2 Samuel 17 - Chayahuita (Shahui)

Osai, Aitohuiro, inapitari Apësaron nisha nisha ayonquipisoꞌ

¹ Apësaronsoꞌ, paꞌpin cosonanënpita inapotërin. Ina piquëran Aitohuirori pënënin: —Apiramiachin shonca cato huaranca israiroꞌsa huayonarahuë. Inaporahuato ipora tashi chachin inapitaroꞌcoi tata ahuëaꞌhuaiso marëꞌ imasarai.

² Canotaton sanpataso chachin ahuëarai. Inapotatoi aꞌpayanarai. Naporoꞌ piyapinënpitarisoꞌ, taꞌananpiponaꞌ. Inapotohuachina tatasáchin tëparahuë.

³ Ina catahuapisopitasoꞌ, co manta onpotarahuëꞌ. Oshaquëranchin inapitarëꞌco anoyatarahuë. Inapohuato, nohuantapona quëma yaꞌhuërëꞌ natëinënsoꞌ. Quëmasoꞌ, tatasáchin chiminacaso nohuantëran. Ina chiminpachin, yaꞌipinpoa sano yaꞌhuëantarihuaꞌ, itërin.

⁴ Ina pochin pënëninsoꞌ Apësaron costarin. Aꞌnapita Israiro ansianoꞌsantaꞌ, costapi. Inahuarinta copirno yápënënpi.

⁵ Yaꞌipiya quëran costapirinahuëꞌ, Apësaronso Osainta quëcacaiso camaitaantarin. Inanta yonquirinso shaꞌhuihuachin nitotacaiso marëꞌ naporin.

⁶ Osai canquihuachina Apësaronsoꞌ, Aitohuirori pënëninsoꞌ shaꞌhuitahuaton, itapon: —Ina pochin Aitohuiro pënëninco: ¿Noya ipora ina pochin nicacasoꞌ to? ¿Maꞌta quëma yonquiran? itërin.

⁷ —Aitohuiro ipora pënëninquënsoꞌ, co noyahuëꞌ.

⁸ Nani quëmasoꞌ tataparin nohuitëran. Inasoꞌ, piyapinënpitarë chachin chiníquën cancantonaꞌpiroꞌsaꞌ. Apiramiachin inahuasoꞌ, paꞌpi noꞌhuitapi. Tocani paya huaꞌhuinpita matopiso pochin cancantapi. Naporahuaton tatasoꞌ ahuëton nichinapon chachin nani tantiarin inimiconënpitari ahuëcaisoꞌ. Inapo yonquiaton tashisoꞌ, co piyapinënpitarëꞌ huëꞌëponhuëꞌ.

⁹ Nani ipora apiramiachin inso motopi naninquë tërantaꞌ, naꞌpiarin. Onpopinquëhuë nipon nisarin. Ipora ahuëtasoi chachin, inapitari quëma sontaronënpita tëpaapi. Tëparahuachina aꞌnaroáchin quëma sontaronënpitasoꞌ: “Nanichi canarinënpoa paya,” tosapi.

¹⁰ Napohuachina aꞌnaquën sontaronënpita chiníquën cancantopirinahuënta co huachi nanitapihuëꞌ. Paꞌpini pochin cancantopirinahuë tërantaꞌ, co huachi chiniapihuëꞌ. Naní quëran israiroꞌsasoꞌ: “Tapi, sontaronënpita, inapitaso chiníquën cancantopisopita,” topi.

¹¹ Napoaton carinquën pënëiquën: Pëtëtë parti Tano ninano yaꞌhuërin. Pëꞌnatëraonta Piirsipa ninano yaꞌhuërin. Yaꞌipi ina nani chachin israiroꞌsaso yaꞌhuëatonaꞌ, marë yonsanquë inotëraꞌhuaya pochin naꞌapi. Ina nápo chachin niyontoinaꞌ. Naporahuaton tata ahuëamaso marëꞌ quëmari chachin inapita quëpaquëꞌ.

