Apocalipsis 10 - Chayahuita (Shahui)

Quiricaꞌhuaya oporininsoꞌ

¹ Ina quëran huaꞌnarëso pochin aꞌna anquënintaꞌ niantarahuë, chiníquën nanantërinsoꞌ. Chitoroꞌ huancana inápa quëran oꞌmararin. Motën yahuaꞌtani tahuitërin. Yaꞌpirin piꞌi pochin aꞌpinin. Tonaintaꞌ pën pochin yaꞌnoarin.

² Quiricaꞌhuaya sëꞌquërin. Soꞌnanpinan nipirinhuëꞌ, nani oporininsoꞌ sëꞌquërin. Oꞌmarahuaton, inchinan nantën quëran marëquë iꞌnaitarin. Ahuënan nantën quëran isoroꞌpaquë iꞌnarin. Panca masho niꞌton, naporin.

³ Chiníquën nanantaton, chiníquën nonsarin. Paꞌpiniꞌ përarinso pochin natanahuë. Përapachina, inápa quëran canchisë huira pochin nininsopitari aꞌpanipi.

⁴ Nonpachinara, natanato quiricaquë yaninshitopirahuëꞌ, inápa quëran aꞌna shaꞌhuitërinco: “Ama naporinsoꞌ ninshitëquësohuëꞌ. Co aꞌnapita shaꞌhuitacasoꞌ yaꞌhuërinhuëꞌ,” itërinco.

⁵ Naporoꞌ panca anquëni marëquë, noꞌpaquë inaquëpita iꞌnarinsoꞌ inchinan tanpaquën anquiontarin.

⁶ “Yosë niꞌsárinco niꞌton, co nonpinahuëꞌ. Inasoꞌ iráca quëran huarëꞌ yaꞌhuaton, co onporontaꞌ ayaponhuëꞌ. Isoroꞌpaꞌ, marë, piꞌiroꞌtëꞌ, yaꞌipi yaꞌhuërinsopita inari ninin. Tëhuënchachin co huachi huaꞌqui quëranhuëꞌ anaꞌintomiatarin.

⁷ Aꞌnaíchin anquëni pahuanarin tronpita pihuicasoꞌ. Ina pihuiantahuachina, oshahuanoꞌsaꞌ anaꞌintahuaton, yaꞌipiya Yosëri huaꞌanëntarin. Piyapiꞌsaꞌ inahuara co nitotopihuëꞌ. Iráca quëran huarëꞌ Yosë nohuanton, pënëntonaꞌpiroꞌsaꞌ ninopirinahuëꞌ, ipora huarëꞌ nanirin. Inimiconënpita anaꞌintahuaton, huaꞌanëntarin,” tënin panca anquëni.

⁸ Ipora huantaꞌ aꞌna nantën quëran marëquë iꞌnaitarin. Aꞌna quëraontaꞌ noꞌpaquë iꞌnarin. Ina quëran inápa quëran nontërincosoꞌ itantarinco: —Paaton, quiricaꞌhuaya sëꞌquërinsoꞌ maꞌpaquëꞌ,

⁹ itohuachincora, paꞌsahuato, —Quiricaꞌhuaya quëtoco, itërahuë. —Noyahuaꞌ. Macaton, caꞌquëꞌ. Ninoi pochin cashin caꞌsaran. Napoaponahuëꞌ, nani niꞌipatan, main nisarin, itërinco.

¹⁰ Quiricaꞌhuaya masahuato, caꞌnahuë. Ninoi pochin cashin caꞌpirahuëꞌ. Nani niꞌipatëra, main natanahuë.

¹¹ Ina quëran shaꞌhuitërinaco: —Naꞌa piyapiꞌsaꞌ pënëantaquëꞌ. Aꞌna tahuëri maꞌsona onpocaisoꞌ Yosë anitotarinquën. Nisha nisha piyapiꞌsaꞌ, nisha nisha nananquë nonpisopita, copirnoroꞌsaꞌ, inapita maꞌsona onpocaisoꞌ Yosë ninoton, anitotarinquën ninshitamaso marëꞌ, itërinaco.