Apocalipsis 21 - Chayahuita (Shahui)

Nasharoꞌpaꞌ nininsoꞌ

¹ Ina quëran huaꞌnarëso pochin niantarahuë. Nasharoꞌpaꞌ, nasha piꞌiroꞌtëꞌ, inapita quënanahuë. Yosë nohuanton, isoroꞌpaꞌ taꞌhuantapon. Piꞌiroꞌtëntaꞌ taꞌhuantapon. Marëntaꞌ co huachi yaꞌhuaponhuëꞌ. Yaꞌipiya nasha nisarin.

² Ina quëran noyápiachin ninanoꞌ inápa quëran oꞌmararin niꞌnahuë. Yosë yaꞌhuërin quëran oꞌmararin. Quirosarin pochin niponahuëꞌ, noya noya ninin. Noyápiachin yaꞌnorin. Sanapi soꞌyacaso marëꞌ nitaparinso pochin noyápiachin ninin. Nasha Quirosarin itopisoꞌ.

³ Inápa quëran chiníquën noninsoꞌ natanahuë. —Iporaso huachi, Yosë piyapinënpitarë chachin yaꞌhuërarin. Co onporontaꞌ patarinhuëꞌ. Inapitarëꞌ yaꞌhuëmiatarin.

⁴ Yosëri chachin naꞌnëiꞌ amirayatarin. Co huachi chiminaponahuëꞌ. Co huachi sëtaponahuëꞌ. Co huachi naꞌnëponahuëꞌ. Co piꞌpisha tërantaꞌ iquitaponahuëꞌ. Iráca naꞌcon parisitopirinahuëꞌ, co huachi ina pochin yaꞌhuaponahuëꞌ. Noya noya yaꞌhuaponaꞌ, tënin.

⁵ Ina quëran Yosë huaꞌanëntacasoꞌ shiranënquë huënsëaton, itërinco: —Niꞌquëꞌ. Yaꞌipiya anoyatarahuë. Nashasáchin acoarahuë. Noꞌtëquën nontëranquën niꞌton, ninshitëquëꞌ. Yaꞌipiya natëtacaisoꞌ yaꞌhuërin, itërinco.

⁶ Ina quëran itantarinco: —Nani yaꞌipiya anoyatërahuë. Caꞌton yaꞌhuërahuë. Coꞌhuara isoroꞌpaꞌ yaꞌhuëyátërasohuëꞌ, yaꞌhuárahuë. Aꞌna tahuërintaꞌ yaꞌipi maꞌsharoꞌsaꞌ taꞌhuantopirinahuëꞌ, casoꞌ yaꞌhuápo. Iráca quëran huarëꞌ yaꞌhuárahuë. Co onporontaꞌ taꞌhuantarahuëꞌ. Napoaton nontoco catahuainquëmaꞌ. Niꞌquëꞌ. Chiníquën yamorohuatëra, oꞌorëꞌ. Oꞌopatëra, chiníquën cancantërëꞌ. Inapochachin cantaꞌ catahuaranquëmaꞌ. Yamororëso pochin cancantohuatamaꞌ, nanpirin iiꞌ quëchinquëmaꞌ noya cancantacamaso marëꞌ. Caora nohuanto, catahuaranquëmaꞌ. Insonquëma tërantaꞌ nohuantohuatamaco, huëcoꞌ anoyacancanchinquëmaꞌ.

⁷ Sopai minsëhuatamaꞌ, yaꞌipi tapatëranquëmasopita quëchinquëmaꞌ. Huiꞌnahuëpita pochin niꞌsaranquëmaꞌ. Casáchin yonquiaramaco.

⁸ Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.

Ninanoꞌ inápa quëran oꞌmararinsoꞌ

⁹ Ina quëran aꞌnaraꞌ anquëni huëcapairinco, anaꞌintacaso marëꞌ minëꞌ quëtopisoꞌ. Huëꞌsahuaton, itërinco: “Huëquëꞌ, nasha ninanoꞌ aꞌnochinquën. Inaquë Carniroaꞌhuari huayoninsopita yaꞌhuaponaꞌ. Sanapi soꞌyacaso marëꞌ nitaparinso pochin noyápiachin ninin,” itërinco.

¹⁰ Itohuachincora, huaꞌnarëso pochin niantarahuë. Ispirito Santo nohuanton, panca motopiꞌpaꞌ quëparinco. Inaquë noya ninanoꞌ aꞌnotërinco. Nasha Quirosarin itopisoꞌ. Ina ninanosoꞌ Yosë yaꞌhuërin quëran chachin oꞌmararin.

¹¹ Yosësoꞌ noya noya niꞌton, ina pochin nicaton, huënaráchin huënaráchin aꞌpinin. Naꞌpiaꞌhuaya paꞌton nininso pochin huënaratarin. Caspi itopisoꞌ. Isihuico pochin niponahuëꞌ, iꞌhua iꞌhuanánshin quënantërëꞌ.

¹² Pairatopisoꞌ inápa masho ninin. Shonca catoꞌ yaꞌcoana yaꞌhuëtërin. Aꞌnaya aꞌnaya yaꞌcoanaquë aꞌna anquëniri niꞌsarin. Yaꞌipi quëran shonca catoꞌ yaꞌhuëpi. Nisha nisha yaꞌcoanaquë nininën nani ninshitopi. Aꞌnaya aꞌnaya israiroꞌsaꞌ huëntonën ninintërinsoꞌ. Shonca catoꞌ niꞌton, yaꞌipi yaꞌcoana nanitopi.

¹³ Piꞌi pipirinsoꞌ parti quëran pairatopisoꞌ cara yaꞌcoana yaꞌhuëtërin. Piꞌi yaꞌconinsoꞌ partintaꞌ cara chachin yaꞌhuëtërin. Huancana yonsanquëchin inapochachin cara cara yaꞌhuërin.

