2 Timoteo 2 - Chayahuita (Shahui)

Sontaro pochin nininsoꞌ

¹ Quëmantaꞌ api: “Quisocristo catahuarinco,” taꞌton chiníquën cancantëquëꞌ. Ina imapatëhuaꞌ, inaora nohuanton catahuarinpoaꞌ chiníquën cancantacasoꞌ. Huiꞌnahuë pochin nicatënquën, pënënaranquën.

² Piyapiꞌsaꞌ niyontonpachinara, Yosë nanamën aꞌchintërahuë. Quëmantaꞌ natanan. Inapochachin quëmantaꞌ caraíchin quëmapiꞌsaꞌ huayonahuaton, ina nanan chachin aꞌchintantaquëꞌ. Noya natërinsopita aꞌchintëquëꞌ. Inahuanta aꞌnapita aꞌchintacaiso marëꞌ inapotëquëꞌ.

³ Noya sontaro pochin niquëꞌ. Inasoꞌ parisitohuachina, ahuantërin. Inapochachin quëmantaꞌ Quisocristo marëꞌ parisitohuatan, ahuantëquëꞌ.

⁴ Sontaro yaꞌconpatëra, co huachi aꞌna sacato yonquirëhuëꞌ. Capitanáchin natërëꞌ. Ina nohuantërinsoáchin ninëꞌ. Inapochachin canpoantaꞌ Quisocristoachin natëcasoꞌ yaꞌhuërin.

⁵ Isontaꞌ yonquiquëꞌ. Canatacaso marëꞌ yaꞌnipihuatëra, yaꞌnipi huaꞌan shaꞌhuitërinpoꞌ maꞌsona noya nicacasoꞌ. Co natëhuatërahuëꞌ, co canatërëhuëꞌ. Inapochachin canpoantaꞌ Quisocristo noninsoꞌ natëahuaꞌ.

⁶ Iminquë chiníquën sacatërinso pochin Yosë marëꞌ chiníquën sacatacasoꞌ yaꞌhuërin. Shaꞌtonaꞌpi noya sacatohuachina, cosharoꞌ yaꞌhuëtërin. Cayahuachina, inariꞌton manin.

⁷ Aꞌchintaranquënsoꞌ api yonquiráquëꞌ. Quisocristo catahuaarinquën noya noya yonquicamaso marëꞌ.

⁸ Quisocristo naꞌcon yonquiquëꞌ. Isoroꞌpaquë oꞌmaton, piyapi chachin nasitimarin. Tapi shiin inasoꞌ. Chiminaponahuëꞌ, nanpiantarin. Ina nanan chachin aꞌchinárahuë. Ina imapatëhuaꞌ, nichaꞌësarinpoaꞌ.

⁹ Ina aꞌchinahuëso marëꞌ parisitërahuë. Noꞌhuitonaco, tashinan pëiquë poꞌmorinaco. Apinaꞌpi pochin nicatonaco, catinatërinaco. Inapotopirinacohuëꞌ, Yosë nanamënsoꞌ co nanitopihuëꞌ inapotacaisoꞌ. Nisha nisha parti aꞌchinapi niꞌton, nahuinin.

¹⁰ “Yosë nohuanton, huayoninsopita oshaquëran imasapi,” taꞌto, yaꞌipiya ahuantërahuë. Quisocristo imapachinaꞌ, nichaꞌësarin. Oshanënaꞌ inquitahuaton, anoyacancantarin niꞌton, aꞌna tahuëri Yosëꞌpaꞌ nanpiantarapi. Inatohuaꞌ noya noya yaꞌhuëcontapi. Co onporontaꞌ pipiapihuëꞌ.

¹¹ Noꞌtëquën itëranquën. Yatëpapirinënpoahuëntaꞌ, imamiatohuatëhuaꞌ, inarëꞌquënpoaꞌ nanpimiatarihuaꞌ.

¹² Parisitapirëhuahuëꞌ, noya ahuantohuatëhuaꞌ, aꞌna tahuëri inarëꞌquënpoaꞌ huaꞌanëntarihuaꞌ Nipirinhuëꞌ, ina aꞌpohuatëhuaꞌ, inantaꞌ aꞌpoarinpoaꞌ.

¹³ Co noꞌtëquënáchin imapirëhuahuëꞌ, inasoꞌ noꞌtëquën nontërinpoaꞌ niꞌton, noya aꞌpaiarinpoaꞌ. Nani shaꞌhuitërinpoaꞌ niꞌton, co nanitërinhuëꞌ nonpintinpoasoꞌ. Co onporontaꞌ nisha cancantarinhuëꞌ.

Yosë marëꞌ sacatërëhuasoꞌ

¹⁴ Ina nanan chachin api yaꞌipi piyapiꞌsaꞌ shaꞌhuitaantaquëꞌ yonquiꞌinaꞌ: “Yosë niꞌsarinpoa niꞌton, ama nisha nisha ninontocosohuëꞌ,” itëquëꞌ. Inahuara yonquinëna quëran nisha nisha ninontohuachinara, topinan quëran nonsapi. Insosona inapita natanpachinaꞌ, co huachi noya Yosë imasapihuëꞌ. Nisha cancantatonaꞌ, yaaꞌpoapi.

