Apocalipsis 18 - Chayahuita (Shahui)

Papironia taꞌhuantërinsoꞌ

¹ Ina quëran aꞌna anquënintaꞌ inápa quëran oꞌmararin, niꞌnahuë, chiníquën nanantërinsoꞌ. Huënaráchin niꞌton, isoroꞌpaꞌ aꞌpintërin.

² Oꞌmarahuaton, chiníquën nonin. “Nani huachi Papironia taꞌhuantarin. Panca ninanoꞌ niponahuëꞌ, taꞌhuantarin. Inaquë nisha nisha sopairoꞌsaꞌ yaꞌhuaponaꞌ. Nisha nisha chanaroꞌ caꞌtëroꞌsantaꞌ inaquë paꞌsapi.

³ Papironiaroꞌsari notohuaroꞌ piyapiꞌsaꞌ anishacancantopi. Ina pochin cancantatonaꞌ, copirnoroꞌsaꞌ, piyapinënpita, inapita co noyahuëꞌ nisapi. Monshihuaninso pochin nicatonaꞌ, Yosë naniantopi. Maꞌhuanoꞌsantaꞌ inaquë paꞌanatonaꞌ, nani maꞌsha canapirinahuëꞌ,” tënin anquëni.

⁴ Ina topachina, inápa quëran aꞌnari itërin: —Yaꞌipi imaramasopita pënënaranquëmaꞌ, natanco. Niꞌcona papironiaroꞌsaꞌ anishacancantochinënquëmaꞌ. Ina quëran pipiramaso pochin nicatomaꞌ, ama inapita pochin cancantocosohuëꞌ. Co noyahuëꞌ nipatamaꞌ, Yosë anaꞌintarinquëmaꞌ canpitantaꞌ.

⁵ Naꞌcon oshahuanpi niꞌton, co Yosëri naniantarinhuëꞌ anaꞌintacasoꞌ.

⁶ Aꞌnapita aparisitopi niꞌton, noꞌtëquën anaꞌintacasoꞌ yaꞌhuërin. Naꞌcon naꞌcon iꞌhuërëtacasoꞌ yaꞌhuërin. Paꞌpi co noyahuëꞌ nipi.

⁷ Pita nicacaisoáchin cancantopi. Maꞌsharáchin yonquiatonaꞌ, aꞌnapita nocanpi niꞌton, Yosëri aparisichin. Iporasoꞌ cancanëna quëran yonquirapi. “Quiyasoꞌ nóya yaꞌhuërai. Huaꞌan pochin nicatoi, co mantaꞌ pahuantërincoihuëꞌ. Co quëyoron pochincoihuëꞌ. Co onporontaꞌ sëtaraihuëꞌ,” topirinahuëꞌ.

⁸ Aꞌnanaya Yosëri anaꞌintarin huachi. Naꞌa piyapiꞌsaꞌ canioponaꞌ, sëtaponaꞌ, tanarotaponaꞌ, napoaponaꞌ. Yosëri chini chiníquën nanantaton, anaꞌintarin. Ahuiquitarin.

⁹ Nisha nisha copirnoroꞌsantaꞌ anishacancantërinsopita sëtaponaꞌ. Huiquitërinsoꞌ nicatonaꞌ, naꞌnëponaꞌ. Yosëri anaꞌintohuachin, naꞌnëponaꞌ.

¹⁰ Aquë quëran quënanpachinaꞌ, paꞌpi tëꞌhuatapi. “¡Maꞌhuantacha ninin paya! Papironia panca ninanoꞌ niponahuëꞌ, aꞌnaroáchin ataꞌhuantopi. Yosëri anaꞌintërin,” tosapi.

¹¹ Maꞌsha paꞌanaꞌpiroꞌsantaꞌ sëtatonaꞌ, naꞌnëponaꞌ. Nani maꞌsha paꞌanacaso marëꞌ yaꞌhuëtopirinahuëꞌ, co huachi insoari tërantaꞌ paꞌantaponhuëꞌ.

¹² Notohuaroꞌ oro, prata, naꞌpiraꞌhuaya paꞌton nininsopita, morin, sita, caninëꞌmëtëꞌ, quëhuanëꞌmëtëꞌ, inapita yaꞌhuëtopirinahuëꞌ, co incari tërantaꞌ paꞌantarinhuë huachi. Nisha nisha pimonontëroꞌsaꞌ, huiripomon quëran maꞌsha nipisopita, nontëroꞌsaꞌ paꞌton nininsopita quëran maꞌsha nipisoꞌ, shaꞌpihuaꞌna, huaꞌnamia, huirinaꞌpi, ina quëranpita maꞌsha nipiso yaꞌhuërin.

¹³ Nisha nisha pimoanacaso marëntaꞌ yaꞌhuërin. Canina, nisha nisha cosharoꞌ apimotacasoꞌ nininsopita, yonarin pochin pimóchin nininsoꞌ, pimo yaquiꞌ, pimo huaꞌsaiꞌ, huino, tomaꞌ, arina, trico, inapita yaꞌhuërin. Ohuacaroꞌsaꞌ, ohuicaroꞌsaꞌ, cahuarioroꞌsaꞌ, toronanoꞌsaꞌ, inapitantaꞌ yaꞌhuërin. Piyapiroꞌsantaꞌ paꞌanapi asacatacaiso marëꞌ. Piyapi chachin nipirinhuëꞌ, maꞌsharoꞌsa pochin yapaꞌanpi. Notohuaroꞌ maꞌsha yaꞌhuëpirinhuëꞌ, co huachi paꞌanapihuëꞌ.

