Apocalipsis 13 - Chayahuita (Shahui)

Maꞌsha marë quëran pipirinsoꞌ

¹ Ina quëran huaꞌnarëso pochin niantarahuë. Aꞌna maꞌsha paꞌpi tëꞌhuatoroꞌ nininsoꞌ marë quëran pipiarin. Canchisë motohuan nisahuaton, shonca pomonën yaꞌhuëtërin. Aꞌnaya aꞌnaya pomonënquë yancotëꞌ yaꞌhuëtërin. Huaꞌan pochin chiníquën nanantërin niꞌton, naporin. Motënaquë nininënpita nani ninshitërin, Yosë pinorinsoꞌ. “Yosë quëran chini chiníquën nanantërahuë,” taꞌton, ninshitërin.

² Yarani pochin niponahuëꞌ, tocani pochin nantëtërin. Nanamënsoꞌ paꞌpini pochin nanantërin. Panca yaꞌhuani chachin chiníquën nanan quëtapon niꞌton, chiníquën nanantaton, copirno yaꞌconapon.

³ Aꞌna motën ahuëtohuachinaꞌ, chiminatë pochin niponahuë, noyatantarin. Noyatohuachin, yaꞌipi piyapiꞌsaꞌ paꞌyanapi. Paꞌyatatonaꞌ, imasapi.

⁴ Panca yaꞌhuan chinotatonaꞌ, acorinsontaꞌ chinotapi. Notohuaroꞌ piyapiꞌsaꞌ ina yonquiatonaꞌ, natëapi: “Ma noyacha inaso paya. Chini chiníquën nanantarin. ¿Incaritaꞌ nanitërin ina minsëcasoꞌ?” tosapi.

⁵ Sopai nohuanton, maꞌsha marë quëran pipirinsoꞌ naꞌcon Yosë pinosarin. “Yosë quëran chini chiníquën nanantërahuë. Co ina chinotacasoꞌ yaꞌhuërinhuëꞌ,” tosarin. Sopairi catahuarin niꞌton, copirno yaꞌconarin. Chini chiníquën nanantarin niꞌton, yaꞌipi copirnoroꞌsaꞌ camaiarin. Cara piꞌipi miria yaꞌipiya huaꞌanëntarin.

⁶ Naꞌcon Yosë pinosarin. “Casoꞌ Yosëco,” toconapon. Yosë yaꞌhuërinsontaꞌ nocanarin. Inaquë yaꞌhuërinsopitantaꞌ pinosarin.

⁷ Yosë imapisopita co quëꞌyarinhuëꞌ. Sopai nohuanton, aparisitarin. Quira nisahuaton, canatarin. Notohuaroꞌ piyapiꞌsaꞌ nisha nisha parti yaꞌhuëpisopita huaꞌanëntarin. Nisha nisha nananquë nonpisopita huaꞌanëntarin.

⁸ Huaꞌhuayatërahuëꞌ piyapiꞌsari natëapi. Carniroaꞌhua imapisopitaíchin co ina chinotapihuëꞌ. Inasoꞌ aꞌna quirica yaꞌhuëtërin. Nanpirin quirica itopisoꞌ. Inaquë nininënpita nani ninshitërin. Isoroꞌpaꞌ ninin quëran huarëꞌ imapisopita ninoton, inaquë ninshitërin. “Canpoa marëꞌ Carniroaꞌhua chiminin,” taꞌtonaꞌ, ina imasapi. Aꞌnapitaso nipirinhuëꞌ co nanpirin quiricaquë nininënpita yaꞌhuërinhuëꞌ niꞌton, maꞌsha marë quëran pipirinsoꞌ chinotapi.

⁹ Huëratëhuanpatamaꞌ, noya natanatomaꞌ, yonquicoꞌ.

