Apocalipsis 11 - Chayahuita (Shahui)

Catoyaꞌpi Yosëri aꞌparinsoꞌ

¹ Ina quëran mitro pochin nininsoꞌ quëtërinaco aꞌnicaꞌhuaso marëꞌ. —Yosë chinotopiso pëiꞌ aꞌniconquëꞌ. Artarontaꞌ aꞌniquëꞌ. Nani aꞌnihuatan, piyapiꞌsantaꞌ Yosë chinotopisopita onposona yaꞌhuëpisoꞌ nitotacaso marëꞌ pichiquëꞌ.

² Iꞌiratëso nipirinhuëꞌ, ama aꞌniquësohuëꞌ. Inaquë nisha piyapiꞌsaꞌ yaꞌconapi. Co Yosë imaponaraihuëꞌ, inaquë yaꞌconahuatonaꞌ, tapirapi. Yosë ninanonëontaꞌ tapirapi. Cara piꞌipi miria pochin napotapi.

³ Naporo tahuëriꞌsaꞌ catoꞌ quëmapi aꞌpararahuë pënëntacaiso marëꞌ. Yaaꞌpahuato, chiníquën nanan quëtarahuë noꞌtëquën shaꞌhuicaiso marëꞌ. Piyapiꞌsaꞌ naꞌcon oshahuanpi niꞌton, catoꞌ quëmapi sëtapi. Sëtatonaꞌ saꞌcatën nininsoꞌ aꞌmosapi piyapiꞌsaꞌ oshanënaꞌ ayonquicaiso marëꞌ. Cara piꞌipi miria pënëntapi, itërinco Yosë.

⁴ Catoyaꞌpisoꞌ nóya pënëntaponaꞌ, Yosëri chachin aꞌparinsoꞌ. Panca nanparinoꞌsaꞌ orotërinso pochin nicatonaꞌ, Yosë nanamën anitotaponaꞌ. Oripo nara pochin nipi antaꞌ, Yosë notënanquë yaꞌhuërinsoꞌ.

⁵ Yosë nohuanton, sacaiꞌ nininsopita nanitapapi. Aꞌnapitari yatëpahuachinaꞌ, nanamëna quëran pën pipiarin. Pipihuachina, yatëpapisopita huëyarapi. Huëyarahuatonaꞌ, chiminapi. Ina pochin Yosëri catahuarin niꞌton, minsëapi.

⁶ Iráca pënëntonaꞌpiroꞌsaꞌ nani maꞌsha nipi piyapiꞌsaꞌ ayonquicaiso marëꞌ. Inapochachin catoyaꞌpi Yosëri aꞌparinsoꞌ, nani maꞌsha nanitapaapi. Yosë nontahuachinaꞌ, co oꞌnanaponhuëꞌ. Inapotatonaꞌ, pënëntáponaꞌ. Tëquëiontaꞌ nontahuachinaꞌ, huënaiꞌ taranapon. Ina quëran Yosë nohuanton, nisha nisha canioroꞌsaꞌ acorapi Yosë yonquicaiso marëꞌ.

⁷ Nani yaꞌipi noyá pënëntohuachinaꞌ, co huachi aquëtëꞌ pënëntacasoꞌ yaꞌhuaponhuëꞌ. Naporoꞌ maꞌsha paꞌpi tëꞌhuatoro nininsoꞌ yaꞌnoarin. Acoporoꞌ quëran huëꞌsarin. Huëꞌsahuaton, cato yaꞌpi ahuëquiarin. Ina quëran minsërahuaton, tëpararin.

⁸ Quirosarinquë chachin tëpararin. Inaquë iráca Quisosontaꞌ tëpapi. Inaquë yaꞌhuëpisopita paꞌpi co noyahuëꞌ cancantopi. Sotomaquë, Iquipitoquë inaquëpita yaꞌhuëpisopita pochin cancantatonaꞌ, oshahuanacaisoáchin yonquipi. Catoyaꞌpi tëpahuachinaꞌ, cachiquë tëꞌyatapi. Co paꞌpitapihuëꞌ.

