Apocalipsis 9 - Chayahuita (Shahui)

¹ Ina piquëran aꞌna anquënintaꞌ pihuiantahuachina, tayora anotërinso pochin aꞌnantaꞌ oꞌmarin. Yosë nohuanton, chiníquën nanan yaꞌhuëtërin sopairoꞌsaꞌ oncorapirinsoꞌ parti iꞌsoatacaso marëꞌ. Nanin acoporoꞌ paꞌninsoꞌ iꞌsoatarin.

² Iꞌsoatohuachina, acopo quëran conaiꞌ pipiarin. Yaráchin tomontarin. Panca pën quëran tomontërinso pochin pipiton, piꞌi yaꞌcopiarin. Yaꞌipi parti tashiarin.

³ Naporahuaton, conai quëran notohuaroꞌ sopairoꞌsaꞌ pipiapi. Panca sëquërë pochin yaꞌnorahuatonaꞌ, pipiapi. Paꞌpi tëꞌhuatoroꞌ. Sëquërë pochin niponaraihuëꞌ, yonpinca pochin huitapi.

⁴ “Ama panpatëroꞌ, nara monoꞌ, nitërinsoꞌ inapita pëꞌyacosohuëꞌ. Piyapiꞌsaꞌ co Yosë marcanën tëꞌyainquë yaꞌhuëtohuachinarahuëꞌ, inapita aparisitocoꞌ,” itërin.

⁵ Co tëpaponaraihuëꞌ, aꞌnatërápo yoqui pochin aparisitapi. Yonpincari huininso pochin niponahuëꞌ, co sanoaponhuëꞌ. Paꞌpi iquin natanaponaraihuëꞌ, co chiminaponahuëꞌ.

⁶ Naꞌcon parisitatonaꞌ: “Chimiin nipachin,” tosapirinahuëꞌ, co chiminaponahuëꞌ. Chiminacaisoꞌ nohuantopirinahuëꞌ, co nanitapihuëꞌ.

⁷ Panca sëquërë pochin yaꞌnotonaꞌ, chiníquën paꞌsapi. Cahuarioroꞌsaꞌ quira nicacaiso marëꞌ tapapiso pochin paꞌsapi. Yancotë pochin oro quëran nininsoꞌ yancopi. Naporahuaton, piyapi pochin niꞌtopi.

⁸ Aihuan niꞌton, sanapi pochin aintapi. Paꞌpiniꞌ pochin natëtopi.

⁹ Shaꞌhuëtëontaꞌ tachiton. Huaꞌna pochin niꞌton, co ohuanchináchinhuëꞌ. Paꞌpachinara, anpiantëna quëran chiníquën tënëntërapi. Quira toronanoꞌsaꞌ cahuarioroꞌsari ohuararinso pochin tënëntapi.

¹⁰ Naporahuaton, yonpinca pochin huiꞌnotopi. Iquin huitatonaꞌ, aꞌnatërápo yoqui pochin aparisitapi.

¹¹ Huaꞌanën yaꞌhuëtërin antaꞌ. Inari camairinsoꞌ, sopairoꞌsaꞌ oncorapirinsoꞌ parti quëran huëꞌnin. Cotio nananquë Apatono itopisoꞌ. Crico nananquë Aporiono itopi. Tiquitonaꞌpi tapon naporin.

¹² Naꞌcon parisitacaisoꞌ ninoton, nani aꞌnotërinco. Ina niꞌpirahuëꞌ, naꞌcon naꞌcon parisitacasoꞌ yaꞌhuapon. Catoroꞌ aparisitacasoꞌ pahuanarin nicaꞌhuasoꞌ.

¹³ Yosë nohuanton, nani aꞌnatërápo anquëniroꞌsaꞌ tronpita pihuipi co noyahuëꞌ nipisopita anaꞌintacaiso marëꞌ. Ina quëran aꞌna anquënintaꞌ pihuiantahuachina, inápaquë nontërinsoꞌ natanahuë. Artaroaꞌhuaya pomonënpita huáncana quëran nontaton, pihuitonaꞌpi itapon:

¹⁴ “Catapini anquëniroꞌsaꞌ iꞌquiritëquë paꞌinaꞌ piyapiꞌsaꞌ aparisitacaiso marëꞌ. Panca iꞌ yonsanquë nani ninarapisoꞌ, Iyopiratisiiꞌ itopiquë,” itërin.

¹⁵ Itohuachina, anquëniroꞌsaꞌ aꞌparin piyapiꞌsaꞌ anaꞌintacaiso marëꞌ. Iráca inaquë acopirinhuëꞌ. Nani ora nanirin niꞌton, aꞌparin huachi patoma pochin piyapiꞌsaꞌ tëpacaiso marëꞌ.

¹⁶ Ina quëran huaꞌhuayátërahuë sontaroꞌsaꞌ huëꞌsapi, niꞌnahuë. Cahuarioroꞌsa aipi huënsëriapi. “Cato pasa michon huëꞌsapi,” tënin, natanahuë.

¹⁷ Huaꞌnarëso pochin aꞌninquëchin quënanahuë. Aꞌna tahuëri maꞌsha onpocasoꞌ quënantarahuë. Huaꞌna coton sontaroꞌsaꞌ aꞌmopiso pochin aꞌmopi. Pënsha pochin huënaráchin nipi. Aꞌnaquën caninchin. Aꞌnantaꞌ shaꞌpíchin. Cahuarioroꞌsantaꞌ nisha yaꞌnopi. Paꞌpiniꞌ pochin mototopi. Nanamën quëran pën, conaiꞌ, shaꞌpi moꞌshiꞌ, inapita pipiapi.

¹⁸ Cahuarioroꞌsa nanamëna quëran inapita pipirahuatonaꞌ, patoma pochin piyapiꞌsaꞌ tëparapi. Notohuaroꞌ chiminapi.

¹⁹ Nanamëna quëran tëparapi. Huinamëna quëraontaꞌ yaꞌhuan pochin quëtëtatonaꞌ, tëparapi.

²⁰ Naꞌa piyapiꞌsaꞌ chiminpirinahuëꞌ, co naporo tërantaꞌ aꞌnapitasoꞌ yonquiapihuëꞌ. Niꞌsaponaraihuëꞌ, inachachin co noyahuëꞌ cancantapi. Aquëtë chachin sopairoꞌsaꞌ chinotapi. Nisha nisha mamanshi moshapi. Oro quëran, prata quëran, huaꞌna quëran, naꞌpi quëran, nara quëran, ina quëranpita nipisoꞌ. Co inapitasoꞌ quënantopihuëꞌ, co natantopihuëꞌ, co iratopihuëꞌ. Co nanpipirinahuëꞌ, mosharapi.

²¹ Paꞌpi co noyahuëꞌ cancantatonaꞌ, tëpatapi, pënotapi, monshihuanapi, maꞌsha ihuatapi. Yosëri anaꞌintërinsoꞌ niꞌsáponaraihuëꞌ, co naporo tërantaꞌ nohuantapihuëꞌ oshanënaꞌ aꞌpocaisoꞌ.