2 Timoteo 4 - Chayahuita (Shahui)

¹ Yosë niꞌsárinpoa niꞌton, pënënaranquën. Quisocristontaꞌ niꞌsárinpoa niꞌton, “nanamën aꞌchináquëꞌ,” tënahuë. Aꞌna tahuëri inasoꞌ oꞌmantararin isoroꞌpaꞌ huaꞌanëntacaso marëꞌ. Naporoꞌ chiminpisopita, nanpirëhuasopita, yaꞌipinpoaꞌ coisë pochin noꞌtëquën shaꞌhuitarinpoaꞌ. Oshahuanoꞌsaꞌ anaꞌintarin. Natërëhuasopitasoꞌ noya acoarinpoaꞌ. Napoaton Yosë marëꞌ noya sacatëquëꞌ.

² Nanamën aꞌchináquëꞌ. Piyapiꞌsaꞌ yanatanpachinaꞌ, aꞌchintëquëꞌ. Sacaiꞌ aꞌchinacaso nipirinhuëꞌ, onpopiontaꞌ aꞌchináquëꞌ. Aꞌnaquënsoꞌ co yaimapachinahuëꞌ, noꞌtëquën shaꞌhuitëquëꞌ natëinaꞌ. Co noyahuëꞌ nipachinaꞌ, pënënquëꞌ. Noya nontëquëꞌ chiníquën cancantatonaꞌ, imainaꞌ. Yaꞌipi piyapiꞌsaꞌ aꞌchintëquëꞌ noya nicacaiso marëꞌ. Nipirinhuëꞌ, ama noꞌhuiquësohuëꞌ. Sanoanan quëran pënënquëꞌ.

³ Aꞌna tahuëri piyapiꞌsaꞌ co nohuantapihuëꞌ Yosë nanamën natanacaisoꞌ. Nonpin nananoꞌsaꞌ nisha nisha aꞌchinpachinaꞌ, paꞌyatapi. Inahuara costapisorachin yanatanapi.

⁴ Yosë noꞌtëquën noninsoꞌ aꞌporahuatonaꞌ, piyapi yonquirinsoꞌ natëapi.

⁵ Quëmaso nipirinhuëꞌ, yonquínahuan niquëꞌ. Aparisitohuachinënquën, ama noꞌhuitatonahuëꞌ, ahuantëquëꞌ. Aꞌnaya aꞌnaya Yosë nanamën aꞌchintëraꞌpiaquëꞌ. Co imapisopitahuëntaꞌ nitochinaꞌ. Yaꞌipi imapisopita catahuaquëꞌ noya noya imainaꞌ.

⁶ Maꞌsha Yosë marëꞌ tëpapiso pochin co huaꞌquiya quëranhuëꞌ aꞌchinahuëso marëꞌ tëpaarinaco. Nani tahuëri naniriarin chiminaꞌhuasoꞌ.

⁷ Iráca Yosë shaꞌhuitërinco aꞌnapita aꞌchintaꞌhuasoꞌ. Nani tiquirahuë. Chiníquën sacatërahuë pochin Quisocristo nóya natërahuë. Co piꞌpian tërantaꞌ aꞌporahuëꞌ.

⁸ Napoaton Yosëꞌpaꞌ acanaarinco. Quisocristo oꞌmantahuachin, coisë pochin nicaton, noꞌtëquën shaꞌhuitarinpoaꞌ. Naporoꞌ noya ninahuëso marëꞌ acanaarinco. Co casáchin acanaarincohuëꞌ. Aꞌnapitantaꞌ Quisocristo nosoroatonaꞌ, “Manóton oꞌmantaꞌin,” topisopitantaꞌ Yosëꞌpaꞌ canaapi.

Timotio huëcacasoꞌ nohuantërinsoꞌ

⁹ Manóton api huëquëꞌ niꞌquico. Ama huaꞌquiquësohuëꞌ.

¹⁰ Timasësoꞌ isoroꞌparáchin yonquiaton, patërinco. Tisaronicaquë paꞌnin. Crisinti Carasiaquë paꞌnin. Titontaꞌ Tarëmasiaquë paꞌnin.

¹¹ Nocasëíchin isëquë yaꞌhuërarin. Marcontaꞌ macaton, quëquëꞌ. Inasoꞌ noya catahuarinco.

¹² Tiquicosoꞌ yaꞌhuëapirinhuëꞌ, Ipisoquë aꞌparahuë.

¹³ Aipi aꞌmorahuëso tanontën nininsoꞌ Troasëquë huëshirahuë. Carpio pëinënquë yaꞌhuëarin. Huëꞌpatan, quëshico. Quiricaroꞌsantaꞌ quëshico. Quiricanëhuë soꞌnanpinan nininsopita naꞌcon naꞌcon nohuantërahuë.

¹⁴ Aricantëro huaꞌnaquë sacatërinsoꞌ chiníquën shaꞌhuirapirinco. Ina marëꞌ Siniorori anaꞌintarin.

¹⁵ Yosë nanamën aꞌchinahuë niꞌton, chiníquën noꞌhuirinco. “Nonpiánin,” tënin. Napoaton niꞌquëna quëmanta inapotochinquën.

¹⁶ Yaꞌnan coisëquë shaꞌhuirapiponaco, co insontaꞌ catahuarincohuëꞌ. Yaꞌipiya tëꞌhuatonaꞌ, taꞌananpirinaco. Nipirinhuëꞌ, co noꞌhuirahuëꞌ. “Ama ina marëꞌ Sinioro anaꞌintëquësohuëꞌ,” itërahuë Yosë nontato.

¹⁷ Taꞌananpipirinacohuëꞌ, Quisocristo catahuarinco. Co patërincohuëꞌ. Achinicancaninco niꞌton, inaquëntaꞌ yaꞌipi Yosë nanamën shaꞌhuirahuë. Nisha nisha piyapiꞌsaꞌ nani natanpi. Paꞌpiniꞌ yamaninposo pochin yatëpapirinacohuëꞌ, Yosë catahuarinco, chaꞌërahuë.

¹⁸ Paꞌpi co noyahuëꞌ yonquirapihuachinacontaꞌ, onpopiontaꞌ nichaꞌësarinco. Quisocristo anoyacancantërinco niꞌton, aꞌna tahuëri huaꞌanëntërinquë quëpantarinco. ¡Ma noyacha Quisocristoso paya! Ipora quëra huarëꞌ inasáchin chinotahuaꞌ. Amen.

Tiquiapon pochin shaꞌhuirinsoꞌ

¹⁹ Pirisica, Aquira, Onisiporo, saꞌin, huiꞌninpita, inapita saludos aꞌpatërahuë.

²⁰ Irasito Corintoquë quëparitërin. Tropimo caniorin niꞌton, Miritoquë huëshirahuë.

²¹ Ama api huaꞌquiquësohuëꞌ. Coꞌhuara oꞌnapi naniyatërasohuëꞌ, huëquëꞌ. Ioporo, Potinti, Nino, Craotia, yaꞌipi imapisopita isëquë yaꞌhuëpisoꞌ yonquiatënënquën, saludos aꞌpatarinënquën.

²² Sinioro Quisocristo achinicancainquën. Yaꞌipinquëmaꞌ imaramasopita inaora nohuanton, noya catahuainquëmaꞌ. Nani huachi. Paono