¹² Naporoꞌ tataparin intohua yaꞌhuëpirinhuë tërantaꞌ, ahuëarihuaꞌ. Poroncayo anotohuachina, yaꞌipi parti anotërin. Ina pochin canpoanta noyá tahuirapitohuatëhuaꞌ, co intoparan taꞌaponhuëꞌ. Inapotatëhuaꞌ, sontaronënpitarë chachin tiquiarihuaꞌ.

¹³ Pairahuan ninanoquë chaꞌëcaso marëꞌ yaꞌconpirinhuëꞌ tërantaꞌ, poꞌtarihuaꞌ: Yaꞌipi Israiro sontaroꞌsanpoa noninoꞌsa quëparihuaꞌ. Aꞌnaya aꞌnaya quëran ina ninano naꞌpinënpita ohuaratëhuaꞌ, iꞌquë huarëꞌ tëꞌyaitarihuaꞌ. Inapotohuatëhuaꞌ, co aꞌna naꞌpi tëranta inaquë yaꞌhuëaponhuëꞌ naꞌpicasoꞌ, itërin.

¹⁴ Apësaron, Israiro ansianoꞌsaꞌ, inapitaso Osai naporinso natanpi. Ina natanatonaꞌ: “Osaicha, Aitohuiro quëran noya noya pënëninpoa paya,” topi. Aitohuirori noꞌtëquën pënënpirinhuëꞌ, Sinioro nohuanton co ina imapihuëꞌ. Tapiri, Apësaron canacaso marëꞌ naporin.

¹⁵ Ina quëran pipirahuaton Osaisoꞌ, corto huaꞌanoꞌsa Satoco, Apiataro, inapita niꞌconin. Niꞌconaton Aitohuirori Apësaron, Israiro ansianoꞌsaꞌ, inapita pënëninsoꞌ shaꞌhuitërin. Inaora chachionta inapita pënëninsoꞌ shaꞌhuitërin. Nani shaꞌhuitahuaton: “Inapita Tapi shaꞌhuitonco nitochin.

¹⁶ Naporahuaton sontaronënpitarë chachin aꞌnaroáchin Cortaniiꞌ pëntonchinaꞌ. Ama tëpacaiso marëhuëꞌ inapoꞌinaꞌ, itocoꞌ,” itërin.

¹⁷ Conatan, Aimasë, inapitasoꞌ, In-roquë itopiso huinanquë nisapi. Co nanitopihuëꞌ Quirosarinquë pacacaisoꞌ. Inaquë quënanpi naporini, Apësaronquë shaꞌhuirapiitonahuëꞌ. Ina camaitërin macatonaꞌ, Tapi shaꞌhuirapicaiso marëꞌ aparisichitonahuëꞌ. Napoaton Satoco, Apiataro, inapitasoꞌ, aꞌnara piyapinën sanapi inatohua aꞌpapi. Osairi Tapi nanan aꞌpatërinso shaꞌhuitacaso marëꞌ aꞌpapi. Ina natanatonaꞌ, inapitaso aꞌnaroáchin Tapi shaꞌhuitapona paꞌpi.

¹⁸ Paꞌsapirinahuëꞌ, aꞌna huiꞌnapiri quënanin. Quënanaton, Apësaronquë shaꞌhuirapipon paꞌnin. Napohuachina: “Nani quënaninënpoaꞌ,” taꞌtonaꞌ, aꞌna pëiquë taꞌapi. Ina pëi huaꞌanënsoꞌ, Paorin ninanoquë yaꞌhuërin. Pëi huaꞌanën natanpachinara, ina posonënquë naꞌpicaiso marëꞌ nohuaramapi.

¹⁹ Ina quëran ina quëmapi saꞌinsoꞌ, posonën aꞌtantërin. Inapotahuaton, trico toꞌnorarinsoꞌ ina aipi aꞌhuintacaso marëꞌ acorin. Inapotohuachina, co insonta manta nitotërinhuëꞌ.

²⁰ Apësaron sontaronënpita canquirahuatonaꞌ, sanapi natanpi: —Aimasë, Conatan, inapita yonisarai. ¿Co quëmari niꞌnanhuëꞌ? itopi. —Isëchin mini naꞌhuëpi. Iꞌ parti paꞌmapi pora, itërin sanapiri. Napotohuachina, yonípona paꞌpi. Yonisápirinahuëꞌ, co quënanpachinaraihuëꞌ Quirosarinquë paantapi.

