Amós 7 - Chayahuita (Shahui)

Sëquërë quëran anaꞌintacaso quënaninsoꞌ

¹ Aꞌna tahuëri Sinioro huaꞌnarëso pochin aꞌnotërinco. Inasoꞌ, paꞌpi notohuaroꞌ sëquërëꞌ acorarin niꞌnahuë. Naporoso copirno marëꞌ shaꞌtopisoꞌ, nani yaquiatona mapi. Yaquipisontaꞌ, nani papoantararin.

² Ina quëran sëquëroroꞌsasoꞌ, sharoꞌsaꞌ, pacatoroꞌ, inapita pëꞌyarantararin. Naporahuachinara: —Sinioro, tëhuënchachin oshahuanpiraihuëꞌ, oshanëhuëi inquitocoi. Israiroꞌsa inapotaton anaꞌintohuatan, co chiniapihuëꞌ. Huaꞌhuaroꞌsa pochin nisapi nichinapon chachin taꞌhuantaponaꞌ, itërahuë ina nontato.

³ Napotohuatora, Siniorosoꞌ israiroꞌsa anaꞌintacaso yonquiaponahuëꞌ, tananpitërin. —Co inapotapohuëꞌ, tënin.

Pën quëran anaꞌintacaso quënaninsoꞌ

⁴ Ina piquëran Siniorosoꞌ, pën quëran yaꞌhuërë anaꞌintiinpoaso yonquirinsoꞌ, aꞌnotaantarinco. Paꞌpi huëya pën mashori panca marë anpotërinsoꞌ, ayanimiatërin. Iminoꞌsaꞌ, pastoroꞌsaꞌ, inapitanta huëyarantararin.

⁵ Naporahuachina: —Sinioro, ama ina pochin anaꞌintocoisohuëꞌ. Israiroꞌsa inapotaton anaꞌintohuatan, co chiniapihuëꞌ. Huaꞌhuaroꞌsa pochin nisapi nichinapon chachin taꞌhuantaponaꞌ, itaantarahuë.

⁶ Napotohuatora, Siniorosoꞌ israiroꞌsa anaꞌintacaso yonquiaponahuëꞌ, tananpitaantarin. —Co inapotapohuëꞌ, tënin.

Paira tantiatinan quënaninsoꞌ

⁷ Ina piquëran Siniorosoꞌ, aꞌna yaꞌhuërë huaꞌnarëso pochin aꞌnotaantarinco. Sinioro chachin aꞌna paira pirayan huaniárin niꞌnahuë. Imirinquë aꞌnara paira tantiatiinan sëꞌquëarin.

⁸ Ina quëran nataninco: —¿Maꞌta Amosë niꞌnan? itërinco. —Aꞌnara pëi tantiatiinan niꞌnahuë, itërahuë. —Ina mini. Pëinaꞌpisoꞌ, isanpi quëran paira noꞌtëquën pantarinsoꞌ tantiarin. Inapochachin cantaꞌ, piyapinëhuëpita noyasáchin nisapisoꞌ, tantiarahuë. Naꞌaro nichaꞌëpirahuëꞌ, co noyahuëꞌ nipachinara, anaꞌintarahuë huachi.

⁹ Isaco quëran pipipisopita mamanshi moshacaiso marëꞌ inahuara nohuanton artaroroꞌsa acopi. Inapitasoꞌ, yaꞌipi taꞌhuantaponaꞌ. Israiroꞌsa mamanshi moshacaiso marëꞌ pëipisopitantaꞌ, tapiarahuë. Quiropoamo copirno quëmopinënpitantaꞌ, co huachi israiroꞌsa huaꞌanëntaponahuëꞌ, tënin.

Amasiasëri Amosë noꞌhuirinsoꞌ

^10-11 Pitiriquë aꞌnara corto huaꞌan yaꞌhuërin. Inasoꞌ, Amasiasë itopi. Pënëntërahuësoꞌ natanahuaton, Quiropoamo copirno anitotacaso marëꞌ nanan aꞌpatërin: “Amosë yaocoiatënquën pinosárinquën. Naporinsoꞌ, yaꞌipi israiroꞌsacoi co noyahuëꞌ natanai. Naporin pënëntapon: ‘Inimicoroꞌsari israiroꞌsa ahuëhuachinaꞌ, Quiropoamosoꞌ ahuëtápaton, chiminapon. Inapoatona inimicoroꞌsasoꞌ, aꞌna noꞌpaꞌpaꞌ quiquiaponënpoaꞌ,’ tënin,” itopi.

¹² Ina quëran Amasiasësoꞌ, itaponco: —Pënëntaton yacanahuatansoꞌ, yaꞌhuëranquë paantaton inaquë pënëntëquëꞌ.

¹³ Ama huachi isëquëso pënëntëquësohuëꞌ. Isëquë copirnonta moshatërin. Naporahuaton yaꞌipi Israiro noꞌpaquë yaꞌhuërinsopita quëran, noya noya moshato pëi isëquëso yaꞌhuërin, itërinco.

¹⁴ Napotohuachincora: —Co caso pënëtonaꞌpicohuëꞌ. Naporahuaton co canaꞌhuaso marëꞌ pënëntërahuëꞌ. Caso ohuicaroꞌsa aꞌpaiato sacatërahuë. Naporahuato iquira nara nitërinsoꞌ, yontonato paꞌanahuë.

¹⁵ Ohuicaroꞌsa aꞌpairápirahuëꞌ: “Carinquën nanan quëtaranquën niꞌton, piyapinëhuëpita pënënacaso marëꞌ paquëꞌ,” itërinco Sinioro.

¹⁶ Napoaton quëmantaꞌ, Sinioro napotërinquënso natanquëꞌ: Quëmasoꞌ pënënatonco: “Quiyasoꞌ, Isaco quëran pipiraisopita israiroꞌsacoi. Inacoi niꞌtoi, Yosë maꞌsha onpotiincoiso yonquirinsoꞌ yashaꞌhuitopirancoihuëꞌ, ama ina shaꞌhuitocoisohuëꞌ,” itëranco.

¹⁷ Napotopirancohuëꞌ, quëmanta Sinioro maꞌsha yaonpotërinquënso shaꞌhuichinquën: “Aꞌna tahuëri quëmaso saꞌan, iso ninanoquë chachin pota yaꞌconapon. Huiꞌnanpitasoꞌ, sahuëni quëran chiminaponaꞌ. Noꞌpanëntaꞌ, nicanatona maponaꞌ. Quëmaso nipirinhuëꞌ, co Yosë imapiquëhuëꞌ quëpahuachinën, inaquë chiminapon. Israiroꞌsantaꞌ, áquë noꞌpaꞌpaꞌ inimicoroꞌsari quëpaponaꞌ, tënin Sinioro,” itërahuë.