Apocalipsis 20 - Chayahuita (Shahui)

Huaranca piꞌipi nininsoꞌ

¹ Ina quëran aꞌna anquënintaꞌ inápa quëran oꞌmararin, niꞌnahuë. Panca catina, niahui, inapita sëꞌquërin. Niahuisoꞌ sopairoꞌsaꞌ oncorapirinsoꞌ parti iꞌsoacaso marëꞌ sëꞌquërin.

² Oꞌmarahuaton, panca yaꞌhuan pochin nininsoꞌ masarin. Sopai chachin inasoꞌ. Iráca quëran huarëꞌ piyapi nonpintërin, Satanasë itopisoꞌ. Ina masahuaton, catinaquë tonporin. Huaranca piꞌipintaꞌ nipirinhuëꞌ co niꞌquiritarinhuëꞌ.

³ Tonporahuaton, nanin acoporoꞌ nininquë tëꞌyatarin. Nani tëꞌyatahuaton, oncorapiarin. Oncorapirahuaton, noyá paꞌpirapitarin ama pipicaso marëhuëꞌ. Huaranca piꞌipi co nanitarinhuëꞌ piyapiꞌsaꞌ nonpintacasoꞌ. Ina quëran ocoiantapirinhuëꞌ, co huaꞌqui quëranhuëꞌ Yosëri anaꞌintomiatarin.

⁴ Ina quëran huaꞌnarëso pochin niantarahuë. Naꞌa piyapiꞌsaꞌ quënanahuë. Yosëri nani acorin coisë pochin nicacaiso marëꞌ. Aꞌnapitantaꞌ niꞌnahuë. Isoroꞌpaquë yaꞌhuaponaꞌ, Quisosoíchin imapi. Yosë nanamën aꞌchinpi niꞌton, tëpapi. Co maꞌsha paꞌpi tëꞌhuatoroꞌ nininsoꞌ chinotopihuëꞌ. Co nonanpisoꞌ moshapihuëꞌ. Co marcanën niacotopihuëꞌ. “Quisosoíchin imarai,” topachinara, nishitëconotëraꞌpiapi. Inapotopirinahuëꞌ, Quisosori ananpitaantarahuaton, ichihuaꞌanëntarin. Huaranca piꞌipi huaꞌanëntapi.

⁵ Inapitaꞌton ananpitaantarin. Ina quëran nani huaranca piꞌipi nanihuachin, aꞌnapita chiminpisopita ananpitaantarin anaꞌintacaso marëꞌ.

⁶ Quisoso imarëhuasopitaꞌton ananpitaantarinpoaꞌ. Noya nicatëhuaꞌ, nóya cancantarihuaꞌ. Co onporontaꞌ chiminarihuahuëꞌ. Iráca corto huaꞌanoꞌsaꞌ yaꞌhuërin Yosë chinotacaiso marëꞌ. Aꞌna tahuëriso nipirinhuëꞌ, Quisoso imarëhuasopita noya noya chinotarihuaꞌ. Huaranca piꞌipi inarëꞌquënpoaꞌ huaꞌanëntarihuaꞌ.

Sopai huaꞌan anaꞌintomiatërinsoꞌ

⁷ Nani huaranca piꞌipi nanihuachin, sopai ocoiantarin.

⁸ Ocoiantahuachin, isoroꞌpaquë huënantarin nisha nisha piyapiꞌsaꞌ nonpintacaso marëꞌ. Yaꞌipi parti paaton, notohuaroꞌ piyapiꞌsaꞌ nonpintarin, Coco, Macoco inapita itopisoꞌ. Inotë pochin co pichicasohuëꞌ. Sopairi nonpintërin niꞌton, niyontonapi quira nicacaiso marëꞌ.

⁹ Nisha nisha parti quëran niyontonahuatonaꞌ, Yosë piyapinënpita yaꞌhuëpiquë huëꞌsapi. Huëꞌsahuatonaꞌ, ninanonën tancapitapi. Imapisopita yatëpapirinahuëꞌ, Yosëri nosoroaton, inápa quëran panca pën aꞌpaimarin. Anotohuachin, noꞌhuipisopita ahuiquitarin. Yaꞌipimiáchin taꞌhuantapi. Yosë imapisopitaíchin chaꞌësapi.

¹⁰ Ina quëran sopai anaꞌintomiatarin. Huaꞌquiꞌ piyapiꞌsaꞌ nonpintërin niꞌton, Yosëri anaꞌintarin. Panca sono shaꞌpimoꞌshirë chachin pën orotërinquë tëꞌyatarin. Co onporontaꞌ pipiarinhuëꞌ. Inaquë maꞌsha paꞌpi tëꞌhuatoroꞌ nininsontaꞌ parisitarin. Nonpin nanan pënëntonaꞌpintaꞌ inaquë chachin parisitarin. Tahuërirë chachin, tashirë chachin chiníquën parisitapi. Co onporontaꞌ sanoarinhuëꞌ. Co onporontaꞌ pipiapihuëꞌ.

Ayaroꞌ tahuëri anaꞌintërinsoꞌ

¹¹ Ina quëran panca huaꞌanëntacasoꞌ shira quënanahuë, huiríchin nininsoꞌ. Inaquë Yosë huënsëaton, piyapiꞌsaꞌ anaꞌintarin. Chini chiníquën nanantarin niꞌton, isoroꞌpaꞌ, piꞌiroꞌtëꞌ, inapita taꞌhuantopi. Capa nisarin.

¹² Ayaroꞌ tahuëri nani nanirin niꞌton, yaꞌipi chiminpisopita inatohuaꞌ huaniáponaꞌ. Huaꞌanoꞌsaꞌ, topinan piyapiꞌsaꞌ, inapita yaꞌipiya inaquë paꞌsapi. Yosëri anaꞌintacaso marëꞌ ayontonarin. Naporoꞌ quiricaroꞌsaꞌ inápaquë ninshitërinsoꞌ aꞌnaya aꞌnaya oniriarin. Aꞌnasoꞌ nanpirin quirica itopisoꞌ. Inaquë Yosë imapisopita nininënpita nani ninshitopi. Aꞌna quiricantaꞌ yaꞌhuërin. Inaquë yaꞌipi ninëhuasopita ninshitërinpoaꞌ. Noya ninëhuasopita, co noyahuëꞌ ninëhuasopita, yaꞌipiya nani ninshitërinpoaꞌ. Ina nontaton, Yosëri anaꞌintarin.

¹³ Yaꞌipi piyapiꞌsaꞌ Yosëri nontarin. Paꞌitatonaꞌ, marëquë chimiitopi quëran huarëꞌ ananpitaantarin noꞌtëquën anaꞌintacaso marëꞌ. Insëquëso tërantaꞌ chiminpisopita yaꞌipiya yaꞌnorapi. Aꞌnaya aꞌnayanpoaꞌ nontarinpoaꞌ. Co noyahuëꞌ nipatëhuaꞌ, noꞌtëquën anaꞌintarinpoaꞌ.

¹⁴ Chimirin, chiminpisopita yaꞌhuëpiquë, inapita panca sono pën orotárinquë tëꞌyatapi. Inaquë parisitomiatáponaꞌ.

¹⁵ Co nanpirin quiricaquë nininënpita yaꞌhuëhuachinahuëꞌ inaquë chachin aꞌpararin.