⁹ Cara tahuëri miria pochin nisha nisha piyapiꞌsaꞌ, nisha nisha nananquë nonpisopita inapitari niꞌsapi. Nicaponaraihuëꞌ, co nohuantapihuëꞌ paꞌpitacaisoꞌ.

¹⁰ Tëpapi niꞌton, capa cancantatonaꞌ, pita nisapi. Maꞌshanënantaꞌ topinan aꞌnaya aꞌnaya niquëtapi. “Huaꞌquiꞌ pënënatonpoaꞌ, apininpoaꞌ nipirinhuëꞌ, iporasoꞌ nani chiminpi,” taꞌtonaꞌ, capa cancantapi.

¹¹ Cara tahuëri miria napoápirinahuëꞌ, aꞌnanaya Yosë nohuanton, nanpiantarahuatonaꞌ, huanintarapi. Piyapiꞌsari niꞌsahuatonaꞌ, paꞌpi tëꞌhuatapi.

¹² Naporoꞌ inápa quëran nontërinsoꞌ natanapi. —¡Isëquë huëntaco huachi! itarin. Napotohuachina, inimiconënpitari nicasoiꞌ, catoyaꞌpisoꞌ inápaquë paantapi. Chitororë chachin paantapi.

¹³ Naporo chachin panca ocohua paꞌsarin. Paꞌpachina, notohuaroꞌ pëiroꞌsaꞌ ohuatarin. Canchisë huaranca piyapiꞌsaꞌ chiminapi huachi. Aꞌnapitasoꞌ paꞌpi tëꞌhuatapi. “Yosë nohuanton, naporin. ¡Maꞌpitacha nanitaparin paya!” tosapi.

¹⁴ Nani catoroꞌ parisitapisoꞌ niꞌnahuë. Shiarahuaton, aꞌnantaꞌ aꞌnotantarinco. Huaꞌnarëso pochin niꞌnahuësoꞌ shaꞌhuichinquëmaꞌ.

Yaꞌnatontarinsoꞌ pihuirinsoꞌ

¹⁵ Ina quëran yaꞌnatontarinsoꞌ anquënintaꞌ, pihuiantarin. Pihuihuachina, inápaquë chiníquën nonsapi, natanahuë. “Iráca quëra huarëꞌ naꞌa copirnoroꞌsaꞌ yaꞌhuëpirinahuëꞌ, iporasoꞌ Yosëri yaꞌipiya huaꞌanëntarin. Quisocristorë chachin huaꞌanëntomiatarin. Co onporontaꞌ pipiapihuëꞌ,” tosapi.

^16-17 Cato shonca catapini ansianoꞌsantaꞌ Yosëꞌpaꞌ yaꞌhuëpisoꞌ isonahuatonaꞌ, Yosë chinotapi: “Yosparinquën, Sinioro. Quëmasáchin yaꞌipi nanitaparan. Iráca quëran huarëꞌ yaꞌhuaton, ipora huantaꞌ nanpiaran. Chini chiníquën nanantaton, yaꞌipi huaꞌanëntaran.

¹⁸ Nisha nisha piyapiꞌsaꞌ noꞌhuirinënquënsopita anaꞌintaran. Yaꞌipi chiminpisopitantaꞌ noꞌtëquën anaꞌintaran. Imarinënquënsopitaso nipirinhuëꞌ, acanaaran. Inso tërantaꞌ natëhuachinquën, inápaquë quëpaaran. Huaꞌanoꞌsaꞌ, topinan piyapiꞌsaꞌ, inapita imapachinënquën, acanaaran. Aꞌnapitaso nipirinhuëꞌ piyapiꞌsaꞌ aparisitatona tëpapi niꞌton, chiníquën anaꞌintaran,” itapi.

¹⁹ Ina quëran huaꞌnarëso pochin nicasoco, Yosë pëinën inápaquë yaꞌhuërinsoꞌ niꞌsoatërin niꞌnahuë. Iráca chinotopiso pëi acohuana Yosë caposonën yaꞌhuërin. Ina pochin nininsoꞌ inápaquë niꞌnahuë. Nicasoco, oꞌcoritërin, tënëntërin, huiratërin, ocohua paꞌnin, ocaiꞌ anotërin, naporin. Yosë chiníquën nanantërin niꞌton, naporin.