¹⁴ Yaꞌhuëhuanoꞌsaꞌ itaponaꞌ: “Huayoroꞌsaꞌ nayaramasoꞌ capa ninin. Naꞌa maꞌsha yaꞌhuëtopirinënquëmahuëꞌ, capa nisarin. Co huachi noya yaꞌhuapomahuëꞌ,” tosapi.

¹⁵ Maꞌsha paꞌanaꞌpiroꞌsaꞌ naꞌcon canapirinahuëꞌ, sëtapi huachi. Tëꞌhuatatonaꞌ, aquë quëran notërapi. Naꞌnëpona pochin

¹⁶ itaponaꞌ: “¡Maꞌhuantacha ninin paya! Panca ninanoꞌ niponahuëꞌ, taꞌhuantërin. Sanapi noyápiachin aꞌmorinso pochin nipirinhuëꞌ, co huachi yaꞌhuërinhuëꞌ. Morin, caninëꞌmëtëꞌ, quëhuanëꞌmëtëꞌ, inapita aꞌmosahuaton, oro, naꞌpiraꞌhuaya paꞌton nininsoꞌ, inapita pëꞌpëpirinhuëꞌ,

¹⁷ aꞌnaroáchin maꞌshanënpitarë chachin taꞌhuantërin huachi,” tosapi. Nanchahuanoꞌsantaꞌ marë paꞌtatonaꞌ, naꞌa maꞌsha aquë quëran quëpirinahuëꞌ. Inapoatonaꞌ, naꞌcon canapirinahuëꞌ, co huachi paꞌsapihuëꞌ. Piyapinënpitantaꞌ inaquë sacatatonaꞌ, canapirinahuëꞌ, co huachi canapihuëꞌ. Inapitantaꞌ aquë quëran niꞌsapi.

¹⁸ Pëiroꞌsaꞌ huiquitohuachinaꞌ, panca conaitarinsoꞌ quënanapi. Quënanpachinaꞌ, paꞌyanapi. “Co onporontaꞌ aꞌna ninanoꞌ iso pochin niꞌchinëhuahuëꞌ. Ma notohuaroꞌ maꞌshanënpita yaꞌhuëtopirinahuëꞌ, taꞌhuantopi,” tosapi.

¹⁹ Chiníquën sëtatonaꞌ, moꞌshiquë nipashimototapi. Iráca sëtohuachinara, inachintopisoꞌ. Naꞌnëpona pochin itaponaꞌ: “¡Maꞌhuantacha ninin paya! Panca ninanoꞌ nipirinhuëꞌ, ayarin. Marë nanchaquë paꞌtohuatëira, naꞌa maꞌsha paꞌanatoi, quënai. Paꞌanpatëira, naꞌcon canapiraihuëꞌ, aꞌnaromaráchin maꞌshanënpitarë chachin taꞌhuantërin huachi,” tosapi.

²⁰ Yaꞌipi inápaquë yaꞌhuëramasopitaso nipirinhuëꞌ, ama ina marëꞌ sëtocosohuëꞌ. Imaramaꞌ niꞌton, noya cancantocoꞌ. Aparisitopirinënquëmahuëꞌ, nani Yosëri anaꞌintërin huachi. Ina marëꞌ Quisoso caꞌtaninsopita, pënëntonaꞌpiroꞌsaꞌ, inapitantaꞌ noya cancanchinaꞌ.

²¹ Ina quëran huaꞌnarëso pochin niantarahuë. Aꞌna anquënintaꞌ yaꞌnoantarin, chiníquën nanantërinsoꞌ. Pancaraꞌpi masahuaton, marëquë tëꞌyaitërin. “Pancaraꞌpi tëꞌyaitërahuëso pochachin Papironia taꞌhuantarin. Panca ninanoꞌ niponahuëꞌ, taꞌhuantarin. Yosëri chiníquën anaꞌintarin. Co huachi yaꞌhuaponhuëꞌ.

²² Iráca naꞌa arparoꞌsaꞌ piꞌnipi. Pirinanoꞌsaꞌ, tronpitaroꞌsaꞌ, inapitantaꞌ pihuipirinahuëꞌ, iporasoꞌ co huachi mosica natanapihuëꞌ. Co huachi sacatoroꞌsaꞌ inaquë sacatapihuëꞌ. Co huachi cosharoꞌ nipisoꞌ natanapihuëꞌ.

²³ Co huachi nanpara iꞌchinpiapihuëꞌ. Co huachi inaquë saꞌasapihuëꞌ. Iráca notohuaroꞌ maꞌsha paꞌanaꞌpiroꞌsaꞌ inaquë yaꞌhuatonaꞌ, naꞌcon canapirinahuëꞌ, noyá taꞌhuantapi. Naꞌcon pënotatonaꞌ, nisha nisha piyapiꞌsaꞌ isoroꞌpaquë anishacancantopirinahuëꞌ, Yosëri anaꞌintarin huachi,” tënin.

²⁴ Iráca quëran huarëꞌ inaquë Yosë imapisopita, pënëntonaꞌpiroꞌsaꞌ, inapita tëpapi. Ina marë antaꞌ chiníquën anaꞌintarin huachi.