Apocalipsis 17 - Chayahuita (Shahui)

Monshihuanaꞌpi pochin nininsoꞌ

¹ Ina quëran aꞌna anquëni minëꞌ sëꞌquënaꞌpi nininsoꞌ huëcapairahuatonco, itërinco: “Huëquëꞌ paꞌa piyapiꞌsaꞌ anaꞌintacasoꞌ yaꞌhuërinsoꞌ aꞌnochinquën. Pasëquë aꞌna sanapi panca iiroꞌsaꞌ aipi huënsëárin. Inasoꞌ paꞌpi co noyahuëꞌ. Monshihuanaꞌpi pochin piyapiꞌsaꞌ anishacancantërin.

² Yaꞌipi copirnoroꞌsaꞌ ina natëtonaꞌ, co noyahuëꞌ nisapi. Monshihuaninso pochin cancantatonaꞌ, Yosë naniantapi. Piyapinënpitantaꞌ ina imatonaꞌ, co noyahuëꞌ nicacaisoáchin yonquiapi,” itërinco.

³ Itohuachincora, huaꞌnarëso pochin niantarahuë. Ispirito Santo nohuanton, co piyapi yaꞌhuërinquëhuëꞌ quëparinco. Inaquë co noyahuëꞌ sanapi niꞌnahuë. Maꞌsha paꞌpi tëꞌhuatoroꞌ nininsontaꞌ quënanahuë. Iporasoꞌ quëhuanën yaꞌnorin. Canchisë mototahuaton, shonca pomon yaꞌhuëtërin. Nisha nisha nininën yaꞌhuëtërin, Yosë pinorinsoꞌ. Yaꞌipi nonënquë ninshitëraꞌpiarin. Ina aipi sanapi huënsëarin.

⁴ Inasoꞌ noyápiachin aꞌmoponahuëꞌ, co noyahuëꞌ cancantërin. Aꞌmorinsoꞌ paꞌton ninin. Quëhuashin, quëhuanën, inapita aꞌmorin. Naporahuaton, oro, naꞌpiaꞌhuaya paꞌton nininsopita, inapita pëꞌtënin. Monshihuanaꞌpi pochin nitaparin. Minë oro quëran nininsoꞌ sëꞌquërin. Inaquë taparoꞌ nininsoráchin yaꞌhuërin. Oꞌshitërinso pochin naꞌa piyapiꞌsaꞌ anishacancantërin. Anoꞌpirin, amonshihuanin, napotërin

⁵ Nininën pochin nininsoꞌ tëꞌinquë ninshitopi. Ninshitopirinahuëꞌ, maꞌtaꞌ tapon naporinsoꞌ co piyapiꞌsaꞌ nitotopihuëꞌ. iso sanapisoꞌ papironiaquë yaꞌhuëpisopita pochin cancantërin. paꞌpi monshihuantëꞌ niꞌton, ina aꞌchinin quëran monshihuanpi. nisha nisha co noyahuëꞌ yonquipi topi, ninshitatonaꞌ.

⁶ Tëhuënchachin ina sanapi paꞌpi co noyahuëꞌ cancantërin. Quisoso imapisopita co quëꞌyarinhuëꞌ. “Quisoso imarai,” topachinara, atëpatërin. Notohuaroꞌ atëpatahuaton, noꞌpirinso pochin paꞌyatërin. Ina nicato, panca paꞌyanahuë. Ina quëran anquëni itërinco:

⁷ “¿Onpoatontaꞌ paꞌyanansoꞌ? Carinquën anitochinquën. Sanapi, maꞌsha ina aipi huënsërinsoꞌ inapita maꞌsona tapon naporinsoꞌ aꞌchinchinquën nitotëquëꞌ. Ina maꞌshasoꞌ canchisë mototahuaton, shonca pomonën yaꞌhuëtërin.

⁸ Iráca isoroꞌpaquë yaꞌhuërin. Iporasoꞌ co yaꞌhuërinhuëꞌ. Aꞌna tahuëriso nipirinhuëꞌ yaꞌnoantarin. Acoporoꞌ quëran huëantarin. Ayaroꞌ tahuëri nanihuachin, parisitopiquë paꞌsarin. Nipirinhuëꞌ, coꞌhuara paꞌshátërasohuëꞌ, aꞌnanaya yaꞌnoantahuaton, piyapiꞌsaꞌ aꞌpayanarin. Co Quisoso imapihuëꞌ niꞌton, paꞌyanapi. Quisoso imapi naporini, iráca quëran huarëꞌ nininënpita nanpirin quiricaquë ninshichitonhuëꞌ.

