2 Samuel 22 - Chayahuita (Shahui)

Yosë chinotaton Tapi naporinsoꞌ

^1-2 Siniorori Tapi nichaꞌërin. Copirno Saonocori inimicotaton yatëpapirinhuëꞌ, nichaꞌërin. Aꞌnapitarinta inimicotatona yatëpapirinahuëꞌ, nichaꞌërin. Ina yonquiaton iso pochin cantarin: “Quëmasáchin Sinioro paꞌpoyaranco. Naꞌpianaquë naꞌpirahuëso pochin yaꞌcopiranco. Quëmasáchin yánichaꞌëranco.

³ Quëmaso Yosënquën. Quëmasáchin imaranquën. Panca naꞌpiana noyá yaꞌcopirinco. Iscotontaꞌ, noya paꞌpoyarinco. Inapochachin quëmanta noya paꞌpoyaranco. Chiníquën nanantaton nichaꞌëranco. Ina inápa natëtëquë noya naꞌpirëꞌ, inapochachin quëmanta noya yaꞌcopiranco. Inimicoroꞌsa quëran nichaꞌëranco. Noꞌhuitërayaroꞌsa yatëpapirinacohuëꞌ, nichaꞌëranco.

⁴ Inimicoroꞌsa yaahuëhuachincora, nontëranquën. Ina natanaton, inapita quëran nichaꞌëranco. Napoaton chinotaꞌhuanquënso yaꞌhuërin.

⁵ Inimicoroꞌsa imapachinacora: ‘Masarinaco mini. Marë coꞌsacairi imotërinso pochin tëpaponaco,’ topirahuë. Huëhuëpiro pama pochin inimicoroꞌsaso niꞌton, inapita nicato paꞌpi tëꞌhuatërahuë.

⁶ Ohuacaꞌ caporinquë aꞌsonpatëra, co taꞌarinhuëꞌ. Ina pochachin cantaꞌ, nani chimirin aꞌsoninco topirahuë. Pëcotanquë maꞌsha mapatëra, tëparëꞌ. Ina pochachin cantaꞌ, macatonaco tëpaponaco topirahuë.

⁷ Napoaton co napion ancantato Sinioro përaranquën. ‘¡Catahuaco!’ taꞌto nontëranquën. Napotohuatënquëra, yaꞌhuëran quëran natananco. Chiníquën nontohuatënquëra, natananco huachi.

⁸ Naporoꞌ quëma nohuanton, chiníquën ocohua paꞌnin. Motopiroꞌsanta nacon naconchararin. Quëma Sinioro noꞌhuitëran niꞌton, naporin. Inimiconëhuëpita noꞌhuiton naporan.

⁹ Paꞌpi noꞌhuitëran niꞌton, nitëquën quëran conai pipirinso pochin yaꞌnoran. Nanamën quëran panca pën pipirinso pochin yaꞌnoran. ¡Inaran chachin pënayaroꞌsa opororanso pochin yaꞌnoran!

¹⁰ Piꞌiroꞌtë paꞌshintëransoꞌ paꞌshirëso pochin nitaton, oꞌmaran. Oꞌmahuatana, panca chitoro nininquë oꞌmaran. ¡Yara yaráchin nininquë oꞌmaran!

¹¹ Cahuarioquë yaꞌmitërëso pochin aꞌna quiropinoquë yaꞌmitëran. Yanponatë paꞌnëso pochin aꞌnaroáchin huëcapairinco. Panca ihuantaꞌ, anpiantëhuan pochin ninin. Ina aipi paꞌnëso pochin oꞌmaransoꞌ yaꞌnorin.

¹² Paꞌpi tëꞌhuatoro yaꞌnocaso marëꞌ yaráton chitoro yaꞌcopirinquën. Oꞌnan yaꞌhuërinquë chitoro napotërinquën.

¹³ Quëma nisaranquë oꞌcori huënaratërinso pochin huënaratarin. Pënayaroꞌsanta oꞌnan pochin aꞌpaimaran.

¹⁴ Chini chiníquën nanantonaꞌpi Sinioronquën nipiranhuëꞌ, anoꞌhuitërinën. Noꞌhuitaton huira pochin: ‘Sharí,’ tënan.

