Copo naporinso' 41 - Chayahuita (Shahui)

^1-2 Aꞌna maꞌshantaꞌ, ina pochin marëquë acorahuë. Inasoꞌ, nipiatan itopi. ¡Inasoꞌ, co piꞌpian tëranta yoꞌnanaquë oshicamaso nanitaranhuëꞌ! Noninquë tonpoanantacasoꞌ, iꞌnaraquë aꞌtëncohuiratëtacasoꞌ, inapotacasoꞌ, ¡co onporonta nanitaranhuëꞌ!

³ Mapatan, co noyasha nontarinquënhuëꞌ. ‘Nosoroatonco aꞌpaco paꞌi,’ co itarinquënhuëꞌ.

⁴ Yatëparahuataontaꞌ: ‘Ama tëpacosohuëꞌ, chiminaquë huarëꞌ quëma piyapinën nisarahuë,’ ¡co itarinquënhuëꞌ!

⁵ Inaira yaꞌnipitërëꞌ. ¡Co inarëꞌquënsoꞌ, yaꞌnipicaso nanitaranhuëꞌ! Piyapinënpita sanapi nipiso costacaiso marëꞌ ¡co aꞌsonconotahuaton quëpataponhuëꞌ!

⁶ Caꞌnan tëpahuatëra, anpirahuatë aꞌcatërëꞌ. Inasoꞌ: ¡Co onporonta inapotaranhuëꞌ! Panca caꞌnansoꞌ, yaquiatë paꞌanëꞌ. Inasoꞌ: ¡Co inapotaton paꞌanaꞌpiroꞌsa paꞌantaranhuëꞌ!

⁷ Pëꞌchinanquë maꞌsha inanpatëra, pápi papitarëꞌ. Arponquënta motën ohuantohuatëra, tëparëꞌ. Inasoꞌ: ¡Co onporonta napotaranhuëꞌ!

⁸ Inta macaton tëniriquëꞌ. Inasoꞌ chinitarinquën niꞌton, ¡co catoro macamaso yonquiaranhuëꞌ!

⁹ Inasoꞌ topinan niꞌsharapirinahuëꞌ, paꞌyani tëpa tëparapon.

¹⁰ Insoari tëranta apipachin, inaso noꞌhuitarin. ¡Napoaton co insonta ina apicaso yonquiarinhuëꞌ!

¹¹ Insoariso ina apipachin, ¡co onporonta ina canaarinhuëꞌ!

¹² Onpopinsona nipiatan nininsoꞌ, shaꞌhuitochinaꞌinquën: Nantën quëran huarëꞌ paꞌpi chinirin. ¡Co inso maꞌshari tërantaꞌ, chinirinso icantërinhuëꞌ!

¹³ Shaꞌhuëtënsoꞌ paꞌpi taríton. Cato yaꞌhuiri shaꞌhuëtëtërin. ¡Co incari tëranta ina iꞌsoarinhuëꞌ!

¹⁴ Natëquënpita paira pochin panshinin. Paꞌpi huëhuëpiro niꞌton, ¡co incari tëranta nanitarinhuëꞌ ina onirianancasoꞌ!

¹⁵ Pinënsoꞌ, iscotoroꞌsa apanshinpiso pochin nininquë yaꞌcopirin. Ina panshinoꞌsasoꞌ, naꞌpi pochin tachitopi.

¹⁶ Ina iscotoroꞌsasoꞌ, noyá niyaꞌquëtopi. Napoaton co ihuan tëranta inaëchin yaꞌconinhuëꞌ.

¹⁷ Nichiꞌhuarataton noyá nichinpitërin. ¡Co insonta ina oquiarinhuëꞌ!

¹⁸ Aꞌchiconpachina, oꞌcori pochin huënsha huënshachararin. Yaꞌpirinpitanta quëhuashin huënaratërin. Tashiramiachin piꞌi pipihuachina yaꞌnorinso pochin ninin.

^19-21 Nanamën quëran pën pipirin. Ina pën chachin huënapo huënapochararin. Nitën quëraonta conai pipirin. Panca huëꞌëtaquë iꞌsha inpiitohuachina, panca tomontërin. Ina pochin nitëquën quëran tomontërin. Pihuihuachina pëyara matërin.

²² Cononënsoꞌ, panca masho. Naporahuaton paꞌpi chiníquën. Ina niꞌpachinara, yaꞌipiya quëran tëꞌhuatopi.

²³ Noshinën tëranta inasoꞌ, taríton. Huaꞌnamia asoquipi quëran nipiso pochin tarítërin.

²⁴ Ninopinëontaꞌ, natëtë tarítërinso pochin tarítërin. Naꞌpi quëran nanpi nipiso pochin ninin.

²⁵ Huanihuachina, huaꞌanoꞌsanta paꞌyanpi. Paꞌyanënaquë taꞌamiatopi.

²⁶ Sahuëni, nansa, shinërë, huaꞌnaroaꞌhua, inapitaquësoꞌ, co onporo nanitaranhuë paquitacasoꞌ.

²⁷ Huaꞌnamiaquë ohuanpirinahuëꞌ, shinpitëquë ohuanpiso pochin natanin. Shaꞌpi huaꞌnaquënta nipirinhuëꞌ, nara nanparo pochin natanin.

²⁸ Pëꞌchinan shinërëquë ohuanpirinahuëntaꞌ, co taꞌaponhuëꞌ. Naꞌpiquë tëꞌyarahuachinaꞌ, shinpitë pochin natanapon.

²⁹ Panca pasananquë ahuëpirinahuëꞌ, pëshananquë ahuëpiso pochin natanapon. Nansaꞌhua tëꞌyanantohuachinaꞌ iriniarinso natanaponahuëꞌ, topinan tëhuarinso pochin nisarin.

³⁰ Chipiro paꞌtohuachina, niꞌhuacotërinso huiꞌshatárin. Panca tricho ohuarahuachinara, noꞌpaꞌ niꞌhuacorinso pochin acorin.

³¹ Marë anpoquë quëhuëitohuachina, comamaitárin. Huëꞌëtaquë iꞌsha ainpitërëso pochin nitërin. Panca huëꞌëtaquë mintoro nicacaiso marëꞌ nisha nisha ayontopi. Ayontai marëꞌ chiníquën ohuërëpi. Inapochachin inarinta marë nitërin.

³² Marë paꞌtohuachina, cato quëran chachin iꞌ taꞌsararin. Taꞌsarinsoꞌ moncoiaton, huiríchin huënaratërarin. Acasáchin nisahuaton naporopi aintërinso pochin marë acorin.

³³ Isoroꞌpaquë, marëquë, inaquëpita co aꞌna, maꞌsha ina pochin yaꞌhuërinhuëꞌ. Inasoꞌ maꞌsha, co tëꞌhuarohuanhuëꞌ, cari acorahuë.

³⁴ Co panorohuanhuëꞌ maꞌsharoꞌsa nipisopitanta co oshatarinhuëꞌ canapon. Yaꞌipi tanan maꞌsharoꞌsa huaꞌanëntatë pochin nitërin,” itërin Yosëri.