Copo naporinso' 14 - Chayahuita (Shahui)

Piyapinpoa co huaꞌqui nanpiarëhuasohuëꞌ

¹ Piyapicoisoꞌ, sanapi quëran huaꞌhuatatoi, co chiniraihuëꞌ. Co huaꞌqui nanpipiraihuëꞌ, naꞌcon parisitërai.

² Yanco huësohuatochina ahuiantarin. Inapochachin piyapicointaꞌ, aꞌnaroáchin capa nisarai. Huaꞌyanëhuëi piꞌiquë, aꞌnaroáchin naꞌhuërinso pochin ninai.

³ Ina pochinco niꞌto, ¡co yonquiancoso yaꞌhuërinhuëꞌ! ¡Co coisë pochin nitancoso yaꞌhuërinhuëꞌ!

⁴ Piyapicoi co aꞌnayacoi tëranta noyápiachin cancantëraihuëꞌ. Ina pochin nininso huiꞌnarinco niꞌton, nëꞌhuëtërahuëso pochin cancantërahuë.

⁵ Onposona nanpicaꞌhuaisoꞌ, quëma isoroꞌpaquë quëtërancoi. Chiminaꞌhuaiso nanihuachin, co piꞌpisha tëranta naꞌhuëarinhuëꞌ.

⁶ Inapoarai niꞌton, ama yonquicoisohuëꞌ. Quiyaora yaꞌhuëatoi sano cancanchi. Pahuërë marëꞌ sacatëraiso pochin nicatoi noya ancanchi.

⁷ Nara aꞌnëhuatëra, papoyantacasoꞌ ninarëꞌ. Papoyantohuachina naꞌantarin.

⁸ Itënsoꞌ nani aꞌshiitë masho. Namënëonta chiminaton mocasarin nipirinhuëꞌ,

⁹ oꞌnani masápachina papotaantararin. Nasha shaꞌpinan nara pochin sëꞌpahuantarin.

¹⁰ Piyapiso napoaponahuëꞌ chiminpachina, co aso inapoyátërarinhuëꞌ. ¡Inapohuachina copi tochaanin!

¹¹ Sonoroꞌsanta tomoitaton yanirin. Iroꞌsanta inapohuachina yanirin. Ina pochin piyapicointa chiminpatoira, capa nisarai.

¹² Napohuatoisoꞌ, co piꞌiroꞌtëꞌ taꞌhuanchátërasohuëꞌ, paꞌpitërinacoi quëran co yaꞌnoaraihuëꞌ. Huëꞌërai pochin ninaisoꞌ, co capayatëraiso pochin nisaraihuëꞌ.

¹³ Chimipiroꞌsa yaꞌhuërin quëran huënantacaso nanitërai naporini, chiminacaso nohuanchitohuëꞌ. Inapoasoco, noꞌhuitëranso asanorahuaton yonquiantaꞌitoncohuëꞌ.

¹⁴ Napoaponahuëꞌ piyapi chiminpachina, co huachi nanpiantaponhuëꞌ. Sontaroꞌsasoꞌ, sirhuitopi quëran pipicaisoꞌ ninapi. Nanpiantacaso yaꞌhuërin naporini, ina pochin cantaꞌ, nanpiantaꞌhuaso ninaitohuëꞌ.

¹⁵ Tahuëri nanihuachin përaitoncohuëꞌ. Nanpiantarahuato, aꞌpaniitënquënhuëꞌ. Quëma ninanco niꞌton, nosoroꞌitoncohuëꞌ.

¹⁶ Iporaso mini oshahuanahuëso marëꞌ anaꞌintëranco. Naporoso co huachi oshanëhuë yonquiꞌitonhuëꞌ.

¹⁷ Tëhuërahuësopita naniantaton, yaꞌipi oshanëhuë inquichitoncohuëꞌ.

¹⁸ Motopiroꞌsa notarintopi. Natëtëroꞌsanta nopoatatonaꞌ, nohuatopi.

¹⁹ Chiniiri naꞌpiroꞌsa asoquirin. Oꞌnaninta amocan quiquirin. Inapochachin quëmantaꞌ, piyapi noya yaꞌhuëcaso ninarinso osërëtëran.

²⁰ Canamiatahuaton, noꞌpanën quëran tëꞌyatëran. Inapotohuatan, nishinahuën niꞌtahuaton paꞌsarin huachi.

²¹ Huiꞌninpita piyapiꞌsari noya niꞌpachinaꞌ, co nitotarinhuëꞌ. Taparo nitohuachinantaꞌ, co nitotarinhuëꞌ.

²² Nanpiraiquëáchin iquitaꞌhuaisoꞌ, sëtatoi co napion ancantaꞌhuaisoꞌ, inapita yaꞌhuërin, itërin.