Apocalipsis 6 - Chayahuita (Shahui)

Toꞌni iꞌshorinsoꞌ

¹ Yosë nohuanton, huaꞌnarëso pochin niantarahuë. Quirica soꞌnanpinan nininsoꞌ quënantarahuë, canchisë toꞌniquë achinpitërinsoꞌ. Naporoꞌ Carniroaꞌhuari yaꞌnan achinpitërinsoꞌ iꞌshotërin. Iꞌshotohuachina, aꞌna maꞌsha pochin nininsoꞌ chiníquën nonin, huira pochin natanahuë. —¡Huëquë huachi! itërin.

² Itohuachina, cahuario yaꞌnorin, niꞌnahuë, huiríchin nininsoꞌ. Ina aipi quëmapi huënsëarin. Pëꞌchinan quëparin. Piyapiꞌsaꞌ yaminsërin niꞌton, huaꞌan pochin yancotëtaton, paꞌsarin minsëcaso marëꞌ.

³ Ina quëran aꞌna toꞌniquë achinpitërinsoꞌ iꞌshotantarin. Iꞌshotantahuachina, aꞌna maꞌsha pochin nininsoarintaꞌ përantarin. —¡Huëquë huachi! itërin.

⁴ Itohuachina, nisha cahuario yaꞌnorin, quëhuashin nininsoꞌ. Ina aipi aꞌna quëmapintaꞌ huënsëarin. Panca sahuëni sëꞌquëarin. Chiníquën nanan yaꞌhuëtërin quira nicacaso marëꞌ. Ina nohuanton, isoroꞌpaquë naꞌa piyapiꞌsaꞌ niahuëatonaꞌ, nitëparapi. Nisha nisha parti quira nisapi. Co huachi noya yaꞌhuapihuëꞌ.

⁵ Ina quëran aꞌna toꞌniquë achinpitërinsoꞌ iꞌshotantarin. Iꞌshotantahuachina, aꞌna maꞌsha pochin nininsoari përantarin. —¡Huëquë huachi! itohuachina, yara cahuario yaꞌnorin, niꞌnahuë. Quëmapi ina aipi huënsërinsoꞌ paransa sëꞌquërin cosharoꞌ pëꞌtënacaso marëꞌ.

⁶ Naporoꞌ catapini maꞌsharoꞌsaꞌ huancánachin, noninsoꞌ natanahuë: —Yaꞌipi cosharoꞌ naꞌcon paꞌtarin. Aꞌna tahuëriraꞌ iꞌhuaquë huarëꞌ sacatopirinahuëꞌ, aꞌna quiroichin trico paꞌanapi. Inapochachin aꞌna cosharontaꞌ pahuanarin. Sipatasoꞌ trico pochin niponahuëꞌ, co ina pochin paꞌtopirinhuëꞌ, inantaꞌ paꞌtarin. Aꞌna tahuëriraꞌ iꞌhuaquë huarëꞌ sacatopirinahuëꞌ, cara quiroichin paꞌanapi. Tomaꞌ, huino, inapitantaꞌ pahuanarin. Niꞌcona chiniatamaꞌ, tënin.

⁷ Ina quëran aꞌna toꞌniquë achinpitërinsoꞌ iꞌshotantarin. Nani catapini iꞌshotërin. Ina iꞌshotohuachina, aꞌna maꞌsha pochin nininsoari përantarin, yaꞌnatomarinsoꞌ.

⁸ —¡Huëquë huachi! itohuachina, aꞌna cahuariontaꞌ yaꞌnoantarin, shaꞌpíchin nininsoꞌ. Quëmapi ina aipi huënsërinsoꞌ, Chimirin itopi. Ina nohuanton, naꞌa piyapiꞌsaꞌ chiminapi. Notohuaroꞌ chiminatonaꞌ, chimipiroꞌsaꞌ yaꞌhuëpiquë paꞌsapi. Aꞌnaquën niahuëatonaꞌ, nitëparapi. Aꞌnaquën tanari tëpaarin. Naporahuaton, chiníquën caniori masarin niꞌton, naꞌa piyapiꞌsaꞌ chiminapi. Tanan niꞌniroꞌsarintaꞌ tëparapi. Inapoatonaꞌ, patoma patoma pochin piyapiꞌsaꞌ chiminapi. Cacharonquë un cuarto itopi.

