2 Timoteo 3 - Chayahuita (Shahui)

Aquë aquëtëꞌ co noyahuëꞌ cancantapisopita

¹ Isontaꞌ api pënëantaꞌinquën. Ayaroꞌ tahuëri yaꞌcaritohuachin, co huachi noya yaꞌhuapihuëꞌ.

² Piyapiꞌsaꞌ niapiratatonaꞌ, co huachi aꞌnapita yonquiapihuëꞌ. Coriquiráchin cancantapi. Aꞌnapita nocanapi. “Casoꞌ noya noyaco,” taꞌtonaꞌ, aꞌnapita co noyahuëꞌ niꞌsapi. Nipinosapi; Yosëntaꞌ pinosapi. Aꞌshinaꞌ, paꞌpinaꞌ, inapita co natërapihuëꞌ. Nani maꞌsha quëtopirinahuëꞌ, ina marëꞌ “Yosparinquën,” co itopihuëꞌ. Co Yosë chinotapihuëꞌ.

³ Co piꞌpisha tërantaꞌ ninosoroapihuëꞌ. Co niquëꞌyaapihuëꞌ. Ninonpinapitonaꞌ nishaꞌhuirapiapi. Nimonshitapi. Niꞌni pochin cancantatonaꞌ niahuëapi. Noya nininsopita co piꞌpisha tërantaꞌ nohuantapihuëꞌ.

⁴ Iina niponaraihuëꞌ, nonpinapitonaꞌ shaꞌhuirapiapi. Co huachi yonquiapihuëꞌ: “Quiyasáchin nitotërai,” tosapi. Nipaꞌyatacasoáchin yonquiatonaꞌ, co huachi Yosë nohuantapihuëꞌ.

⁵ “Quiyantaꞌ Yosë imarai,” topirinahuëꞌ, co tëhuënchachin imapihuëꞌ. Chinotopirinahuëꞌ, co cancanëna quëran huarëꞌ natëpihuëꞌ niꞌton, co Yosëri catahuarinhuëꞌ ina pochin cancantacaisoꞌ. Ama inapita natanquësohuëꞌ. Tananpitëquëꞌ paꞌinaꞌ.

⁶ Naꞌa piyapiꞌsaꞌ anishacancantapi. Aꞌnaya aꞌnaya pëiquë paatonaꞌ, sanapiꞌsaꞌ nonpintopi. Nonpintatonaꞌ, aꞌchintapirinahuëꞌ, aꞌnaquënsoꞌ noya natanpi. “Oshahuanco niꞌton, anaꞌintincosoꞌ yaꞌhuërin,” taꞌtonaꞌ, co chiníquën cancantopihuëꞌ. Nani maꞌsha nohuantatonaꞌ, co sano yonquipihuëꞌ niꞌton, aꞌnaroáchin natëtopi.

⁷ Nisha nisha nanan yanatanaponaꞌ. Yosë noꞌtëquën noninsoso nipirinhuëꞌ, co yanatëpihuëꞌ. Napoaton co Yosë nohuitopihuëꞌ.

⁸ Iráca catoꞌ pënotonoꞌsari Moisësë chinitopi. Canisë, Canprisë inapita itopisoꞌ. Moisësë noꞌhuitonaꞌ, copirno nonpintopi ama natëcaso marëhuëꞌ. Inapochachin ipora nisha aꞌchinaꞌpiroꞌsaꞌ co noyahuëꞌ yonquiatonaꞌ, co Yosë nohuantopihuëꞌ. Noꞌtëquën noninsoꞌ co yanatanpihuëꞌ. Nisha nanan imatonaꞌ, co Yosë imasapihuëꞌ.

⁹ Aꞌchintohuachina, aꞌnaquën natëpirinahuëꞌ, oshaquëran co huachi natërapihuëꞌ. “Nonpinápi,” taꞌtonaꞌ, co huachi imasapihuëꞌ. Inapochachin iráca ina pënotonoꞌsari nonpintopirinahuëꞌ, piyapiꞌsari oshaquëran noꞌtëquën nitotahuatonaꞌ, aꞌpopi huachi.

Paonori Timotio pënëninsoꞌ

¹⁰ Quëmaso nipirinhuëꞌ noya cancantaton, huaꞌquiꞌ caꞌtananco. Yosë nanamën aꞌchinpatëra, noya natanan. Yaꞌipi naporahuësoꞌ niꞌnan. Yosëíchin yonquiato, imamiatarahuë. Cancanëhuë quëran huarëꞌ natërahuë. Co piyapiꞌsaꞌ noꞌhuirahuëꞌ, nosororahuë. Maꞌsha onpoaporahuëꞌ, chiníquën cancantërahuë.

¹¹ Aparisitopirinacohuëꞌ, ahuantërahuë. Yaꞌipi niꞌnan niꞌton, nitotëran. Antioquiaquë, Iconioquë, Nistraquë, inaquëpita chiníquën parisitaporahuëꞌ, Sinioro catahuarinco niꞌton, chaꞌërahuë.

¹² Yaꞌipi cancanënpoa quëran Quisocristo imapatëhuaꞌ, aparisitarinënpoaꞌ.

¹³ Co noyahuëꞌ nipisopita, nonpintëroꞌsaꞌ, inapitasoꞌ aquë aquëtëꞌ co noyahuëꞌ nisapi. Naꞌcon piyapiꞌsa nonpintopi quëran, aꞌnapitarintaꞌ nonpintapi.

¹⁴ Quëmaso nipirinhuëꞌ, Yosë nanamën imamiatëquëꞌ. Nani iráca mama, mama paya, ca, aꞌnapitantaꞌ aꞌchintërainquën, cancanën quëran huarëꞌ natëran. Noya nohuitërancoi niꞌton: “Noꞌtëquën aꞌchintërinacoi,” taꞌton, imamiatëquëꞌ.

¹⁵ Huaꞌhuatapon quëra huarëꞌ Yosë quiricanën nohuitëran. Ina quëran Yosë nontërinpoaꞌ nichaꞌëinpoaso marëꞌ. Ina nitotohuatëhuaꞌ, Quisocristo natëhuatëhuaꞌ, cancanënpoaꞌ anoyacancantërinpoaꞌ.

¹⁶ Yaꞌipi Yosë quiricanënsoꞌ nóya. Yonquirinso chachin Yosëri aninshitërin. Quiricanën quëran aꞌchintërinpoaꞌ. Pënëninpoaꞌ co noyahuëꞌ ninëhuasopita naniantacaso marëꞌ, nóya ayonquirinpoaꞌ. Anitotërinpoaꞌ noꞌtëquën Yosë natëcasoꞌ.

¹⁷ Quisocristo imapatëhuaꞌ, quiricanën quëran catahuarinpoaꞌ noya nicacaso marëꞌ. Nitotatëhuaꞌ, natëhuatëhuaꞌ, nóya nisarëhuaꞌ. Ina marëꞌ quiricanën quëtërinpoaꞌ.