Apocalipsis 7 - Chayahuita (Shahui)

Yosë marcanën acotopisoꞌ

¹ Ina quëran Yosë nohuanton, huaꞌnarëso pochin niantarahuë. Aꞌna tahuëri maꞌsha onpocasoꞌ aꞌnotantarinco. Catapini anquëni yaꞌnopi, niꞌnahuë. Aꞌnasoꞌ piꞌi pipirinsoꞌ parti huaniarin. Aꞌnantaꞌ piꞌi yaꞌconinsoꞌ parti huaniarin. Huancanachiontaꞌ catoꞌ ninotërapi. Inaquëpita Yosëri acorin isoroꞌpaꞌ anaꞌintacaiso marëꞌ. Oshaquëran Yosë nohuanton, anaꞌintapi. Piꞌpisha pahuanarin niꞌton, anquëniroꞌsari ihuan yaꞌcopirapi ama marëquë, isoroꞌpaquë inaquëpita maꞌsha onpocaiso marëhuëꞌ. Ama nararoꞌsa tërantaꞌ oyanacaiso marëhuëꞌ yaꞌcopirapi.

² Ina quëran aꞌnanaya aꞌna anquënintaꞌ yaꞌnoantarin. Piꞌi pipirinsoꞌ parti quëran huëꞌsahuaton, huaꞌnaꞌhuaya quësarin Tata Yosë marcanën acocaso marëꞌ. Inasoꞌ catapini anquëniroꞌsaꞌ shaꞌhuitërin:

³ —Ama apiramiáchin anaꞌintocosohuëꞌ. Ninataco Yosë piyapinënpita catahuai. Co Yosë marcanën acochátëraraihuëꞌ. Tëꞌyainaquë acotëraꞌpiapoi. Nani acotohuatoi, yaꞌipiroꞌpaꞌ, marë, nararoꞌsaꞌ, inapita anaꞌintocoꞌ, itiirin.

⁴ Ina quëran tëꞌyainaquë Yosë marcanën acotëraꞌpiapi aꞌnapitari nohuitacaiso marëꞌ. Notohuaroꞌ acotëꞌyatëraꞌpiapi. Pichirahuaton: —Pasa catapini shonca catapini huaranca acotërai, tënin, natanahuë. Yaꞌipi Israiro huëntonoꞌsaquë napotërin.

^5-8 Shonca catoꞌ huëntonoꞌsaꞌ yaꞌhuërin, israiroꞌsaꞌ itopisoꞌ. Nisha nisha nininsopita yaꞌhuëpi: Cota, Nopino, Caro, Asiri, Nipitari, Manasisi, Simion, Nihui, Isacaro, Saporono, Cosi, Mincamin, inanapo huëntonoꞌsaꞌ yaꞌhuërin niꞌton, shonca cato huaranca, shonca cato huaranca acotëꞌyatëraꞌpiapi.

Huiríchin aꞌmopisoꞌ

⁹ Ina quëran huaꞌnarëso pochin niantarahuë. Huaꞌhuayatërahuëꞌ piyapiꞌsaꞌ Yosëꞌpaꞌ quënanahuë. Co pichicasohuëꞌ. Nisha nisha piyapiꞌsaꞌ Yosë huaꞌanëntacasoꞌ shiranën notënanquë huaniapi, nisha nisha nananquë nonpisopita. Nisha nisha parti quëran huëcatonaꞌ, Carniroaꞌhua yamotatonaꞌ, notërapi. Inapitasoꞌ huiríchin aꞌmopi. Mërëmë pochin nininsoꞌ sëꞌquërahuatonaꞌ, Yosë chinotapi.

¹⁰ “Tata Yosëíchin nichaꞌërinpoaꞌ. Inasáchin huaꞌanëntërinpoaꞌ. Carniroaꞌhua anoyacantërinpoaꞌ. ¡Ma noyacha inaso paya!” tosapi chiníquën nonatonaꞌ.

¹¹ Inaquë Yosë chachin huaꞌanëntacasoꞌ shiranënquë huënsëarin. Ansianoꞌsaꞌ, catapini maꞌsharoꞌsa pochin nininsopita, inapitari tancapitopi. Ina tahuirinquë notohuaroꞌ anquëniroꞌsaꞌ huaniapi. Chinotopisoꞌ natanahuatonaꞌ, inapitantaꞌ isonahuatonaꞌ, Yosë chinotapi:

¹² “Tëhuënchachin Sinioro, piyapiꞌsaꞌ nichaꞌëran. ¡Ma noyanquëncha quëmaso paya! Yaꞌipiya chinochinënquën. Yaꞌipi nitotëran. Chini chiníquën nanantaton, yaꞌipiya nanitaparan niꞌton, yaꞌipi natëinënquën. ‘Yosparinquën,’ ichinënquën. Naꞌcon natëmiatarainquën. Co onporontaꞌ aꞌpoarainquënhuëꞌ. Amen,” itapi.

¹³ Ina quëran aꞌna ansiano nataninco. —¿Ma piyapiꞌsataꞌ isopita, huiríchin aꞌmopisoꞌ? ¿Intohua quërantaꞌ huëntapi? ¿Nitotëran ti? itërinco.

¹⁴ —Co casoꞌ nitotërahuëꞌ. Quëma nitotëransoꞌ. Shaꞌhuitoco cantaꞌ nitochi, itohuatëra, shaꞌhuitërinco: —Isopitasoꞌ chiníquën parisitaponaraihuëꞌ, co Yosë aꞌpopihuëꞌ. Carniroaꞌhuari huënainën quëran anoyacancantërin niꞌton, huiríchin aꞌmopi.

¹⁵ Napoaton Yosë yaꞌhuërinquë huëntapi. Tahuërirë chachin tashirë chachin ina chinotapi. Yosëri ichiyaꞌhuëaton, niꞌsarin.

¹⁶ Co huachi tanaponahuëꞌ, co yamoroponahuëꞌ. Co piꞌiri picahuachin, parisitaponahuëꞌ. Noya yaꞌhuëintarapi.

¹⁷ Niꞌcoꞌ. Huaꞌanëni ohuicanënpita noya aꞌpaiarin. Quëchitërahuaton, noya iiꞌ aꞌnotërin oꞌocaiso marëꞌ. Inapochachin Carniroaꞌhuari imapisopita aꞌpaiarin. Yosëꞌpaꞌ noya noya nanpiapi. Yosëri chachin naꞌnëiꞌ amitarin niꞌton, co huachi sëtaponahuëꞌ, itërinco.