Apocalipsis 14 - Chayahuita (Shahui)

Pasa catapini shonca catapini huaranca cantapisoꞌ

¹ Ina quëran huaꞌnarëso pochin niantahuato, Carniroaꞌhua quënantarahuë. Sion motopiquë huaniarin. Inarëꞌ pasa catapini shonca catapini huaranca piyapiꞌsaꞌ yaꞌhuapi, niꞌnahuë. Imapi niꞌton, ina nininën niacotëꞌyatopi. Tata Yosë nininëontaꞌ niacotopi.

² Ina quëran inápaquë chiníquën tënëntërinsoꞌ natanahuë. Panca soꞌpora pochin tënëntarin. Chiníquën huira pochin natanpirahuëꞌ, arparoꞌsaꞌ piꞌniatonaꞌ, naporapi.

³ Nasha cantanën inápaquë cantarapi. Yosë notënanquë cantarapi. Ansianoꞌsaꞌ, catapini maꞌsharoꞌsa pochin nininsopita, inapitantaꞌ natanapi. Pasa catapini shonca catapini huaranca imapisopita cantapisoꞌ. Isoroꞌpaquë yaꞌhuaponaꞌ, Quisosori nichaꞌërin. Oshanëna marëꞌ chiminaton, anoyacancantërin niꞌton, inapitaráchin nanitopi ina cantacaisoꞌ.

⁴ Noyápiachin cancantapi. Co piꞌpisha tërantaꞌ monshihuanaꞌpi pochin cancantopihuëꞌ. Yosëíchin yonquiapi. Insëquësona Carniroaꞌhua paꞌpachin, imasapi. Isoroꞌpaquë yaꞌhuëpirinahuëꞌ, nani Yosëri nichaꞌërin. Yaꞌnan cayarinso macatëꞌ Yosë quëtërëso pochin nicatonaꞌ, inasáchin chinotapi. Nani tahuëri Carniroaꞌhuantaꞌ chinotapi.

⁵ Co piꞌpisha tërantaꞌ nonpinpihuëꞌ. Noyápiachin cancantapi.

Cara anquëniroꞌsaꞌ paꞌsapisoꞌ

⁶ Ina quëran aꞌna anquënintaꞌ quënanahuë. Inápaquë yanponarin noya nanan shaꞌhuicaso marëꞌ. Nisha nisha piyapiꞌsaꞌ, nisha nisha nananquë nonpisopita, yaꞌipiya shaꞌhuitarin.

⁷ —Yosë tëꞌhuatatomaꞌ, natëcoꞌ. Anaꞌintacasoꞌ tahuëri nani naniriarin niꞌton, inasáchin imacoꞌ. Yaꞌipi isoroꞌpaꞌ, inápaquë yaꞌhuërinsoꞌ, marë, iiroꞌsaꞌ, yaꞌipiya ninin niꞌton, chinotocoꞌ, itarin anquëniri chiníquën nontaton.

⁸ Ina quëran aꞌna anquënintaꞌ paaton, shaꞌhuirarin: —Iráca naꞌa oshahuanoꞌsaꞌ Papironiaquë yaꞌhuëpi. Panca ninanoꞌ nipirinhuëꞌ, Yosë nohuanton, taꞌhuantopi. Inapita pochin cancantopisopita yaꞌhuantapirinahuëꞌ, Yosëri anaꞌintarin. Paꞌpi co noyahuëꞌ yonquiatonaꞌ, naꞌa piyapiꞌsaꞌ anishacancantopi niꞌton, taꞌhuantapi. Noyá taꞌhuantapi, tënin.

⁹ Ina piquëran aꞌna anquënintaꞌ paaton, chiníquën nonsarin. —Ama maꞌsha paꞌpi tëꞌhuatoroꞌ nininsoꞌ natëcosohuëꞌ. Ama mamanshinën moshacosohuëꞌ. Tëꞌyamaquë marcanën yaacotarinquëmaꞌ huaꞌanëntinquëmaso marëꞌ. Ama natëcosohuëꞌ. Ina chinotohuatamaꞌ, Yosë anaꞌintarinquëmaꞌ.

