Amós 8 - Chayahuita (Shahui)

Huayo noyá cayatërinso pochin nininsoꞌ

¹ Aꞌna tahuëri Sinioro huaꞌnarëso pochin aꞌnotaantarinco. Aꞌna iꞌmëquë huayo noyá cayatërin niꞌnahuë.

² Ina quëran Sinioro nataninco: —¿Maꞌta Amosë niꞌnan? itërinco. —Aꞌna iꞌmëquë huayo noyá cayatërin niꞌnahuë, itërahuë. Naporoꞌ Sinioro taantarin: —Tëhuënchachin mini. Israiroꞌsantaꞌ, nani huachi noyá cayapiso pochin nipi. Napoaton co huachi aquëtë nichaꞌësarahuëꞌ.

³ Ina tahuëri nanihuachin, copirno noyápiachin pëinënquë cantayantopisoꞌ, copi tapon. Naꞌnëroꞌsa yaꞌhuërëꞌ, oshaatona noncarorantaponaꞌ. Notohuaroꞌ piyapi naporo chiminapon niꞌton, co huachi paꞌpitaponahuëꞌ. Onpopinquë tëranta topinan tëꞌyataponaꞌ. Co manta tëcaponaraihuëꞌ, tëꞌyataponaꞌ. Ca Sinioroco noꞌtëquën shaꞌhuitaranquëmaꞌ, tënin.

Israiroꞌsa anaꞌintacaso yaꞌcaritërinsoꞌ

⁴ Aꞌnaquëmaso co panorohuanhuëꞌ nicatomaꞌ, sano piyapiroꞌsa ihuaramaꞌ. Popriyatopisopitantaꞌ, naꞌcon naꞌcon aparisitëramaꞌ.

^5-6 Canpitaso maꞌsha paꞌanaꞌpinquëma niꞌton: “¡Trico paꞌantacaso marëꞌ yoquiaꞌhuaraiꞌ pita, manóton naꞌhuëin! Ihuatë pëꞌtënanquë pëꞌtënatëhuaꞌ, naꞌcon naꞌcon canacaso marëꞌ ¡Sahuatontaꞌ, aꞌnaroáchin naꞌhuëin! Popriyaroꞌsa aquëtë apopriyatahuaꞌ. Inahuara chachiontaꞌ, nihuirinpoaso marëꞌ paꞌanhuaꞌ. Sapatë marëya tëranta nihuihuachinpoaꞌ, inapotahuaꞌ. Trico nitapihuachina tëꞌyatopirëhuahuëꞌ, ina tëranta paꞌantacaso yaꞌhuërin,” tënamaꞌ.

⁷ Inaporamaso marëꞌ Sinioro tapon: “Caso Sinioroco niꞌto, israiroꞌsanquëma chinotopiramacohuëꞌ, co onporonta naporamaso naniantarahuëꞌ.

⁸ ¡Anaꞌintohuatënquëmaꞌ, yaiꞌpi roꞌpaꞌ nacontapon! ¡Yaꞌipi piyapiroꞌsantaꞌ, naꞌnëcaisoꞌ yaꞌhuëapon! Isoroꞌpaꞌ chachiontaꞌ, Niroiꞌ pamatërinso pochin nisarin. Pamatërin quëran huinquintërinso pochin, nisarin antaꞌ,” tënin.

⁹ Naquëranchin Sinioro taantarin: “Isontaꞌ, ca Sinioroco noꞌtëquën shaꞌhuitaranquëmaꞌ: Ina tahuëri nanihuachin, camotëchin nipirinhuëꞌ, piꞌi tacopiapon. Yono piꞌi nipirinhuëꞌ, tashiapon.

¹⁰ Pita tahuëriꞌsa naꞌhuëyantëramasoꞌ, acopitarahuë. Pita yaꞌhuërënamën, chiminpisopita marëꞌ naꞌnëtoma oshaarápomaꞌ. Sëtohuachinara aꞌmopisoꞌ, canpitanta aꞌmosaramaꞌ. Co napion ancatohuachinara noyá niyaꞌitopiso pochin niyaꞌitaramaꞌ. Aꞌnaíchin huiꞌnin yaꞌhuëtopirinhuëꞌ, chiminpachina naꞌnëpiso pochin nisaramaꞌ.

¹¹ Co huaꞌquiya quëranhuëꞌ, tanacaiso isoroꞌpaquë aꞌpararahuë. Napoaponahuëꞌ, co cosharo quëran tanaponahuëꞌ. Co oꞌoi quëran yamoroaponahuëꞌ. Ca nanamëhuë natanacaiso marëꞌ tanarëso pochin nisapi.

¹² Napoatona piyapiꞌsa patë patë́rantaponaꞌ. Ca Sinioroco nonahuësoꞌ, yonitona napoaponaꞌ. Aꞌna marë quëran aꞌna marëꞌpaꞌ, norti parti quëran piꞌi pipirinso parti paponaꞌ. Napopirinahuëꞌ, co nanamëhuë natanapihuëꞌ.

¹³ Nanoꞌsa noyápiroyanchin nipirinahuëꞌ, huiꞌnapiꞌsanta chiníquën cancantopirinahuëꞌ, yamorotonaꞌ, tapinanpitëraponaꞌ.

¹⁴ Samariaquë mamanshiroꞌsa chinotatonaꞌ: ‘Noꞌtëquën nontaranquën. Tano mamanshiantaꞌ,’ topi aꞌnaquën. Piirsipaquënta mamanshiroꞌsa yaꞌhuërinso chinotatonaꞌ: ‘Noꞌtëquën nontaranquën. Piirsipa mamanshiantaꞌ,’ topi aꞌnaquëontaꞌ. Napopisopitasoꞌ, ca nohuanton anotërëso pochin nipachinaꞌ, co huachi huënsëaponahuëꞌ,” tënin Sinioro.