⁹ Ina quëran aꞌna toꞌniquë achinpitërinsoꞌ iꞌshotantarin. Iꞌshotantahuachina, artaro Yosë chinotacaso marëꞌ acorinsoꞌ inápaquë niꞌnahuë. Inaanaquë naꞌa imapisopita chiminpisopita quënanahuë. Nanpiponaꞌ, nóya imapi. Co tëꞌhuatonaraihuëꞌ, Yosë nanamën aꞌchinpi. Ina marëꞌ tëpapi.

¹⁰ Tëpahuachinara, huaꞌyanënaꞌ inápaquë yaꞌhuëcontarahuatonaꞌ, Yosë nontápi. —Quëma Sinioro chini chiníquën nanantëran. Noyasáchin nicaton, noꞌtëquën nonan. ¿Onporo huarëtaꞌ oshahuanoꞌsaꞌ anaꞌintaran? Tëparinacoiso marëꞌ noꞌtëquën anaꞌintacasoꞌ yaꞌhuërin, tosapi.

¹¹ Napotohuachinara, Yosëri itërin: —Ninatacoꞌ. Oshaquëran anaꞌintarahuë. Co tahuëri naniyatërarinhuëꞌ. Aꞌnapita imarinacosopita ipora huantaꞌ pënëntapi. Aꞌnaquën tëpaantahuachinaꞌ, isëquë chachin huëantapi antaꞌ. Naporo huarëꞌ tëparinënquëmasopita noꞌtëquën anaꞌintarahuë, itërin. Itahuaton, huiríchin aꞌmocaisoꞌ quëtërin. Noyápiachin cancantopi niꞌton, huiríchin aꞌmotërin.

¹² Ina quëran aꞌna toꞌniquë achinpitërinsoꞌ iꞌshotaantarin. Inarëꞌ nani saotaroꞌ iꞌshorin. Inapotohuachina, panca ocohua paꞌsarin. Piꞌi tashiaton yaráchin nisarin. Yoquintaꞌ co huachi aꞌpianinhuëꞌ. Nincoan huëꞌsaponahuëꞌ, quëhuashin huënai pochin nisarin.

¹³ Naporahuaton, tayoraroꞌsantaꞌ anotapi. Iquira nara nitërinsoꞌ canora niponahuëꞌ, panca ihuan paꞌpachina, notohuaro shitatërinso pochin nisapi.

¹⁴ Piꞌiroꞌtëntaꞌ capa nisarin. Quirica soꞌnanëso pochin co huachi yaꞌnoarinhuëꞌ. Naporahuaton, motopiroꞌsaꞌ, soꞌtonoꞌsaꞌ, inapitantaꞌ nacon nacontatonaꞌ, itopa itopa nichiꞌhuincapi.

¹⁵ Yaꞌipi piyapiꞌsaꞌ paꞌyanahuatonaꞌ, taꞌarapi. Copirnoroꞌsaꞌ, huaꞌanoꞌsaꞌ, sontaro huaꞌanoꞌsaꞌ, maꞌhuanoꞌsaꞌ, chiníquënoꞌsaꞌ, inapita Yosë tëꞌhuatatonaꞌ, taꞌarapi. Motopiꞌpaꞌ taꞌarahuatonaꞌ, naꞌpi naninoꞌsaquë yaꞌconapi naꞌpicaiso marëꞌ. Patronoꞌsaꞌ piyapinënpitarë chachin panca naꞌpianaroꞌsaquë naꞌpirapi.

¹⁶ Yaꞌipi piyapiꞌsaꞌ tëꞌhuatatonaꞌ, motopi nontapirinahuëꞌ: —Panca naꞌpiroꞌsaꞌ notarintatonaꞌ, yaꞌcopiinacoi ama Yosë quënanaincoiso marëhuëꞌ. Inápaquë huaꞌanëntarin. Carniroaꞌhuantaꞌ chiníquën noꞌhuirincoi.

¹⁷ Nani anaꞌintacasoꞌ tahuëri nanirin. Anaꞌintohuachincoi, co insonta nanitarinhuë ina chinitacasoꞌ, tosapi.