Apocalipsis 19 - Chayahuita (Shahui)

¹ Ina quëran notohuaroꞌ inápaquë yaꞌhuëpisopita nonsapi natanahuë. Capa cancantatonaꞌ, chiníquën nonsapi: “¡Ma noyacha Tata Yosëso piyapiꞌsaꞌ nichaꞌërin paya! Chini chiníquën nanantarin niꞌton, yaꞌipi piyapiꞌsari chinochinaꞌ.

² Co topinan quëran anaꞌintërinhuëꞌ. Yaꞌipiya noꞌtëquën anaꞌintërin. Monshihuanaꞌpi pochin nininsoꞌ nani anaꞌintërin. Inasoꞌ notohuaroꞌ piyapiꞌsaꞌ anishacancantërin. Imapisopita tëpapi niꞌton, iꞌhuërëtërin,” topi.

³ Ina quëran itantapi: “¡Ma noyacha Tata Yosëso paya! Co noyahuëꞌ nipisopita anaꞌintërin niꞌton, huiquitapi. Pën co onporontaꞌ tacopiarinhuëꞌ. Conaintaꞌ tomontápon,” tosapi.

⁴ Napohuachinara, cato shonca catapini ansianoꞌsaꞌ, catapini maꞌsharoꞌsa pochin nininsopita, inapitantaꞌ isonahuatonaꞌ, Yosë chinotapi: “¡Naporinchi paya! ¡Ma noyacha Tata Yosëso paya! Shiranënquë huënsëaton, yaꞌipiya huaꞌanëntarin,” tosapi.

⁵ Ina quëran Yosë shiranën quëran noninsoꞌ natanahuë. “Yaꞌipi Yosë imaramasopita ina chinotocoꞌ. Huaꞌanoꞌsanquëmahuë nipon, piyapinënpitanquëmahuë nipon, inasáchin yonquicoꞌ. Ina nóya nicatomaꞌ natëramaꞌ niꞌton, ‘Ma noyanquëncha, Sinioro, quëmaso paya,’ itocoꞌ,” tënin.

Carniroaꞌhua saꞌacasoꞌ pita nisarinsoꞌ

⁶ Ina quëran huaꞌhuayátërahuë piyapiꞌsaꞌ nonsapisoꞌ natanahuë. Panca soꞌpora pochin tënëëntarin. Chiníquën huira ahuëtërinso pochin natanahuë. “Ma noyacha Tata Yosëso paya. Chini chiníquën nanantaton, yaꞌipiya huaꞌanëntarin.

⁷ Huëcoꞌ capa cancantahuaꞌ. Noya cancantahuaꞌ. Inasáchin noya noya niꞌton, natëahuaꞌ. Nani ora nanirin Carniroaꞌhua saꞌarinso pochin nicacasoꞌ. Imapisopitarëꞌ yaꞌhuëmiatarin. Niꞌcoꞌ. Sanapi yasoꞌyahuachina, noyápiachin nitaparin. Inapochachin imapisopita nitapacancanpi.

⁸ Huiríchin aꞌmorëso pochin Yosëri noyápiachin cancan quëtërin. Tëhuënchachin inari catahuarin noya nicacaiso marëꞌ,” tosapi.

⁹ Ina quëran anquëni shaꞌhuitërinco ninshitaꞌhuaso marëꞌ: “Carniroaꞌhua saꞌacasoꞌ pita nininquë përapachinquëmaꞌ, nóya cancantaramaꞌ,” itërinco. Ina quëran itaantarinco: “Yosë chachin noꞌtëquën shaꞌhuitërinquën niꞌton, ina ninshitëquëꞌ,” itërinco.

¹⁰ Naporoꞌ isonahuato, yachinotopirahuëꞌ. “Ama chinotocosohuëꞌ. Casoꞌ anquënico. Co Yosëcohuëꞌ. Canpita pochachin cantaꞌ Yosë natërahuë. Quisoso nanamën imaramaꞌ niꞌton, Yosëíchin yonquiquëꞌ,” itërinco. Quisoso nanamënáchin aꞌchinpatëhuaꞌ, noꞌtëquën pënëntarëhuaꞌ.

Quisoso canatërinsoꞌ

¹¹ Ina quëran Yosë nohuanton, huaꞌnarëso pochin niantarahuë. Piꞌiroꞌtëꞌ niꞌsoatohuachina, huiri cahuario quënantarahuë. Ina aipi quëmapi huënsëarin. Noꞌtëquën nonaꞌpi itërëhuasoꞌ. Maꞌsona tërantaꞌ shaꞌhuitohuachinpoaꞌ, co onporontaꞌ nonpintarinpoahuëꞌ. Noꞌtëquën huaꞌanëntarin. Quira nicaton, inimicoroꞌsaꞌ minsëarin.

