Apocalipsis 2 - Chayahuita (Shahui)

Ipisoquë yaꞌhuëpisopita ninshitërinsoꞌ

¹ Ina quëran shaꞌhuitërinco: —Aꞌna quiricaquë ninshitaton, ansiano Ipisoquë yaꞌhuërinsoꞌ aꞌpatëquëꞌ nontohuachin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Inchinanëhuë quëran canchisë tayoraroꞌsaꞌ sëꞌquërahuë. Canchisë sëꞌparahuan nanparin pochin nininsopita huancánachin paꞌsárahuë.

² Nani nohuitëranquëmaꞌ. Yaꞌipi ninamasopita nitotërahuë. Chiníquën ca marëꞌ sacatëramaꞌ. Co amiatomacohuëꞌ, noya ninamaꞌ. Aꞌnaquën co noyahuëꞌ nipachinara, co noya niꞌnamahuëꞌ. Nonpin nanan aꞌchinaꞌpiroꞌsantaꞌ co noya niꞌnamahuëꞌ. ‘Yosë aꞌparincoi, aꞌchinarai,’ itopirinënquëmahuëꞌ, nonpinapi. Inapita natanpatamaꞌ: ‘Co noꞌtëquën aꞌchinpihuëꞌ,’ taꞌtomaꞌ, co natëramahuëꞌ.

³ Imaramacoso marëꞌ aparisitopirinënquëmahuëꞌ, ahuantëramaꞌ. Co yaaꞌporamacohuëꞌ. Ina marëꞌ noya niꞌnanquëmaꞌ.

⁴ Nipirinhuëꞌ, co huachi noya nosororamacohuëꞌ. Iráca yaꞌnan imapomaco, tëhuënchachin nóya nosororamaco. Canpita capinintaꞌ noya ninosororamaꞌ. Iporaso nipirinhuëꞌ co huachi iráca pochin noya ninosororamahuëꞌ. Co huachi cantaꞌ noya nosororamacohuëꞌ. Ina marëꞌ sëtato, co noya niꞌnanquëmahuëꞌ.

⁵ Iráca naporamasoꞌ yonquiantatomaꞌ, noya niantacoꞌ. Yaꞌipi co noyahuëꞌ yonquiramasopita naniantatomaꞌ, yaꞌipi cancanëma quëran nosoroantaco. Naporahuaton canpita capinintaꞌ noya ninosoroantacoꞌ. Co noya cancantantahuatamahuëꞌ, paaparahuatënquëmaꞌ, anaꞌintaranquëmaꞌ. Nanparin tacopirinso pochin nisaramaꞌ. Aꞌna tahuëri yaꞌhuëramaquë co insontaꞌ imasarinacohuëꞌ.

⁶ Napoaponahuëꞌ, nisha aꞌchinaꞌpiroꞌsaꞌ co piꞌpian tërantaꞌ nohuantëramahuëꞌ, Nicoraitaroꞌsaꞌ itopisoꞌ. Co noyahuëꞌ nicacasoꞌ aꞌchintopirinënquëmahuëꞌ, co nohuantëramahuëꞌ natëcamasoꞌ. Carintaꞌ co costarahuëꞌ.

⁷ Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Sopai minsëhuatamaꞌ, Yosëꞌpaꞌ yaꞌhuëmiataramaꞌ. Inatohuaꞌ nanpirin nara nitërinsoꞌ caꞌpatamaꞌ, noya noya nanpimiataramaꞌ. Nani huachi,” itëquëꞌ, ninshitohuatan, itërinco Quisoso.

Ismirinaquë yaꞌhuëpisopita ninshitërinsoꞌ

⁸ Ina quëran shaꞌhuitaantarinco: —Ansiano Ismirinaquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Iráca quëran huarëꞌ yaꞌhuërahuë. Co onporontaꞌ taꞌhuantarahuëꞌ. Chiminaporahuëꞌ, nanpiantarahuë.

⁹ Imaramacoso marëꞌ naꞌcon parisitëramasoꞌ nitotërahuë. Co naꞌa maꞌsha yaꞌhuëtopirinquëmahuëꞌ, Yosë nohuitacamasoachin cancantatomaꞌ, sano cancantëramaꞌ. Aꞌna tahuërintaꞌ Yosëꞌpaꞌ paꞌpatamaꞌ, co mantaꞌ pahuantarinquëmahuëꞌ. Iporaso nipirinhuëꞌ aꞌnaquën chiníquën pinorinënquëmaꞌ. ‘Yosë piyapinëncoi quiyasoꞌ,’ topirinahuëꞌ, Satanasë huëntonënquë yaꞌconpi.