⁹ Noꞌtëquën yonquiamaquë huarëꞌ maꞌsona tapon naporinsoꞌ nitotaramaꞌ. Maꞌsha canchisë motohuaninsoꞌ, canchisë motopi tapon naporin. Ina aipi sanapi huënsërinsoꞌ. Naporahuaton, canchisë copirnoroꞌsaꞌ ayonquirinpoaꞌ.

¹⁰ Aꞌnatërápo nani iráca huaꞌanëntëraꞌpiapirinahuëꞌ, chiminaꞌpiapi. Iporasoꞌ aꞌnari huaꞌanëntantarin. Aꞌnaíchin pahuanarin yaꞌipiroꞌpaꞌ huaꞌanëntacasoꞌ. Aꞌna tahuëri yaꞌnoarin. Nipirinhuëꞌ, co huaꞌquiꞌ huaꞌanëntaponhuëꞌ.

¹¹ Ina piquëran maꞌsha paꞌpi tëꞌhuatoroꞌ nininsoari huaꞌanëntapon. Nani canchisë copirnoroꞌsaꞌ ayaponahuëꞌ, inapita pochin nicaton, huaꞌanëntapirinhuëꞌ, aꞌna tahuëri Yosëri ocoiarin. Ocoirahuaton, parisitopiquë aꞌpararin.

¹² Shonca pomontërinso pochin shonca copirnoroꞌsaꞌ yaꞌhuaponaꞌ. Inapitasoꞌ co huaꞌanënchatërapihuëꞌ. Tahuëri nanihuachin, nisha nisha piyapiꞌsaꞌ huaꞌanëntaponaꞌ. Naporo chachin maꞌsha paꞌpi tëꞌhuatoroꞌ nininsontaꞌ huaꞌanëntapon. Napoaponahuëꞌ, co huaꞌqui huaꞌanëntapihuëꞌ.

¹³ Shonca copirnoroꞌsasoꞌ napopianachin yonquiatonaꞌ, maꞌsha paꞌpi tëꞌhuatoroꞌ nininsoꞌ natëponaꞌ. Piyapinënpitantaꞌ camaiaponaꞌ ina natëcaiso marëꞌ.

¹⁴ Inapitasoꞌ Carniroaꞌhua yaminsëatonaꞌ, quira nisapirinahuëꞌ, co nanitapihuëꞌ minsëcaisoꞌ. Inari minsëapon. Inasoꞌ Quisocristo chachin. Chini chiníquën nanantarin niꞌton, yaꞌipiya huaꞌanëntarin. Inasáchin natëcasoꞌ yaꞌhuërin. Piyapinënpitari imasapi. Yosëri huayonin niꞌton, natëmiatapi,” itërinco anquëni.

¹⁵ Ina quëran aꞌchintaantarinco. —Panca iroꞌsantaꞌ niꞌnan, ina aipi sanapi huënsërinsoꞌ. Inantaꞌ aꞌchinchinquën nitotëquëꞌ. Inapochachin aꞌna tahuëri nisha nisha piyapiꞌsaꞌ yaꞌhuaponaꞌ, nisha nisha nananquë nonpisopita. Huaꞌhuayatërahuëꞌ yaꞌhuaponaꞌ. Nisha nisha copirnori huaꞌanëntërinsopita.

¹⁶ Oshaquëran shonca copirnoroꞌsaꞌ, maꞌsha paꞌpi tëꞌhuatoroꞌ nininsoꞌ, inapita co huachi sanapi nohuantapihuëꞌ. Noꞌhuirahuatonaꞌ, masapi. Masahuatonaꞌ, aiꞌnanpiratapi. Chiníquën aparisitatonaꞌ, tëparapi. Ina quëran ahuiquitapi.

¹⁷ Yosë nohuanton, copirnoroꞌsaꞌ yonquiapi maꞌsha tëꞌhuatoroꞌ nininsoꞌ natëcaiso marëꞌ. Napopianachin yonquiatonaꞌ, co noya sanapihuëꞌ nininsoꞌ ataꞌhuantapi. Yosë nohuantërinso chachin nisapi.

¹⁸ Sanapi panca iiroꞌsaꞌ aipi huënsërinso pochin panca ninanoꞌ yaꞌhuapon. Yaꞌhuëhuanoꞌsaꞌ paꞌpi co noyahuëꞌ cancantapi. Naꞌa piyapiꞌsaꞌ, copirnoroꞌsaꞌ, inapita anishacancantaponaꞌ maꞌsharáchin yonquicaiso marëꞌ. Yosë aꞌpocaiso marëꞌ yanonpintapi. Nonpintápirinahuëꞌ, Yosë nohuanton, ataꞌhuantapi antaꞌ.