2 Samuel 7 - Chayahuita (Shahui)

Yosë Tapirëꞌ anoyatërinsoꞌ

¹ Tapi copirno niꞌton, pëinënquë yaꞌhuëaton camaitarin. Siniorori catahuarin niꞌton, co huachi inimicoroꞌsari ahuëcaiso nohuantopihuëꞌ.

² Aꞌna tahuëri inasoꞌ, pënëntonaꞌpi Natan itopisoꞌ nontaton itapon: —Niꞌquëꞌ. Caso nonara nontë pëiquë noya yaꞌhuërahuë. Sinioro caposonënso nipirinhuëꞌ, topinan nëꞌmëtë pëiquë yaꞌhuëarin, itërin.

³ Napotohuachina Natani itapon: —Ina pëinën yanitohuatan, nitëquëꞌ. Sinioro catahuarararinquën, itërin.

⁴ Napotopirinhuëꞌ, naporo tashi chachin Siniorori yaꞌnotaton itapon:

⁵ “Paaton piyapinëhuë Tapi, yonquirahuëso shaꞌhuitëquëꞌ: ‘Pëi yaꞌhuëcaꞌhuaso marëꞌ, co quëma nitarancohuëꞌ.

⁶ Israiroꞌsanquëma Iquipito quëran ocoiranquëmaꞌ. Naporo quëran huarëꞌ ipora huanta co pëimiaquë yaꞌhuërahuë. Topinan nëꞌmëtë pëiroꞌsaquë itohua itohua yaꞌhuërahuë.

⁷ Ca nohuanton israiroꞌsa aꞌpaicaso marëꞌ huaꞌanoꞌsa acorahuë. Co inso huaꞌan tërantaꞌ, natanahuë nonara nontë quëran, pëi nitiincosoꞌ.’

⁸ Napoaton piyapinëhuë Tapi shaꞌhuitëquëꞌ: ‘Sinioro yaꞌipi nanitaparinso napotërinquën: “Quëmasoꞌ huiꞌnapitapon co máquënquënhuëꞌ ninan. Ohuicaroꞌsa aꞌpairapiranhuëꞌ, carinquën ocoiranquën. Piyapinëhuëpita huaꞌanëntamaso marëꞌ acoranquën.

⁹ Intopa tëranta paꞌnanquë, carinquën caꞌtanatënquën catahuaranquën. Inimiconënpita chinitopirinënquënhuëꞌ, carinquën catahuaranquën inapita tiquicamasoꞌ. Ca nohuanton sacóshin nahuinan. Chiníquën nanantopisopita pochin quëmanta nahuinan.

¹⁰ Naporahuaton, canpita yaꞌhuëcamaso marëꞌ noꞌpaꞌ taparahuë. Inaquë yaꞌhuëcamaso marëꞌ acoranquëmaꞌ. Isëquësoꞌ, co insonta apiponquëmahuëꞌ. Co noyahuëꞌ nipisopita co aparisitaponquëmahuëꞌ. Shimashonëmapitasoꞌ iso Canaan noꞌpaquë yaꞌnan yaꞌhuëaponaꞌ, aparisitopi. Canpitaso ipora co huachi inapotarinënquëmahuëꞌ.

¹¹ Naporo tahuëriꞌsasoꞌ, israiroꞌsanquëma catahuaimaso marëꞌ nisha nisha huaꞌanoꞌsa acorahuë. Quëmanta carinquën catahuaranquën inimiconënpita minsëamasoꞌ. Yaꞌipi inapita quëran nichaꞌëranquën. Naporahuaton ca nohuanton quëmá quëran pipipisopitantaꞌ, israiroꞌsa huaꞌanëntáponaꞌ.

¹² Aꞌna tahuëri chiminpatan, aꞌnara huiꞌnan copirno nicacaso marëꞌ acoarahuë.

¹³ Ina huachi pëinëhuë nitarinco. Ca nohuanto ina yaꞌconaton, huaꞌanëntomiatapon.

¹⁴ Inasoꞌ, huiꞌnahuë pochachin niꞌsarahuë. Inantaꞌ, paꞌpin pochachin niꞌsarinco. Inasoꞌ tëhuëpachin, anaꞌintatë huihuirëso pochin nitarahuë. Quëmapiꞌsa huiꞌnina nosoroatona pënënpiso pochin nitarahuë. Ina quëran pipipisopitanta copirno yaꞌconpachinaꞌ, ina pochachin nitarahuë.

¹⁵ Napotaporahuëꞌ, inapitaso co aꞌpomiatarahuëꞌ. Saonosoꞌ tëhuërinso marëꞌ aꞌpomiatërahuë. Aꞌpomiatato, ina yaꞌhuërënamën quëma acoranquën. Inapitasoꞌ, co ina pochin nitarahuëꞌ.

¹⁶ Quëmá quëran pipipisopita cari aꞌpairápo. Napoaton inapitaráchin piyapinëhuëpita copirnonëna yaꞌconaponaꞌ. Ca nohuanto inapitaso copirno yaꞌconatonaꞌ, huaꞌanëntáponaꞌ. Co nisharoꞌsari huaꞌanëntarinhuëꞌ,” tënin,’ itëquëꞌ,” itërin.

