2 Samuel 5 - Chayahuita (Shahui)

Yaꞌipi israiroꞌsa copirnonëna nicacaso marëꞌ Tapi yaꞌconinsoꞌ

¹ Ina piquëran, yaꞌipi Israiro ansianoroꞌsa Ipronquë paꞌpi. Inaquë Tapi quënanconahuatonaꞌ, itaponaꞌ: “Canpoasoꞌ, israiroꞌsanpoaráchin.

² Saonoꞌton copirnonënpoa yaꞌconin. Napoaponahuëꞌ, naporo quëran huarëꞌ quëmari Israiro sontaroꞌsa camairan. Ahuëtacaiso marëꞌ quëpahuatana, quëmari chachin quëantaran. Naporahuaton Sinioro chachintaꞌ, nani shaꞌhuitërinquën copirnonëhuëi nicamaso marëꞌ. Ohuicaroꞌsa huaꞌanëni aꞌpairinso pochin nitancoiso marëꞌ nani acorinquën,” itopi.

³ Inapoatona yaꞌipi Israiro ansianoroꞌsari Tapi Ipronquë nontoonpi. Napotohuachinara inarintaꞌ, “Sinioronta niꞌsárinco niꞌton, noya camaitarahuë,” itahuaton inapitarëꞌ anoyatërin. Napohuachina, inapitaso yaꞌipi israiroꞌsa copirnonëna nicacaso marëꞌ acopi huachi.

⁴ Cara shonca piꞌipitasoꞌ copirno yaꞌconarin. Yaꞌipiya quëran catapini shonca piꞌipi copirno ninin.

⁵ Ipronquëꞌton yaꞌconaton, Cota huënton israiroꞌsa huaꞌanëntërin. Canchisë piꞌipi miria inaquë huaꞌanëntërin. Ina quëran yaꞌipi israiroꞌsa huaꞌanëntohuachina, cara shonca cara piꞌipi huaꞌanëntërin. Quirosarin ninanoquë naporin.

Quirosarin notënanquë noyá niacorapipirinahuëꞌ, Tapiri minsërinsoꞌ

⁶ Onporahuatonsona Tapi Quirosarin ninanoquë huaꞌanëntërinsoꞌ, shaꞌhuichinquëmaꞌ: Inasoꞌ, sontaronënpitarë chachin Quirosarinquë yaꞌhuëapon paꞌnin. Ina notënanquë quiposoroꞌsa noyá niacorapitona yaꞌhuëpi. Inapita ahuëcaiso marëꞌ Tapisoꞌ sontaronënpitarë chachin paaparin. Ina niꞌsahuatonaꞌ, inapitaso yonquinëna quëran: “Co onporonta Tapi yaꞌcontarinpoahuëꞌ,” topi. Napoaton nocanatona nanan aꞌpatopi: “Co onporonta quëmasoꞌ ninanonëhuëiquë yaꞌconaranhuëꞌ. Somarayaroꞌsaꞌ, sonpacharoꞌsaꞌ, inapitaráchin iso ninano aꞌpaiapirinahuë tërantaꞌ, co napoaranhuë taꞌa,” itopi.

^7-9 Naporoꞌ Tapisoꞌ sontaronënpita itapon: “Quiposoroꞌsa ahuëcamaso marëꞌ isopocoꞌ: Yayaꞌconpatamaꞌ, iꞌsha ninanoquë yaꞌconintaquëchin yaꞌconacamaso yaꞌhuërin. Nani yaꞌconpatamaꞌ, somarayaroꞌsaꞌ, sonpacharoꞌsaꞌ, inapita quihuitërinacosoꞌ tëpacoꞌ. ‘Inapitari tëranta yaꞌcopiapon,’ topiso marëꞌ inapita paꞌpi co quëꞌyarahuëꞌ,” tënin. Napoaton piyapiꞌsa nonpachinara napopi: “Somarayaroꞌsaꞌ, sonpacharoꞌsaꞌ, inapitasoꞌ, co onporonta Sinioro pëinënquë yaꞌconaponahuëꞌ,” topi. Inapotaton Tapisoꞌ sontaronënpitarë chachin quiposoroꞌsa yaꞌcontatona ahuëpi. Nani canarahuatona inaquë yaꞌhuërin. Napoaton inaso ninanoꞌ: “Tapi ninanonën,” itopi antaꞌ. Oshaquëranchin Quirosarin co pairahuanhuëꞌ nininsonta apairatërin. Noꞌpaꞌ paꞌpipi quëran apairatërinsoꞌ, pëinënquëꞌpaꞌ huarëꞌ nanirin.

Iran itopisoꞌ copirnori, Tapi catahuarinsoꞌ

¹⁰ Tapisoꞌ aquë aquëtë chiníquën nanantarin. Siniorori catahuarin niꞌton, naporin. Inasoꞌ Yosë yaꞌipi nanitaparin.

