Colosenses 2 - Chayahuita (Shahui)

¹ Naꞌcon iyaroꞌsaꞌ yonquiranquëmaꞌ. Naotisiaquë yaꞌhuëpisopitantaꞌ yonquirahuë. Naꞌaquëmaꞌ inatohuaꞌ yaꞌhuëramasopita co nohuitaponquëmarahuëꞌ, naꞌcon yonquiranquëmaꞌ. Co piꞌpisha tërantaꞌ nohuantërahuëꞌ nisha cancantacamasoꞌ. Napoaton ninshitaranquëmaꞌ.

² Yaꞌipinquëmaꞌ yonquiatënquëmaꞌ, Yosë nontárahuë. “Catahuaquëꞌ Sinioro chiníquën cancanchinaꞌ. Noya ninosoroꞌinaꞌ. Ina quëran aꞌna huëntoínchin pochin nisapi. Ma noyacha quëmasoꞌ yonquirancoi paya. Catahuaquëꞌ quëma nanamën noya yonquiꞌinaꞌ. Quisocristo chachin nohuichinaꞌ. Iracasoꞌ co piyapiꞌsari nohuitopirinahuëꞌ. Iporaso nipirinhuëꞌ anohuitërancoi. Ina nohuitatoi, tëhuënchachin noya cancantarai,” itërahuë, Yosë nontato.

³ Quisocristo yaꞌipi nitotërin. Noꞌtëquën yonquirin. Inasáchin catahuarinpoaꞌ noꞌtëquën yonquicasoꞌ. Ina naꞌcon yonquihuatëhuaꞌ, noya noya nitotarihuaꞌ. Naꞌa piyapiꞌsaꞌ co nitotopirinahuëꞌ, Yosë anitotërinpoaꞌ Quisocristo pochin yonquicaso marëꞌ.

⁴ Aꞌnaquënso nipirinhuëꞌ nisha aꞌchinpi. Ama Quisocristoíchin yonquicamaso marëhuëꞌ noyásha nontarinënquëmaꞌ. Niꞌcona nonpintochinënquëmaꞌ.

⁵ Co canpitataquë yaꞌhuaporahuëꞌ, nosoroatënquëmaꞌ, nani tahuëri yonquiranquëmaꞌ. Noya niniꞌtomaꞌ, yaꞌhuaramaꞌ. Co nisha nisha yonquiramahuëꞌ. Yaꞌipi cancanëma quëran Quisocristo natëramaꞌ. Ina marëꞌ nóya cancantërahuë.

Quisocristo nichaꞌërinpoasoꞌ

⁶ Yaꞌnan imapomaꞌ, Quisocristo anoyacancantërinquëmaꞌ. Inasáchin huaꞌanëntërinquëmaꞌ. Iporahuantaꞌ inasáchin natëtomaꞌ, imamiatocoꞌ.

⁷ Niꞌcoꞌ. Maꞌsha shaꞌpatëra, itën acopoꞌ noꞌpaquë paꞌpachina, noya huanirin. Inapochachin canpitantaꞌ Quisocristo noya chinpitocoꞌ. Inasáchin yonquicoꞌ achinicancainquëmaꞌ. Nani iyasha noꞌtëquën aꞌchintërinquëmaꞌ niꞌton, yaꞌipi cancanëma quëran Quisocristo natëcoꞌ. “Yosë naꞌcon nosororinpoaꞌ,” taꞌtomaꞌ, nani tahuëri “Yosparinquën Sinioro,” itocoꞌ.

⁸ Aꞌnaquënso nipirinhuëꞌ nisha aꞌchinpi. Niꞌcona oshaquëran anishacancantochinquëmaꞌ. Nonpin nanan inahuara yonquipisoꞌ aꞌchinapi. Piyapiꞌsaꞌ yonquipisoráchin imasapi. Quisocristo aꞌchininsoꞌ co imapihuëꞌ. Nisha nisha isoroꞌpaquë chiníquën nanantopisopita yonquiatonaꞌ, nisha pënëntapi. Yaocoirinënquëmaꞌ. Canpitaso nipirinhuëꞌ ama inapita natëcosohuëꞌ.

