Apocalipsis 8 - Chayahuita (Shahui)

Sënan oro quëran nininsoꞌ

¹ Ina quëran huaꞌnarëso pochin niantarahuë. Aꞌna tahuëri maꞌsha onpocasoꞌ aꞌnotantarinco, niꞌnahuë. Ipora huantaꞌ Carniroaꞌhua quirica sëꞌquëarin. Nani saota toꞌniquë achinpitërinsoꞌ iꞌshotërin. Aꞌnaíchin pahuanarin iꞌshocasoꞌ. Naporoꞌ aꞌnaíchin nininsoꞌ iꞌshotarin. Iꞌshotohuachina, yaꞌipiya copica topi. Miria ora pochin co mantaꞌ nonpihuëꞌ.

² Ina quëran canchisë anquëniroꞌsaꞌ quënanahuë. Yosë notënanquë huanirapi. Inaquë huanihuachinara, aꞌnaya aꞌnaya tronpita quëtopi pihuicaiso marëꞌ.

^3-4 Coꞌhuara pihuiyatërasoihuëꞌ, aꞌna anquënintaꞌ huëcaton, Yosë chinotopiquë artaroaꞌhuaya notënanquë huaniconin. Aꞌpëtinan oro quëran nininsoꞌ sëꞌquërin. Inaquë naꞌa yonarin pochin pimóchin nininsoꞌ acorin panca tomontacaso marëꞌ. Yosë yaꞌhuërinquë chachin tomontarin. Tomontërinso pochin Yosë imapisopitantaꞌ ina nontápi. “Ma noyanquëncha quëmaso paya. Nani tahuëri catahuacoi, Sinioro,” itohuachinara, noya natanin.

⁵ Ina quëran anquëni Yosë artaronënquë yaꞌcaritahuaton, naꞌa pënayaꞌ manin. Aꞌpëtinanquë acorahuaton, isoroꞌpaquë tëꞌyatërin. Tëꞌyatohuachina, aꞌnaroáchin huira pochin natanahuë. Chiníquën tënëntërin. Oꞌcorintaꞌ huënsha huënshaꞌtarin. Naporahuaton, panca ocohua paꞌnin. (Nani huachi Yosëri anaꞌintarin, tënahuë.)

Tronpita pihuipisoꞌ

⁶ Naporoꞌ canchisë anquëniroꞌsaꞌ tronpita yapihuirapi. Co napopianachin pihuiapihuëꞌ. Aꞌnaya aꞌnaya pihuirapi.

⁷ Yaꞌnan pihuirinsoꞌ irinpachina, Yosë nohuanton, ocaiꞌ, pën, inapita inápa quëran anotarin. Huënairë chachin anotarin. Pancana huiquitarin. Patoma pochin huiquitarin. [Cacharonquë un tercero, topisoꞌ.] Nararoꞌsaꞌ, panpatëroꞌ inapitanta napochachin huiquitarin.

⁸ Ina quëran aꞌna anquënintaꞌ tronpita pihuiantarin. Pihuiantahuachina, panca motopi pochin nininsoꞌ niꞌnahuë. Pën pochin orotërimarin. Yosë nohuanton, marëquë anoitërin. Inaquë anotohuachina, patoma pochin marë huënai taranin.

⁹ Patoma pochin maꞌsharoꞌsaꞌ inaquë yaꞌhuërinsoꞌ chiminpi huachi. Panca nancharoꞌsantaꞌ patoma pochin taꞌhuantopi.

¹⁰ Ina quëran aꞌna anquënintaꞌ pihuiantahuachina, panca tayora anotarin, panca orotërinsoꞌ. Anotohuachina, Yosë nohuanton, patoma pochin iiroꞌsaꞌ tapiarin.

¹¹ Ina tayorasoꞌ Main itopi. Tëquëin, iꞌshaaꞌhuaroꞌsaꞌ, inapita patoma pochin main nisarin. Máin niꞌton, notohuaroꞌ piyapiꞌsaꞌ ina oꞌotonaꞌ, chiminapi.

¹² Nani cara anquëni pihuirin. Aꞌnantaꞌ pihuiantahuachina, Yosë nohuanton, patoma pochin piꞌi tapiarin. Yoqui, tayoraroꞌsaꞌ, inapitantaꞌ patoma pochin tapiapi. Napoaton tahuëri nipachina, co huachi piꞌi noya aꞌpianinhuëꞌ. Tashintaꞌ yoqui, tayoraroꞌsaꞌ, inapita co huachi noya aꞌpianpihuëꞌ.

¹³ Ina quëran panca onian quënanahuë. Inápaquë aꞌninquëchin yanponarin. Piyapi pochin noninsoꞌ natanahuë. —¡Maꞌhuantacha nisapi paya! Yosë aꞌpopi niꞌton, piyapiꞌsaꞌ chiníquën parisitaponaꞌ. Aꞌnapita anquëniroꞌsaꞌ pihuiantahuachina, isoroꞌpaquë yaꞌhuëpisopita aquë aquëtëꞌ parisitaponaꞌ, tënin.