Apocalipsis 16 - Chayahuita (Shahui)

Minëroꞌsaquë yaꞌhuërinsoꞌ tëꞌyanantopisoꞌ

¹ Naporoꞌ chinotopiso pëiꞌ inápaquë yaꞌhuërinso quëran chiníquën noninsoꞌ natanahuë. —Piyapiꞌsaꞌ yaꞌhuërinquë paatomaꞌ, minëroꞌsaquë yaꞌhuërinsoꞌ tëꞌyanantocoꞌ. Tëꞌyanantohuatamaꞌ, parisitapi. Paꞌpi co noyahuëꞌ cancantopi niꞌton, Yosëri chiníquën noꞌhuiton, anaꞌintarin, itërin anquëniroꞌsaꞌ.

² Ina natanahuaton, aꞌnaraꞌ paꞌnin. Isoroꞌpaꞌ nocorahuaton, minëquë yaꞌhuërinsoꞌ tëꞌyanantërin. Tëꞌyanantohuachina, naꞌa piyapiꞌsaꞌ panca taꞌtarapi. Sëncopi pochin pipitëraꞌpiaponaꞌ. Co noyatochináchinhuëꞌ nisapi. Maꞌsha paꞌpi tëꞌhuatoroꞌ nininsoꞌ imapisopita parisitapi. Marcanën niacotopi niꞌton, Yosë nohuanton, taꞌtaráchin nisapi. Mamanshinëntaꞌ moshapi niꞌton, parisitáponaꞌ. Aꞌna tahuëri maꞌsha onpocasoꞌ ninoton, aꞌnotërinco, niꞌnahuë.

³ Ina quëran aꞌna anquënintaꞌ paaton, minëquë yaꞌhuërinsoꞌ marëquë tëꞌyaitarin. Inaquë tëꞌyaitohuachina, huënaiꞌ taranarin. Chimipi huënainën pochin anën nisarin. Napoaton yaꞌipi marëquë yaꞌhuërinsopita taquiapi.

⁴ Ina piquëran aꞌna anquënintaꞌ paꞌnin. Minëquë yaꞌhuërinsoꞌ iroꞌsaquë tëꞌyaitohuachina, inapitantaꞌ huënaiꞌ taranarin. Tëquëin, iꞌsharoꞌsaꞌ, inapita napoapi.

⁵ Napohuachina, anquëni iiꞌ aꞌpairinsoari Yosë nontaton tapon: “Noꞌtëquën Sinioro anaꞌintaran. Iráca quëra huarëꞌ yaꞌhuaton, ipora huantaꞌ nanpiaran. Noyasáchin ninan.

⁶ Naꞌa imarinënsopita tëpapi. Noya pënëntopirinahuëꞌ, tëpapi niꞌton, iꞌhuërëtaton, anaꞌintaran. Iiroꞌsaꞌ huënaiꞌ atarantëran niꞌton, ina tërantaꞌ oꞌocaisoꞌ yaꞌhuërin. Noꞌtëquën anaꞌintaran,” itërin.

⁷ Artaro quëraontaꞌ noninsoꞌ natanahuë: “Tëhuënchachin Sinioro quëmasáchin yaꞌipi huaꞌanëntëran. Chini chiníquën nanantaton, noꞌtëquën nonan. Noꞌtëquën anaꞌintaran,” tënin.

⁸ Ina quëran aꞌna anquënintaꞌ paꞌnin anaꞌintacaso marëꞌ. Minëquë yaꞌhuërinsoꞌ piꞌiquë tëꞌyanantohuachina, piꞌi chini chiníquën piꞌcatarin. Pën pochin piꞌcataton, piyapiꞌsaꞌ chiníquën aparisitarin.

⁹ Panca huëyaponaraihuë, co nirotapihuëꞌ. Yosë noꞌhuitonaꞌ, pinosapi: “Sopai pochin cancantaton, aparisitarinpoaꞌ niꞌsora,” tosapi. Parisitaponaraihuëꞌ, co nohuantapihuëꞌ oshanënaꞌ aꞌpocaisoꞌ. Co Yosë yayonquiapihuëꞌ.

¹⁰ Nani catapini anquëniroꞌsari anaꞌintaponaꞌ paꞌpi. Ina quëran aꞌnantaꞌ maꞌsha marë pipirinsoꞌ yaꞌhuërinquë paꞌnin. Huaꞌanëntacasoꞌ shiranënquë chachin paaton, minëquë yaꞌhuërinsoꞌ tëꞌyanantarin. Tëꞌyanantohuachina, yaꞌipiya tashiarin. Piyapiꞌsaꞌ chiníquën parisitatonaꞌ, tarëtapi.