⁹ Quisocristoíchin natëcasoꞌ yaꞌhuërin. Piyapi chachin niponahuëꞌ, Yosë chachin ninin antaꞌ. Co mantaꞌ pahuantërinhuëꞌ Yosë pochin nicacasoꞌ.

¹⁰ Canpoantaꞌ ina imapatëhuaꞌ, co mantaꞌ pahuantarinpoahuëꞌ noya noya cancantacaso marëꞌ. Yosë chachin nohuitarëhuaꞌ. Huaꞌanoꞌsaꞌ, anquëniroꞌsaꞌ, sopairoꞌsaꞌ, inapita chiníquën nanantopirinahuëꞌ, Quisocristosoꞌ chini chiníquën nanantërin. Co ina nohuantohuachinhuëꞌ, co mantaꞌ nanitapihuëꞌ nicacaisoꞌ.

¹¹ Iráca Yosë chinotopisopita marca niacotopi. Iporaso nipirinhuëꞌ Quisocristo imapatëhuaꞌ, nisha acotërinpoaꞌ. Co nonënpoaquë acotërinpoahuëꞌ. Cancanënpoaꞌ anoyatërinpoaꞌ. Co noyahuëꞌ yonquirëhuasopita inquitatonpoaꞌ, anoyacancantërinpoaꞌ niꞌton, nóya cancantarihuaꞌ.

¹² Aporihuanpatëhuaꞌ, Quisocristo pochin ninëhuaꞌ. Chiminpachina, paꞌpitopirinahuëꞌ. Yosë nohuanton, nanpiantarin. Inapochachin canpoantaꞌ co noyahuëꞌ yonquirëhuasopita naniantarihuaꞌ. Ina quëran Quisocristo nanpiantarinso pochin ninëhuaꞌ. “Yosë yaꞌipiya nanitaparin,” topatëhuaꞌ, catahuarinpoaꞌ ina pochin nicacasoꞌ.

¹³ Iráca canpitasoꞌ oshahuanatomaꞌ, chimipi pochin ninamaꞌ. Co noyahuëꞌ nicacasoráchin yonquiramaꞌ. Co Yosë piyapinënpita ninamahuëꞌ. Iporaso nipirinhuëꞌ Quisocristo imaramaꞌ niꞌton, anoyacancantërinquëmaꞌ. Oshanëmaꞌ inquitatënquëmaꞌ, nanpiantarinso pochin niꞌninquëmaꞌ.

¹⁴ Iráca Moisësë pënëntërin nani maꞌsha natëcaso marëꞌ. Co inquënpoa tërantaꞌ nanitaparëhuahuëꞌ yaꞌipi natëcasoꞌ niꞌton, oshahuanëhuaꞌ. Ina marëꞌ anaꞌintinpoaso nipirinhuëꞌ, Quisocristo corosëquë chiminaton, nichaꞌërinpoaꞌ niꞌton, Yosë noya niꞌninpoaꞌ.

¹⁵ Quisocristosoꞌ chini chiníquën nanantërin. Corosëquë chiminaton, yaꞌipi sopai huaꞌanoꞌsaꞌ, sopairoꞌsaꞌ, inapita aꞌninquëchin minsërahuaton, atapanin. Co huachi inapita nanitapihuëꞌ shaꞌhuirapiinpoasoꞌ.

Inápaquë yaꞌhuërinsopita yonquicasoꞌ yaꞌhuërin

¹⁶ Napoaton nisha pënënpachinënquëmaꞌ, ama natëcosohuëꞌ. “Nani maꞌsha caꞌpatëhuaꞌ, oꞌopatëhuaꞌ, oshahuanarëhuaꞌ,” topi aꞌnaquën. Nani sahuato tahuëri chinotopi. Nani yoquiaꞌhuaraiquë chinotopi. Nisha nisha niyontopiso tahuëriꞌsaꞌ naꞌhuëpi. “Co quiya pochin nipatamahuëꞌ, co noꞌtëquën imaramahuëꞌ,” itarinënquëmaꞌ. Nipirinhuëꞌ, ama inapitasoꞌ natëcosohuëꞌ.

