Amós 2 - Chayahuita (Shahui)

¹ Naquëranchin Sinioro taantarin: “Moaporoꞌsantaꞌ, paꞌpi co noyahuëꞌ nipi. Aꞌnara Itomo copirno paꞌpitopiso nansëquën mapi. Inapoatona yano taranaquë huarëꞌ ahuiquitopi. Napoaton moaporoꞌsa anaꞌintaꞌhuaso yaꞌhuërin.

² Ca nohuanton Moapo parti huíquitapon. Quirioto ninanoquë noya noyápiachin pëiroꞌsa yaꞌhuërinsoꞌ ina pëni chachin ahuiquitapon. Tronpitaroꞌsa pihuisoiꞌ, niahuëatona noncarorapi quëran moaporoꞌsa chiminaponaꞌ.

³ Copirnonëna osërëtarahuë. Ina nisahuaton huaꞌanoꞌsa acorinsopitarë chachin, tëpaarahuë,” tënin.

⁴ Naquëranchin Sinioro taantarin: “Cota huënton israiroꞌsantaꞌ, paꞌpi co noyahuëꞌ nipi. Aꞌchintërahuësopita nocanatonaꞌ, pënëntërahuësopitanta co natëpihuëꞌ. Shimashonëna moshapiso chachin inapitanta moshaantapi. Napoaton inapitanta anaꞌintaꞌhuaso yaꞌhuërin.

⁵ Ca nohuanton Cota huënton parti huíquitapon. Ina pëni chachin Quirosarinquë noya noyápiachin pëiroꞌsa yaꞌhuërinsoꞌ, ahuiquitapon,” tënin.

Israiroꞌsanta anaꞌintacaso shaꞌhuitërinsoꞌ

⁶ Naquëranchin Sinioro taantarin: “Israiroꞌsanta paꞌpi co noyahuëꞌ nipi. Aꞌnaquën co manta tëhuëpirinahuëꞌ, aꞌnapitari asacatacaiso marëꞌ paꞌanpi. Popriyaroꞌsanta sapatë marëáchin nihuitopirinahuëꞌ, inapotopi. Napopiso marëꞌ inapitantaꞌ, anaꞌintaꞌhuaso yaꞌhuërin.

⁷ Inapitasoꞌ, popriyaroꞌsa aparisitatona atapanpi. Sano piyapiroꞌsantaꞌ, co noꞌtëquën catahuapihuëꞌ. Aꞌnaquëonta huiꞌninëꞌ, sanapi catopitopi. Caso noyasáchin nipirahuëꞌ, israiroꞌsa napopiso marëꞌ piyapiroꞌsa pinorinaco.

⁸ Inapitasoꞌ mamanshi marëꞌ maꞌsha tëpapisoꞌ caꞌpatopi. Aꞌnanpiso pahuërëtacaisoꞌ nitotai marëꞌ aꞌmopiso maꞌpatopi. Ina huëtohuachinara, ina aipi caꞌpatopi. Topinan quëran apahuërëtahuatonaꞌ, coriqui maꞌpatopi. Ina coriquiquë huino paꞌanatonaꞌ, mamanshinëna moshapisoꞌ pëiroꞌsaquë oꞌopi,” tënin.

⁹ Ina quëran Siniorosoꞌ, piyapinënpita itapon: “Iráca caso shimashonëmapita isoporinquë poꞌmocaꞌhuaso marëꞌ amororoꞌsa ataꞌhuantërahuë. Inapitasoꞌ nonara pochin inapatopirinahuëꞌ, ataꞌhuantërahuë nopri nara pochin chiníquënoꞌsa nipirinahuëꞌ, inapotërahuë.

¹⁰ Canpitaso Iquipito quëran ocoirahuatënquëmaꞌ, catapini shonca piꞌipi inotëro parti ichiiratëranquëmaꞌ. Ina piquëran, inahua noꞌpanëna huaꞌanëntamaso marëꞌ quëtëranquëmaꞌ.

¹¹ Aꞌnaquëmasoꞌ, yonquirahuëso shaꞌhuicaso marëꞌ acoranquëmaꞌ. Aꞌnaquëmantaꞌ, ca nohuanton nasario yaꞌconamaꞌ. Napotëranquëmasoꞌ noꞌtëquën niꞌton, ‘co napopirinhuëꞌ napoárin,’ co taꞌcamaso yaꞌhuërinhuëꞌ. Ca Sinioroco noꞌtëquën shaꞌhuitaranquëmaꞌ,” itërin.

¹² Ina quëran Sinioro taantarin: “Nasarioroꞌsa nipirinahuëꞌ, apisápatoma huino oꞌshitëramaꞌ. Pënëntonaꞌpiroꞌsanta pënëinquëmaso marëꞌ nanan quëtopirahuëꞌ, noꞌhuitoma acopitëramaꞌ.

¹³ Naporamaso marëꞌ mini, toronanquë naꞌa trico aꞌmitëtopinan paꞌpachina, noꞌpaꞌ niꞌpirinso pochin canpitanta nitaranquëmaꞌ.

¹⁴ Chiníquën taꞌapiramahuëntaꞌ, co chaꞌësaramahuëꞌ. Chini chiníquën nininso tëranta co huachi napoarinhuëꞌ. Chini chiníquën cancantërinso tëranta co chaꞌësarinhuëꞌ.

¹⁵ Pëꞌchinanquë míso inantopirinhuëꞌ, co huachi chiniaponhuëꞌ. Chiníquën taꞌanaꞌpintaꞌ, co chaꞌësarinhuëꞌ. Cahuarioquë taꞌarinsonta chiminapon.

¹⁶ Ina tahuëri nanihuachin, chiníquën ahuëtonaꞌpi nicaponahuëꞌ, ahuëtacaiso marëꞌ ohuararinsopita tëꞌyatahuaton taꞌapon. Ca Sinioroco chachin noꞌtëquën shaꞌhuitaranquëmaꞌ,” tënin.