Colosenses 3 - Chayahuita (Shahui)

¹ Quisocristo chiminpachina, Yosëri ananpitaantarin. Canpitantaꞌ imaramaꞌ niꞌton, anoyacancantërinquëmaꞌ noya noya yonquicamaso marëꞌ. Napoaton Quisocristo yonquirinso chachin nohuantocoꞌ. Nani tahuëri yonquirácoꞌ ina pochin cancantacamaso marëꞌ. Inasoꞌ inápaquë yaꞌhuërarin. Yosë inchinan quëran huënsëaton, ina pochachin chini chiníquën nanantarin.

² Ama maꞌsharáchin yonquicosohuëꞌ. Yosëꞌpaꞌ yaꞌhuërinsopita yonquirácoꞌ.

³ Niꞌcoꞌ. Chimipisoꞌ co huachi isoroꞌpaꞌ yonquirinhuëꞌ. Inapochachin canpitantaꞌ Quisocristorëꞌquëmaꞌ chiminamaso pochin cancantatomaꞌ, co maꞌsharáchin yonquiaramahuëꞌ. Aꞌna tahuëri huachi Quisocristorëꞌquënpoaꞌ Yosëꞌpaꞌ noya noya yaꞌhuëcontarihuaꞌ.

⁴ Quisocristo chachin yaꞌcoancantërinpoaꞌ Yosë yonquicaso marëꞌ. Aꞌna tahuëri oꞌmantahuachin, noya noya yaꞌnoarin. Naporoꞌ inarëꞌquënpoaꞌ yaꞌhuërarihuaꞌ niꞌton, canpoantaꞌ noya noya acoarinpoaꞌ.

Co noyahuëꞌ yonquirëhuasopita naniantatëhuaꞌ, noyápiachin cancantahuaꞌ

⁵ Napoaton piꞌpian tërantaꞌ co noyahuëꞌ yonquihuatamaꞌ, aꞌnaroáchin naniantocoꞌ. Ama monshihuancosohuëꞌ. Ama taparoꞌ yonquicosohuëꞌ. Ama aꞌna sanapi sëꞌhuacamasoꞌ yonquicosohuëꞌ. Ama aꞌna quëmapi saꞌin noyapacosohuëꞌ. Ama nani maꞌsha nohuantapatocosohuëꞌ. Aꞌnaquënsoꞌ maꞌsha naꞌcon nohuantatonaꞌ, mamanshi moshapiso pochin niconpi.

⁶ Ina pochin nipisopita co natëpihuëꞌ. Ina marëꞌ Yosëri chiníquën anaꞌintarin.

⁷ Iráca canpitantaꞌ co noyahuëꞌ cancantatomaꞌ, co noyahuëꞌ ninamaꞌ.

⁸ Iporaso nipirinhuëꞌ isopitantaꞌ co noyahuëꞌ cancantatomaꞌ naporamasopita aꞌpocoꞌ. Ama noꞌhuitocosohuëꞌ. Ama noꞌhuito canainquëmasohuëꞌ. Ama piyapi naponin yonquirapicosohuëꞌ. Ama yanpitocosohuëꞌ. Ama taparoꞌ noncosohuëꞌ.

⁹ Ama ninonpintocosohuëꞌ. Co noyahuëꞌ yonquiramasopita nani aꞌporamaꞌ niꞌton, co ina yonquicasoꞌ yaꞌhuërinhuëꞌ. Mocarinsoꞌ tëꞌyatërëso pochin iráca naporamasopita aꞌpoatomaꞌ, naniantomiatocoꞌ.

¹⁰ Nasha aꞌmorëso pochin nasha cancan manamaꞌ. Yosë nininpoaꞌ niꞌton, nani tahuëriya catahuarinquëmaꞌ ina pochin cancantacamaso marëꞌ. Ina quëran noya noya ina nohuitaramaꞌ. Ina marëꞌ nasha cancan quëtërinquëmaꞌ.

¹¹ Quisocristo imapatëhuaꞌ, napopináchin Yosë niꞌninpoaꞌ. Aꞌnaquën cotioroꞌsaꞌ, aꞌnaquënso nipirinhuëꞌ cricoroꞌsaꞌ. Aꞌnaquën marca niacotopisoꞌ, aꞌnaquënso nipirinhuëꞌ co niacotopihuëꞌ. Aꞌnaquën nisha piyapiꞌsaꞌ, aꞌnaquëntaꞌ quëmaroꞌsaꞌ. Aꞌnaquën patron piyapinënpita, aꞌnaquënso nipirinhuëꞌ inahuara marëꞌ sacatopi. Nisha nisha nicarihuarahuëꞌ, napopináchin Yosë niꞌninpoaꞌ. Quisocristoíchin yonquicasoꞌ yaꞌhuërin. Ina imapatëhuaꞌ, yaꞌipinpoaꞌ yaꞌcoancantërinpoaꞌ. Co mantaꞌ pahuantarinpoahuëꞌ noya cancantacaso marëꞌ.

