Amós 9 - Chayahuita (Shahui)

Artaro pirayan huanirin quëran shaꞌhuitërinsoꞌ

¹ Naquëranchin huaꞌnarëso pochin Sinioro quënaantarahuë. Inasoꞌ, artaro pirayan huaniton shaꞌhuitërinco: “Chinotërinacoso pëi onënënpita aipi motën pochin acotopisoꞌ, ahuëquëꞌ. Inapotohuatan, chinotërinacoso pëi nacontapon. Pairanënpita, pëi aꞌcanpisoꞌ, inapita nacontatona piyapiꞌsa aipi anochinaꞌ. Nopoato nopoatotatonaꞌ, piyapiꞌsa niꞌpiꞌin. Ina quëran chaꞌëpisopitasoꞌ, ca nohuanton sahuëni quëran tëpaponaꞌ. Yataꞌapirinahuëꞌ, co aꞌnaya tëranta chaꞌëponhuëꞌ.

² Acoporoquë naꞌpipirinahuëꞌ, inaquëran cari ocoiarahuë. Piꞌiroꞌtë aquëtë pantahuachinantaꞌ, cari anohuaraantapo.

^3-4 Carmiro motopi huiꞌnimotënꞌpaꞌ naꞌpihuachina, inaquënta paꞌsahuato macontarahuë. Marë acopoiꞌ naꞌpitohuachinacontaꞌ, inaquë panca yaꞌhuan acorahuësoꞌ aꞌpatohuato, inari oqui oquitapon. Inimiconënapitari aꞌna noꞌpaꞌpaꞌ quëpahuachinara, ca nohuanton inaquë sahuëni quëran chiminaponaꞌ. Co huachi catahuapohuëꞌ. Nani ataꞌhuantaꞌhuaso yonquirahuë,” itërinco.

Amosë Sinioro chinotërinsoꞌ

⁵ Siniorosoꞌ, Yosë. Inasoꞌ, yaꞌipi nanitaparin. Isoroꞌpaꞌ cariatë pochin nipachina, pëni paꞌnan apoirinso pochin nitërin. Napohuachina, piyapiꞌsa naꞌnërantaponaꞌ. Niroiꞌ pamatohuachina huinquintërinso pochin isoroꞌpanta nisarin.

⁶ Siniorosoꞌ, inápaquë yaꞌhuërin. Isoroꞌpaꞌ aipi piꞌiroꞌtë acorin. Ina nohuanton marë quëran chitoro pipihuachina, isoroꞌpaquë oꞌnanin. Inasoꞌ Sinioro. Ina pochin nohuitërëhuaꞌ.

Trico taparapiso pochin israiroꞌsa nitarinsoꞌ

⁷ Naquëranchin Sinioro pënëntaantarin: “Isontaꞌ, ca Sinioroco noꞌtëquën shaꞌhuitaranquëmaꞌ: ‘Israiroꞌsanquëmaꞌ. Canpitasoꞌ, itiopiaroꞌsa pochin niꞌnanquëmaꞌ. Canpita Iquipito quëran ocoirahuatënquëma isëquë quënanquëmaso pochachin, Crita soꞌton quëran huiristinoꞌsanta quënahuë. Siriaroꞌsantaꞌ, Quiri parti quëran quënahuë.

⁸ Israiroꞌsanquëmaꞌ, canpitaso naꞌcon oshahuanama nicato, anaꞌintatënquëma ataꞌhuantaranquëmaꞌ. Napoaponahuëꞌ, co noyá ataꞌhuantaponquëmahuëꞌ. Ca Sinioroco noꞌtëquën shaꞌhuitaranquëmaꞌ.

⁹ Trico toꞌnorahuachinara pintiapi. Canpitanta israiroꞌsanquëmaꞌ, inapotatë pochin nitiinëmasoꞌ camaitarahuë. Inapotohuachinënquëmaꞌ, napoonamasopitaso co chiniaramahuëꞌ.

¹⁰ Canpitaso nonpatamara: “Co onporo napoarihuahuëꞌ. Noya yaꞌhuëáparihuaꞌ,” toconamaꞌ. Piyapinëhuëpitanquëma mini nipomarahuëꞌ, oshahuanacasoráchin cancantëramaꞌ. Naporama niꞌton, ca nohuanton sahuëni quëran chiminapomaꞌ,’ tënahuë,” tënin.

Aꞌna tahuëri israiroꞌsa noya acoantacasoꞌ shaꞌhuirinsoꞌ

¹¹ Naquëranchin Sinioro taantarin: “Co huaꞌquiya quëranhuëꞌ israiroꞌsa noya acoantarahuë. Iráca Tapi copirnori huaꞌanëntapon naporinso pochachin acoantarahuë.

¹² Naporoꞌ israiroꞌsanquëmasoꞌ, itomoroꞌsa minsërahuatomaꞌ, noꞌpanëna huaꞌanëntapomaꞌ. Aꞌnapita nacionoꞌsanta inapotapomaꞌ. Ca Sinioroco noꞌtëquën shaꞌhuitaranquëmaꞌ,” tënin.

¹³ Naquëranchin Sinioro taantarin: “Co huaꞌquiya quëranhuëꞌ Israiro noꞌpaquë sharoꞌsa noya noyatapon. Trico nanquicaiso pahuanapirinhuëꞌ, noꞌpaꞌ taparoantacaso tahuëriꞌsa naniantarin. Opanta cayarinso co yaꞌipi toꞌpoiyátërasoihuëꞌ, trico yaꞌhuërë shaantacaso naniantarin. Motopiroꞌsaꞌ, motopiaꞌhuaroꞌsaꞌ, inaquëpita huino iꞌsha pochin pacapon.

¹⁴ Naporoꞌ israiroꞌsa nisha nisha parti quëpapisoꞌ, isëquë chachin quëantarahuë. Ninanoroꞌsa ataꞌhuantopisopita anoyataantaponaꞌ. Inapotahuatona inaquë yaꞌhuëaponaꞌ. Oparotahuatonaꞌ, huino oꞌoponaꞌ. Nisha nisha cosharo shacatona caponaꞌ.

¹⁵ Inahuara noꞌpanënaquë chachin yaꞌhuëantaponaꞌ. Ina piquëransoꞌ, co huachi onporo tëranta noꞌpaꞌ quëtërahuë quëran ocoiaponahuëꞌ. Caso Sinioroco, Yosënëmaco niꞌton, noꞌtëquën shaꞌhuitaranquëmaꞌ,” tënin.