¹⁵ Pëꞌchinanquë shinërë tëꞌyatërëso pochin, oꞌcorinënpita aꞌpaimaran. Inimiconëhuëpita inaquë ohuanëso pochin ayanquëëran.

¹⁶ Inimiconëhuëpita noꞌhuiton iquianantëran. Inapita noꞌhuiton pihui pihuiaran. Naporoꞌ marë anpo nipirinhuëꞌ, noꞌpaꞌ yaꞌno yaꞌnoarin. Isoroꞌpaꞌ achinipisopitantaꞌ, yaꞌno yaꞌnoarin.

¹⁷ Panca marëquë paꞌitërëso pochin inimicoroꞌsa nitërinaco. Quëmasoꞌ imiranën ihuëtatë pochin nitëranco. Napotohuatancora, inaquë matatë pochin nicato chaꞌërahuë.

¹⁸ Inimiconëhuëpitasoꞌ, chini chiníquën nanantopi. Chiníquënoꞌsa niꞌtona noꞌhuipirinacohuëꞌ, inapita quëran nichaꞌëranco.

¹⁹ Maꞌsha onpoasoco chachin pashitaꞌparinaco. Quëmasoꞌ Sinioro napoaponahuëꞌ, catahuaranco.

²⁰ Inimicoroꞌsa quëran nichaꞌëranco niꞌton, co tëparinacohuëꞌ. Nosororanco niꞌton, nichaꞌëranco.

²¹ Noya ninahuëso marëꞌ noya catahuaranco. Co maquë tëranta naꞌinpiro ninahuëꞌ niꞌton, nóya acanaranco.

²² Quëma camaitëransopita noꞌtëquën natërahuë. Pënëntëransopita noꞌtëquënáchin natërahuë.

²³ Yaꞌipi camaitëransopita natërahuë. Pënëntëransopitanta yaꞌipi natërahuë.

²⁴ Noyasáchin nicato imaranquën. Co noyahuëꞌ nipatëra, tëhuërëꞌ. Co caso piꞌpian tëranta inaporahuë.

²⁵ Quëma nohuantëransoráchin ninahuë. Napoaton Sinioro acanaranco.

²⁶ Noꞌtëquënáchin natëhuachinën, quëmarinta noꞌtëquënáchin catahuaran. Noyasáchin nicatona imapachinën, noya nicaton catahuaran.

²⁷ Noꞌtëquën nontohuachinën quëmarinta noꞌtëquën nontaran. Yanonpintohuachinënsoꞌ, quëmarisoꞌ naꞌcon naꞌcon nitotaton monaaran.

²⁸ Co manta nanitopisopitahuëꞌ, nichaꞌëran. ‘Cashachaꞌ,’ topisopitaso nipirinhuëꞌ, atapanaran.

²⁹ Quëmasoꞌ aꞌpintatë pochin nitatonco noyasha acancantëranco. Tashinanquë paꞌnëso pochin maꞌsha onpotatonaco yatëparinaco. Quëmaso nipirinhuëꞌ, aꞌpintatë pochin nitëranco. Napotohuatancora, co inimicoroꞌsa maꞌsha onpotarinacohuëꞌ.

³⁰ Quëma catahuaranco niꞌton, inimicoroꞌsa ahuëarahuë. Pairahuan ninanoroꞌsaquë yaꞌhuëpirinahuëꞌ, yaꞌcontato minsërahuë.

³¹ Quëmaso Sinioro ninansopita, noyasáchin ninin. Co manta tëhuëranhuëꞌ. Catahuancoiso shaꞌhuitërancoisopitasoꞌ, natëpiro ninin. Sontaroꞌsa iscotonëni paꞌpoyarin. Inapochachin quëmanta natërinënquënsopita paꞌpoyaquëꞌ.

³² ¡Quëmasáchin Sinioro Yosënquën! ¡Co aꞌna yaꞌhuërinhuëꞌ paꞌpoyaincoisoꞌ!

³³ Quëma catahuaranco niꞌton, chiníquën ahuëtërahuë. Quëma catahuaranco niꞌton, noyasáchin nisarahuë.

