Amós 3 - Chayahuita (Shahui)

Pënëntonaꞌpi maꞌsona nicacaso yaꞌhuërinsoꞌ

¹ Israiroꞌsanquëmaꞌ. Canpitasoꞌ, Sinioro Iquipito quëran ocoirinquëmaꞌ. Ina naporinso natanco shaꞌhuichinquëmaꞌ:

² “Isoroꞌpaquë nisha nisha nacionoꞌsa yaꞌhuëpirinhuëꞌ, canpitasáchin huayonanquëmaꞌ. Inapotopiranquëmahuëꞌ, co noyahuëꞌ ninama niꞌton, anaꞌintaꞌhuanquëmaso yaꞌhuërin.

³ Cato yaꞌpi napopináchin yaꞌhuëhuachinara, anoyatopi niꞌton, naporin.

⁴ Paꞌpiniꞌ masho tananquë përapachina, nani mapintërin niꞌton, naporin. Paꞌpiniꞌ huiꞌnapishinta yaꞌhuërinquë tarëtohuachina, nani mapintaton napoárin.

⁵ Inaira noꞌpaquë anotohuachina, yaquiri siꞌpirin niꞌton, naporin. Huënson, ‘huëꞌcaꞌ,’ topachina maꞌsha macaton naporin.

⁶ Ninanoquë pomon irinpachina, piyapiꞌsa paꞌyanpi. Ninanoquë maꞌsha onpohuachinara, ca camaitërahuë niꞌton, napoarin.

⁷ Inapita naporinso pochachin canta maꞌsha yanipatora, piyapinëhuëpita pënëntonaꞌpiroꞌsaꞌton anitotarahuë.

⁸ Paꞌpiniꞌ përarinso natanpachinara, yaꞌipi piyapiꞌsa paꞌyanpi. Inapochachin cari maꞌsona shaꞌhuicaso marëꞌ aꞌna piyapi nanan quëtohuato, ¡onpopionta shaꞌhuiarin!” tënin.

Samaria ninano ataꞌhuantarinsoꞌ

⁹ Ina quëran Sinioro taantarin: “Asototo ninanoquë noyápiachin pëiroꞌsa yaꞌhuërin. Iquipitoquëntaꞌ, noyápiachin pëiroꞌsa yaꞌhuërin. Inaquëpita huaꞌanoꞌsa yaꞌhuërinso shaꞌhuitoncoꞌ: ‘Samaria ninano pirayan motopiroꞌsa yaꞌhuërinquë pacoꞌ. Inaquë mantanta nisapisoꞌ, niꞌconcoꞌ. Itohuara capini maꞌsha nionpotatona niaparisitapisoꞌ, niꞌconcoꞌ.

¹⁰ Inapitasoꞌ, noya nicacaisoꞌ co nitotopihuëꞌ. Ahuëtatona maꞌsha mapisoꞌ, noya pëinënaquë tapapi,’ itoncoꞌ,” tënin.

^11-12 Ina quëran Sinioro taantarin: “Samariaroꞌsa ina pochin cancantopiso marëꞌ, inimiconënapitari yaꞌhuëpiso noꞌpaꞌ tahuirapitapi. Noyá niacorapipisoꞌ ninanoroꞌsa ohuataponaꞌ. Noya pëinënapitaquë yaꞌconatonaꞌ, maꞌshanëna mataponaꞌ. Paꞌpiniꞌ ohuica caꞌpachina, aꞌpaitonaꞌpisoꞌ pëꞌsotërinsoꞌ manin. Huëratënhuë nipon, paꞌhuëquënpitahuë nipon, huaꞌanën aꞌnotacaso marëꞌ manin. Inapochachin Samariaquë yaꞌhuëpiso israiroꞌsantaꞌ, Tamascoquë, noya huënsënanoꞌsa paꞌanatona huënsëtopirinahuëꞌ, caraíchin chaꞌëtona taꞌaponaꞌ,” tënin.

^13-14 Siniorosoꞌ Yosë. Yaꞌipi nanitapaton naporin: “Cacopo quëran pipipisopita naporahuësoꞌ shaꞌhuitocoꞌ. Yaꞌipi inapitaso oshahuanpi niꞌton, anaꞌintaꞌhuasoꞌ yonquiarahuë. Ina tahuëri nanihuachin, Pitiriquë artaroroꞌsa yaꞌhuërinso ataꞌhuantarahuë. Ina artaroroꞌsa pomonënapitantaꞌ, inimicoroꞌsari yátonpachina tëꞌyataponaꞌ.

¹⁵ Maꞌhuanoꞌsasoꞌ, oꞌnapi pëi yaꞌhuëtopi. Piꞌipi pëinta yaꞌhuëtopi. Yaꞌhuëtopirinahuëꞌ, cari yaꞌipi ataꞌhuantarahuë. Aꞌnaquën pëiroꞌsasoꞌ, huiri pomon quëranpita tapapitarapi. Aꞌnaquëonta panca nisahuaton noyápiachin pëiroꞌsa acopi. Inapopirinahuëꞌ, yaꞌipi ataꞌhuantarahuë.” Ca Sinioroco noꞌtëquën shaꞌhuitaranquëmaꞌ.