2 Samuel 16 - Chayahuita (Shahui)

Tapi taꞌahuachina naporinsoꞌ

¹ Tapisoꞌ piyapinënpitarë chachin Oriposë motopiaꞌhua pomosotoontarin. Pomosotoontarahuatona amasha paasoiꞌ, Mihui-posi piyapinën Sipa itopisori nacapirin. Cato moraquë cato pasa pan quësarin. Pasa pan pochin nininsoꞌ opa ayanitopi quërantaꞌ, quësarin. Pasa chachin sharoꞌsa cayarinsoꞌ, aꞌnara shaꞌhuëtë morsaquë huino, inapitanta quësarin.

² Nacapirahuaton copirnori itapon: —¿Maꞌmarëta isopita quësaran? itërin. —Moraroꞌsasoꞌ, saꞌanpita, huiꞌnanpita, inapita yaꞌmitëatona pacacaiso marëꞌ quësarahuë. Pan, sharoꞌsa cayarinsoꞌ, inapitasoꞌ, sontaroꞌsari capacaisoꞌ. Huinoso nipirinhuëꞌ, inotëro paꞌtasëma yamoro yatapinantopisopitari oꞌocaisoꞌ, itërin Sipari.

³ —¿Saonocoꞌ shiin Mihui-posi poꞌ? itaantarin copirnori. —Inasoꞌ, Quirosarinquëranchin quëparitërin: “Iporacha tëhuënchinsoꞌ tata mashoco Saono pochin israiroꞌsa copirnonëna nicaꞌhuaso marëꞌ acoaponaco,” taꞌton yaꞌhuëárin, itërin.

⁴ —Noyapaꞌ. Yaꞌipi ina huaꞌanëntërinsoꞌ, iporaso quëmaquën nisarin, itërin copirnori. —Ipora tahuëri noya nicatonco catahuamiatëranco. ¡Maꞌcha ina pochachin catahuarárancohuë paya! itërin Sipari. Copirno noya nicaton monshoapon pochin napotërin.

⁵ Paorin ninano itopiquë Tapi canconin. Ina quëran pipiton aꞌnara Saonocoꞌ shiini chiníquën noꞌhuirin. Inasoꞌ, Cohuira huiꞌnin, Simii itopisoꞌ.

⁶ Aꞌpaipisopita sontaroꞌsaꞌ, sontaronënpita, inapita huáncana Tapisoꞌ paꞌsarin. Napopirinhuëꞌ, Simiisoꞌ noꞌhuitapon pochin naꞌpiraquë tëꞌyarárarin. Sontaro huaꞌanoꞌsantaꞌ, inapotëriarin.

⁷ Tëꞌyaratapon pochin: —¡Paquë paꞌsáquë matararo mashonquën!

⁸ Saonocoꞌ huiꞌninpita tiquirahuaton, ina yaꞌhuërënamën copirno yaꞌconan. Inapoaton co noyahuëꞌ ninanso marëꞌ Sinioro anaꞌintarinquën. Iporasoꞌ ina nohuanton Apësaron yaꞌhuërëtërinquën. Quëmaso matararonquën niꞌton, co noyahuëꞌ ninanso marëꞌ parisitaran, itërarin.

⁹ Naporoꞌ Sirohuia huaꞌhuin Apisai itopisori, copirno itapon: —Paso piyapi co máquënhuëꞌ. ¡Co ina pochin noꞌhuiinquënso yaꞌhuërinhuëꞌ! ¡Apiramiachin paꞌsahuato nishitëconochi! itërin.

¹⁰ —Coapo, Apisai, canpitaso Sirohuia huaꞌhuinpitanquëmaꞌ. Noꞌhuirincoso yatëpahuatamaꞌ, co noꞌtëquën yonquiramahuëꞌ. Inasoꞌ, co inaora nohuanton napotërincohuëꞌ, Siniorori camairin niꞌton, napotamarinco. Napoaton naporinso marëꞌ co naꞌininhuëꞌ, itërin.