³⁴ Quëma catahuaranco niꞌton, yo pochin taꞌarahuë. Huëhuëpiro motopiroꞌsa nininquënta míso paꞌnahuë. Inaporahuë niꞌton, co inimicoroꞌsa icantërinacohuëꞌ.

³⁵ Quëma aꞌchintëranco ahuëtaꞌhuasoꞌ. Achiniranco niꞌton, shaꞌpi huaꞌna pëꞌchinanoꞌsaquë inantërahuë.

³⁶ Inimicoroꞌsa quëran paꞌpoyarahuatonco, nichaꞌëranco. Nosoroatonco catahuaranco noya noya yaꞌhuërahuë.

³⁷ Inimicoroꞌsa imapachinacora co sacai quëranhuëꞌ taꞌananpirahuë. Inapohuatora, co toꞌcoitonahuanhuëꞌ taꞌarahuë.

³⁸ Inimicoroꞌsa nitaꞌatohuatora, imato tiquirahuë. Yaꞌipi tiquiaꞌhuarëꞌ huënantarahuë.

³⁹ ¡Yaꞌipi tiquiato, paꞌsa paꞌsatërahuë! Notatohuachinara, inaquëranchin taꞌhuantopi.

⁴⁰ Quëma achiniranco niꞌton, inimicoroꞌsa ahuërahuë. Co natantochináchinhuëꞌ cancantopisopitanta mosharinaco.

⁴¹ Quëma nohuanton inimicoroꞌsa taꞌananpirinaco. Taꞌapirinahuë imarahuë. Inapotato, noꞌhuirinacosopita tiquirahuë.

⁴² Canarahuatora, catahuacaiso marëꞌ: ‘Yai’ topi. Napopirinahuëꞌ, co incari catahuarinhuëꞌ. Quëmápita Sinioro përápirinënhuëꞌ, co aꞌpaniranhuëꞌ.

⁴³ Amocan paꞌsarëso pochin inimicoroꞌsa canarahuë. Cachiquë chipiroꞌ iꞌnatërëso pochin inimicoroꞌsa nitërahuë.

⁴⁴ Piyapinëhuëpita chachionta chinitopirinacohuëꞌ, nichaꞌëranco. Nisha nisha nacionoꞌsa huaꞌanëntërahuë quëran co ocoirancohuëꞌ. Co nohuitërahuësopitantaꞌ, natërinaco.

⁴⁵ Nisharoꞌsa niponaraihuëꞌ, natëinacoso nohuantopi. Maꞌsona camaihuatora aꞌnaroáchin natërinaco.

⁴⁶ Nisha piyapiroꞌsanta tëꞌhuatatonaco co huachi chinitërinacohuëꞌ. Tëꞌhuanënaquë, ropatërëꞌna naꞌpipi quëran pipipi.

⁴⁷ ¡Sinioro quëmaso yaꞌhuëmiatëquëꞌ! ¡Ma noyacha quëmasoꞌ paꞌpoyarancoi paya! Quëmasoꞌ nichaꞌëranco, paꞌpoyaranco, napotëranco. Napotëranco niꞌton, shaꞌhuihuato naní quëran paꞌyachinën.

⁴⁸ Quëmaso Yosënquën niꞌton, inimiconëhuëpita iꞌhuërëtëran. Quëma chachin nisha nisha nacionoꞌsa camaicaꞌhuaso marëꞌ acoranco.

⁴⁹ Inimiconëhuëpita quëran nichaꞌëranco. Aꞌnaquën co natëtatonahuëꞌ yaocoirinaco. Inapita quëraonta nichaꞌëranco. Sinioro: Noꞌhuitërayaroꞌsa yatëpapirinacohuëꞌ, quëma nichaꞌëranco.

⁵⁰ Nisha nisha nacionoꞌsaquë chinotaranquën. Quëma yonquiatënquën cantarahuë.

⁵¹ Quëma catahuaranco niꞌton, naꞌaro inimicoroꞌsa minsërahuë. Huayonatonco copirno nicaꞌhuaso marëꞌ acoranco. Nosoroatonco yácatahuaranco. Cá quëran pipipisopitanta inapotápon,” tënin Tapi Yosë cantanën cantaton.