëntaꞌ, iꞌshara quëtocoi. Ina piquëran aꞌnapita huiꞌnapiꞌsa copirno cosharonën caꞌpisopitarëꞌcoi nicanariꞌi. Co inapita pochin chinihuatoisohuëꞌ, maꞌsona yonquiranso nitocoi, itërin.

¹⁴ Napotohuachina, huaꞌansoꞌ nohuantërin. Shonca tahuëri noꞌpa quëran papotërinsopitaráchin aꞌcarin.

¹⁵ Inanapo tahuëri quëran catapini yaꞌpisoꞌ, aꞌnapita huiꞌnapiꞌsa copirno cosharonën caꞌpisopita quëran noya noya chinipi.

¹⁶ Ina nicaton, inanpi cosharoráchin inapitaso aꞌcarin. Yaꞌhuërëꞌ copirno cosharonën quëtopisosoꞌ, inaora pëinënquë quëparin. Huinonta inapotërin.

¹⁷ Yosë nohuanton inapita huiꞌnapiꞌsasoꞌ, yonqui yonquícharahuatonaꞌ, nitoto nitotócharapi. Nisha nananquë quiricaroꞌsa ninshitopirinahuëꞌ, inanta nitotaantapi. Yaꞌipi aꞌchintopiso nitotopi. Naporahuaton Nanirisoꞌ, maꞌsona tapon huaꞌnapisopitanta nitotërin. Huaꞌnarëso pochin niꞌpachinantaꞌ, maꞌsona tapon naporinso nitotërin.

¹⁸ Copirno tahuëri acorinso nanihuachina, yaꞌipi huiꞌnapiꞌsa Aspinari copirnoquë quëparin.

¹⁹ Inari tëniton nontohuachina, co aꞌnaya tëranta Naniri, Ananiasë, Misairo, Asariasë, inapita pochin quënaninhuëꞌ. Napoaton inapitasoꞌ, catahuacaiso marëꞌ acorin.

²⁰ Aꞌna tahuëri maꞌsona nicacasoꞌ natanpachina, aꞌnapita quirica nitotoroꞌsa quëran noya noya shaꞌhuitopi. Magiaroꞌsaꞌ, ninotonaꞌpiroꞌsaꞌ, co inapitari tëranta inapita huiꞌnapiꞌsa pochin copirno shaꞌhuitopihuëꞌ.

²¹ Inapoaton Nanirisoꞌ, Papironia copirno huaꞌanëntërinso pëiquë sacatërin. Pirsia copirno Siro itopisoꞌ, aꞌna piꞌisaꞌ copirno yaꞌconinso naniquë huarëꞌ, inaquëranchin sacatërin.