2 Samuel 18 - Chayahuita (Shahui)

Apësaron canatonaꞌ, tëpapisoꞌ

¹ Tapisoꞌ sontaronënpita ayontonahuaton huaꞌanoꞌsa acoraꞌpiarin. Aꞌnaquën, huaranca sontaro camairarin. Aꞌnaquënsoꞌ, pasa sontaro camairarin.

^2-3 Inapotahuaton patoma pochin Coapo huaꞌan aꞌpantërin. Inanapochachin Coapo iin Apisai itopisontaꞌ, aꞌpantërin. Itai itopisonta inanapochachin aꞌpantërin. Naporahuaton yaꞌipi sontaronënpita itapon: —Cantaꞌ, canpitaroꞌco paꞌsarahuë, itërin. Napopirinhuëꞌ, inapitariso itaponaꞌ: —Co naporinhuëꞌ. Co pacamaso yaꞌhuërinhuëꞌ. Quiyasoꞌ inimicoroꞌsa co aquëtë tahuërëtarinacoihuëꞌ. Tëpahuachinacoi co maꞌshahuëꞌ nisarin. Nitaꞌatohuachinacointaꞌ, noyatapon. Quëma tëhuënchinsoꞌ shonca huarancacoi pochin paꞌtëran. Napoaton quëmasoꞌ ninanoquëranchin quëparitaton catahuacoi, itopi.

⁴ —Naporama niꞌquëhuarëꞌ, inapoꞌi nipachin, itërin Tapiri. Napotahuaton ninano yaꞌcoanaquë yaꞌhuincá tënin. Sontaronënpita pipicaiso marëꞌ naporin. Inapohuachina, aꞌna huënton aꞌna huënton pipipi. Aꞌnaquën huaranca huaranca. Aꞌnaquënsoꞌ, pasa pasa pipipi.

⁵ Sontaroꞌsa coꞌhuara pipiyátërasoihuëꞌ, Tapisoꞌ Coapo, Apisai, Itai, inapita camairin: “Noya nicatomaco natëhuatamacosoꞌ, ama Apësaron maꞌsha onpotocosohuëꞌ,” itërin. Yaꞌipi sontaroꞌsa natantonënquë inapita huaꞌanoꞌsa napotërin.

⁶ Inapoatona Tapi sontaronënpitasoꞌ, Apësaron sontaronënpitarëꞌ niahuëcaiso marëꞌ paꞌpi. Niquënapachinara niahuëpi. Iprain tanan itopiquë niahuëpi.

⁷ Niahuëhuachinara, Tapi sontaronënpitari Apësaron sontaronënpita canapi. Notohuaroꞌ tiquipi. Cato shonca huaranca sontaroꞌsa pochin chiminpi.

⁸ Yaꞌipi ina tanan nani chachin niahuëpi. Napoaponahuëꞌ, co Tapi sontaronënpitariáchin ina nápo tiquirinhuëꞌ. Tanani naꞌcon naꞌcon napotërinsoꞌ.

⁹ Ahuëtasoi Apësaronsoꞌ, moranënquë yaꞌmitëpinan paꞌsarin. Paꞌsapirinhuëꞌ, aꞌnanaya paꞌpin sontaronënpita quënanin. Napohuachina, tahuërërahuaton taꞌacaso marëꞌ pashi tënin. Pashitopirinhuëꞌ, moranënso insina naraanaquë yaꞌconconin. Notohuaroꞌ sëꞌpaquënpita yaꞌhuërintaquëchin naꞌhuërapirinhuëꞌ, inaquë ainën aꞌtënconin. Moraso naꞌhuërin niꞌton, inasoꞌ inaquëranchin huëntënárin.

¹⁰ Aꞌnari quënanahuaton, Coapo shaꞌhuitapon paꞌnin: —Apësaron insina sëꞌpaquë ainën quëran aꞌtënpinan huëntënárin quënanahuë, itërin.

¹¹ Napotohuachina: —¡Nani quënanan niꞌquëhuarëꞌ, tëpachinaꞌitonhuëꞌ! Paantarahuaton tëpaontahuatan, noya ancantato shoncatë coriqui prata quëran nininsoꞌ, quëchitënquënhuëꞌ. Ina quëtahuatënquën, chini chiníquën nanantaton camaitacaso marëꞌ, huaꞌan sintoron quëtochinaꞌitënquënhuëꞌ, itërin.

