Apocalipsis 5 - Chayahuita (Shahui)

Carniroaꞌhua quirica maꞌpatërinsoꞌ

¹ Yosë nohuanton, huaꞌnarëso pochin niantarahuë. Inápaquë yaꞌhuërinsoꞌ quënanato, quirica niꞌnahuë, soꞌnanpinan. Inchinan imirin quëran Yosëri sëꞌquërarin. Cato quëran chachin nani ninshitërin. Toꞌniquë noyá achinpitërin. Canchisëroꞌ achinpitërin.

² Aꞌna anquënintaꞌ niꞌnahuë. Chiníquën nanantaton, chiníquën nonin. —¿Intaꞌ noya noya niꞌton, nanan yaꞌhuëtërin toꞌniroꞌsaꞌ iꞌshotahuaton iso quirica oporinacasoꞌ? tënin.

³ Yaꞌipiroꞌpaquë yonisápirinahuëꞌ, co insontaꞌ nanan yaꞌhuëtërinhuëꞌ oporinacasoꞌ. Inápaquë yaꞌhuëpisopitantaꞌ co nanitopihuëꞌ. Acoporontaꞌ yonípirinahuëꞌ, co inso tërantaꞌ nanan yaꞌhuëtërinhuëꞌ oporinaton nicacasoꞌ.

⁴ Co insontaꞌ nanitohuachinhuëꞌ, chiníquën sëtato, naꞌnërahuë. Naꞌnëapirahuëꞌ,

⁵ aꞌna ansiano shaꞌhuitërinco. —Ama naꞌnëquësohuëꞌ. Niꞌquëꞌ. Tapi shiin nani yaꞌipi minsërin. Cota huëntonënquë nasitaton, chini chiníquën nanantërin. Inari nanitërin toꞌni iꞌshotahuaton quirica oporinacasoꞌ, itërinco.

⁶ Itohuachincora, Quisoso quënanahuë. Huancanachin Yosë huënsërinso yaꞌcariya huaniarin. Ansianoꞌsaꞌ, catapini maꞌsharoꞌsa pochin nininsopita, inapitari tancapitopi. Quisoso chachin niponahuëꞌ, carniroaꞌhua nani tëpapiso pochin yaꞌnorin. Canchisë pomohuan nisahuaton, canchisë yaꞌpirin yaꞌhuëtërin. Chiníquën nanantaton, canchisë ispiritoroꞌsaꞌ aꞌparin yaꞌipiroꞌpaquë nicainpoaso marëꞌ.

⁷ Ina quëran yaꞌcariconahuaton, Yosë inchinan quëran quirica maꞌparin.

⁸ Nani maꞌpahuachina, maꞌsharoꞌsa pochin nininsopita isonahuatonaꞌ, Carniroaꞌhua chinotapi. Ansianoꞌsantaꞌ isonahuatonaꞌ, ina chinotapi. Aꞌnaya aꞌnaya arparoꞌsaꞌ sëꞌquëpi piꞌniatonaꞌ chinotacaiso marëꞌ. Sënaontaꞌ aꞌnaya aꞌnaya quëpapi, oro quëran nininsoꞌ. Inaquë yonarin pochin pimóchin nininsoꞌ yaꞌhuërin tomontacaso marëꞌ. Tomontërinso pochin imarëhuasopita Yosë nontërëhuaꞌ. “Nontohuatëhuaꞌ, noya nataninpoaꞌ,” taꞌtonaꞌ, Yosë chinotapi.

⁹ Chinotatonaꞌ, inahuara yonquinëna quëran nasha cantanën cantarapi. “Noya noyanquën, Sinioro, niꞌton, nanan yaꞌhuëtërinquën quirica niꞌcamasoꞌ. Toꞌni iꞌshotohuatan, nani maꞌsha anitotarancoi. Iráca tëparinënquën. Chiminaton, piyapiꞌsaꞌ sopai quëran ocoiran Yosë imacaiso marëꞌ. Napoaton quëmasáchin nanitëran yaꞌipiya huaꞌanëntacasoꞌ. Nisha nisha parti yaꞌhuëpirinahuëꞌ, imarinënquën, Sinioro. Nisha nisha nananquë nonpisopita imarinënquën. Nisha nisha copirnori huaꞌanëntërinsopita niponaraihuëꞌ, natërinënquën.

¹⁰ Huaꞌanëntëranquë ayaꞌconan. Corto huaꞌanoꞌsa pochin acoran Yosëíchin yonquicaiso marëꞌ. Aꞌna tahuëri noꞌpaquë chachin ichihuaꞌanëntaran huachi. Ma noyanquëncha quëmaso paya,” itopi, cantatonaꞌ.

¹¹ Ina quëran huaꞌhuayátërahuë anquëniroꞌsaꞌ quënanahuë. Yosë shiranën, maꞌsharoꞌsa pochin nininsopita, ansianoꞌsaꞌ inapita tancapitopi. Huaꞌhuayátërahuë yaꞌhuëpi, co pichinahuanhuëꞌ. Inapitantaꞌ chiníquën naporapi:

¹² “¡Ma noyacha Carniroaꞌhuaso paya! Piyapiꞌsaꞌ oshanënaꞌ inquitacaso marëꞌ chiminin. Noya noya niꞌton, yaꞌipi piyapiꞌsari chinochinaꞌ. Chini chiníquën nanantaton, yaꞌipi nanitaparin. Nani maꞌsha yaꞌhuëtërin, yaꞌipi huaꞌanëntarin. Yaꞌipi nitotërin. Napoaton yaꞌipinpoaꞌ natëahuaꞌ. ‘Yosparinquën, Sinioro,’ itahuaꞌ,” tosapi.

¹³ Ina quëran yaꞌipi Yosëri nininsopita napopianachin chinotapi, natanahuë. Inápaquë yaꞌhuërinsopita, isoroꞌpaquë yaꞌhuërinsopita, chiminpisopita, marëquë yaꞌhuërinsopita, yaꞌipiya Yosë chinotapi. “Ma noyacha Tata Yosëso paya. Huaꞌanëntarinpoaꞌ niꞌton, ‘Yosparinquën’ itahuaꞌ. Inasáchin natëahuaꞌ. Noya noya niꞌton, chinotahuaꞌ. Yaꞌipiya nanitaparin. Carniroaꞌhuantaꞌ inapochachin chinotahuaꞌ. Ipora quëra huarëꞌ ina natëahuaꞌ,” tosapi.

¹⁴ —Naporinchi paya. Tëhuënchachin inasáchin natëahuaꞌ, topi catapini maꞌsharoꞌsa pochin nininsopitantaꞌ. Ansianoꞌsantaꞌ isonahuatonaꞌ, chinotapi.