Copo naporinso' 5 - Chayahuita (Shahui)

¹ Chiníquën: ‘Oo,’ tëquëꞌ. Tapona aꞌpanirinën. ¡Catahuainquënso marëꞌ co aꞌna anquëni tëranta yaꞌhuërinhuëꞌ!

² Co yonquinahuanhuëꞌ nipatëra, noꞌhuitomiatërëꞌ. Inapohuatëra chimirin yonitë pochin ninëꞌ.

³ Aꞌnaquën piyapiꞌsa co noya yonquiaponahuëꞌ, maꞌhuanarin. Naporapirinhuëꞌ, co huaꞌquiya quëranhuëꞌ yaꞌipi yaꞌhuëtërinso ataꞌhuantaponaꞌ.

⁴ Inaponaꞌpi huiꞌninpitasoꞌ, co incari catahuaarinhuëꞌ. Coisëroꞌsarinta naꞌcon naꞌcon anaꞌintohuachinaꞌ, co inso tëranta ina marëꞌ nonsarinhuëꞌ.

⁵ Shaꞌtërinsopita nitërinsontaꞌ, tanarotopisopitari pëꞌyapon. Nahuanoꞌsa huáncana ocoiatonaꞌ, pëꞌyaponaꞌ. Maꞌsharáchin cancantopisopitari, maꞌshanëna noyapaponaꞌ. Inapotatona osërëtaponaꞌ.

⁶ Pacatorosoꞌ inaora paporin. Co noyahuëꞌ nicacasoso nipirinhuëꞌ, co inaora nohuanton yaꞌhuërinhuëꞌ. Inapochachin parisitacasonta co topinan naporinhuëꞌ.

⁷ Pën noꞌhuitohuachina, chocaca chocaca chararin. Inapochachin piyapinpoantaꞌ, canpoara tëhuënënpoaquë parisirëhuaꞌ.

⁸ Quëma pochin nisarahuë naporini, Yosëíchin tahuërëtaantaꞌitohuëꞌ. Catahuaincoso marëꞌ maꞌsha onporahuësoꞌ, yaꞌipi shaꞌhuichitohuëꞌ.

⁹ Inasoꞌ, nani maꞌsha paꞌpi huëhuëpiro nininsopita ninin. ¡Naꞌaro naporin! Naporinsopita co insonta nanitërinhuëꞌ nitotacasoꞌ.

¹⁰ Ina nohuanton isoroꞌpaquë oꞌnanin. Napohuachina sharoꞌsa nipaꞌquirin.

¹¹ Sano piyapiroꞌsanta catahuahuachina, noya noya acorin huachi. Sëtopisopitantaꞌ, sëto inquitaton acapacancanin.

¹² Aꞌnaquën yonquínahuan niꞌton, aꞌnapita maꞌsha onpotacaisoꞌ yonquipi. Napopipirinahuëꞌ, Yosëso yonqui yonquínahuan niꞌton, yonquipiso tapitarin. Inapotohuachin, co huachi yonquipiso chachin nisapihuëꞌ.

¹³ Yonquinahuanoꞌsasoꞌ, yamonatopi. Napopirinahuëꞌ, Yosëso yonqui yonquínahuan niꞌton, minsëaton atapanarin. Piyapiꞌsa maꞌsha onpotacaisoꞌ yonquipirinahuëꞌ, Yosëri yonquipiso tapiarin.

¹⁴ Huaꞌyantërëso pochin cancantatonaꞌ, tahuëri nipirinhuëꞌ, tashi pochin paꞌsapi. Tashiri noyá iꞌcopitërinso pochin nisapi.

¹⁵ Co noyahuëꞌ nipisopitari saꞌahuaroꞌsa aparisitërin. Napoaponahuëꞌ, Yosëri inapita quëran nichaꞌësarin.

¹⁶ Co chinipisopitahuëntaꞌ, Yosëri catahuacaso ninapi. Co noyahuëꞌ nipisopitaso nipirinhuëꞌ, sëꞌcopianantatë pochin, maꞌsha onpotaton, acopitarin.

¹⁷ Yosë pënënaponquën poꞌtërinquën. Napoaton tëhuënchachin noya cancantëquëꞌ. Inasoꞌ, yaꞌipi nanitaparin. Ina nohuanton maꞌsha onpohuatan, ama noꞌhuitëquësohuëꞌ.

¹⁸ Ina nohuanton caniohuatan, ina nohuanton chachin noyatapon. Ina nohuanton parisitohuatan, ina chachin inquitapënquën.

¹⁹ Naquëranchin naquëranchin huëhuëpiro ninin quëran nichaꞌësarinquën. Ina nohuanton co nosorotáponhuëꞌ.

²⁰ Tanaro tahuëriꞌsa nipachin, co chiminaponhuëꞌ. Quira tahuëriꞌsantaꞌ, co tëpaponënhuëꞌ.

²¹ Yanonpinapihuachinën, ina paꞌpoyarinquën. Nonapitënën maꞌsha onpotochináchin nitopirinënhuëꞌ, co tëꞌhuataranhuëꞌ.

²² Tanaro tahuëriꞌsanta noya cancantaran. Nisha nisha maꞌsha onpohuataontaꞌ, noya chinitaran. Maton maꞌsharoꞌsa tërantaꞌ, co tëꞌhuataranhuëꞌ.

²³ Naꞌpiroꞌsanta co iminënpitaquë, yaꞌcopiarinquënhuëꞌ. Maton maꞌsharoꞌsanta payapënën. Napoaton co sacai quëranhuëꞌ, iminënquë sacataran.

²⁴ Pëinënquë yaꞌhuëpisopitanta maꞌhuanaponaꞌ. Pëꞌtahuanënpita pichihuatan, co pahuanaponhuëꞌ.

²⁵ Paꞌpi notohuaroꞌ shiparinpita yaꞌhuëtarinquën. Iminquë pacatoro yaꞌhuërinso pochin naꞌaponaꞌ.

²⁶ Sharoꞌsa cayahuachina, manëꞌ. Inapochachin quëmantaꞌ, máshoya nipiranhuëꞌ, chinirápon.

²⁷ Nani huaꞌqui tahuëri nicato inapita nitotërahuë. Yaꞌipi shaꞌhuitëranquënsoꞌ, noꞌtëquënáchin ninin. Nani shaꞌhuitëranquën niꞌton, quëmarinta tëniriquëꞌ,” itërin Irihuasëri.