¹² —Huarancatë coriqui prata quëran nininsoꞌ quëtopirancohuë tërantaꞌ, co tëpaꞌitohuëꞌ. Nani quiyanta natanai copirno camairinquënsoꞌ. Apisai, Itai, inapitanta ina chachin camairin. Ama huiꞌnin maꞌsha onpotamaso marëhuëꞌ camairinquëmaꞌ.

¹³ Tëparahuënta nicaipoꞌ, copirnoso nitotaantaꞌitonhuëꞌ. (Ina marësoꞌ, co poꞌoana quëran maꞌsha nishápasohuëꞌ niconin.) Tëparahuë naporini, inaso canta yatëpaantaꞌintoncohuëꞌ. Co quëma paꞌpoyaitoncohuëꞌ, itërin.

¹⁴ —Co nonsápatë tahuëri chiniacaso yaꞌhuërinhuëꞌ, itërin Coapori. Napotahuaton cara huaꞌnaroaꞌhua manin. Ina masahuaton Apësaron paaparin. Inasoꞌ, inaquëranchin huëntënárin quënanconin. Quënanconahuaton cara huaꞌnaroaꞌhuaquë chachin ninopinëntaquëchin tëꞌyanantaton, papitërin.

¹⁵ Inapotohuachina Coapo catahuarinsopita shonca sontaroꞌsari tancapitatona tëpaihuarëꞌ nitopi.

¹⁶ Nani tëpahuachinara, Coaposo tronpita pihuinaꞌpi pihuicasoꞌ camairin. Ama huachi Apësaron sontaronënpita imatona ahuëcaiso marëhuëꞌ napotërin. Camaihuachina, inaso pihuirin huachi. Inapoaton, Coapori ahuëtopiso acopitërin.

¹⁷ Naporoꞌ Apësaron nonën masahuatonaꞌ, noꞌpaꞌ nanin acoponantëquë tëꞌyatopi. Inapotahuatonaꞌ, notohuaroꞌ naꞌpiroꞌsaquë imotopi. Sontaronënpitaso co huachi imapachinarahuëꞌ, yaꞌhuëpiꞌpaꞌ taꞌapi.

¹⁸ Inaso nanpipon, piyapinënpita camairin aꞌnara panca raꞌpi ahuanicaisoꞌ. Napotohuachina inapitasoꞌ, copirno motopiana itopiquë ahuanipi. Ahuanirahuatonaꞌ, ina nininënquë nohuitopi. Inasoꞌ, co huachi aꞌnaya tëranta huiꞌnin quëmapi yaꞌhuëtërinhuëꞌ yaꞌhuërëtacaso niꞌton: “Iso naꞌpi ahuanirahuë quëran, yonquiaponaco,” taꞌton naporin. Napoaton iso quirica ninshitasoco huarënta inachachin: “Apësaron naꞌpinën,” itapi.

¹⁹ Ina quëran Satoco huiꞌnin Aimasëri Coapo itapon: —Taꞌarëꞌnachin paꞌsahuato copirno shaꞌhuitocoꞌin: “Sinioro noya nicatënquën inimiconënpita quëran nichaꞌërinquën,” itoꞌin, itërin.

²⁰ —Co quëma iporasoꞌ copirno nanan quëpatacaso yaꞌhuërinhuëꞌ. Aꞌna tahuëri mini quëmari nanan quëpataran. Iporasoꞌ copirno huiꞌnin chiminin niꞌton, co quëpataranhuëꞌ, itërin.

²¹ Napotaponahuëꞌ, aꞌnara Itiopia sontaro camaiaton itapon: —Quëmari paꞌsahuaton maꞌsona onporëhuasoꞌ copirno shaꞌhuitoonquëꞌ, itërin. Napotohuachina, inaso Coapo notënanquë mónsho tënin. Naporahuaton taꞌarëꞌnachin paꞌnin.

²² Napoaponahuëꞌ, Aimasëso naquëranchin Coapo itaantapon: —Onpopionta cantaꞌ, Itiopia quëmapi imasarahuë, itërin. Napotaantapirinhuëꞌ: —¡Ama apiaꞌhua napoquësohuëꞌ! Copirno huiꞌnin chimininso shaꞌhuitohuatan, co ina marëꞌ manta canaranhuëꞌ, itaantarin Coapori.

²³ —¡Maꞌta pini! Onpopionta paꞌsarahuë, tënin Aimasë. —¡Naporan niꞌquëhuarëꞌ, paquë nipachin! itërin Coapori. Napotohuachina, inaso paꞌnin. Motopianataquëchin taꞌarahuaton, Itiopia quëmapi naꞌcotërin.

