Amós 4 - Chayahuita (Shahui)

Samaria sanapiꞌsa maꞌhuanpisopitanta pënëninsoꞌ

¹ Sanapiꞌsanquëmanta Samaria ninanoquë yaꞌhuëramasopita, natanco shaꞌhuichinquëmaꞌ: Canpitasoꞌ, Pasan parti ohuacaroꞌsa amonpiso pochin noya coshatatomaꞌ, amonamaꞌ. Popriyaroꞌsa nonpintatoma ihuaramaꞌ. Pahuantopisopitanta aparisitëramaꞌ. Soꞌyamanta huino quëshiimaso camairamaꞌ. Naporamaꞌ.

^2-3 Siniorosoꞌ Yosë niꞌton, shaꞌhuitatënquëma naporin: “Co huaꞌquiya quëranhuë canpitasoꞌ, arponoꞌsaquë aꞌtëntatë pochin nitatënënquëmaꞌ, inimiconëmapita quëpaponënquëmaꞌ. Huaꞌhuamapitantaꞌ, yoꞌnanaroꞌsaquë sami pochin aꞌtëntahuatonaꞌ, quëpaponaꞌ. Ninano pairanën pacoantopi quëran inimiconëma apanshinahuatënënquëmaꞌ, ocoiarinënquëmaꞌ. Irmon motopi parti inapo quëpataponënquëmaꞌ. Caso Sinioroco noyasáchin nicato inapotiinëmasoꞌ, noꞌtëquën shaꞌhuitaranquëmaꞌ,” tënin.

Siniorori israiroꞌsa nocanananquë pënëninsoꞌ

⁴ Siniorori israiroꞌsa nocanananquë pënënaton itapon: “Pitiri, Quiricaro, inapita ninanoroꞌsaquë moshatamaso marëꞌ acoramaꞌ. Inaquëpita pacoꞌ. Co natëtomacohuëꞌ, naꞌcon naꞌcon oshahuancoꞌ. Chinotatomaco tëpamaso marëntaꞌ, tashíramiachin quëcoꞌ. Diesmo ca marëꞌ acoamaso yaꞌhuërinsontaꞌ, nani cara tahuëri quëran quëcoꞌ.

⁵ ‘Yosparinquën Sinioro,’ itamacoso marëꞌ pan co ahuëpocatopinanhuë nininsontaꞌ, ahuiquitocoꞌ. Canpitaora nohuanton maꞌsha yaquëtëramacosontaꞌ, yaꞌipi parti shaꞌhui shaꞌhuírantacoꞌ. Inapocaso paꞌyatërama niꞌquëhuarëꞌ, inapocoꞌ,” Ca Sinioroco napotaranquëmaꞌ.

Yosëri anaꞌintopirinhuëꞌ, israiroꞌsa co nirotëpisohuëꞌ

⁶ Naquëranchin Sinioro taantarin: “Ca nohuanton yaꞌipi yaꞌhuëramaquë cosharo pahuanin. Inapoapomarahuëꞌ, co tahuërëtëramacohuëꞌ. Ca Sinioroco noꞌtëquën shaꞌhuitaranquëmaꞌ,” tënin.

⁷ Naquëranchin Sinioro taantarin: “Ca nohuanton oꞌnaonta pahuantërinquëmaꞌ. Shaꞌtëramasoꞌ nanitacaso marëꞌ cara yoqui pahuanapirinhuëꞌ, aꞌnaquën ninanonëmaquë aoꞌnanahuë. Aꞌnaquëso nipirinhuëꞌ, co oꞌnaninhuëꞌ. Aꞌna iminquësoꞌ oꞌnanin. Aꞌnaquëso nipirinhuëꞌ, oꞌnan pahuanin quëran noꞌpaꞌ yanirin.

⁸ Naporoꞌ iꞌsha pahuanin niꞌton, aꞌna ninanoquë aꞌna ninanoquë iꞌsha yonípoma paꞌnamaꞌ. Pacapomarahuëꞌ, piꞌpisha manama niꞌton, co yamoro inquiramahuëꞌ. Inapoatoma nosorotápomarahuëꞌ, co tahuërëtëramacohuëꞌ. Ca Sinioroco noꞌtëquën shaꞌhuitaranquëmaꞌ,” tënin.

⁹ Naquëranchin Sinioro taantarin: “Ca nohuanton ihuaonta huëya pihuirinquëmaꞌ. Napoaton shaꞌtëramasopitanta ahuiánahuanin. Sëquërënta aꞌpatëranquëma niꞌton, oparonëma pëꞌyarin. Iquiraroꞌsaꞌ, oriporoꞌsaꞌ, inapitanta pëꞌyarin. Nisha nisha cosharo shaꞌnamasopitanta ahuirin. Inapoatoma parisitápomarahuëꞌ, co tahuërëtëramacohuëꞌ. Ca Sinioroco noꞌtëquën shaꞌhuitaranquëmaꞌ,” tënin.

¹⁰ Naquëranchin Sinioro taantarin. “Iráca iquipitoroꞌsa nisha nisha quëran aparisitërahuë. Inapita aparisitërahuëso pochachin canpitanta aparisitëranquëmaꞌ. Huiꞌnapinëmapita ahuëtopiquëranchin chiminpi. Cahuarionëmapitantaꞌ, inimiconëmapitari matërinënquëmaꞌ. Chinotëramaso nëꞌmëtë pëiroꞌsaquë chiminpisopita anarinsoꞌ, aimëtëranquëmaꞌ. Inapotëranquëmaꞌ. Inapotápiranquëmahuëꞌ, co tahuërëtëramacohuëꞌ. Ca Sinioroco noꞌtëquën shaꞌhuitaranquëmaꞌ,” tënin.

¹¹ Naquëranchin Sinioro taantarin: “Sotoma, Comora, inapita ninanoroꞌsaꞌ, huëhuëpiro nitato iráca ataꞌhuantërahuë. Inapochachin canpitantaꞌ, naꞌaquëma ataꞌhuantëranquëmaꞌ. Ina quëran chaꞌëramasopitasoꞌ, pënaya pën quëran ocoipiso pochin ninamaꞌ. Inapoápomarahuëꞌ, co tahuërëtëramacohuëꞌ. Ca Sinioroco noꞌtëquën shaꞌhuitaranquëmaꞌ,” tënin.

¹² Naquëranchin Sinioro taantarin: “Yaꞌipi inapita ninamaso marëꞌ anaꞌintaꞌhuanquëmaso yaꞌhuërin. Inapotaranquëma niꞌton, niꞌtonëhuëquë yaꞌnocamaso marëꞌ noya niacoatoma ninaco,” tënin.

¹³ Sinioro napotarinquëmasoꞌ natancoꞌ. Inari motopiroꞌsa acorin. Inari chachin ihuaontaꞌ, acorin. Ina chachin maꞌsona yanininsopita anitotërinpoaꞌ. Ina nohuanton tahuërinta iꞌhuahuachina, tashirin. Ina inápa motopiroꞌsa quëran huarëꞌ inariso paꞌtërin. Inaso Sinioro, Yosë yaꞌipi nanitaparinsoꞌ. Inapochin nohuitahuaꞌ, tënahuë.