¹⁷ Napotohuachina, Natanisoꞌ inachachin Tapi shaꞌhuitërin.

¹⁸ Naporoꞌ inasoꞌ, Yosë caposonën acopisoꞌ nëꞌmëtë pëiquë yaꞌconin. Yaꞌconaton iso pochin Sinioro nontërin: “Sinioro. Quëmaso Yosënquën. Chini chiníquën nanantëran. Caso co máquëncohuëꞌ. Quëmopinëhuëpitantaꞌ, co máquënoꞌsahuëꞌ. Napoaton israiroꞌsa copirnonëna nicaꞌhuasoꞌ co inashitërahuëꞌ.

¹⁹ Quëmaso Sinioro, Yosënquën. Chini chiníquën nanantëran. Co copirno nicaꞌhuasoꞌ inashitopirahuëꞌ, acoranco piyapinënpita huaꞌanëntaꞌhuaso marëꞌ. Naporahuaton cá quëran pipipisopitanta piyapinënpita huaꞌanëntacaiso marëꞌ acoaran. ¡Co inso piyapi tërantaꞌ, quëma pochin nininhuëꞌ!

²⁰ Quëmaso Sinioro, Yosënquën. Chini chiníquën nanantëran. Co huachi nanitërahuëꞌ maꞌsona itaꞌhuanquënsoꞌ. Caso piyapinënco. Noyá nohuitëranco.

²¹ Quëmasoꞌ Sinioro, paꞌyapiro nininsoꞌ nicaton catahuaancoso yonquiran. Cá quëran pipipisopitantaꞌ, ina chachin nitaran. Quëmaora nohuanton inapocaso yonquiaton nitotaꞌhuaso marëꞌ shaꞌhuitëranco.

²² Quëmaso Sinioro, Yosënquën. Chini chiníquën nanantëran. ¡Ma nóyacha quëmasoꞌ ninan paya! Shimashonëhuëipita yáshaꞌhuitërinacoi: ‘Co insonta ina pochin yaꞌhuërinhuëꞌ. Co aꞌna yosë tëranta ina pochin nininhuëꞌ,’ itërinacoi.

²³ Israiroꞌsacoisoꞌ, piyapinënpitacoi. Nishatërai niꞌton, co aꞌna nacion tëranta quiya pochin yaꞌhuërinhuëꞌ. Iquipito quëran nichaꞌërahuatoncoi, huaꞌanëntërancoi. Nisha nisha nacionoꞌsa isëquë yaꞌhuëpirinahuëꞌ, ocoiran. Inapitasoꞌ nisha nisha mamanshi moshapirinahuëꞌ, napotëran. Huëhuëpiro nitaton ocoiran niꞌton, sacóshin nahuinan.

²⁴ Israiroꞌsacoi huaꞌanëntápancoiso marëꞌ naporan. Napoaton quëmasoꞌ Sinioro Yosënëhuëinquën nisaran.

²⁵ Inapoaton quëmasoꞌ, shaꞌhuitërancosoꞌ yonquiráquëꞌ. Ama naniantëquësohuëꞌ. Cá quëran pipipisopitanta copirno yaꞌconpachina, shaꞌhuitërancoso chachin nitëquëꞌ.

²⁶ Quëmasoꞌ Sinioro yaꞌipi piyapiꞌsa noya nicatënën paꞌyachinën. Nontohuachinën napoꞌinaꞌ: ‘¡Quëmaso Sinioro yaꞌipi nanitaparan! ¡Israiroꞌsa Yosënënquën. Inapita noya aꞌpaiton catahuaran! Tapisoꞌ quëma piyapinën ninin. Ina quëran pipipisopitanta copirno yaꞌconpachinaꞌ, noya huaꞌanëntomiachinaꞌ. Quëmari chachin inapita aꞌpaiquëꞌ,’ ichinën.

²⁷ Quëmasoꞌ Sinioro yaꞌipi nanitaparan. Cá quëran pipipisopitaráchin copirno yaꞌconacaisoꞌ, anitotëranco. Napoaton piyapinënco nipirahuëꞌ, nanitërahuë iso pochin nontaꞌhuanquënsoꞌ:

²⁸ Quëmaso Sinioro, Yosënquën. Chini chiníquën nanantëran. Noꞌtëquënáchin nonan. Caso piyapinënco nipirahuëꞌ, naꞌcon nosoroatonco catahuancoso shaꞌhuitëranco.

²⁹ Shaꞌhuitërancoso chachin nipachin, cá quëran pipipisopita copirno yaꞌconpachina, catahuaquëꞌ. Inapotaton noya aꞌpaiquëꞌ. Quëmaso Sinioro, Yosënquën. Chini chiníquën nanantaton, nani shaꞌhuitëranco. Napotërancoso chachin, inapitaso nitaran niꞌton, noya huaꞌanëntaponaꞌ,” itërin.