²⁴ Napoasoi Tapisoꞌ, cato yaꞌcoanaroꞌsa huáncana huënsëárin. Ina yaꞌcoanaroꞌsataquëchin ninanoquë yaꞌconpi. Aꞌpaitonaꞌpi sontarontaꞌ, yaꞌcoanaroꞌsa pëirapipiso aipi nanpërahuaton, aꞌpaitárin. Inasoꞌ, ira parti notëtahuaton niꞌpirinhuëꞌ, aꞌnara quëmapi taꞌarëꞌnachin huëꞌsarin niꞌnin.

^25-26 Chiníquën nonaton, quënaninsoꞌ copirno shaꞌhuitërin. Naporoꞌ copirnosoꞌ, chiníquën nonaton tapon: —Inaoráchin huëꞌsarin niꞌquëhuarëꞌ, noya nanan quëshiarinpoaꞌ, tënin. Napoin quëran huëꞌsarinsosoꞌ, yacaritëriarin. Naporoꞌ aꞌpaitonaꞌpisoꞌ, naquëranchin notëantapirinhuëꞌ, aꞌna yaꞌhuërëꞌ taꞌariantarin niꞌnin. Ina niꞌsahuaton, yaꞌcoana aꞌpainaꞌpi chiníquën shaꞌhuitërin: —¡Aꞌna yaꞌhuërëꞌ, taꞌarëꞌnachin huëantararin! itërin. —Inanta noya nanan quëshiarinpoaꞌ, tënin copirno.

²⁷ Naquëranchin aꞌpainaꞌpi sontarosoꞌ, copirno shaꞌhuitaantarin: —Taꞌarin quëran nohuitërahuë. Yaꞌnan huëꞌsarinsosoꞌ, Satoco huiꞌnin Aimasë tënahuë, tënin. —Inasoꞌ, noya quëmapi. Co nisha nisha cancantërinhuëꞌ. Noya nanan quëshiarinpoa ipora, tënin copirnontaꞌ.

²⁸ Aimasë canquirahuaton copirno notënanquë isonin. Noya nicaton isonin quëran noꞌpaquë huarëꞌ monshomarin. Ina quëran nontaton itapon: —¡Ma noyacha Sinioroso paya! Inasoꞌ Yosë chinotëransoꞌ. Ina nohuanton yaocoirinënquënsopita quiyari minsërai, itërin.

²⁹ Napotohuachina copirnori itapon: —¿Apësaron poꞌ? ¿Co manta onporinhuëꞌ? itërin. —Coaposoꞌ, quëma piyapinën. Huëcaꞌhuaso marëꞌ ina camaiasonco chachin sontaroꞌsa panca noncarorapi. Noncarorapirinahuëꞌ, co caso nitotërahuëꞌ maꞌsona onpopisoꞌ, itërin Aimasëri.

³⁰ Naporoꞌ copirnori camairin: —Amasha yaꞌhuincarahuaton inaquë huanitaquëꞌ, itërin. Napotohuachina, inaso ina inachachin ninin.

³¹ Naporoꞌ Itiopia quëmapinta canquiarin. Canquirahuaton itapon: —Noya nanan quëshiaranquënsoꞌ nitotëquë sinioro copirno. Ipora tahuëri Sinioro noya nicatënquën catahuarinquën. Yaꞌipi yaocoirinënquënsopita quëran nichaꞌërinquën, itërin.

³² Napotohuachina, inanta copirnori itapon: —¿Apësaron poꞌ? ¿Co manta onporinhuëꞌ? itërin. —Nani chiminin. Inimicotërinënquënsopita, yaocoirinënquënsopita, maꞌsha yaonpotërinënquënsopita, inapita inaporaꞌpiapi naporini, noya niitonahuëꞌ, itërin.

³³ Ina natanaton, copirnoso paꞌpi sëtërin. Sëtaton yaꞌcoana aipi patoana yaꞌhuërinquë nanpëontarin. Inaquë huiꞌnin marëꞌ sëtaton, naꞌnëmiatërin. Ayanapon pochin naporin: “Apësaron, huiꞌnahuë taꞌa. Apësaron conpaaꞌhua taꞌa. Quëma yaꞌhuërënamën chiminahuë naporini, noya niitohuë taꞌa. Apësaron, huiꞌnahuë taꞌa. Apësaron conpaaꞌhua taꞌa,” tënin naꞌnëton.