¹⁴ Pairatopisoꞌ shonca catoꞌ naꞌpiquë paquëërin, panca nininsoꞌ. Aꞌnaya aꞌnaya naꞌpiquë Quisoso caꞌtanoꞌsanënpita nininënaꞌ ninshitopi. Shonca catoꞌ yaꞌhuërin niꞌton, yaꞌipi nanitopi.

¹⁵ Ina ninanosoꞌ, pancana. Mitro pochin oro quëran nininsoꞌ anquëni yaꞌhuëtërin aꞌnicaso marëꞌ. Ina masahuaton, aꞌnirin. Ninanoꞌ, pairatopisoꞌ, yaꞌcoanaroꞌsaꞌ, inapita aꞌnirin.

¹⁶ Cato huaranca cato pasa quiromitro naporopitërinsoꞌ. Inapochachin pancanatërinsoꞌ ninin. Inaparinsontaꞌ cato huaranca cato pasa quiromitro inaparin.

¹⁷ Pairatopisontaꞌ aꞌnirin. Anquëni niponahuëꞌ, piyapiꞌsaꞌ maꞌsha aꞌnipiso pochin aꞌniton: “Saota shonca aꞌnatërápo mitro yaꞌhuëtërin,” tënin.

¹⁸ Pairasoꞌ naꞌpi paꞌton ninin quëran nipi. Caspi itopisoꞌ. Ina ninanosoꞌ oro quëransáchin ninin. Oro niponahuëꞌ, iꞌhua iꞌhuanánshin quënantërëꞌ.

¹⁹ Paira paquëëmarinquë noyápiachin nipi. Nisha nisha naꞌpi paꞌton nininsopita quëran nipi. Shonca catoꞌ nisha nisha yaꞌhuërin. Yaꞌnatiirinsosoꞌ caninton, caspi itopi. Ina quëran niantarinsoꞌ caninchin, sapiro itopi. Ina quëran caninton niponahuëꞌ, huiꞌtonchin huiꞌtonchin ninin, acata itopi. Ina piquëran canora niponahuëꞌ, caninton pochin yaꞌnorin, ismirarita itopi.

²⁰ Ina quëran quëhuanën nisahuaton, piꞌpian huiri huiríton huiꞌshatërin. Onisi itopi. Ina quëran niantarinsontaꞌ quëhuashin, cornarina itopi. Ina piquëransoꞌ shaꞌpíchin, crisorito itopi. Ina quëran caninton, piriro itopi. Ina quëran niantarinso shaꞌpiton, topasio itopi. Ina quëransoꞌ crisoprasa itopi. Inantaꞌ caninton chachin. Ina piquëransoꞌ caninton niponahuëꞌ, piꞌpisha piꞌpisha quëhuanën yaꞌhuëtërin. Casinto itopi. Yaꞌnatontarinsosoꞌ caninchin, amatista itopi. Yaꞌipi quëran shonca catoꞌ yaꞌhuërin.

²¹ Yaꞌcoanaroꞌsantaꞌ noyápiachin. Aꞌnaya aꞌnaya panca huiri naꞌpi quëran nipi. Cachintaꞌ oro quëran chachin ninin. Orosachin niponahuëꞌ, iꞌhua iꞌhuanánshin quënantërëꞌ.

Yosë chachin aꞌpintarinpoasoꞌ

²² Inaquësoꞌ co Yosë chinotacasoꞌ pëiꞌ yaꞌhuërinhuëꞌ. Yosë chini chiníquën nanantërinso chachin yaꞌipi parti yaꞌhuarin. Carniroaꞌhuantaꞌ yaꞌhuarin niꞌton, noya noya chinotarihuaꞌ.

²³ Inatohuaꞌ paꞌpatëhuaꞌ, co huachi piꞌi, yoqui, inapita nohuantarihuahuëꞌ. Tata Yosë chachin huënaráchin aꞌpintarinpoaꞌ. Carniroaꞌhuantaꞌ aꞌpintarinpoaꞌ.

²⁴ Inaquë nisha nisha piyapinpoaꞌ napopianachin yonquiarihuaꞌ. Noya aꞌpintarinpoaꞌ. Nisha nisha copirnoroꞌsantaꞌ isoroꞌpaquë chiníquën nanantaponaraihuëꞌ, naporoꞌ Yosëíchin yonquirapi. “Ma noyacha Yosësoꞌ catahuarinpoa paya,” tosapi.

²⁵ Inatohuaꞌ co huachi tashiarinhuëꞌ. Yaꞌcoanaroꞌsantaꞌ co huachi oncotapihuëꞌ.

²⁶ Naporoꞌ nisha nisha piyapinpoaꞌ noya noya nicatëhuaꞌ, inaquë yaꞌhuarihuaꞌ. “Ma noyacha Yosësoꞌ niꞌton, anoyacancantërinpoa paya,” taꞌtëhuaꞌ, inasáchin yonquiarihuaꞌ.

²⁷ Noyasáchin inaquë yaꞌhuaponaꞌ. Co mantaꞌ osha yaꞌhuërarinhuëꞌ. Co noyahuëꞌ nipisopitasoꞌ, co yaꞌconaponahuëꞌ. Aꞌnaquën nonpinatonaꞌ: “Imarai quiyantaꞌ,” topirinahuëꞌ, co inapitasoꞌ yaꞌconaponahuëꞌ. Carniroaꞌhua imarëhuasopitaráchin inaquë yaꞌhuëcontarihuaꞌ. Nanpirin quiricaquë nininënpoapita nani ninshitërinpoaꞌ.