²¹ Sontaroꞌsa paꞌpachinara, cato yaꞌpiso pipipi. Taꞌarëꞌnachin paꞌsahuatonaꞌ, Tapi shaꞌhuitomapi: “Aꞌnaroáchin Cortaniiꞌ pëntontocoꞌ. Aitohuirori nani Apësaron tëpainquënso marëꞌ pënënin,” itopi.

²² Napotohuachinara, inaso piyapinënpitarë chachin tashi nipirinhuëꞌ, Cortaniiꞌ pëntontopi.

²³ Aitohuirosoꞌ: “Noꞌtëquën pënënpirahuëꞌ, co Apësaron natërincohuëꞌ. Co natërincohuëꞌ niꞌquëhuarëꞌ, paꞌpini canapon,” tënin. Ina yonquiaton moranën taparin. Inaquë yaꞌmitëahuaton huaꞌhuatërinso ninanoquë paꞌnin. Canconahuaton quëmopinënpita, piyapinënpita, inapita nontërin. Maꞌpitaso nicacaisoꞌ camaitërin. Inaporahuaton, noninquë nihuënquëconorin quëran chiminin. Napohuachina, inanta paꞌpincoꞌ poꞌmopiquë chachin poꞌmoontapi.

Tapi Maanain ninanoquë canconinsoꞌ

²⁴ Apësaronsoꞌ, Israiro sontaroꞌsa ayontonin. Ayontonahuaton Tapi ahuëcaso marëꞌ imarin. Naporahuaton sontaronënpitarë chachin Cortaniiꞌ pëntontërin. Naporoꞌ Tapinta piyapinënpitarë chachin, Maanain ninanoquë canconpi. Inaso ninanoꞌ, pairahuan.

²⁵ Apësaronsoꞌ, sontaronënpita huaꞌanën nicacaso marëꞌ Amasa itopisoꞌ acorin. Coapo yaꞌhuërënamën ina acorin. Amasasoꞌ, aꞌnara Ismairo quëmapi huiꞌnin. Inasoꞌ, Itara itopi. Apicairo itopisoꞌ macaton huiꞌnahuaninsoꞌ. Apicairosoꞌ, Naasi huiꞌnin. Naporahuaton Sirohuia cainpain. Nani shaꞌhuitëranquëmaso chachin inasoꞌ, Coapo, Apisai, inapita aꞌshinaꞌ.

²⁶ Apësaronso sontaronënpitarë chachin Carata parti canconpi. Inaquë chinotai marëꞌ nëꞌmëtë pëinëna ótënaꞌpiapi.

²⁷ Maanainquë canpachinara, cara quëmapiꞌsari nontacaiso marëꞌ Tapi nacapipi: Aꞌnasoꞌ, Naasi huiꞌnin. Sohui itopi. Napa ninanoquë yaꞌhuërinsoꞌ. Ina ninanosoꞌ, amonoꞌsa noꞌpanënquë yaꞌhuërin. Aꞌnantaꞌ, Amiri huiꞌnin Maquiri itopisoꞌ. Inanta Notiparo ninanoquë yaꞌhuërin. Aꞌnantaꞌ, Parisirai itopi. Inaso nipirinhuëꞌ, Carata parti Noquirin ninano itopiquë yaꞌhuërin.

^28-29 Inapitari, sahuanasaroꞌsaꞌ, panticaroꞌsaꞌ, noꞌpaꞌ huëꞌëtaroꞌsaꞌ, inapita quëshipi. Trico, sipata, trico roꞌmoꞌ, sipata iyana, aparaya, shantë, inapitanta quëshipi. Ninoiꞌ, ohuaca shoꞌshoiꞌ atachirotopisoꞌ, ina quëran chachin quiso nipisoꞌ, ohuica shoꞌshoiꞌ quëranta quiso nipisoꞌ, inapita quëshiipi: “Tapi piyapinënpitarë chachin inotëro huëꞌshitona canotopi, tanapi, yamoropi, napopi. Quëpatahua inaya tëranta caꞌinaꞌ,” taꞌtona inapita quëshipi.