¹⁰ Ipora tahuëriꞌsaꞌ naꞌcon parisitapiramahuëꞌ, ama tëꞌhuacosohuëꞌ. Sopai nohuanton, tashinan pëiquë poꞌmoarinënquëmaꞌ. Yosë aꞌpocamaso marëꞌ napotarinënquëmaꞌ. Shonca tahuëri pochin parisitaramaꞌ. Tëpapirinënquëmaontaꞌ, ama aꞌpocosohuëꞌ. Imamiatohuatamaco, inápaquë acanaranquëmaꞌ. Inatohuaꞌ nanpimiataramaꞌ.

¹¹ Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Sopai minsëhuatamaꞌ, co parisitopiquë paatomaꞌ, parisitomiataramahuëꞌ. Nani huachi,” itëquëꞌ, ninshitohuatan, itërinco.

Pircamoquë yaꞌhuëpisopita ninshitërinsoꞌ

¹² Ina quëran shaꞌhuitaantarinco: —Ansiano Pircamoquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Chiníquën nanantato, sahuëni cato quëran chachin toꞌnapinan pochin nininsoꞌ yaꞌhuëtërinco anaꞌintaꞌhuaso marëꞌ.

¹³ Canpita yaꞌhuëramaquë nohuitërahuë. Inaquë naꞌa piyapiꞌsaꞌ co noyahuëꞌ cancantopi. Satanasëri huaꞌanëntopirinhuëꞌ, canpitasoꞌ noya imaramaco. Antipasë natëtonco, noya pënëntopirinhuëꞌ, ina marëꞌ tëpapi, niꞌnamaꞌ. Satanasë chachin inaquë yaꞌhuërin, tënahuë. Parisitapomarahuëꞌ, co aꞌporamacohuëꞌ. Ina marëꞌ noya niꞌpiranquëmahuëꞌ,

¹⁴ co yaꞌipinquëmaꞌ noꞌtëquën imaramacohuëꞌ. Aꞌnaquëmaꞌ Paramo pochin cancantëramaꞌ. Iráca inasoꞌ Yosë nanamën nitotopirinhuëꞌ, Yosë piyapinënpita nonpintërin. Inimiconënpita huaꞌanën shaꞌhuitërin anishacancantacaiso marëꞌ, Paraco itopisoꞌ. Inari shaꞌhuitohuachina, anishacancantopi. Nisha cancantatonaꞌ, mamanshi moshapi. Moshatonaꞌ, nosha mamanshi marëꞌ acopisontaꞌ caꞌpi. Naporahuaton, monshihuanapi.

¹⁵ Inapochachin aꞌnaquëmaꞌ nisha cancantëramaꞌ. Nisha aꞌchinaꞌpiroꞌsaꞌ aꞌchintohuachinënquëmara, aꞌnaquëmaꞌ natëtomaꞌ, Nicoraitoroꞌsaꞌ aꞌchinpisoꞌ imaramaꞌ.

¹⁶ Napoaton yaꞌipi co noyahuëꞌ yonquiramasopita naniantocoꞌ. Insosona co naniantohuachinhuëꞌ, chiníquën anaꞌintarahuë. Nanamëhuë quëran sahuëni inëshin nininsoꞌ yaꞌhuëarin oshahuanoꞌsaꞌ anaꞌintaꞌhuaso marëꞌ.

¹⁷ Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Sopai minsëhuatamaꞌ, noya cancantarama huachi. Iráca israiroꞌsaꞌ Yosëri cosharoꞌ aꞌpatimarin, mana itopisoꞌ. Inachachin poꞌorahuësoꞌ carimantaꞌ quëchinquëmaꞌ sano cancantacamaso marëꞌ. Imaramaco niꞌton, nasha nininëmaꞌ aꞌnaya aꞌnayanquëmaꞌ acoꞌinquëmaꞌ. Canpitaora nitotaramaꞌ. Huiri naꞌpiquë ninshitahuato, quëchinquëmaꞌ. Cancanëma quëran noya noya nohuitaramaco huachi. Nani huachi,” itëquëꞌ, ninshitohuatan, itërinco.

Tiatiraquë yaꞌhuëpisopita ninshitërinsoꞌ

¹⁸ Ina quëran itaantarinco: —Ansiano Tiatiraquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Yosë huiꞌninco quirica aꞌpataranquëmaꞌ. Yaꞌpirahuë pën nënërinso pochin niꞌton, yaꞌipi yonquiramaso quëran huarëꞌ nitotërahuë. Nantëhuëntaꞌ shaꞌpi huaꞌna pënquë aꞌpërëso pochin niꞌton, huënaráchin yaꞌnorin.