¹¹ Napotahuaton Apisai, sontaro huaꞌanoꞌsaꞌ, inapita itapon: —Niꞌcoꞌ. Huiꞌnahuë chachin nipirinhuëꞌ, yatëparinco. Aquëtë huarëꞌ Mincamin huënton piyapisoꞌ tëpaincosonta yaꞌhuërin. ¡Tananpitoco noꞌhuiinco! Siniorori ina pochin camaimara.

¹² Ipora parisitërahuësoꞌ Sinioronta niꞌsarin. Tapona ipora ina noꞌhuirincoso marëꞌ, Sinioro yacatahuápirincohuëꞌ, itërin.

¹³ Napotohuachina paantapi. Tapisoꞌ yaꞌipi caꞌtaninsopitarë chachin ira paꞌtapi. Yaꞌhuërëꞌ Simiisoꞌ, Tapirë napopináchin panën nisha paꞌtarin. Noꞌhuipon pochin naꞌpiquë tëꞌyarárarin. Amocaonta masahuaton paꞌsárarin.

¹⁴ Paꞌsápatona Cortaniiquë camapi. Yaꞌipiya canotopi niꞌton, inaquë chinotopi.

Osairi Apësaron monarinsoꞌ

¹⁵ Napoasoi Apësaronsoꞌ, imarinsopitarë chachin Quirosarinquë nani yaꞌconpi. Aitohuirorintaꞌ, catahuaton imaquirin.

¹⁶ Yaꞌhuërëꞌ Osaisoꞌ, Apësaron nacapiapon paꞌnin. Ina paꞌyataton chiníquën nonin: —¡Ma inacha copirnoso paya! ¡Huaꞌqui tahuëri camaiinpoaꞌ! tënin.

¹⁷ Ina natanaton, Apësaroniso itapon: —Quëmarësoꞌ tata paꞌpi nipayarin topirahuë. Iporaso napoaponahuëꞌ, nisha cancantëran yaꞌnoran. ¿Onpoatonta co ina imaranhuëꞌ? itërin.

¹⁸ —Co nanitërahuëꞌ ina imacaꞌhuasoꞌ. Quëmasoꞌ, Sinioro chachin copirno nicamaso marëꞌ, huayoninquën. Yaꞌipi israiroꞌsanta nohuantërinquën. Napoaton cantaꞌ, quëma catahuararanquën huachi.

¹⁹ Naporahuaton Amiconëhuë huiꞌninquën. Napoaton, noya ancantato catahuararanquën. Tataparin catahuarahuëso pochachin quëmanta nitaranquën, itërin.

Aitohuirori Apësaron pënëninsoꞌ

^20-21 Ina quëran Apësaroni Aitohuiro natanin: ¿Maꞌta iporasoꞌ niahua huachi? itërin. Napotohuachina, inariso pënënin: —Insoari tëranta copirno saꞌinpita tëcarihuachina: “Copirno yaꞌhuërëtërin huachi,” tënëhuaꞌ. Napoaton tata cosonanënpita inapotëraꞌpiaquëꞌ. Inapitasoꞌ pëi aꞌpaicaiso marëꞌ patërin. Inapohuatan yaꞌipi israiroꞌsaꞌ: “Inaporin niꞌton, iporasoꞌ paꞌpini, tëhuënchachin co huachi quëꞌyaponhuëꞌ,” tosapi. Napoatona quëmasáchin cancantaponën huachi, itërin.

²² Napotohuachina, piyapinënpitari aꞌnara nëꞌmëtë pëi copirno pëi aipi otënpi. Nani ótënpachinara, inaquë yaꞌconaton paꞌpin saꞌinpita inapotëraꞌpiarin. Inaporinsoꞌ, yaꞌipi israiroꞌsa nitotopi.

²³ (Naporo tahuëriꞌsa Aitohuiro maꞌsona nicacaisoꞌ natanpanchinara, pënënin. Pënënpachin, Yosë shaꞌhuirinso pochachin nitopi. Ina pochin Aitohuiro natëpi. Tapirinta natërin. Apësaronta natërin.)