Copo naporinso' 3 - Chayahuita (Shahui)

Parisitaton Copo naporinsoꞌ

^1-2 Canchisë tahuëri nani naꞌhuëhuachina, Coposoꞌ parisitápaton huaꞌhuatërinso tahuëri yonquirin. Ina yonquiaton ina tahuëri noꞌhuirin. Napoaton chiníquën tapon:

³ “¡Tatahuë huiꞌnarincoso tashi yonquiato, paꞌpi co noyahuëꞌ niꞌnahuë! ¡Huaꞌhuatërahuëso tahuërinta inapochachin niꞌnahuë!

⁴ ¡Maꞌcha naporo tahuëri tashi nininhuëꞌ paya! Co Yosëri nohuaninhuëꞌ naporini, co tahuëriitonhuëꞌ.

⁵ ¡Paꞌpi tashirori imotërin naporini, noya noya niitonhuëꞌ! ¡Maꞌcha yaráchin chitorori iꞌcopitërinhuë paya! ¡Piꞌihuë nipon chiminaton aꞌpayaninhuë paya!

⁶ ¡Maꞌcha tatahuë huiꞌnarincoso tashi tashinantërinsoari ayatërin naporini, noya noya niitonhuëꞌ! tënahuë. Inaporin naporini, ¡co huachi nani piꞌiquë ina tahuëri pichiꞌitonahuëꞌ! ¡Co huachi nani yoquiquë tëranta yonquiꞌitonahuëꞌ!

⁷ ¡Maꞌcha naporo tashi mamahuë co huaꞌhuanincohuëꞌ paya! Inaporin naporini, co insonta noya cancanchitonhuëꞌ.

⁸ Panca yaꞌhuan marëquë yaꞌhuërin. Inasoꞌ, Nipiatan itopi. Pënotonoꞌsari pënoitohuachinara, ina anocantopi, topi. ¡Maꞌcha inapitari, naporo tashi pënopihuëꞌ paya! Inapotopi naporini, co mamahuë huaꞌhuaintoncohuëꞌ.

⁹ ¡Maꞌcha naporo tahuëririnquëntaꞌ, huënio tayora co yaꞌnorinhuëꞌ paya! ¡Tahuëricasonta ninapirinahuëꞌ co tahuëririnhuë naporini, noyataꞌitonhuëꞌ! ¡Tahuërinta huënihuaninsoꞌ, co quënanpihuëꞌ naporini, noya noya niitonhuëꞌ!

¹⁰ Co inapoatonhuëꞌ, naporo tashi huaꞌhuataꞌhuaso quëtërinco niꞌton, paꞌpi co noyahuëꞌ niꞌnahuë. ¡Yaꞌcopirinco naporini, co poꞌpin nosorochitohuëꞌ!

¹¹ ¡Yoꞌnanquë chachin chiminahuë naporini, noya niitonhuëꞌ! ¡Mamahuë huaisonco chachin chiminahuë naporini, noya noya niitohuëꞌ!

¹² Mamahuë huairahuatonco tonainquë acorinco. Inapotatonco ashoꞌshorinco. ¡Co inapotërincohuëꞌ naporini, noya noya niitohuëꞌ!

¹³ Naporoꞌ chiminahuë naporini, yashi yashin huëꞌëpiso pochin sano cancantato chinotaꞌitohuëꞌ.

^14-15 Iráca copirnoroꞌsaꞌ, catahuarinsopita huaꞌanoꞌsaꞌ, inapitasoꞌ, nipaꞌpitacaiso marëꞌ panca noꞌpapiroꞌsa nipi. Huaꞌanoꞌsa nipisopitanta notohuaroꞌ oro, prata, inapita huaꞌanëntopiso pëiroꞌsaquë yontonpi. Inapitanta nani chiminpi niꞌton, inapitarëꞌco cantaꞌ, chinotaꞌitohuëꞌ.

¹⁶ Anaꞌhuayaroꞌsasoꞌ, paꞌpitopi. Chimipiaꞌhua huaꞌhuatopisontaꞌ, inapotopi. Canta inapotërinaco naporini, noya noya cancanchitohuëꞌ.

¹⁷ Apiroꞌsasoꞌ, piyapiꞌsa yaaparisitopi. Napoaponaraihuëꞌ chiminpachinara, copi topi huachi. Parisitápatona amipisopitantaꞌ, chiminpachina chinotopi huachi.

¹⁸ Quiraquë mapisopitantaꞌ, sacato huaꞌanoꞌsari naꞌcon aparisitopi. Napoápirinahuë chiminpachinara, inahuanta copi topi huachi.

¹⁹ Chimipiroꞌsa yaꞌhuëpiquësoꞌ, maꞌhuanoꞌsa saꞌahuaroꞌsarëꞌ, napopináchin yaꞌhuërapi. Aꞌnaquën huaꞌanëhuanpirinahuëntaꞌ, inaquësoꞌ, co huachi huaꞌanëhuanpihuëꞌ.

²⁰ Yosë nohuanton piyapi huaꞌhuatërin. ¡Napoaponahuëꞌ, parisitacaiso marëꞌ huaꞌhuatopiso yonquiato, co noyahuëꞌ cancantërahuëꞌ! Parisitapisopitasoꞌ chiminchinapi naporini, noya noya niitonahuëꞌ.

²¹ Aꞌnaquën parisitatonaꞌ, yachiminpi huachi. Oro yonirëso pochin chimirin nohuantopi. ¡Napopirinahuë nanpirápiso marëntaꞌ, co noyahuëꞌ cancantërahuëꞌ!

²² Napoin quëran chiminpachinara, paꞌpitopi. Naporo huarëꞌ capa cancantopi huachi.

²³ Piyapinpoa Yosë nohuanton yaꞌhuëpirëhuahuëꞌ, maꞌsona onpocasoꞌ co anitotërinpoahuëꞌ. Oncorapirëso pochin acorinpoaꞌ. Co onpo taꞌananpichináchinhuëꞌ, ninëhuaꞌ.

²⁴ Co napion natanato tarëtárahuë co capahuaso tëranta yonquirahuëꞌ. Naꞌnërápato co yamoro manincohuëꞌ.

²⁵ Yaꞌipi tëꞌhuatërahuësopita, huëꞌhuëtërahuësopita, inapita cantiirinco taꞌa.

²⁶ ‘Piꞌpian tëranta chinochi,’ topirahuë, co manta sano cancantërahuëꞌ. ¿Onpoatosoꞌ topinan parisitámarahuë?” tënahuë yonquiato.