¹² Yaꞌpirin pën nënërinso pochin huënaratarin. Naꞌa yancotëroꞌsaꞌ oro quëran nininsoꞌ yancorin. Inaquë aꞌna nininëontaꞌ ninshitërin, inaora nitotërinsoꞌ.

¹³ Aꞌmorinsoꞌ huënaiquë aꞌshitërin. Inasoꞌ Yosë nanamën chachin ninin.

¹⁴ Notohuaroꞌ inápaquë yaꞌhuërinsopitari imasapi, huiríchin aꞌmopisoꞌ. Inapitantaꞌ huiri cahuarioroꞌsaꞌ aipi huënsëatonaꞌ, sontaroꞌsa pochin paꞌsapi.

¹⁵ Quëmapi quëchitërinsoꞌ nanamën quëran sahuëni pochin nininsoꞌ yaꞌhuëtërin. Chiníquën nanantaton, nanamën quëran chachin inimiconënpita minsëarin. Noninsoꞌ sahuëni pochin nicaton, topinan noncharapirinhuëꞌ, co noyahuëꞌ nipisopita minsëarin. Piyapiꞌsaꞌ noꞌtëquën anaꞌintarin. Yosëri noꞌhuirin niꞌton, oparoꞌsaꞌ toꞌpoirëso pochin oshahuanoꞌsaꞌ chiníquën anaꞌintarin.

¹⁶ Aipi aꞌmorinsoquë nani ninshitërin: iso quëmapi chini chiníquën nanantaton, yaꞌipi copirnoroꞌsantaꞌ, huaꞌanëntarin. inasáchin natëcasoꞌ yaꞌhuërin tënin. Tonamënquëntaꞌ ina chachin ninshitërin.

¹⁷ Ina quëran aꞌna anquënintaꞌ quënantarahuë. Inápaquë piꞌi aꞌpininquë huanirahuaton, soporoꞌsaꞌ përasarin. Yaꞌipi chanaroꞌ caꞌtëroꞌsaꞌ chiníquën përasarin. —Huëcoꞌ Yosëri ataꞌhuantarinsopita caꞌquicoꞌ.

¹⁸ Naꞌa piyapiꞌsaꞌ chiminaponaꞌ. Copirnoroꞌsaꞌ, capitanoꞌsaꞌ, chiníquën nanantopisopita, inapita chiminaponaꞌ. Cahuarionënpitarë chachin taꞌhuantaponaꞌ. Huaꞌanoꞌsaꞌ piyapinënpitarë chachin co Yosë imapihuëꞌ niꞌton, taꞌhuantapi. Maꞌhuanoꞌsaꞌ, saꞌahuaroꞌsaꞌ, inapitanta co chaꞌësapihuëꞌ, tënin anquëni.

¹⁹ Ina quëran maꞌsha paꞌpi tëꞌhuatoroꞌ nininsoꞌ quënantarahuë. Naꞌa copirnoroꞌsaꞌ sontaroꞌsanënpitarë chachin niyontonapi. Huiri cahuario aipi huënsërinsoꞌ minsëcaiso marëꞌ quira nisapi. Piyapinënpitantaꞌ yaminsëpirinahuëꞌ.

²⁰ Quira nipachinara, huiri cahuario aipi huënsërinsoari canarin. Canarahuaton, maꞌsha paꞌpi tëꞌhuatoroꞌ nininsoꞌ masarin. Nonpin nanan pënëntonaꞌpintaꞌ, masarin. Inasoꞌ, sacaiꞌ nininsoꞌ nicaton, notohuaroꞌ piyapiꞌsaꞌ nonpintërin maꞌsha paꞌpi tëꞌhuatoroꞌ nininsoꞌ imacaiso marëꞌ. Marcanën niacotahuatonaꞌ, mamanshinën moshapirinahuëꞌ, minsëarin huachi. Minsërahuaton, cato chachin masahuaton, anaꞌintomiatarin. Nanpirapirinahuëꞌ, parisitopiquë tëꞌyatarin huachi. Inaquë panca sono shaꞌpimoꞌshirë chachin pën tënëntápon. Co onporontaꞌ pipiapihuëꞌ.

²¹ Inapita imapisopitantaꞌ ataꞌhuantarin. Inaora nanamën quëran yaꞌipiya ataꞌhuantarin. Chiminpachinaꞌ, chanaroꞌ caꞌtëroꞌsari huëcatonaꞌ, natëaquë huarëꞌ noshinënaꞌ caꞌsapi.