2 Samuel 9 - Chayahuita (Shahui)

Tapiri Mihui-posi catahuarinsoꞌ

¹ Aꞌna tahuëri Tapisoꞌ, piyapinënpita natanin: “¿Saonocoꞌ quëmopinënpita aꞌnaya tëranta yaꞌhuëarin to? iráca Conatancorëꞌco anoyatatoi, ‘Yoscoarëꞌ co ninoꞌhuiarihuëꞌ,’ niitatoi nipayarai. Ina yonquiato inso tëranta quëmopinën yaꞌhuëapachin, shaꞌhuitoco. Nosorocaꞌhuaso marëꞌ napoarahuë,” itërin.

² Napotohuachina, aꞌnari itapon: “Saono quëmopinënpita piyapinëna aꞌnara yaꞌhuëarin, Sipa itopisoꞌ,” itërin. Ina natanaton: “Quëshico,” itaantarin. Quëpachina itapon: —¿Quëma Sipanquën? itërin. —Inaco mini sinioro copirno. Caso piyapinënco niꞌto, maꞌsona camaitëranso nisarahuë, itërin inarintaꞌ.

³ —¿Aꞌnaya tëranta Saono quëmopinën yaꞌhuëarin to? Yaꞌhuëapachin shaꞌhuitoco. Yosë niꞌsárinco nosoroarahuë, itërin Tapiri. —Yaꞌhuëarin mini aꞌnara Conatanco huiꞌnin. Inasoꞌ, Mihui-posi itopi. Cato paꞌhuën quëran chachin yamorin, itërin Sipari.

⁴ ¿Insëquëta ipora ina yaꞌhuëarin? itaantarin Tapiri. —Notiparo ninano itopiquë yaꞌhuarin. Amiri huiꞌnin Maquiri itopisoꞌ pëinënquë yaꞌhuëarin, tënin Sipantaꞌ.

⁵ Napotohuachina, copirnori camairin quëcacasoꞌ.

⁶ Maconpachina, canquirin. Inasoꞌ Conatanco huiꞌnin niꞌton, Saonocoꞌ shiin. Canquirahuaton copirno notënanquë mónsho tënin. Noya nicaton naporin. Tapirisoꞌ chiníquën nontaton itapon: —¿Quëma Mihui-posinquën? itërin. —Inaco mini sinioro copirno. Caso piyapinënco niꞌto, maꞌsona camaitëranso nisarahuë, itërin inarintaꞌ.

⁷ —Ama tëꞌhuatocosohuëꞌ. Iráca quëmaquën tatacorëꞌco, “Yoscoarëꞌ co ninoꞌhuiarihuëꞌ,” niitatoi nipayarai. Ina yonquiato carinquën nosoraoaranquën. Tata masho Saonocoꞌ noꞌpanën macamaso marëꞌ camaitarahuë. Naporahuaton quëmasoꞌ, ipora quëran huarëꞌ carëꞌquën coshataran, itërin.

⁸ Napotohuachina, inariso mónsho taantarahuaton: —Caso piyapinënco. Co máquëncohuëꞌ niꞌto, ina pochin catahuaancoso co inashitërahuëꞌ. ¡Niꞌnira chimipitë pochinco niꞌto, co maꞌmarë tëranta paꞌtërahuëꞌ! itërin.

⁹ Napotopirinhuëꞌ, copirnoriso Sipa amatahuaton itapon: —Saonocoꞌ noꞌpanën, maꞌshanënpita, inapita Mihui-posi quëtarahuë.

^10-13 Napoaton quëmasoꞌ, huiꞌnanpitarëꞌquën chachin ina noꞌpaquë sacataramaꞌ. Piyapiparinpitanta inaquë chachin sacataponaꞌ. Shaꞌtëramaso cayahuachin, macatoma tapaaramaꞌ. Huaꞌanëncoꞌ quëmopinënpita nanpicaiso marëꞌ inapotaramaꞌ. Mihui-posiso napoaponahuëꞌ, carë chachin coshatápon, itërin. Sipasoꞌ shonca aꞌnatërápo huiꞌninpita yaꞌhuëtahuaton, cato shonca piyapinënpita yaꞌhuëtërin. Inari copirno itapon: —Yaꞌipi camaitëranso sinioro copirno nisarai, itërin. Mihui-posisoꞌ cato paꞌhuën quëran chachin yamorin niꞌton, co nanitërinhuëꞌ sacatacasoꞌ. Napoaton Sipasoꞌ, huiꞌninpitarë chachin ina marëꞌ sacatopi. Piyapinënpitanta ina marëꞌ sacatopi. Inasoꞌ, saꞌinë chachin Quirosarinquë yaꞌhuërin. Inaquë copirno yaꞌhuërin niꞌton, inanta inaquë yaꞌhuërin. Copirno huiꞌninpita pochin nicaton, nani tahuëri inarë coshatërin. Aꞌnara huiꞌnin huaꞌhuishin yaꞌhuëtërin. Inasoꞌ, Micaia itopi.