¹¹ Napoaton Tiro copirno Iran itopisori, piyapinënpita huaꞌanoꞌsa nininsoꞌ aꞌpatiirin. Nontë camayoroꞌsaꞌ, naꞌpi camayoroꞌsaꞌ, inapitanta aꞌpatiirin. Inapitari pëinën nitacaiso marëꞌ nonara nontë quëpatopi.

¹² Inapotohuachinara Tapi tapon: “Sinioro chachin Israiro copirno nicaꞌhuaso marëꞌ acorinco. Yaꞌipi israiroꞌsa nosoroaton, noya noya huaꞌanëntaꞌhuaso catahuarinco,” tënin yonquinënquë. (Tapisoꞌ Ipronquë huaꞌanëntapon pochin, saota huiꞌninpita quëmapiꞌsa yaꞌhuëtërin.)

Tapi Quirosarinquë huiꞌnahuaantarinsopita

¹³ Ina quëran Quirosarinquë yaꞌhuëcaso marëꞌ paꞌpachina, naꞌa sanapiꞌsa maantarin. Inaquëpitanta huiꞌnahuanpachina, aquë aquëtë huiꞌninpita quëmapiꞌsaꞌ, sanapiꞌsaꞌ, yaꞌhuëtaantarin.

^14-16 Huiꞌninpita inaquë huaꞌhuatopisopitasoꞌ, isopita: Samoa, Sopapo, Natano, Saromon, Iparo, Irisoa, Nihuico, Cahuia, Irisama, Iriata, Irihuirito, inapita. Yaꞌipi inapitasoꞌ, quëmapiráchin nipi.

Huiristinoꞌsa Tapiri minsërinsoꞌ

¹⁷ Tapi yaꞌipi israiroꞌsa copirnonëna nicacaso marëꞌ acopi. Ina acopisoꞌ, huiristino huaꞌanoꞌsanta natantopi. Napoaton sontaronënapita ayontonatonaꞌ, ina yonicaiso marëꞌ paapapi. Tapisoꞌ ina nitotaton, sontaronënpitarë chachin motopi naninoꞌsaquë naꞌpicaiso marëꞌ paꞌpi.

¹⁸ Huiristinoꞌsaso huëꞌsahuatonaꞌ, Nihuaimo motopiana itopisoꞌ huaꞌanëntiipi.

¹⁹ Napoaton Tapisoꞌ Sinioro natanin: —¿Huiristinoꞌsa ahuëcaꞌhuaso marëꞌ paꞌi? ¿Quëma catahuaponco inapita minsëaꞌhuasoꞌ to? itërin. Napotohuachina, inariso itapon: —Paapaton ahuëconquëꞌ. Carinquën catahuaranquën inapita minsëamasoꞌ, itërin.

²⁰ Naporoꞌ Tapisoꞌ, sontaronënpitarë chachin aꞌna noꞌpaquë canconpi. Inaquë israiroꞌsaso ahuëtatonaꞌ, huiristinoꞌsa canapi. Napoaton Tapi tapon: “Iꞌsha paquiitohuachina ihuairin. Inapochachin Sinioro catahuarinco niꞌton, inimicoroꞌsa yaꞌcontato ahuërahuë,” tënin. Napoaton ina noꞌpaso nohuitaton: Paaro-pirasin itërin.

²¹ Huiristinoꞌsasoꞌ, co ahuantatonaraihuëꞌ, taꞌapi. Taꞌatona mamanshinënapitanta patopi. Patohuachinara Tapisoꞌ sontaronënpitarë chachin inapita mapi.

²² Napotopirinahuëꞌ, huiristinoꞌsaso naquëranchin huëantapi. Huëꞌsahuatonaꞌ, Nihuaimo motopiana huaꞌanëntiantapi.

²³ Napohuachinara Tapisoꞌ, naquëranchin Sinioro nataantarin. Natanpachina Siniorori itapon: —Ama notënan quëran ahuëconcosohuëꞌ. Conitahuaton, pinëna parti quëran ahuëconcoꞌ. Parsamo nararoꞌsataquëchin canconpatamaꞌ, inaquë ahuëtocoꞌ.

²⁴ Ina nararoꞌsa huiꞌnimotënquë piyapiꞌsa iratërinso pochin natanaramaꞌ. Ina natanpatamaꞌ, ahuëtocoꞌ. Cá chachin quëchitato huiristinoꞌsa tiquiarahuë. Ina nitotamaso marëꞌ ina pochin natanaramaꞌ, itërin.

²⁵ Siniorori camairinso chachin Tapisoꞌ ninin. Inapoatona huiristino sontaroꞌsa canapi. Capaon quëran Coisiri ninano itopiquë huarëꞌ canapi.