2 Timoteo 1 - Chayahuita (Shahui)

Timotio yonquiaton, nanan aꞌpatërinsoꞌ

¹ Ca Paonoco ninshitaranquën. ¿Noya quëmantaꞌ yaꞌhuaran? Noya cantaꞌ isëquë yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Quisocristo imapatëhuaꞌ, Yosë nohuitatëhuaꞌ, nanpimiatarihuaꞌ.

² Timotionquën ninshitaranquën. Nosoroatënquën, huiꞌnahuë pochin niꞌnanquën. Tata Yosë inaora nohuanton, catahuainquën. Noya nosoroꞌinquën. Nani tahuëri asanocancainquën. Quisocristontaꞌ inachachin catahuainquën. Inasoꞌ huaꞌanënpoaꞌ niꞌton, inasáchin natërëhuaꞌ.

Timotio noya imarinsoꞌ

³ Iráca shimashonëhuëpita Yosë chinotopi. Inapochachin cantaꞌ chinotërahuë. Yosë nanamën noꞌtëquën natëto, chinotërahuë. Ina marëꞌ noyápiachin cancantërahuë. Nani tahuëri tashirë chachin Yosë nontato, quëma yonquiranquën. Noya imaranso marëꞌ: “Yosparinquën Sinioro,” itërahuë.

⁴ Iráca yapatohuatënquëna, sëtaton naꞌnëran. Ina yonquiato, naꞌcon yaniꞌnanquën. Onpopiontaꞌ nicato noya cancanchi, tënahuë.

⁵ Cancanën quëran huarëꞌ Quisocristo natëran. Mamapayaꞌton natërin. Noita inasoꞌ. Ina quëran mama Ionisantaꞌ natëton, aꞌchintërinquën. Ipora quëmantaꞌ imaran, tënahuë. Ina yonquiarahuë.

⁶ Iráca sëꞌhuamotorahuatënquën, acoranquën pënëntamaso marëꞌ. Naporoꞌ Yosë chachin ananitërinquën niꞌton, nóya pënëntëran. Imapisopita noya aꞌchintëran. Iporantaꞌ api, ina yonquiaton chiníquën cancantëquëꞌ. Niꞌquëꞌ. Pënsha yatacopihuachina, pishitohuatëra noya orotaantarin. Inapochachin chiníquën cancantaton, pënëntaantaquëꞌ, tënahuë. Napoaton ninshitaranquën achinicancanaꞌhuanquënso marëꞌ.

⁷ Yosë co nohuantërinhuëꞌ tëꞌhuacasoꞌ. Ispirito Santo chachin achinicancaninpoaꞌ sopai minsëcaso marëꞌ. Inasáchin ananitërinpoaꞌ piyapiꞌsaꞌ nosorocasoꞌ. Catahuarinpoaꞌ cancanënpoa quëran noꞌtëquën yonquicasoꞌ.

⁸ Ama tapanatonhuëꞌ, Sinioro nanamën aꞌchináquëꞌ. Ina aꞌchinahuëso marëꞌ tashinan pëiquë poꞌmorinaco. Ama ina marëntaꞌ tapanquësohuëꞌ. Quëmantaꞌ aꞌchinanso marëꞌ aparisitohuachinënquën, chiníquën cancantëquëꞌ. Napohuatan, Yosë catahuarinquën noya ahuantamasoꞌ.

⁹ Yosë chachin anoyacancantërinpoaꞌ. Oshanënpoaꞌ inquitatonpoaꞌ, acorinpoaꞌ nóya nicacaso marëꞌ. Inaora nohuanton, nosororinpoaꞌ. Co noyahuëꞌ nipirëhuahuëꞌ, nosoroatonpoaꞌ, catahuarinpoaꞌ. Coꞌhuara isoroꞌpaꞌ acoyátërasohuëꞌ, ninotonpoaꞌ, nosororinpoaꞌ. Naporoꞌ chinotërin Quisocristo aꞌpaimacasoꞌ. Ina imapatëhuaꞌ, anoyacancantërinpoaꞌ.

¹⁰ Nosororinpoasoꞌ nani anitotërinpoaꞌ. Quisocristo oꞌmarin niꞌton, nitotërëhuaꞌ. Quisocristo chachin nichaꞌërinpoaꞌ. Nanpiantarahuaton, chimirin minsërin. Nanamën natëhuatëhuaꞌ, Yosë nohuitatëhuaꞌ, nanpimiatarëhuaꞌ. Chiminarihuarahuëꞌ, nanpiantarihuaꞌ. Nanamën quëran anitotërinpoaꞌ.

¹¹ Yosë acorinco nanamën shaꞌhuicaꞌhuaso marëꞌ. Pënëntaꞌhuaso marëꞌ aꞌparinco. Ina nohuanton, nisha piyapiꞌsaꞌ aꞌchintarahuë.

¹² Ina marëꞌ aparisitopirinacohuëꞌ, co tapanato yaaꞌporahuëꞌ. Quisocristo imamiatarahuë. Ina nohuitato, inasáchin natërahuë. Yaꞌipi nanitaparin. Nani shaꞌhuitërinco nanamën aꞌchinaꞌhuasoꞌ niꞌton, noya aꞌpaiarinco. Oꞌmantaquë huarëꞌ nanamën yaꞌhuëmiatarin, tënahuë.

¹³ Noꞌtëquën api aꞌchintëranquën. Inachachin quëmantaꞌ aꞌchinquëꞌ. “Quisocristoíchin anoyacancantërinpoaꞌ,” taꞌton inasáchin natëquëꞌ. Ina nosoroaton, aꞌnapitantaꞌ nosoroquëꞌ.

¹⁴ Yosë nohuanton, nanamën noꞌtëquën nitotëran. Ama mantaꞌ nisha aꞌchinquësohuëꞌ. Ispirito Santo catahuarinquën noꞌtëquën yonquicamasoꞌ. Nani yaꞌcoancantërinpoaꞌ catahuainpoaso marëꞌ.

¹⁵ Tashinan pëiquë poꞌmohuachinaco, yaꞌipi Asiaquë imapisopita patërinaco. Huiquiro, Imoquinisi, inapita quëran huarëꞌ napotërinaco. Nani nitotëran, tënahuë.

^16-17 Onisiporoso nipirinhuëꞌ, co naniantërincohuëꞌ. Nomaquë huëꞌsahuaton, yonisápatonco, quënaninco. Co tapanatonhuëꞌ, tashinan pëiquë niꞌquirinco. Naꞌaroꞌ achinicancaninco. Ina marëꞌ yaꞌipi pëinënquë yaꞌhuërinsopita Siniorori naꞌcon catahuain, tënahuë.

¹⁸ Ipisoquëntaꞌ naꞌcon catahuarincosoꞌ nani nitotëran. Ina marëꞌ Yosë nontërahuë. “Naꞌcon nosororinco niꞌton, Sinioro oꞌmantahuachin, inantaꞌ nosoroquëꞌ,” itërahuë, Yosë nontato.