Apocalipsis 12 - Chayahuita (Shahui)

Panca yaꞌhuan pochin yaꞌnorinsoꞌ

¹ Ina quëran Yosë nohuanton, huaꞌnarëso pochin niantarahuë ayonquiinpoaso marëꞌ. Aꞌna sanapi inápaquë quënanahuë. Aꞌmorinsoꞌ huënaráchin huënaráchin. Piꞌi pochin aꞌpinin. Nantëanaquë yoqui yaꞌhuërin. Shonca catoꞌ tayoraroꞌsari yancotë pochin motën tahuitërin.

² Inasoꞌ cayoron. Nani yahuaiarin niꞌton, chiníquën iquitaton, parisitárin.

³ Ina quëran aꞌna maꞌsha inápaquë yaꞌnorin, niantarahuë. Panca yaꞌhuan pochin niponahuëꞌ, ina quëran panca panca ninin. Quëhuashin nisahuaton, canchisë motën yaꞌhuëtërin, shonca pomohuanin. Aꞌnaya aꞌnaya motënquë huaꞌan pochin yancotë yancorin.

⁴ Huinamën quëran inápaquë huihuicontahuachina, tayoraroꞌsaꞌ aꞌtëntontarahuaton, isoroꞌpaquë tëꞌyatimarin. Patoma pochin tëꞌyatimarin. Ina quëran huaꞌnarëso pochin quënantarahuë. Panca yaꞌhuan pochin nininsoꞌ paꞌnin. Sanapi notënanquë huaniarin. “Huaihuachin, huaꞌhuin matahuato, caꞌsarahuë,” taꞌton, ninararin.

⁵ Ninasoꞌ, huairin. Quëmapiaꞌhuaya huairin. Inasoꞌ chini chiníquën nanantaton, aꞌna tahuëri yaꞌipi piyapiꞌsaꞌ huaꞌanëntapon. Noꞌtëquën anaꞌintapon niꞌton, yaꞌhuani yatëparin. Ina marëꞌ ninarápirinhuëꞌ. Nani nasitohuachina, Yosëri nichaꞌërin. Yaꞌhuërinquë chachin quëpantarin ichihuaꞌanëntacaso marëꞌ.

⁶ Aꞌshinso nipirinhuëꞌ, co piyapi yaꞌhuërinquëhuëꞌ taꞌarin. Inaquë Yosëri nani tapatërin yaꞌhuëcaso marëꞌ. Cara piꞌipi miria pochin inaquë yaꞌhuarin niꞌton, cosharoꞌ quëtapi.

⁷ Ina quëran huaꞌnarëso pochin niantarahuë. Inápaquë quira nisapi. Anquëni huaꞌan Miquiri itopisoꞌ anquëninënpita camairin panca yaꞌhuan pochin nininsoꞌ minsëcaiso marëꞌ. Inantaꞌ anquëniroꞌsaꞌ camairinsopitarë chachin ahuëtopirinahuëꞌ,

⁸ co nanitopihuëꞌ minsëcaisoꞌ. Miquiri anquëninënpitari minsërahuatonaꞌ, isoroꞌpaquë aꞌpaimapi.

⁹ Inapotatonaꞌ, panca yaꞌhuan pochin nininsoꞌ inápa quëran tëꞌyatopi. Inasoꞌ sopai chachin, Satanasë itopisoꞌ. Yaꞌipi piyapiꞌsaꞌ yanonpintërin. Ina minsërahuatonaꞌ, anquëninënpitarë chachin isoroꞌpaquë tëꞌyatopi.

¹⁰ Ina quëran inápaquë chiníquën noninsoꞌ natanahuë. “Tëhuënchachin sopai yaminsëpirinpoahuëꞌ, Yosë nichaꞌërinpoaꞌ. Quisocristorë chachin huaꞌanëntarinpoaꞌ. Sopairi Yosë nontaton, naꞌcon shaꞌhuirapirinpoaꞌ. ‘Oshahuanpi,’ itëraꞌpiarinpoaꞌ. Tahuërirë chachin tashirë chachin shaꞌhuirapiápirinpoahuëꞌ, nani Yosëri minsërin.

¹¹ Carniroaꞌhua chiminaton, huënainën quëran anoyacancantërinpoaꞌ niꞌton, sopai minsërëhuaꞌ. Nanamën shaꞌhuitatëhuaꞌ, minsërëhuaꞌ. Yatëpapirinënpoahuëntaꞌ, co aꞌporëhuahuëꞌ, tosapi.

¹² Napoaton inápaquë yaꞌhuëpisopita noya cancanchinaꞌ. Yaꞌipiroꞌpaquë, marëquë, inaquëpita yaꞌhuëpisopitaso nipirinhuëꞌ, parisitapi. ¡Maꞌhuantacha nisapi paya! Sopai paꞌsárin minsëcaso marëꞌ. ‘Co huaꞌquiya quëranhuëꞌ Yosë anaꞌintarinco,’ taꞌton, chiníquën noꞌhuitërin. Noꞌhuitaton, piyapiꞌsaꞌ yaminsërin.”

¹³ Ina quëran Yosë nohuanton, huaꞌnarëso pochin niantarahuë. Yaꞌhuan pochin nininsoꞌ nani isoroꞌpaquë tëꞌyatopi. Tëꞌyatohuachina, sanapi huairinsoꞌ aparisitapirinhuëꞌ,

¹⁴ Yosëri catahuarin chaꞌëcaso marëꞌ. Panca onian pochin anpiantëhuanaton, taꞌarin. Co piyapi yaꞌhuërinquëhuëꞌ paꞌsahuaton, cara piꞌipi miria pochin inaquë naꞌpiarin. Yosë nohuanton, maꞌsha yaꞌhuërin capacasoꞌ.

¹⁵ Chiníquën noꞌhuiton, yaꞌhuani yamapirinhuëꞌ. Nanamën quëran panca iiꞌ pipirin. Tëquëin pochin pipirin sanapi quëpacaso marëꞌ.

¹⁶ Iiꞌ tëꞌyatopirinhuëꞌ, noꞌpaꞌ huëncharohuachina, yaꞌipiya yanquirin. Co chimiitërinhuëꞌ.

¹⁷ Napoaton sopairi chiníquën noꞌhuirin. Noꞌhuiton, paꞌnin aꞌnapita huaꞌhuinpita ahuëapon. Yosë natëpisopita tëpacaso marëꞌ paꞌnin. Quisoso imasapi niꞌton, aparisitarin.

¹⁸ Ina yonquiaton, marë yonsanquë huaniarin.