¹¹ Yosësoꞌ chini chiníquën nanantopirinhuëꞌ, piyapiꞌsari taꞌtaráchin nicatonaꞌ, noꞌhuipi. “Paꞌpi co noyahuëꞌ niꞌton, aparisitarinpoaꞌ,” topi pinotonaꞌ. Co naporo tërantaꞌ oshanënaꞌ yaaꞌpoapihuëꞌ.

¹² Ina quëran aꞌna anquënintaꞌ paꞌsahuaton, minëquë yaꞌhuërinsoꞌ panca iꞌquë tëꞌyaitërin, Iyopiratisiiꞌ itopiquë. Inaquë tëꞌyaitohuachina, pancaiꞌ niponahuëꞌ, huinquintomaton, yaniromarin. Copirnoroꞌsaꞌ noya pëntonacaiso marëꞌ yaniromarin. Piꞌi pipirin parti quëran huëꞌsapi quira nicacaiso marëꞌ.

¹³ Ina quëran panca yaꞌhuan pochin nininsoꞌ niantarahuë. Maꞌsha marë quëran pipirinsoꞌ, nonpin nanan pënëntonaꞌpi, inapitantaꞌ niantarahuë. Cara chachin nanamëna quëran cara sopairoꞌsaꞌ pipipi, inpo pochin yaꞌnopisoꞌ.

¹⁴ Sopairoꞌsaꞌ niꞌton, nani maꞌsha nanitapapi. Sacaiꞌ nininsopita nisapi piyapiꞌsari natëcaiso marëꞌ. Nonpintatonaꞌ, napoapi. Nisha nisha copirnoroꞌsaꞌ camairaꞌpiaponaꞌ quira nicacaiso marëꞌ. Anaꞌintacasoꞌ tahuëri nani yaꞌcaritëriarin niꞌton, niyontonaponaꞌ. “Canpoari Yosë minsëahuaꞌ,” taꞌtonaꞌ, napoaponaꞌ.

¹⁵ Nani Quisoso shaꞌhuitërinpoaꞌ: “Niꞌcoꞌ, iyaroꞌsaꞌ. Aꞌnanaya oꞌmantararahuë. Ihuatë pochin nicato, co nitotasënquëmahuëꞌ, oꞌmantararahuë niꞌton, nani tahuëri ninaco. Noya ninahuatamaco, noya cancantaramaꞌ. Yosë noya niꞌsarinquëmaꞌ. Noyápiachin aꞌmorëso pochin noyasáchin nicoꞌ. Ina quëran oꞌmantahuato, co tapanapomahuëꞌ. Noya cancantaramaꞌ,” itërinpoaꞌ.

¹⁶ Anaꞌintacasoꞌ tahuëri yaꞌcaritohuachin, naꞌa copirnoroꞌsaꞌ ayontonapi quira nicacaiso marëꞌ. Armaquitono itopiquë niyontonapi. Cotio nananquë napopisoꞌ.

¹⁷ Aꞌnaíchin anquëni pahuanarin pacacasoꞌ. Ina paꞌsahuaton, minëquë yaꞌhuërinsoꞌ tëꞌyanantarin. Ihuanquë tëꞌyanantohuachina, inápaquë Yosë chinotopiso pëi quëran chiníquën nonin. Huaꞌanëntërinso shiranën quëran “¡nani huachi!” tosarin.

¹⁸ Napohuachina, oꞌcoritarin. Huira pochin chiníquën tënëntarin. Naporoꞌ panca ocohua paꞌsarin. Iráca quëran huarëꞌ co onporontaꞌ ina pochin paꞌchininhuëꞌ niponahuëꞌ, napoarin.

¹⁹ Co Yosë natëpisopitahuëꞌ yaꞌhuëpiquë nocharotarin. Panca ninanoꞌ niponahuëꞌ, huëncharoaton, cararoꞌtë huarëꞌ niacoarin. Nisha nisha ninanoroꞌsaquë taꞌhuantapi. Co Yosëri naniantërinhuëꞌ anaꞌintacasoꞌ. Papironiaquë naꞌa piyapiꞌsaꞌ yaꞌhuëpirinahuëꞌ, co noyahuëꞌ nicacaisoráchin yonquipi niꞌton, anaꞌintërin. Inapochachin aꞌna tahuëri chiníquën noꞌhuiton, ataꞌhuantarin.

²⁰ Naporoꞌ motopiroꞌsaꞌ, soꞌtonoꞌsaꞌ, inapita co huachi yaꞌhuaponahuëꞌ.

²¹ Inápa quëran ocaiꞌ anotapon. Panca masho niꞌton, quëquën. Catapini shonca quiro pochin quëꞌninsoꞌ. Naꞌa anotohuachin, piyapiꞌsaꞌ chiníquën parisitapi. Napoaton Yosë chiníquën noꞌhuitonaꞌ, pinosapi huachi.