Copo naporinso' 4 - Chayahuita (Shahui)

Irihuasëri Copo pënëninsoꞌ

^1-2 Naporoꞌ Irihuasëri Copo pënënaton itapon: “Iya Copo, tëhuënchachin parisitáran niꞌton, nontiinënsoꞌ co noyahuëꞌ natanapon. Napoaponahuëꞌ, naporanso natanato, shaꞌhuitochinaꞌinquën tënahuë.

^3-4 Quëmasoꞌ maistro pochin nicaton naꞌa piyapiꞌsa aꞌchintëran. Sanpatopiso pochin cancantopisopitantaꞌ, achinicancanan. Sëtopisopitanta noya catahuaran. Yanitëpapisopitanta noya nontaton achinicancanan niꞌton, co nitëpapihuëꞌ.

⁵ Inaponaꞌpiquën niꞌton, ipora maꞌsha onporanquë chiníquën cancantëquëꞌ.

⁶ Quëmasoꞌ noꞌtëquën Yosë natëran. Inapoaton noyasáchin ninan. Naporan nichinapon chachin, ‘Yosë mini anoyataantaponco,’ tëquëꞌ.

⁷ Inta yonquiriquëꞌ. Noꞌtëquënáchin natërinsopitasoꞌ, co Yosëri ataꞌhuantochininhuëꞌ. Co aꞌnaya tërantaꞌ.

⁸ Co noyahuëꞌ nipisopita tëhuënchinsoꞌ, napopiso marëꞌ noꞌtëquën anaꞌintarin. Maꞌsharaya shaꞌpatëra, ina nitërinso chachin manëꞌ. Inapochachin Yosëriso noꞌtëquën iꞌhuërëtarin. Nani huaꞌqui tahuëri nicato, ina noyá nitotërahuë.

⁹ Panca ihuan paꞌpachina, nani maꞌsha tapirin. Inapochachin Yosërintaꞌ, aꞌnanaya inapita noꞌhuiton ataꞌhuantarin.

¹⁰ Paꞌpiniroꞌsa përapachina aꞌpayaninpoꞌ. Inapochachin co noyahuëꞌ nipisopitasoꞌ, yanoꞌhuitopi. Napoápirinahuëꞌ, Yosëri acopitapon. Paꞌpiniroꞌsa nipanatëtaton acopitërin. Inapochin inapitanta nitapon.

¹¹ Paꞌpiniroꞌsa nipanatëtohuachinara, co huachi mapintatonaraihuëꞌ chiminpi. Napohuachinara, paꞌpiniaꞌhuaroꞌsasoꞌ yanquëëpi. Inapochachin noꞌhuitërayaroꞌsanta chiminpachinaꞌ, huiꞌninpita pataponaꞌ.

¹² Ina caso co nitotopirahuëꞌ anitotërinaco. Aꞌnara huaꞌyan oshaquëraꞌhuaya nontatonco shaꞌhuitërinco.

¹³ Yono tashi piyapiꞌsa huëꞌësoiꞌ, huëꞌëhuëquë nocorinco. Capayatohuatora, paꞌyan tënahuë.

¹⁴ Ina quëran paꞌyamiatato, ropa ropátarahuë.

¹⁵ Ihuan pochin pihui pihuirayararinco natanahuë. Napohuachina, naꞌcon naꞌcon aꞌpayaninco.

¹⁶ Niꞌpirahuëꞌ, piꞌpian quiró tënin niꞌnahuë. Napoaporahuëꞌ, co nirayarahuëꞌ. Topinan tanahuantápirinhuëꞌ, noninso huachi natanahuë:

¹⁷ ‘Yosë marësoꞌ, co aꞌnaya tëranta noyasáchin ninaꞌpi yaꞌhuërinhuëꞌ. Noyápiachin cancantërinsontaꞌ, co aꞌnaya tëranta yaꞌhuërinhuëꞌ.

¹⁸ Inápaquë camairinsopita yaꞌhuëtërinso tërantaꞌ, piꞌpian Yosëri natërin. Co nanitërinhuëꞌ noyá natëcasoꞌ. Anquëniroꞌsantaꞌ, tëhuëpiso quënayatërin.

¹⁹ Aquëtë huarëꞌ piyapiꞌsasoꞌ, co manta chinipihuëꞌ. Noꞌpapi pëi amocanquë pëipiso pochin niconpi. Noꞌson pochin shiꞌsharichináchin niconpi.

²⁰ Isoroꞌpaquë nanpipisoꞌ, co huaꞌquirinhuëꞌ. Huaꞌhuatopi quëran chiminaquë huarëꞌ, aꞌna tahuëriíchin pochin huaꞌquirin. Chiminpachinara, copi tochinapi. Co huachi insoari tëranta nohuanaponhuëꞌ.

²¹ Piꞌshirin yashitërëso pochin copi taponaꞌ. Co yonquínahuan nishátërasoihuëꞌ, taꞌhuantaponaꞌ,’ itërinco.