¹⁷ Iráca Yosë ina pochin pënënin. Quisocristo oꞌmaquë huarëꞌ napopirinhuëꞌ. Iporasoꞌ nani oꞌmarin niꞌton, co huachi inapita nohuantërëhuahuëꞌ. Quisocristoíchin natëcasoꞌ yaꞌhuërin.

¹⁸ Nisha aꞌchinaꞌpiroꞌsaso nipirinhuëꞌ taponaꞌ: “Quiyasoꞌ anquëniroꞌsaꞌ chinotërai. Huaꞌnarëso pochin quënanai. Co canpitasoꞌ quiya pochin nipatamahuëꞌ, co noya cancantaramahuëꞌ,” itohuachinënquëmaꞌ, ama piꞌpisha tërantaꞌ natëtocosohuëꞌ. Inapitasoꞌ nonpinatonaꞌ, “Nani maꞌsha Yosë anitotërincoi niꞌton, noya noyacoi,” topirinahuëꞌ, inahuara yonquinëna quëran napopi.

¹⁹ Inapitasoꞌ co tëhuënchachin Quisocristo imapihuëꞌ. Inasáchin motënpoaꞌ pochin nicaton, huaꞌanëntarinpoaꞌ. Niꞌcoꞌ. Nonënpoaꞌ nisha nisha yaꞌhuëtërin. Motënpoari yaꞌipi camairin noya sacatacaiso marëꞌ. Inapochachin imarëhuasopitantaꞌ Quisocristoíchin noya camairinpoaꞌ. Achinirinpoaꞌ soꞌsorëso pochin nicacaso marëꞌ. Ina pochin nicacasoꞌ Yosë nohuantërin.

^20-21 Iráca Quisocristo chiminin. Canpitantaꞌ ina imapatamaꞌ, inarëꞌquëmaꞌ chiminamaso pochin ninamaꞌ niꞌton, co huachi aꞌnapita pochin nisha nisha chiníquën nanantopisopita imaramahuëꞌ. Inapitasoꞌ inahuara yonquinëna quëran nisha aꞌchinpi. “Nani maꞌsha natëhuatoi, chaꞌësarai,” taꞌtonaꞌ, “Ama ina caꞌcosohuë. Ama piꞌnicosohuëꞌ. Ama sëꞌhuayátëracosohuëꞌ,” itarinënquëmaꞌ. ¿Maꞌmarëtaꞌ ipora huantaꞌ ina natëcamasoꞌ yonquiramaꞌ? tënahuë yonquiato.

²² Co ina pochin Yosë pënëninpoahuëꞌ. Cosharoꞌ, maꞌsha, inapitasoꞌ co yaꞌhuëmiatërinhuëꞌ. Aꞌna tahuëri taꞌhuantarin niꞌton, co inapitasoꞌ aquëtëꞌ Yosë yonquirinhuëꞌ. Piyapiꞌsaꞌ inahuara yonquinëna quëran ina pochin nipënënpi.

²³ Ina pochin nipënënpachinaꞌ, yonquínahuan pochin yaꞌnopirinahuëꞌ. “Maꞌsha aꞌporahuatoi, parisitërai. Parisitopiraihuëꞌ, ahuantërai. Ina marëꞌ Yosë noya noya niꞌnincoi,” topirinahuëꞌ, co noꞌtëquën yonquipihuëꞌ. Ina pochin nipirinahuëntaꞌ, co piꞌpian tërantaꞌ nanitopihuëꞌ co noyahuëꞌ yonquipisopita naniantacaisoꞌ.