¹⁵ Noyasáchin niquëꞌ Yosë noya niꞌinquën. Yosë nanamën maꞌsona tapon naporinsopita noya nitotaton, noꞌtëquën aꞌchinquëꞌ. Ina marëꞌ noya sacatohuatan, co Yosëꞌpaꞌ tapanaranhuëꞌ.

¹⁶ Nonpin nananoꞌsaso nipirinhuëꞌ tananpitëquëꞌ. Ama natanquësohuëꞌ. Topinan quëran ninontapi. Inapita imapatëhuaꞌ, co huachi Yosë pochin yonquiarëhuahuëꞌ.

¹⁷ Niꞌquëꞌ. Panca yonitohuatëra, nohuarotërëꞌ. Inapochachin nonpin nananoꞌsasoꞌ, yatapicancaninpoaꞌ. Iminio, Huirito inapitasoꞌ, nonpin nanan aꞌchinapi.

¹⁸ Yosë noꞌtëquën aꞌchintopirinpoahuëꞌ, co huachi natëpihuëꞌ. “Yosë nani piyapiꞌsaꞌ ananpitatë pochin nitërin. Co huachi aꞌna tahuëri ananpitaantarinpoahuëꞌ,” toconpi. Napopi niꞌton, co huachi aꞌnaquën imapihuëꞌ.

¹⁹ Yosë nanamënso nipirinhuëꞌ yaꞌhuárin, Yosë chachin acorinsoꞌ. Natëricho pëiꞌ achinirinsoꞌ pochin niꞌton, yaꞌhuëmiatarin. Cato quëran chachin ninshitopi. “Yaꞌipi imapisopita Yosëri nohuitërin,” tënin. “Quisocristo imapisopita nóya cancanchinaꞌ. Yaꞌipi co noyahuëꞌ yonquipisopita nanianchinaꞌ,” tënin antaꞌ.

²⁰ Panca pëiquë nisha nisha maꞌsha yaꞌhuërin inaquë oꞌshitacaso marëꞌ. Niꞌtoroꞌsaꞌ huëꞌpachinara, nasha minëꞌ ninshirayáchin masahuatëꞌ, oꞌshitërëꞌ. Minëtëꞌ, paꞌchitëꞌ, inapitaso nipirinhuëꞌ co ina marëꞌ yaꞌhuërinhuëꞌ. Nëꞌhuëiꞌ acocaso marëꞌ, huiꞌsëcaso marëꞌ, inapita marëꞌ yaꞌhuërin.

²¹ Inapochachin co noyahuëꞌ yonquiramasoꞌ naniantohuatamaꞌ, ninshiraya minëꞌ pochin nisaramaꞌ. Noyasáchin cancantohuatamaꞌ, Yosë nohuantarinquëmaꞌ. Acoarinquëmaꞌ noya nicacaso marëꞌ.

²² Aꞌnaquën huiꞌnapiꞌsasoꞌ nisha nisha yonquiatonaꞌ, paꞌsápi. Ama ina pochin yonquiquësohuëꞌ. Noyasáchin nicacasoꞌ yonquiquëꞌ. Yaꞌipi cancanën quëran Quisocristo natëquëꞌ. Yaꞌipi piyapi nosoroquëꞌ. Yaꞌipi imarëhuaso capininpoaꞌ noya niniꞌtëhuaꞌ, yaꞌhuaꞌahuaꞌ. Noyápiachin cancantatëhuaꞌ, Sinioro nontërëhuaꞌ catahuainpoaso marëꞌ.

²³ Aꞌnaquën co Yosë yonquiatonahuëꞌ, nisha nisha ninontapi. Topinan quëran ninontatonaꞌ, ninoꞌhuiapi. Quëmaso nipirinhuëꞌ ama inapitarëꞌquën chiníquën ninontocosohuëꞌ.

²⁴ Sinioro piyapinënpoaꞌ nipatëhuaꞌ, co piyapiꞌsaꞌ noꞌhuicasoꞌ yaꞌhuërinhuëꞌ. Noya nontacasoꞌ yaꞌhuërin. Noya nitotatëhuaꞌ, aꞌchintahuaꞌ. Noꞌhuipirinpoahuëꞌ, ama noꞌhuiahuasohuëꞌ, ahuantahuaꞌ. Sanoanan quëran nontahuaꞌ.

²⁵ Nisha nanan imapachina, oshaquëran pënëanhuanꞌ. Ama noꞌhuitatëhuahuëꞌ, aꞌchintahuaꞌ. Yosëri catahuahuachin, oshaquëran co noyahuëꞌ yonquipisopita naniantatonaꞌ, noꞌtëquën yonquiaponaꞌ nimara.

²⁶ Yonquicaiso marëꞌ sanoanan quëran pënëanhuanꞌ. Huënsonquë maꞌsha manëso pochachin sopairi nani manin. Camaihuachina, natëpi. Nipirinhuëꞌ pënënpatëhuaꞌ, sopai quëran chaꞌëponaꞌ nimara.