¹⁹ Canpitasoꞌ noya ninamaꞌ. Noya natëtomaco, ninosororamaꞌ. Aꞌnaquëmaꞌ pahuantohuachinquëmara, nicatahuaramaꞌ. Maꞌsha onpoapomarahuëꞌ, noya ahuantëramaꞌ. Yaꞌnan imapomaco, noya ninamaꞌ. Iporasoꞌ naꞌcon naꞌcon nicatahuaramaꞌ. Ina marëꞌ noya niꞌpiranquëmahuëꞌ,

²⁰ co yaꞌipi cancanëma quëran imaramacohuëꞌ. Aꞌna sanapi corto pëiquë chachin nonpin nanan aꞌchintopirinquëmahuëꞌ, co aꞌparamahuëꞌ. Iráca Quisapira paꞌpi co noyahuëꞌ sanapi niponahuëꞌ, chiníquën nanantaton, piyapinëhuëpita anishacancantërin. Inapochachin iporasoꞌ ina sanapi pënënarinquëmaꞌ co noyahuëꞌ nicacamasoꞌ. ‘Noya monshihuanacasoꞌ. Mamanshi moshacaso marëꞌ nosha acohuachina, noya capacasoꞌ. Caꞌcoꞌ,’ itohuachinquëmara, aꞌnaquëmaꞌ natëtomaꞌ, monshihuanamaꞌ. Nosha mamanshi marëꞌ acopisoꞌ caꞌnamaꞌ. Ina pochin ina sanapi nonpintërinquëmaꞌ.

²¹ Co aꞌnaroáchin anaꞌintërahuëꞌ. Huaꞌquiꞌ pënënpirahuëꞌ, co piꞌpisha tërantaꞌ nohuantërinhuëꞌ natëincosoꞌ. Oshahuanacasoꞌ co yaaꞌporinhuëꞌ.

²² Iporaso nipirinhuëꞌ anaꞌintarahuë huachi. Chiníquën aparisitarahuë. Aꞌnapitantaꞌ anishacancantërinsopita co oshanënaꞌ aꞌpohuachinahuëꞌ, chiníquën anaꞌintarahuë.

²³ Sanapi imarinsopitasoꞌ co natërinacohuëꞌ niꞌton, ataꞌhuantarahuë. Ina nicatonaꞌ, yaꞌipi imarinacosopitantaꞌ yonquiapi. ‘Tëhuënchachin Sinioro nohuitërinpoaꞌ. Yonquirëhuasontaꞌ nitotërin. Co noyahuëꞌ nipatëhuaꞌ, noꞌtëquën anaꞌintarinpoaꞌ,’ tosapi.

²⁴ Aꞌnaquëmaso nipirinhuëꞌ co nonpin nanan natëramahuëꞌ. ‘Noya noya nitotërai,’ itopirinënquëmahuëꞌ, ‘Sopai imatonaꞌ, napopi,’ taꞌtomaꞌ, co ina natëramahuëꞌ. Iporahuantaꞌ noya imaramaco niꞌton, co aquëtëꞌ pënënaꞌhuanquëmasoꞌ yaꞌhuërinhuëꞌ.

²⁵ Chiníquën cancantatomaꞌ, oꞌmantaꞌhuaquë huarëꞌ imamiatoco.

²⁶ Sopai minsëhuatamaꞌ, aꞌna tahuëri chiníquën nanan quëtaranquëmaꞌ. Ayaroꞌ tahuëriquë huarëꞌ natëhuatamaco, catahuaramaco nisha nisha piyapiꞌsaꞌ huaꞌanëntaꞌhuaso marëꞌ.

²⁷ Tata Yosë nohuanton, chiníquën nanantërahuë. Canpitantaꞌ catahuaramaco copirnoroꞌsaꞌ co natërinacosopitahuëꞌ anaꞌintaꞌhuasoꞌ. Noꞌpa huëꞌëta huaꞌnaquë paꞌquirëso pochin oshahuanoꞌsaꞌ anaꞌintarihuaꞌ.

²⁸ Naporahuaton, huënio tayora huënaráchin aꞌpininso pochin quëchinquëmaꞌ. Noyápiachin aꞌpintaranquëmaꞌ.

²⁹ Imaramaco niꞌton, Ispirito Santo nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Nani huachi,” itëquëꞌ, ninshitohuatan, itërinco.