¹² Yosë nosoroatonpoaꞌ, huayoninpoaꞌ noya nicacaso marëꞌ. Napoaton yaꞌipi piyapiꞌsaꞌ nosoroatomaꞌ, noya nontocoꞌ. Nasha aꞌmorëso pochin noyápiachin cancantocoꞌ. Ama nocantocosohuëꞌ. Nani tahuëriya yonquicoꞌ aꞌnapita catahuacaso marëꞌ. Sano nicatomaꞌ, noya nontocoꞌ. Maꞌsha onpoapomarahuëꞌ, ahuantocoꞌ.

¹³ Ama yaiꞌhuërëtocosohuëꞌ. Aꞌnapita noꞌhuihuachinquëmaꞌ, nanan anoyatocoꞌ. Maꞌsha onpotopirinquëmaontaꞌ, naniantocoꞌ. Sinioro oshanëmaꞌ nani inquitërinquëmaꞌ. Ina nonanatomaꞌ, canpitantaꞌ nanan anoyatocoꞌ.

¹⁴ Nóya ninosorocoꞌ. Ina naꞌcon naꞌcon Yosë nohuantërin. Noya ninosorohuatëhuaꞌ, noya noya nisarëhuaꞌ. Inapohuatëhuaꞌ, tëhuënchachin nóya cancantarihuaꞌ.

¹⁵ Quisocristoíchin asanocancaninpoaꞌ. Ina yonquihuatëhuaꞌ, noya ninicatëhuaꞌ, yaꞌhuarëhuaꞌ. Ina marëꞌ aꞌna huënton pochin Yosë acorinpoaꞌ. Ina catahuahuachinpoaꞌ, co huachi paꞌyanarihuahuëꞌ. Napoaton inasáchin yonquicoꞌ asanocancainquëmaꞌ. Nani tahuëri: “Yosparinquën Sinioro,” itocoꞌ.

¹⁶ Yaꞌipi Quisocristo nanamën yonquirácoꞌ. Naꞌcon ina yonquicoꞌ. Noya nitotatomaꞌ, niaꞌchintocoꞌ, nipënëncoꞌ. Yosë cantanën nisha nisha nininsopita cantacoꞌ. Sarmo quirica nontatomaꞌ, inantaꞌ cantacoꞌ. Canpitaora yonquinëma quëraontaꞌ ocoirahuatomaꞌ, cantacoꞌ: “Ma noyanquëncha Tata niꞌton, catahuarancoi paya,” itatomaꞌ, cancanëma quëran huarëꞌ cantacoꞌ.

¹⁷ Maꞌsona tërantaꞌ yanipatamaꞌ, Sinioro Quisoso yonquiatomaꞌ, nicoꞌ. Ina yonquiatomaꞌ, noya noncoꞌ. Quisoso catahuarinquëmaꞌ niꞌton, “Yosparinquën,” Tata Yosë itocoꞌ.

Saꞌahuanoꞌsaꞌ, soꞌyahuanoꞌsaꞌ, inapita pënëninsoꞌ

¹⁸ Canpitasoꞌ imoyaroꞌsaꞌ, soꞌyamaꞌ natëcoꞌ. Sinioro Quisocristo imaramaꞌ niꞌton, natëcasoꞌ yaꞌhuërin.

¹⁹ Canpitantaꞌ iyaroꞌsaꞌ, saꞌamaꞌ nosorocoꞌ. Ama noꞌhuicosohuëꞌ. Sanoanan quëran nontocoꞌ.

²⁰ Huaꞌhuaroꞌsantaꞌ paꞌpinaꞌ natëinaꞌ. Aꞌshinantaꞌ natëinaꞌ. Yaꞌipi pënënpisoꞌ natëinaꞌ. Inapohuachina, Siniorori noya niꞌsarin.

²¹ Canpitantaꞌ iyaroꞌsaꞌ, huiꞌnamaꞌ sanoanan quëran pënëncoꞌ. Apira apira noꞌhuihuatamaꞌ, co huachi nohuantapihuëꞌ natëcaisoꞌ. “Natëpirahuëꞌ, noꞌhuiárinco,” taꞌtonaꞌ, co huachi natërapihuëꞌ.

²² Patron marëꞌ sacatohuatamaꞌ, noya natëcoꞌ. Ama nonpintocosohuëꞌ. Co niꞌpirinquëmaontaꞌ, noya sacatocoꞌ. Co patronachin yonquicasoꞌ yaꞌhuërinhuëꞌ. Siniorontaꞌ niꞌsarinquëmaꞌ. Ina yonquiatomaꞌ, yaꞌipi cancanëma quëran natëcoꞌ.

²³ Maꞌsona tërantaꞌ nipatamaꞌ, noya nicoꞌ. Co piyapi marëáchin sacatëramahuëꞌ. Yosë imaramaꞌ niꞌton, ina marëꞌ sacataramaso pochin cancantatomaꞌ, nóya sacatocoꞌ.

²⁴ Inasoꞌ noꞌtëquën acanaarinpoaꞌ. Inápaquë noya noya acoarinpoaꞌ. Quisocristo tëhuënchinsoꞌ huaꞌanëntërinpoaꞌ. Napoaton noya natëcoꞌ.

²⁵ Yosësoꞌ yaꞌipinpoaꞌ napopináchin niꞌninpoaꞌ. Noya nipatëhuaꞌ, acanaarinpoaꞌ. Coꞌsoꞌ noya nipatëhuahuëꞌ, anaꞌintarinpoaꞌ.