Apocalipsis 4 - Chayahuita (Shahui)

Inápaquë Yosë chinotopisoꞌ

¹ Ina quëran inápaquë nëꞌpërahuato, quënanahuë. Yosë yaꞌhuërinquë chachin yaꞌcoana niꞌsoatërin, niꞌnahuë. Naporahuaton, inápa quëran yaꞌnan nontërincosoꞌ nontaantarinco. Tronpita pihuipiso pochin natanahuë. —Isëquë huëntaquëꞌ. Nani maꞌsha aꞌnochinquën. Aꞌna tahuëri maꞌsha onpocasoꞌ ninoto, anitotaranquën, itërinco.

² Aꞌnanaya Ispirito Santo nohuanton, huaꞌnarëso pochin Yosë yaꞌhuërinsoꞌ quënanahuë. Huaꞌanëntacasoꞌ shiranënquë aꞌnaraꞌ huënsëárin, niꞌnahuë.

³ Inaquë nisha pochin yaꞌnorin. Naꞌpi noyápiachin nininso pochin huënaratarin. Caspi, cornarina inapita pochin huënaratarin. Noyápiachin yaꞌnorin. Yahuaꞌtani tahuitërin, huënsëarin. Yahuaꞌtan niponahuëꞌ, huëron pochin caninchin aꞌpinin. Ismirarita pochin huënaratarin, niꞌnahuë.

⁴ Inaquë cato shonca catapini ansianoꞌsaꞌ huaꞌanëntacasoꞌ shiraroꞌsaquë tahuishin miáchin huënsëapi. Huirichinachin aꞌmopi. Yancotëꞌ oro quëran nininsoꞌ yancopi.

⁵ Yosë huaꞌanëntacasoꞌ shiranën quëran oꞌcori pochin nininsoꞌ pipiarin. Huënsha huënshaꞌtarin. Huira tacarintërinso pochin nonpisoꞌ natanahuë. Canchisë pën nënërinsoꞌ Yosë notënanquë chachin niꞌnahuë. Inapitasoꞌ canchisë ispiritoroꞌsaꞌ Yosëri camairinsoꞌ, tënahuë.

⁶ Shira notënanquë panca sono pochin yaꞌhuërin. Co iꞌsha pochinhuëꞌ. Isihuico pochin niponahuëꞌ, acopoquë huarëꞌ quënantërëꞌ. Yosë shiranën tahuirinquë catapini maꞌsharoꞌsa pochin nininsoꞌ yaꞌhuëpi, nanpirihuanpisoꞌ. Naꞌa yaꞌpirahuanatonaꞌ, itoparan itoparan quënantopi.

⁷ Nisha nisha niꞌtopi. Aꞌnasoꞌ paꞌpini pochin yaꞌnorin. Aꞌnantaꞌ toro pochin yaꞌnorin. Aꞌnantaꞌ piyapi pochin yaꞌpiratërin. Yaꞌnatoninsosoꞌ, panca onian pochin yaꞌnorin.

⁸ Nisha nisha niponaraihuëꞌ, yaꞌipiya anpiantëhuanpi. Saota saota yaꞌhuëtopi. Ina aipi, ina acopoꞌ, cato quëran chachin yaꞌpirin yaꞌhuëtopi. Inapitasoꞌ tahuërirë chachin, tashirë chachin Yosë chinotápi. Co taꞌtopihuëꞌ. Napopianachin naporapi: “¡Ma noyacha Tata Yosëso paya! ¡Noyasáchin ninin! Chini chiníquën nanantaton, yaꞌipiya huaꞌanëntarin. Iráca quëra huarëꞌ yaꞌhuërin. Ipora huantaꞌ nanpiárin. Inasoꞌ yaꞌhuërárin. ¡Ma noyacha inaso paya!” tosapi.

⁹ Apira apira chinotapi. “¡Ma noyacha Yosëso paya! Yaꞌipi piyapiꞌsari chinochinaꞌ. Naꞌcon catahuarinpoaꞌ niꞌton, ‘Yosparinquën Sinioro,’ itahuaꞌ. Inasoꞌ huaꞌanëntomiatarinpoaꞌ. Co onporontaꞌ taꞌhuantarinhuëꞌ,” topachinara,

¹⁰ ansianoꞌsantaꞌ Yosë yonquiapi. “Tëhuënchachin huaꞌanëntërinpoaꞌ. Co onporontaꞌ chimianinhuëꞌ,” taꞌtonaꞌ, cato shonca catapini chachin isonahuatonaꞌ, chinotapi: “Quëmasáchin nóyanquën,” itatonaꞌ, Yosëri ayancotërinsoꞌ, shiranën notënanquë acoantapi. Chinotatonaꞌ, itaponaꞌ:

¹¹ “Quëmasáchin Sinioro imarainquën. Noya noyanquën niꞌton, yaꞌipi piyapiꞌsaꞌ chinochinënquën. Nani tahuëri natëinënquën. Yaꞌipi nanitaparan. Yaꞌipi maꞌsha ninan. Quëma nohuanton, ipora huantaꞌ yaꞌhuarin,” itopi.