¹⁰ Chiníquën noꞌhuitënquëmaꞌ, main huino oꞌshitërëso pochin anaꞌintarinquëmaꞌ. Parisitopiquë aꞌpahuachinquëmaꞌ, pënquë parisitaramaꞌ. Carniroaꞌhua, anquëniroꞌsaꞌ inapita niꞌtërantapaquë noꞌtëquën anaꞌintarinquëmaꞌ.

¹¹ Co onporontaꞌ pën tacopiaponhuëꞌ. Inaquë conaintaꞌ tomontápon. Parisitápona. Co sanoarinhuëꞌ. Insopitasona maꞌsha paꞌpi tëꞌhuatoroꞌ nininsoꞌ natëtonaꞌ, mamanshinën moshahuachinaꞌ, tahuërirë chachin, tashirë chachin chiníquën parisitáponaꞌ. Co marcanën niacotacasoꞌ yaꞌhuërinhuëꞌ, tënin.

¹² Ina yonquiatomaꞌ, chiníquën cancantocoꞌ. Yosë nanamën natëtomaꞌ, Quisocristo imamiatocoꞌ. Aparisitopirinënquëmahuëꞌ, ama aꞌpocosohuëꞌ.

¹³ Ina quëran inápa quëran noninsoꞌ natanahuë: —Apira shaꞌhuichinquën ninshitëquëꞌ: Insosona Sinioro imarinso marëꞌ chiminpachina, noya cancanchinaꞌ, tënin. Ina quëran Ispirito Santo tapon: —Tëhuënchachin Yosëꞌpaꞌ paꞌpachinaꞌ, chinotapi. Yosë marëꞌ sacatopi niꞌton, inápaquë canapi huachi, tënin.

Piyapiꞌsaꞌ mapisoꞌ

¹⁴ Ina quëran huaꞌnarëso pochin niantahuato, chitoroꞌ quënanahuë, huiríchin nininsoꞌ. Inaquë aꞌnasoꞌ huënsëarin, piyapi pochin yaꞌnorinsoꞌ. Chiníquën nanantaton, oro quëran nininsoꞌ yancorin. Imirin quëran nisha sahuëni sëꞌquërin nitërinsoꞌ macacaso marëꞌ.

¹⁵ Naporoꞌ anquëni Yosë pëinën quëran huëꞌnin. Huëcaton, shaꞌhuitiarin: —Nani ora nanirin, maquë huachi. Trico noya cayahuachina, aꞌnaroáchin sahuëniquë manëꞌ. Inapochachin iporasoꞌ ora nanirin piyapiꞌsaꞌ macacaso marëꞌ, itërin.

¹⁶ Itohuachina, manin. Cayarinsoꞌ manëso pochachin manin huachi.

¹⁷ Ina quëran aꞌna anquëni yaꞌhuërë Yosë yaꞌhuërin quëran pipiantarin. Inantaꞌ nisha sahuëni yaꞌhuëtërin, inëshin nininsoꞌ.

¹⁸ Aꞌna anquënintaꞌ Yosë chinotopi quëran huëꞌnin. Inari pën niꞌsarin ora nanihuachin, anaꞌintacaso marëꞌ. Huëcaton, shaꞌhuitërin: —Nani ora nanirin isoroꞌpaꞌ anaꞌintacaso marëꞌ. Opa cayahuachina, manëso pochachin aꞌnaroáchin maquëꞌ, itërin anquëniri.

¹⁹ Itohuachina, aꞌnaroáchin co imapisopitahuëꞌ manin anaꞌintacaso marëꞌ. Yosëri chiníquën noꞌhuiton, noꞌtëquën anaꞌintarin.

²⁰ Niꞌcoꞌ. Oparoꞌsaꞌ mapachinara, ninano aipiran quëparapi. Inaquë panca nanpiquë toꞌpoipi. Opaiꞌ pipihuachina, quëhuain ninin. Huënai pochin yaꞌnorin. Inapochachin anaꞌintohuachina, panca huënaiꞌ paꞌsarin, niꞌnahuë. Cara pasa quiromitro pochin pancaitërinsoꞌ. Cahuario motën yaꞌcari huarëꞌ anpotarin huachi.