Apocalipsis 15 - Chayahuita (Shahui)

Canchisë anquëniroꞌsaꞌ anaꞌintacaiso marëꞌ acorinsoꞌ

¹ Ina quëran Yosë nohuanton, huaꞌnarëso pochin niantarahuë. Aꞌna tahuëri oshahuanoꞌsaꞌ chiníquën anaꞌintarin. Ina anitotincoso marëꞌ nani maꞌsha aꞌnotërinco. Paꞌpi huëhuëpiroꞌ niꞌnahuë. Canchisë anquëni yaꞌhuarin. Aꞌnaya aꞌnaya Yosëri yaaꞌparin piyapiꞌsaꞌ anaꞌintacaso marëꞌ. Ina nohuanton, isoroꞌpaquë nani maꞌsha onpocaisoꞌ yaꞌhuapon. Inapoaton, anaꞌintërinsoꞌ naniarin.

² Coꞌhuara anquëniroꞌsaꞌ paꞌshatërasoihuëꞌ, inápaquë panca sonoꞌ niantarahuë. Isihuico pochin niponahuëꞌ, huënaratarin. Pën pochin yaꞌnorin. Sono yonsanquë naꞌa piyapiꞌsaꞌ quënanahuë, maꞌsha paꞌpi tëꞌhuatoroꞌ nininsoꞌ minsëpisopita. Isoroꞌpaquë yaꞌhuaponaꞌ, co mamanshinën moshapihuëꞌ. Co marcanën niacotopihuëꞌ. Parisitaponaraihuëꞌ: “Yosëíchin imarai,” taꞌtonaꞌ, imamiatopi. Iporasoꞌ Yosëꞌpaꞌ yaꞌhuatonaꞌ, noya yaꞌhuërapi. Arparoꞌsaꞌ Yosëri quëtërin piꞌniatonaꞌ cantacaiso marëꞌ.

³ Iráca Moisësë Yosëíchin natëton, inimiconënpita minsërahuaton, cantarin. Inapochachin isopitantaꞌ cantarapi. Carniroaꞌhua cantarinsontaꞌ cantarapi. “¡Ma noyanquëncha, Sinioro, quëmaso paya! Yaꞌipi nanitaparan. Ma noyacha catahuarancoi paya. Chiníquën nanantaton, noya ninan. Noya huaꞌanëntaton, noꞌtëquën anaꞌintëran. Co onporontaꞌ nonpinanhuëꞌ. Yaꞌipi piyapiꞌsaꞌ natëinënquën.

⁴ Yaꞌipiya Sinioro tëꞌhuachinënquën. Yaꞌipiya yonquiꞌinënquën. Quëmasáchin nóyanquën. Aꞌna tahuëri noꞌtëquën oshahuanoꞌsaꞌ anaꞌintaran niꞌton, nisha nisha piyapiꞌsaꞌ huëcatonaꞌ, chinotarinënquën,” topi cantatonaꞌ.

⁵ Ina quëran Yosë chinotopiso pëiꞌ inápaquë yaꞌhuërinsoꞌ niꞌsoatërin, niꞌnahuë. Acoana Yosë caposonën yaꞌhuërinquë chachin quënanahuë.

⁶ Canchisë anquëniroꞌsaꞌ ina quëran pipiapi. Huiríchin huiríchin aꞌmopi. Tëꞌtëtënquë oro pochin nininquë nitonpopi. Piyapiꞌsaꞌ oshahuanpi niꞌton, Yosëri aꞌpaarin nisha nisha aparisitacaiso marëꞌ.

⁷ Ina marëꞌ canchisë minëroꞌsa pochin nininsoꞌ yaꞌhuërin, oro quëran nipisoꞌ. Aꞌnaraꞌ maꞌsha pochin nininsoꞌ minëroꞌsaꞌ masahuaton, anquëniroꞌsaꞌ quëtërin. “Paatomaꞌ, minëroꞌsaquë yaꞌhuërinsoꞌ tëꞌyanantocoꞌ. Aꞌnaya aꞌnaya tëꞌyanantohuatamaꞌ, Yosëri chiníquën anaꞌintarin huachi,” taꞌton, aꞌnaya aꞌnaya quëtërin. Yosësoꞌ co onporontaꞌ chimianinhuëꞌ, niꞌsárinpoaꞌ.

⁸ Noya noya niꞌton, yaꞌipi nanitaparin. Ina tëꞌhuatacaiso marëꞌ conai pochin nininsoꞌ tomontarin. Yaꞌipi Yosë chinotopiso pëiꞌ inápaquë yaꞌhuërinsoꞌ yanquëëtërin. Co insontaꞌ nanitërinhuëꞌ inaquë yaꞌconacasoꞌ. Nani piyapiꞌsaꞌ anaꞌintohuachina, naporo huarëꞌ noya yaꞌcoantapi.