¹⁰ “Mapachinënquëmaꞌ, parisitacasoꞌ yaꞌhuërin. Sahuëniquë yatëpahuachinënquëmaꞌ, ahuantacasoꞌ yaꞌhuërin. Ina yonquiatomaꞌ, chiníquën cancantocoꞌ. ‘Yosë catahuarinpoaꞌ,’ taꞌtomaꞌ, imamiatocoꞌ.”

Maꞌsha noꞌpa quëran pipirinsoꞌ

¹¹ Ina quëran huaꞌnarëso pochin niantarahuë. Aꞌna maꞌshantaꞌ noꞌpa quëran pipiarinsoꞌ niꞌnahuë. Carniroaꞌhua pochin catoꞌ pomonaꞌhuaya yaꞌhuëtërin. Noya yaꞌnoaponahuëꞌ, panca yaꞌhuan pochin chiníquën nonsarin.

¹² Inantaꞌ chiníquën nanantapon. Chiníquën nanantaton, yaꞌipi piyapiꞌsaꞌ camaiarin maꞌsha marë quëran pipirinsoꞌ chinotacaiso marëꞌ. Inasoꞌ motën ahuëtohuachinara, chiminatë pochin niponahuëꞌ, noyatantarinsoꞌ niꞌton, piyapiꞌsari chinotapi.

¹³ Maꞌsha noꞌpa quëran pipirinsontaꞌ nani maꞌsha nanitaparin piyapiꞌsaꞌ nonpintacaso marëꞌ. Ina nohuanton, pën inápa quëran anotarin. Piyapiꞌsaꞌ niꞌtërantapaquë napoarin.

¹⁴ Nisha nisha acoarin, sacaiꞌ nininsoꞌ. Maꞌsha paꞌpi tëꞌhuatoroꞌ nininsoꞌ niꞌtonënquë naporin. Piyapiꞌsari niꞌpachinaꞌ: “Tëhuënchachin inasoꞌ Yosë,” tosapi. Notohuaroꞌ piyapiꞌsaꞌ nonpintarin. Ina quëran itapon: “Panca mamanshi niahuaꞌ. Sahuëniquë ahuëatonaꞌ shitëpapirinahuëꞌ, noyataantarinsoꞌ nonanatëhuaꞌ chinotahuaꞌ,” itohuachinaꞌ, nisapi.

¹⁵ Ina quëran aquëtë chachin piyapiꞌsaꞌ nonpintarin. Ina nohuanton, mamanshi nanpirinso pochin yaꞌnoarin. Noninso pochin natanapi. “Insosona co moshahuachincohuëꞌ tëpacoꞌ,” tosarin.

¹⁶ Ina quëran camaiantarin. “Marca niacotacasoꞌ yaꞌhuërin. Tëꞌyamaquëhuë nipon, inchinan imiramaquëhuë nipon niacotocoꞌ. Huaꞌanoꞌsaꞌ, topinan piyapiꞌsaꞌ, maꞌhuanoꞌsaꞌ, saꞌahuaroꞌsaꞌ, patronoꞌsaꞌ piyapinënpitarë chachin, yaꞌipiya niacotacasoꞌ yaꞌhuërin. Co aꞌnaya tërantaꞌ pahuantacasoꞌ yaꞌhuërinhuëꞌ,” tosarin.

¹⁷ Co marca niacotohuachinahuëꞌ, co huachi nanitapihuëꞌ maꞌsha paꞌanatonaꞌ canacaisoꞌ. Co paꞌanacaiso tërantaꞌ nanitapihuëꞌ. Maꞌsha marë quëran pipirinsoꞌ marcanën niacotëraꞌpiaponaꞌ. Aꞌnaquën nininën chachin niacotapi. Aꞌnaquënso nipirinhuëꞌ nomironën niacotapi.

¹⁸ Noꞌtëquën yonquiamaquë huarëꞌ nomironën nitotaramaꞌ. “Piyapi niponahuëꞌ, inasáchin natërëhuaꞌ,” taꞌtonaꞌ, saota pasa saota shonca saota niacotapi.